Indlela Esinokuhlala Sinyaniseke Ngayo Kweli Hlabathi Linganyanisekanga

UKUNGANYANISEKI kukho kuyo yonke indawo, kanye njengomoya esiwuphefumlayo. Abantu bayaxoka, bahlawulisa ngokugqithiseleyo, bayeba, abawahlawuli amatyala baze baqhayise besithi bayakwazi ukuqhuba ishishini. Xa siphila nabantu abanje, siye sivavanywe enoba sizimisele ukunyaniseka kusini na. Sinokuluxhathisa njani utyekelo lokunganyaniseki? Makhe sixubushe iingongoma ezintathu ezibalulekileyo neziya kusinceda senjenjalo. Kukoyika uYehova, isazela esilungileyo nokwaneliseka.

Ukoyika UYehova Ngendlela Efanelekileyo

Umprofeti uIsaya wabhala wathi: “UYehova nguMgwebi wethu, uYehova nguMmisi-mthetho wethu, uYehova nguKumkani wethu.” (Isa. 33:22) Ukugqala igunya analo uYehova kubangela ukuba simoyike—nto leyo esinika amandla okuxhathisa umoya wokunganyaniseki. IMizekeliso 16:6 ithi: “Ngokoyika uYehova ubani uyemka ebubini.” Uloyiko olunjalo aluthethi ukutyhwatyhwa sisoyika uThixo onochuku, kodwa luthetha ukuxhalabela ukungamkholisi uBawo wethu wasezulwini, oyikhathaleleyo impilo-ntle yethu.—1 Pet. 3:12.

Kukho amava abonisa iingenelo zaloo nkxalabo okanye uloyiko. URicardo nomfazi wakhe, uFernanda, batsala i-R4 900 kwiakhawunti yabo yebhanki.a UFernanda wasithi khatha eso sityhwentywe semali ebhegini yakhe engasibalanga nokusibala. Xa befika ekhaya emva kokuhlawula amanye amatyala, bothuswa kukufumana imali ephantse ilingane naleyo bebeyitsalile isesebhegini kaFernanda. “Kumele ukuba ela bhinqa lisebenza ebhankini lisinike imali engaphezulu,” bagqiba kwelo. Ekuqaleni, bahendeka ukuba bayigcine loo mali, kuba babenamatyala amaninzi ababengekawahlawuli. URicardo ucacisa athi: “Sathandaza sicela uYehova ukuba asinike amandla okubuyisela loo mali. Umnqweno wethu wokumkholisa ngokuvisisana nesibongozo sakhe esikwiMizekeliso 27:11 wasenza safuna ukuyibuyisela.”

Isazela Esiqeqeshwe NgeBhayibhile

Sinokuqeqesha isazela sethu ngokufunda iBhayibhile nangokulwela ukwenza oko sikufundayo. Ngaloo ndlela, ‘iLizwi likaThixo eliphilileyo nelinamandla,’ liya kufikelela kungekuphela iingqondo kodwa neentliziyo zethu. Oku kuya kusikhuthaza ukuba ‘sinqwenele ukuziphatha ngokunyaniseka kwizinto zonke.’—Heb. 4:12; 13:18.

Masenze umzekelo ngemeko kaJoão. Wazenzela ityala le-R35 000. Emva koko, engekalihlawuli elo tyala, wafudukela kwenye idolophu. Kwiminyaka esibhozo kamva, uJoão wafunda inyaniso, yaye isazela sakhe esiqeqeshwe ngeBhayibhile samkhuthaza ukuba aqhagamshelane nenkampani ayityalayo ukuze alihlawule elo tyala! Ngenxa yokuba uJoão kufuneka anyamekele umfazi nabantwana abane ngomvuzo nje ongephi, loo nkampani yamvumela ukuba ahlawule ngezavenge inyanga nenyanga.

Ukwaneliseka

Umpostile uPawulos wathi: “Uzinikelo lobuthixo kunye nokwanela, kuyinzuzo enkulu. . . . Ukuba sinesixhaso nesambatho, masaneliswe zezo zinto.” (1 Tim. 6:6-8) Ukusithatha nzulu esi siluleko kuya kusinceda siphephe ukubanjiswa ziindlela zokushishina ezibonisa ukubawa nezithandabuzekayo okanye amaqhinga okutyeba bumini angekho ngqiqweni. (IMize. 28:20) Ukulandela isiluleko sikaPawulos kuya kusinceda sibeke uBukumkani bukaThixo kuqala, siqinisekile ukuba siya kuxhaswa ngezinto ezisisiseko.—Mat. 6:25-34.

Noko ke, ngenxa ‘yamandla akhohlisayo obutyebi,’ masingaze siyijongele phantsi ingozi esinokuba kuyo xa sinikezela kukubawa nakwinkanuko. (Mat. 13:22) Khumbula okwenzeka kuAkan. Wazibonela ngawakhe amehlo amaSirayeli ewela ngokungummangaliso uMlambo iYordan. Sekunjalo, onganyelwe kukubawa, akazange awuxhathise umnqweno wokuba isilivere negolide nesambatho esinexabiso phakathi kwamaxhoba esixeko saseYeriko. Yambulalisa ke loo nto. (Yosh. 7:1, 20-26) Kungenxa yoko le nto kwiinkulungwane kamva, uYesu walumkisa wathi: “Gcinani amehlo enu evulekile nize nizilinde kulo lonke uhlobo lwenkanuko”!—Luka 12:15.

Nyaniseka Emsebenzini

Ngoku makhe sixubushe ezinye iimeko ezinokusivavanya enoba sizimisele kusini na ukuhlala sinyanisekile ezintweni zonke. Ukunyaniseka emsebenzini kuquka ‘ukungebi’—kwanokuba sekuyinto eqhelekileyo kwabanye. (Tito 2:9, 10) UJurandir, osebenza kwiziko laseburhulumenteni, wayenyaniseka xa echaza iindleko zokuhamba. Abanye abasebenzi babefuna imali engaphezu kwaleyo babeyichitha. Babekwazi ukuyenza loo nto kuba intloko yesebe yayibavumela ukuba banganyaniseki. Enyanisweni, kwaloo ntloko inye yamkhalimela uJurandir ngokunyaniseka yaza yayeka ukumthuma kuhambo loshishino. Noko ke, ethubeni, kwahlolwa ingxelo yemali yenkampani, yaye uJurandir wanconywa ngokunyaniseka kwakhe. Wanyuselwa nasemsebenzini.

UAndré, umthengisi, wayalelwa ngumqeshi wakhe ukuba ahlawulise abathengi kabini. Lo mzalwana wethu wacela inkalipho kuYehova ukuze anamathele kwimigaqo yeBhayibhile. (INdu. 145:18-20) Wazama nokucacisela umqeshi wakhe isizathu sokuba angamthobeli—kodwa watsho phantsi. Ngoko uAndré wagqiba kwelokuba awushiye umsebenzi wakhe ohlawula kakuhle. Noko ke, malunga nonyaka kamva, umqeshi wakhe wangaphambili wambiza kwakhona, emqinisekisa ukuba abathengi abasahlawuliswa mali ingaphezulu. UAndré wanyuselwa waba ngumphathi.

Hlawula Amatyala

Umpostile uPawulos wacebisa amaKristu esithi: “Musani ukuba natyala lanto nakubani na.”(Roma 13:8) Sisenokuzithethelela ngokungalihlawuli ityala, siziqhatha ngelithi umntu esimtyalayo unemali eninzi yaye akukho nto aza kuyenza ngaloo mali. Noko ke, iBhayibhile ilumkisa ithi: “Ongendawo uyaboleka angabuyisi.”—INdu. 37:21.

Noko ke, kuthekani ukuba ‘isihlo esingenakubonwa kwangaphambili’ sibangela ukuba singakwazi ukuhlawula ityala lethu? (INtshu. 9:11) UFrancisco waboleka i-R49 000 kuAlfredo ukuze ahlawule imali-mboleko yendlu. Kodwa ngenxa yeengxaki zeshishini lakhe, uFrancisco akazange akwazi ukuhlawula ityala lakhe ngexesha elimisiweyo. Waya kuAlfredo ukuze axubushe ngalo mbandela, yaye uAlfredo wavuma ukuhlawulwa ngezavenge.

Kuphephe Ukudlulisela Ingcamango Ephosakeleyo

Khumbula umzekelo ombi ka-Ananiyas noSafira, isibini esasikwibandla lamaKristu lenkulungwane yokuqala. Emva kokuthengisa intsimi, bazisa kubapostile inxalenye yemali ebithengiswe ngayo kuphela baza baxoka besithi iphelele loo mali. Babefuna ukubonakala ngathi banesisa ebantwini. Noko ke, umpostile uPetros, ephefumlelwe ngumoya oyingcwele kaThixo, wayibhenca inkohliso yabo yaye babulawa nguYehova.—IZe. 5:1-11.

Ngokwahlukileyo kuAnaniyas noSafira ababenganyanisekanga, ababhali beBhayibhile babengafihli nto yaye babenyanisekile. UMoses ngokunyaniseka wabhala ngokuba nomsindo kwakhe okwaphumela ekubeni angavunyelwa ukungena kwiLizwe Lesithembiso. (Num. 20:7-13) Ngokufanayo, uYona akazange azigubungele iimpazamo awazenza ngaphambi nasemva kokushumayela kubantu baseNinive. Kunoko, wazibhala phantsi.—Yona 1:1-3; 4:1-3.

Ngokuqinisekileyo, kufuneka inkalipho ukuze sithethe inyaniso, kwanokuba siza kulahlekelwa kokuthile, njengoko siza kubona koko kwenzeka esikolweni kuNathalia oneminyaka eli-14 ubudala. Wafunda iphepha lakhe leemviwo awayesandul’ ukuzibhala waza waphawula ukuba ezinye zeempendulo utitshala wakhe awayethe zichanile zazingachananga. Nangona wayesazi ukuba le nto yayiza kumchana kumanqaku ezifundo, uNathalia akazange alibazise ukuxelela utitshala wakhe. Wathi: “Abazali bam bebesoloko bendifundisa ukuba ukuze ndimkholise uYehova, kufuneka ndinyaniseke. Isazela sam besiya kunditya ukuba bendingamazisanga utitshala wam.” Utitshala wakuxabisa ukunyaniseka kukaNathalia.

Ukunyaniseka—Uphawu Oluzukisa UYehova

UGiselle, intwazana eneminyaka eli-17 ubudala, wachola isipaji esinamaxwebhu ne-R245. Ngoncedo lwabasemagunyeni esikolweni, walungiselela ukuba eso sipaji sibuyele kumniniso. Emva kwenyanga, isekela-nqununu lafundela iklasi yonke ileta ebulela uGiselle ngokunyaniseka kwakhe lincoma nentsapho yakowabo ngengqeqesho entle nokumkhulisela kwayo enkonzweni. ‘Imisebenzi yakhe emihle’ yamzukisa uYehova.—Mat. 5:14-16.

Kufuna umgudu ukunyaniseka uphila nabantu ‘abazithandayo, abathandi bemali, abazidlayo, abanekratshi nabanganyanisekanga.’ (2 Tim. 3:2) Kodwa ke, ukoyika uYehova ngendlela efanelekileyo, ukuba nesazela esiqeqeshwe ngeBhayibhile nokwaneliseka kusinceda sihlale sinyanisekile kweli hlabathi linganyanisekanga. Siya kuzenzela ubuhlobo obusenyongweni noYehova, ‘olilungisa nothanda izenzo zobulungisa.’—2 Tim. 3:2.

[Umbhalo osemazantsi]

[Imifanekiso ekwiphepha 7]

Ukoyika uYehova ngendlela efanelekileyo kusenza sizimisele ngakumbi ukunyaniseka

[Umfanekiso okwiphepha 8]

Xa siziphatha ngokunyaniseka siya kumzukisa uYehova