Ngaba Ubusazi?
Zazixabisa malini iingqekembe ezimbini zomhlolokazi?
Ngenkulungwane yokuqala yeXesha Eliqhelekileyo irhafu yonyaka yetempile yayilingana ‘needrarhma ezimbini’ ezilingana nomvuzo weentsuku ezimbini. (Mateyu 17:24) Ngokuchasene noko uYesu wathi oongqatyana ababini “abathengiswa ngengqekembe exabiso lincinane” ezilingana nomvuzo wemizuzu engama-45. Oongqatyana abahlanu babenokufumaneka ngomvuzo wemizuzu engama-90.—Mateyu 10:29; Luka 12:6.
Umnikelo wetempile womhlolokazi ongathath’ intweni owayebukelwe nguYesu wawungaphantsi kunoko. Ezi ngqekembe zimbini, okanye iilepta ezimbini, yayizezona zazinexabiso elincinane kwezazisetyenziswa ngamaSirayeli ngeloo xesha. Zazingaphantsi komvuzo wemizuzu eli-12 xa ibalwa ngomlinganiselo womvuzo weeyure ezili-12.
UYesu Kristu wasixabisa kakhulu isipho salo mhlolokazi njengesona sikhulu kunezabo bonke abo babenikela ‘ngokuphuma kwintsalela yabo.’ Kwakutheni ukuze uYesu asixabise ngakumbi isipho somhlolokazi? Ingxelo ikhankanya ukuba ‘wayeneengqekembe ezincinane ezimbini,’ wayenokunikela ngenye aze azigcinele enye. Kunoko, ‘waphosa konke abenako, ukuphila kwakhe kuphela.’—Marko 12:41-44; Luka 21:2-4.
Waqala nini uSawule ukuba nguPawulos?
Umpostile uPawulos wazalwa engumHebhere engummi waseRoma. (IZenzo 22:27, 28; Filipi 3:5) Ngoko ke, kusenokwenzeka ukuba ukususela ebuntwaneni wayenamagama amabini elesiHebhere elinguSawule nelesiRoma elinguPawulos. Ezinye izalamane zikaPawulos ngokufanayo zazinamagama esiRoma nawesiGrike. (Roma 16:7, 21) Ukongezelela, yayiyinto eqhelekileyo ngamaYuda elo xesha ngokukodwa lawo awayehlala ngaphandle kwemida yakwaSirayeli ukuba namagama amabini.—IZenzo 12:12; 13:1.
Ngaphezu kweminyaka elishumi emva kokuba engumKristu lo mpostile wayesaziwa ngegama lakhe lesiHebhere elinguSawule. (IZenzo 13:1, 2) Noko ke, kuhambo lwakhe lokuqala lobuvangeli malunga nowama-47/48 C.E. wakhetha ukuba kusetyenziswe igama lakhe lesiRoma elinguPawulos. Wayalelwa ukuba aye kushumayela iindaba ezilungileyo kubantu ababengengomaYuda yaye kunokwenzeka ukuba wavakalelwa ukuba igama lakhe lesiRoma laliza kwamkelwa. (IZenzo 9:15; 13:9; Galati 2:7, 8) Kwakhona wayesenokusebenzisa igama elithi Pawulos ngenxa yokuba indlela elibizwa ngayo igama elithi Sawule ngesiGrike inentsingiselo engathandekiyo. Kungakhathaliseki ukuba sasiyintoni isizathu sokutshintshwa kwalo, uPawulos wabonisa ukuba wayekulungele ukuba ‘zizinto zonke kubantu bazo zonke iintlobo, ukuze ngandlela zonke asindise abathile.’—1 Korinte 9:22.
[Umfanekiso okwiphepha 12]
Ilepton, ubukhulu bayo bokwenene