Isiprofeto 6 Umsebenzi Wokushumayela Ehlabathini Jikelele
“Ezi ndaba zilungileyo zobukumkani ziya kushunyayelwa kuwo wonke umhlaba omiweyo.”—MATEYU 24:14.
● UVaiatea uhlala kwisiqithi esisemagqagaleni sePasifiki eTuamotu Archipelago. Nangona iTuamotu ineziqithi zekorale ezingama-80 kummandla oziskwe khilomitha ezingama-802 900, kuzo kuhlala abantu abamalunga ne-16 000 kuphela. UVaiatea nabamelwane bakhe baye bashunyayezwa ngamaNgqina kaYehova. Kutheni? Kaloku amaNgqina kaYehova afuna ukwabelana nabantu ngeendaba ezilungileyo ezingoBukumkani bukaThixo—kungakhathaliseki ukuba bahlala phi.
ZIBONISA NTONI IZIGANEKO? Isigidimi soBukumkani sifikelela mbombo zone zomhlaba. Ngowama-2010 kuphela amaNgqina kaYehova aye achitha iiyure ezingaphezu kwebhiliyoni e-1.6 evakalisa iindaba ezilungileyo kumazwe angama-236. Lowo ngumlinganiselo wemizuzu engama-30 ngosuku kwiNgqina ngalinye. Kule minyaka ilishumi edluleyo, amaNgqina aye avelisa aze asasaza uncwadi olufundisa iBhayibhile olungaphezu kweebhiliyoni ezingama-20.
BADLA NGOKUTHINI ABANTU? Bekusoloko kushunyayelwa isigidimi seBhayibhile kangangeminyaka.
NGABA BANYANISILE? Enyanisweni, baninzi abantu abaye bashumayela ngezinto ezithile eziseBhayibhileni. Noko ke, inkoliso yabo bantu ibidla ngokushumayela ixesha elifutshane kubantu abambalwa. Ngokwahlukileyo koko, amaNgqina kaYehova athe bhakada kwiphulo lokushumayela ehlabathini jikelele kumakhulu ezigidi zabantu. AmaNgqina aye azingisa kumsebenzi wawo wokushumayela nangona eye achaswa ngawona maqela anamandla nakhohlakeleyo kwimbali yabantu.a (Marko 13:13) Kanti ke, amaNgqina kaYehova awahlawulwa xa esenza lo msebenzi. Kunoko anikela ngexesha lawo ngokuzithandela yaye iincwadi zawo awazithengisi. Lo msebenzi uxhaswa ngeminikelo yokuzithandela.
UTHINI WENA? Ngaba “ezi ndaba zilungileyo zobukumkani” zishunyayelwa ehlabathini jikelele? Ngaba ukuzaliseka kwesi siprofeto kuthetha ukuba kuza amaxesha alungileyo?
[Umbhalo osemazantsi]
a Ukuze ufumane ingcombolo engakumbi, bukela ezi vidiyo zintathu zithi “Faithful Under Trials,” “Purple Triangles,” nethi “Jehovah’s Witnesses Stand Firm Against Nazi Assault,” ezenziwe ngamaNgqina kaYehova.
[Amagama acatshulweyo akwiphepha 9]
“Logama uYehova esavuma, siya kuqhubeka sishumayela iindaba ezilungileyo zoBukumkani ngenkuthalo, sisebenzisa zonke iindlela ukufikelela abantu.”—INCWADI YONYAKA YAMANGQINA KAYEHOVA YOWAMA-2010.