Ngaba Uyabubona Ubungqina Bokhokelo LukaThixo?
AMASIRAYELI kuquka namaYiputa ayeqala ukubona into enjengale. Njengoko amaSirayeli ayephuma eYiputa, kwakukho umqulu welifu owawundanda phezu kwawo nowawuqhubeka ukho imihla ngemihla. Ebusuku lo mqulu wawusiba ngumlilo. Kwakumangalisa ngokwenene oko! Kodwa wawuvela phi lo mqulu? Yayiyintoni injongo yawo? Ibe njengoko sele kudlule iminyaka emalunga nama-3 500, yintoni esinokuyifunda kwindlela amaSirayeli awayewujonga ngayo ‘umqulu womlilo nelifu’?—Eks. 14:24.
ILizwi likaThixo liyayichaza imvelaphi nenjongo yalo mqulu, lithi: “UYehova wahamba phambi kwabo emini ngomqulu welifu ukuba abakhokele endleleni, nangomqulu womlilo ebusuku ukuba abakhanyisele ukuze bahambe emini nasebusuku.” (Eks. 13:21, 22) UYehova uThixo wasebenzisa umqulu womlilo nelifu ukuze akhokele abantu bakhe xa babephuma eYiputa naxa babesentlango. Kwakufanele bahlale bekulungele ukuwulandela. Xa umkhosi wamaYiputa owawusukela abantu bakaThixo wawusele uza kubahlasela, umqulu wangena phakathi kwala maqela mabini, ukuze ukhusele amaSirayeli. (Eks. 14:19, 20) Nangona lo mqulu wawungawabonisi eyona ndlela ithe ngqo, ukulandela wona yayikuphela kwendlela esa amaSirayeli kwiLizwe Lesithembiso.
Ubukho bomqulu babuqinisekisa abantu bakaThixo ukuba uYehova unabo. Wawumela uYehova, yaye maxa wambi wayethetha ekuwo. (Num. 14:14; INdu. 99:7) Ukongezelela, ilifu lalingumqondiso wokuba uMoses umiselwe nguYehova ukukhokela uhlanga. (Eks. 33:9) Ngokufanayo, isihlandlo sokugqibela ekuthethwa ngaso ngelifu kuxa laliqinisekisa ukumisela kukaYehova uYoshuwa ukuba angene ezihlangwini zikaMoses. (Dut. 31:14, 15) Eneneni, ukuze iMfuduko yamaSirayeli ibe yephumelelayo kwakuxhomekeke ekubeni abone ubungqina bokuba uThixo uyawakhokela aze alandele ukhokelo lwakhe.
Ayengasabuboni Ubungqina
Xa amaSirayeli abona umqulu okwesihlandlo sokuqala, afanele ukuba athi khamnqa. Noko ke, okubuhlungu kukuba, loo mmangaliso awayesoloko ewubona awuzange wenze amaSirayeli ahlale enentembelo kuYehova. Alucel’ umngeni ukhokelo lukaYehova izihlandlo ezininzi. Xa ayesukelwa ngumkhosi wamaYiputa, akazange awathembe amandla kaYehova asindisayo. Kunoko, atyhola uMoses esithi wayeye kuwabulalisa. (Eks. 14:10-12) Emva kokuba ehlangulwe kuLwandle Olubomvu, ambombozelela uMoses, uAron noYehova ngenxa yokuba ayebona ngathi ukutya namanzi ayenqongophele. (Eks. 15:22-24; 16:1-3; 17:1-3, 7) Ibe emva kweeveki enze oko, anyanzela uAron ukuba awenzele ithole legolide. Khawufan’ ucinge! Kwelinye icala lenkampu yawo, amaSirayeli ayebona umqulu womlilo nelifu—ezazibubungqina obubalaseleyo baLowo owakhuphe eYiputa—yaye kude kufuphi nalapho, aqalisa ukunqula isithixo esingaphiliyo, esithi: “Nanko uThixo wakho, Sirayeli, okukhuphileyo ezweni laseYiputa.” Eso ‘yayisisenzo esikhulu sokungabi nantlonelo’!—Eks. 32:4; Neh. 9:18.
Imvukelo yamaSirayeli yayibonisa ukungalukhathaleli ukhokelo lukaYehova. Ayenengxaki kungekhona eyokubona ngokoqobo kodwa kwindlela awayezijonga ngayo izinto zokomoya. Ayewubona umqulu, kodwa ayengasayiqondi intsingiselo yawo. Nangona izenzo zawo ‘zazimenza buhlungu Lowo uyiNgcwele kaSirayeli,’ ngenceba uYehova waqhubeka ewakhokela esebenzisa umqulu de angena kwiLizwe Lesithembiso.—INdu. 78:40-42, 52-54; Neh. 9:19.
Bona Ubungqina Bokhokelo LukaThixo Namhlanje
Ngokufanayo kule mihla siphila kuyo, uYehova ebesoloko ebanika ukhokelo olucacileyo abantu bakhe. Kanye njengokuba wayengalindelanga ukuba amaSirayeli ahambe ngayibonayo, nathi namhlanje akalindelanga ukuba sihambe ngendlela esifuna ngayo ukuya kwihlabathi elitsha esilithenjisiweyo. UYesu Kristu uyiNkokeli yebandla emiselweyo. (Mat. 23:10; Efe. 5:23) Uye walunika igunya elithile udidi lwekhoboka elithembekileyo olubunjwa ngamaKristu athembekileyo athanjiswe ngomoya. Olo didi lwekhoboka nalo lumisela abaveleli ebandleni lamaKristu.—Mat. 24:45-47; Tito 1:5-9.
Sinokulwazi njani olu didi lwekhoboka okanye igosa elithembekileyo? Phawula indlela uYesu alichaza ngayo: “Ngubani ngokwenene elo gosa lithembekileyo, elo liyingqondi, inkosi yalo eya kulimisela phezu kweqela layo labalindi ukuhlala lilinika umlinganiselo walo wokutya ngexesha elifanelekileyo? Linoyolo elo khoboka, ukuba inkosi yalo ekufikeni ilifumana lisenjenjalo!”—Luka 12:42, 43.
Ngenxa yoko, udidi lwekhoboka ‘luthembekile,’ aluze lumngcatshe okanye lumshiye uYehova, uYesu, inyaniso yeBhayibhile okanye abantu bakaThixo. Ekubeni ‘luyingqondi,’ udidi lwekhoboka luwalathisa ngobulumko owona msebenzi ubalulekileyo wokushumayela ‘iindaba ezilungileyo zobukumkani’ yaye ‘lwenza abafundi abantu bazo zonke iintlanga.’ (Mat. 24:14; 28:19, 20) “Ngexesha elifanelekileyo,” udidi lwekhoboka ngentobelo lulungiselela ukutya kokomoya okunik’ impilo nokunesondlo. Isibakala sokuba uYehova uyakholiswa lulo, sibonakala kwindlela abasikelela ngayo ngolwando abantu bakhe, uyabakhokela ekwenzeni izigqibo ezibalulekileyo, ubanceda bayiqonde ngakumbi inyaniso yeBhayibhile, uyabakhusela bangatshatyaliswa ziintshaba zabo yaye ubanika uxolo lwengqondo.—Isa. 54:17; Fil. 4:7.
Yamkela Ukhokelo LukaThixo
Sinokubonisa njani ukuba siyaluxabisa ukhokelo lukaThixo? Umpostile uPawulos wathi: “Bathobeleni abo bakhokelayo phakathi kwenu nize nibalulamele.” (Heb. 13:17) Kusenokungasoloko kulula ukwenjenjalo. Ngokomzekelo: Khawuzifake ezihlangwini zomSirayeli ngomhla kaMoses. Masithi emva kokuba uhambe ixesha elide, umqulu uyema. Uza kuma ixesha elingakanani apho? Usuku? Iveki? Iinyanga eziliqela? Uyazibuza, ‘Ndiyikhuphe imithwalo yam engxoweni?’ Okokuqala, usenokukhupha nje izinto ezimbalwa eziyimfuneko. Kodwa, emva kweentsuku ezithile usenokucatshukiswa kukuguqulula izinto uzikhangela kule mithwalo uze uqalise ukukhupha yonke into. Kuthi kusenjalo, kanye xa ugqiba ukukhupha yonke into, ubona ilifu liphakama—ngoku kufuneka uphinde uqale phantsi ukupakisha! Imele ukuba lowo yayingumsebenzi omkhulu. Sekunjalo, amaSirayeli ayefanele ‘anduluke emva koko.’—Num. 9:17-22.
Ngoko ke, sisabela njani xa sifumana ulwalathiso oluvela kuThixo? Ngaba siye sizame ukulusebenzisa ‘emva koko’? Okanye ngaba siye senze izinto kanye ngendlela ebesiqhele ukwenza ngayo? Ngaba sisebenzisa ulwalathiso lwakutshanje kwimiba ephathelele ukuqhuba izifundo zeBhayibhile, ukushumayela kubantu abathetha ulwimi lwasemzini, ukuqhuba unqulo lwentsapho rhoqo, ukusebenzisana neKomiti Yokunxibelelana Nezibhedlele yaye ngaba siziphatha ngendlela efanelekileyo kwiindibano? Sibonisa ukuba noxabiso ngokhokelo lukaThixo naxa sisamkela isiluleko. Xa kufuneka senze izigqibo ezibalulekileyo, asithembeli kubulumko bethu kodwa sifuna ukhokelo lukaYehova nentlangano yakhe. Kanye njengomntwana ofuna ukukhuselwa ngabazali bakhe xa kukho isaqhwithi, sifuna ukhokelo lwentlangano kaYehova xa iingxaki zeli hlabathi zisiza ziyimvula.
Kakade ke, abo bakhokelayo kwinxalenye esemhlabeni yentlangano kaThixo abafezekanga—kodwa noMoses wayengafezekanga. Sekunjalo, umqulu wawububungqina bokuba umiselwe nguThixo yaye uyakholiswa nguye. Phawula nokuba, umSirayeli ngamnye wayengazigqibeli ukuba makanduluke nini. Kunoko, abantu babesenza “ngokomyalelo kaYehova ngoMoses.” (Num. 9:23) Ngenxa yoko, kusenokwenzeka ukuba, uMoses owayesetyenziswa nguThixo ukunikela ukhokelo, wayesenza umqondiso othile obonisa ukuba kufuneka kundulukwe.
Namhlanje, udidi lwegosa likaYehova lunikela umqondiso ocacileyo nanini na ilixesha lokuba kuthatyathwe inyathelo elithile. Likwenza njani oko eli gosa? Lisebenzisa amanqaku akwiMboniselo nakuBulungiseleli Bethu BoBukumkani, iimpapasho ezintsha neentetho esizifumana kwiindibano. Kwakhona imiyalelo iye idluliselwe emabandleni ngabaveleli abahambahambayo okanye ngeeleta okanye ngoqeqesho olunikwa abazalwana abaneembopheleleko ebandleni.
Ngaba ububona ngokucacileyo ubungqina bokuba uThixo uyakhokela? UYehova usebenzisa intlangano yakhe ukukhokela abantu bakhe kule “ntlango” yemihla yokugqibela elihlabathi likaSathana elingendawo. Ngenxa yoko, sinandipha umanyano, uthando nonqabiseko.
Ekufikeni kwamaSirayeli kwiLizwe Lesithembiso, uYoshuwa wathi: “Niyazi kakuhle ngeentliziyo zenu zonke nangemiphefumlo yenu yonke ukuba akusilelanga nalinye ilizwi kuwo onke amazwi alungileyo uYehova uThixo wenu awathethileyo kuni. Onke abe yinyaniso kuni.” (Yosh. 23:14) Ngokufanayo, abantu bakaThixo namhlanje ngokuqinisekileyo baya kufika kwihlabathi elitsha elithenjisiweyo. Noko ke, into yokuba ngamnye kuthi uya kungena kusini na kulo, ixhomekeke ekuzithobeni kwakhe ngokuzithandela kukhokelo lukaThixo. Ngoko ke, ngamana sonke singahlala sibubona ubungqina bokhokelo lukaYehova!
[Imifanekiso ekwiphepha 5]
Namhlanje sikhokelwa yintlangano kaYehova
Izinto ezikhululwa kwiindibano
Izikolo zobuthixo
Ingqeqesho efumaneka kwiintlanganiso zenkonzo