Ubomi Ngamaxesha Okubhalwa KweBhayibhile—Imali

“Wahlala phantsi ekhangelene nezikhongozelo zobuncwane waza wabona indlela isihlwele esasiphosa ngayo imali kwizikhongozelo zobuncwane; kwaye izityebi ezininzi zaziphosa iingqekembe ezininzi. Kweza umhlolokazi olihlwempu waphosa iingqekembe ezimbini ezincinane, ezinexabiso elincinane kakhulu.”—MARKO 12:41, 42.

KUSOLOKO kuthethwa ngemali eBhayibhileni. Ngokomzekelo njengoko ufunda kwingxelo yeencwadi zeVangeli, uYesu wasebenzisa iingqekembe ezahlukeneyo ukuze afundise abantu imigaqo ebalulekileyo. Wafundisa isifundo esebenzisa umnikelo womhlolokazi “weengqekembe ezimbini ezincinane,” ekubhekiselwa kuzo kule vesi icatshulwe ngasentla. Kwesinye isihlandlo, wabhekisela kwingqekembe ebizwa ngokuba yidenariyo ukuze ancede abalandeli bakhe baqonde indlela abafanele babajonge ngayo abasemagunyeni.a—Mateyu 22:17-21.

Yenzelwa ntoni imali? Yayisenziwa njani ngamaxesha okubhalwa kweBhayibhile? Yayisetyenziswa njani? Yaye sifunda ntoni eBhayibhileni ngendlela esifanele siyijonge ngayo?

Ukusuka Ekutshintshiselaneni Ukuya Kumatye Axabisekileyo

Ngaphambi kokuba kwenziwe imali, abantu baberhweba besebenzisa inkqubo yokutshintshiselana ngezinto. Babetshintshiselana ngezinto ezinexabiso elilinganayo. Kodwa ke inkqubo yokutshintshiselana yayingasoloko isebenza kakuhle. Ukuze le nkqubo isebenze kakuhle, kwakufuneka bobabini abo batshintshiselanayo bazifune izinto abatshintshiselana ngazo. Ukongezelela koko, abarhwebi kwakufuneka besoloko behamba nezinto abarhweba ngazo njengezilwanyana okanye iingxowa zokutya.

Ekugqibeleni abarhwebi babona ukuba kwakufuneka into ababeza kuyisebenzisa ukuthenga nokuthengisa imveliso yabo. Le ngxaki yaconjululwa ngokuba kusetyenziswe amatye anqabileyo anjengegolide isilivere nobhedu. Kumfanekiso okweli nqaku, ubona umrhwebi esebenzisa amatye exabiso ekwenziwe ngawo izacholo nezitena ukuze athenge impahla. Loo matye ayelinganiswa ngobunono ezikalini ngaphambi kokuba kutshintshiselwane. Ngokomzekelo, uAbraham wathenga inxiwa lokungcwaba umfazi wakhe uSara, wabeka isilivere awayeza kuthenga ngayo esikalini.—Genesis 23:14-16.

Mayela nelo xesha uYehova wanika amaSirayeli uMthetho obhaliweyo, abarhwebi ababawayo babesebenzisa izikali namatye okulinganisa angachananga ukuze baqhathe abathengi. UYehova uyakwenyanya ukunganyaniseki wayalela abarhwebi bakwaSirayeli ukuba: “Nifanele nibe nezikali ezichanileyo, amatye okulinganisa achanileyo.” (Levitikus 19:36; IMizekeliso 11:1) Namhlanje, abo bathengisa izinto bafanele bakhumbule ukuba indlela uYehova akujonga ngayo ukubawa nokunyaniseki ayitshintshanga.—Malaki 3:6; 1 Korinte 6:9, 10.

Indlela Ezazisenziwa Ngayo Iingqekembe Ekuqaleni

Iingqekembe zokuqala zazisenziwa eLidiya (ilizwe elibizwa ngokuba yiTurkey namhlanje), ngaphambi nje kowama-700 B.C.E. Abakhandi kumazwe awahlukeneyo baqalisa ukuzivelisa iingqekembe ngobuninzi yaye abantu kuwo onke amazwe akhankanywe eBhayibhileni baqalisa ukuzisebenzisa.

Zazisenziwa njani ezi ngqekembe? Umkhandi wayedla ngokuthabatha ilitye elinyityilikisiweyo (1) aze eso sidudu asigalele kwifolomo siphume siziingqekembe ezingenamfanekiso (2). Ezi ngqekembe wayezithatha azifake phakathi kweentsimbi ezimbini ekukrolwe kuzo imizobo okanye imifanekiso (3). Aze abethe intsimbi engaphezulu ngesando ukuze umfanekiso okrolwe kuyo uphumele kwingqekembe (4). Ngenxa yokugxabhagxabhisa zazidla ngokungaphumi kakuhle. Emva koko zazihlelwa, zize zibekwe esikalini kuze kuqinisekwe ukuba ziyalingana xa kuyimfuneko zaziphinda zincwelwe (5).

Abatshintshi Bemali, Ababuthi Berhafu Nabagcini-mali

Ngenkulungwane yokuqala Yexesha Eliqhelekileyo, iingqekembe zamazwe ngamazwe kwakudla ngokuyiwa nazo ePalestina. Ngokomzekelo, abantu abaya eYerusalem babedla ngokuza neengqekembe zamazwe abo. Noko ke, abo babenyamekela itempile irhafu yetempile babeyithatha kuphela xa ihlawulwa ngeengqekembe ezithile. Abatshintshi bemali baqalisa ukurhweba etempileni yaye babedla ngokubahlawulisa imali eninzi xa bebatshintshela iingqekembe zabo. UYesu wawakhalimela loo madoda anyolukileyo. Kwakutheni? Kaloku indlu kaYehova babeyenza “indlu yokurhweba” ‘nomqolomba wabaphangi.’—Yohane 2:13-16; Mateyu 21:12, 13.

Abantu basePalestina kwakufuneka bahlawule iirhafu nakwezinye izinto. Enye ‘yayiyirhafu yentloko’ abambuza ngayo abachasi bakhe uYesu. (Mateyu 22:17) Ezinye iirhafu ekwakufuneka bazihlawule yayiyirhafu yendlela izinto ezivela kwamanye amazwe nezithunyelwayo. Abaqokeleli berhafu basePalestina babengathandwa ngenxa yokunganyaniseki yaye babedelelwa ngabantu. (Marko 2:16) Abaqokeleli berhafu babedla ngokwenza intywenka yemali ngokurhafisa imali engakumbi baze enye bayithobe ngomlenze. Noko ke, abanye abaqokeleli berhafu abanjengoZakeyu, basabela kwisigidimi sikaYesu baza bahlukana nalo mkhwa wokunganyaniseki. (Luka 19:1-10) Namhlanje nabani na ofuna ukulandela uKristu kufuneka anyaniseke kwizinto zonke, kuquka nakumashishini abo.—Hebhere 13:18.

Elinye iqela elalisebenza ngemali yayingoonobhanki. Ukongezelela ekutshintshiseni ngemali, bayila iindlela zokugcina imali, ukubolekisa ngayo baze babanike inzala abo bagcina imali yabo ezibhankini. UYesu wayebhekisela kwaba nobhanki kumzekeliso wakhe wamakhoboka awanikwa imali engalinganiyo ukuba arhwebe ngayo.—Mateyu 25:26, 27.

Imbono Efanelekileyo Ngemali

Kwinkoliso yamazwe namhlanje abantu bamele basebenzise imali xa befuna ukuthenga. La mazwi uKumkani uSolomon aphefumlelwa ukuba awabhale aseyinyani nanamhlanje: ‘Imali iyakhusela.’ Kodwa uSolomon wathi ubulumko buxabiseke ngakumbi kunemali kuba “bubagcina bephila abo banabo.” (INtshumayeli 7:12) Obo bulumko bufumaneka eBhayibhileni.

UYesu wanceda abalandeli bakhe banembono efanelekileyo ngemali xa wathi: “Kwanaxa umntu enentabalala ubomi bakhe abuphumi kwizinto anazo.” (Luka 12:15) Njengabafundi bakaYesu benkulungwane yokuqala, sibonisa ubulumko xa siyisebenzisa kakuhle imali sinyaniseke size sizame ukungayithandi.—1 Timoti 6:9, 10.

[Umbhalo osemazantsi]

[Ibhokisi/Imifanekiso ekwiphepha 26]

Inkcazelo Ngeengqekembe

● Enye yezona ngqekembe zincinane ezazisetyenziswa ePalestina ngenkulungwane yokuqala yicopper lepton, okanye imite. Umsebenzi wayehlawulwa iilepta ezimbini xa esebenze imizuzu eli-15. Umele ukuba umhlolokazi wayenikele ngeelepta ezimbini.—Marko 12:42.

● Idrarhma yesilivere yayiyingqekembe yamaGrike owawuphantse usebenze imini yonke ukuze uhlawulwe ngayo. (Luka 15:8, 9) Onke amadoda amaYuda ayehlawula irhafu yeedrarhma ezimbini nyaka ngamnye etempileni.—Mateyu 17:24.

● Idenariyo yesilivere yayiyingqekembe yamaRoma eyayinomfanekiso kaKesare, kwakuhlawulwa ngayo “umnikelo” yiyo yonke indoda engumYuda ngexesha lamaRoma. (Roma 13:7) Umqeshi wayehlawula umsebenzi wakhe idenariyo enye xa esebenze iiyure ezili-12.—Mateyu 20:2-14.

● Ishekele yesilivere yaseTire nayo yayisetyenziswa ePalestina xa uYesu wayelapha emhlabeni. “Amaqhosha esilivere” angama-30 umbingeleli omkhulu awahlawula uYudas Skariyoti ngokungcatsha uYesu amele ukuba ayezishekele zaseTire.—Mateyu 26:14-16.

Ezi ngqekembe ziboniswe ngokobukhulu bazo