Sondela KuThixo
Uyazazi ‘Iintliziyo Zoonyana Boluntu’
NGUBANI ongakhe onganyelwe ziinzingo neengxaki zobomi? Maxa wambi, kunokubonakala ngathi akukho mntu uyiqondayo intlungu esikuyo. Kodwa, ukhona umntu oyiqondayo indlela esivakalelwa ngayo—nguYehova uThixo. Sinokuthuthuzelwa ngamazwi kaSolomon, akweyesi-2 yeziKronike 6:29, 30.
USolomon wayethandaza xa kwakunikezelwa itempile yaseYerusalem ngowe-1026 B.C.E. Kumthandazo ekusenokwenzeka ukuba wathabatha imizuzu elishumi, uSolomon uphakamisa uYehova njengoThixo onyanisekileyo, uMzalisekisi wezithembiso noMphulaphuli wemithandazo.—1 Kumkani 8:23-53; 2 Kronike 6:14-42.
USolomon ubongoza uThixo ukuba eve izikhungo zabanquli bakhe. (Vesi 29) Nangona uSolomon ethetha ngezinto ezininzi ezixhwalekisayo (kuvesi 28), uthi umnquli ngamnye uyasazi “isibetho sakhe nentlungu yakhe.” Omnye umntu usenokuba nenye intlungu ngoxa omnye enokuxhwalekiswa yenye into.
Enokuba banaziphi iintlungu, abantu aboyika uThixo akuyomfuneko ukuba bazithwale bodwa. Kulo mthandazo uSolomon wayecinga ngomnquli kaYehova ngamnye ‘owolula izandla zakhe’ ethandaza kuYehova ngokusuka entliziyweni.a Mhlawumbi uSolomon wakhumbula ukuba uyise uDavide xa wayebandezeleke kakhulu wathi: “Umthwalo wakho wulahlele kuYehova.”—INdumiso 55:4, 22.
Uya kusabela njani uYehova kwizibongozo zabantu abacela uncedo ngokunyanisekileyo? USolomon ubongoza uYehova ukuba: “Kwanga ungeva ukwindawo ohlala kuyo, emazulwini, kwaye umele uve uze uxolele.” (Vesi 30) USolomon uyazi ukuba “uMphulaphuli wemithandazo” ubakhathalele abanquli bakhe kungekuphela njengeqela kodwa njengabantu ngabanye. (INdumiso 65:2) UYehova uyasinceda, yaye uyamxolela umoni obuyela kuye ngentliziyo yakhe yonke.—2 Kronike 6:36-39.
Kutheni uSolomon eqinisekile ukuba uYehova uya kuziphendula izibongozo zomnquli wakhe oguqukileyo? Eqhubeka nomthandazo wakhe uSolomon uthi: “Ngenxa yokuba [Yehova] uyayazi intliziyo yakhe (kuba nguwe kuphela oyazi kakuhle intliziyo yabo bonke oonyana boluntu).” UYehova uyasazi isibetho okanye intlungu anayo umkhonzi wakhe ngamnye othembekileyo, yaye unomdla kuye.—INdumiso 37:4.
Umthandazo kaSolomon unokusithuthuzela. Abanye abantu basenokungaziqondi iimvakalelo zethu—‘izibetho zethu neentlungu zethu.’ (IMizekeliso 14:10) UYehova uyayazi intliziyo yethu yaye usikhathalele. Xa sizityanda igila kuye ngomthandazo siya kukwazi ukunyamezela. IBhayibhile ithi: “Liphoseni kuye lonke ixhala lenu, kuba unikhathalele.”—1 Petros 5:7.
[Umbhalo osemazantsi]
a Ngamaxesha okubhalwa kweBhayibhile, ‘izandla zazisolulwa,’ zize zijongiswe phezulu, xa kuthandazwa.—2 Kronike 6:13.