Ngaba Ngokwenene Uyayoliswa LiLizwi LikaThixo?

ULORRAINE uthi: “Xa ndaqalisa ukufunda iBhayibhile rhoqo, ndandikufumanisa kuluxanduva kunokuba kundiyolise. Kwakunzima ukuyiqonda ibe ngenxa yoko ingqondo yam yayidla ngokubhadula.”

Nabanye bayavuma ukuba ekuqaleni babengakunandiphi ukufunda iBhayibhile. Sekunjalo, baqhubeka bezifunda iZibhalo Ezingcwele kuba besazi ukuba ukwenjenjalo kufanelekile. UMarc uthi: “Kulula ukuvumela izinto zikuphazamise ekufundeni iBhayibhile nasekwenzeni isifundo sobuqu. Kwakufuneka ndizingise ukuthandaza ndize ndenze umgudu ukuze ukufunda iBhayibhile rhoqo kube yinxalenye yobomi bam.”

Yintoni onokuyenza ukuze ube noxabiso olungakumbi ngeLizwi likaThixo elibhaliweyo, iBhayibhile? Unokwenza njani ukuze ukunandiphe ukuyifunda? Phawula la macebiso alandelayo.

Ukuzibekela Usukelo Nendlela Yokulufikelela

Thandaza ngaphambi kokuba ufunde iBhayibhile ukuze ukwazi ukunikel’ ingqalelo. Cela uYehova akuncede ube nomdla wokufunda iLizwi lakhe. Mbongoze ukuba avule ingqondo nentliziyo yakho ukuze ubuqonde ngakumbi ubulumko bakhe. (INdu. 119:34) Ukuba akwenjinjalo, uya kuba udlulisela nje usana kunina xa ufunda iBhayibhile yaye usenokuphelelwa nangumdla wokuqhubeka uyifunda. ULynn uthi: “Maxa wambi ndiye ndifunde ngokukhawuleza ndize ndingaziboni iingongoma ezibangel’ umdla. Ndidla ngokungaziqondi iingongoma eziziintloko. Noko ke, ndiye ndithandazele ukuzeyisa yaye oku kuye kundincede ukuze ingqondo yam ingabhaduli.”

Kuxabise oko ukufundayo. Khumbula ukuba ukuqonda nokusebenzisa inyaniso yeBhayibhile kuthetha ubomi kuwe. Ngoko ke, yenza umgudu onyanisekileyo wokufumana iingongoma eziluncedo uze uzisebenzise. UChris uthi: “Ndiye ndikhangele izinto ezindinceda ndibone amakhwiniba kwisimo sengqondo neenjongo zam. Kuyandihlaziya ukubona indlela endinceda ngayo inkcazelo eseBhayibhileni nakwiimpapasho zethu ezininzi, nangona ababhali bazo bengandazi nokundazi.”

Zibekele usukelo onokulufikelela. Zama ukufunda into entsha ngabantu ekuthethwa ngabo eBhayibhileni. Unokufunda izinto ezininzi ezibangel’ umdla ngabo kwi-Insight on the Scriptures okanye uphande kwiWatch Tower Publications Index. Njengoko uya ujonga la madoda namabhinqa ekuthethwe ngawo eBhayibhileni njengabantu bokwenene nabaneemvakalelo, umzekelo wabo uya kuba nempembelelo kuwe.

Khangela iindlela ezintsha zokuqiqa ngeZibhalo. (IZe. 17:2, 3) USophia ufunda ecinga ngaloo nto. Uthi: “Umnqweno wam kukufunda iindlela ezintsha zokuqiqa nabantu entsimini nangezinye izihlandlo ukuze ndikwazi ukuyicacisa kakuhle inyaniso yeBhayibhile. IMboniselo iluncedo gqitha kule nkalo.”—2 Tim. 2:15.

Zenzele umfanekiso-ngqondweni weengxelo eziseBhayibhileni. EyamaHebhere 4:12 ithi: “Ilizwi likaThixo liphilile.” Njengoko ufunda iZibhalo, vumela isigidimi sikaThixo siphile engqondweni yakho ngokuzenzela umfanekiso-ngqondweni wezinto ezazibonwa ngabantu ekuthethwa ngabo eBhayibhileni. Zama ukuva izinto ababeziva uze uvakalelwe ngendlela ababevakalelwa ngayo. Nxulumanisa izinto ezabehlelayo neemeko ezithile ebomini bakho. Funda kwindlela abazisingatha ngayo iingxaki. Oku kuya kukwenza uziqonde ngakumbi iingxelo zeBhayibhile uze ungazilibali.

Zibekele ixesha lokuqwalasela izibhalo ezinzima nengcaciso yazo ukuze uziqonde ngokucacileyo. Ziphe ixesha elininzi sihlandlo ngasinye ufunda. Usenokuba nemibuzo ebangel’ umdla efuna ukuba wenze uphando olongezelelekileyo. Hlola amagama ongawaqhelanga, qwalasela imibhalo esemazantsi neembekiselo zeBhayibhile eziseludinini. Ukuba uyakuqonda yaye uyakusebenzisa oko ukufundayo, uya kuyoliswa ngakumbi liLizwi likaThixo elibhaliweyo. Uya kukwazi ukuthetha la mazwi awathethwa ngumdumisi: “Ndizidle ilifa izikhumbuzo zakho [Yehova] ukusa kwixesha elingenammiselo, kuba zikukugcoba kwentliziyo yam.”—INdu. 119:111.

Kuphephe ukufunda ngokungxama. Zibekele ixesha elisengqiqweni lokwenza isifundo sobuqu. Kodwa musa ukulibala ukulungiselela iintlanganiso zebandla. URaquel uthi: “Amaxesha amaninzi ndiye ndizive ndixinezekile kangangokuba ndingakwazi ukunikel’ ingqalelo. Ngoko ndiye ndikufamanise kuyingenelo ukufunda ixesha elifutshane. Oku kundinceda ndingenelwe ngakumbi kwisifundo sam.” UChris uthi: “Xa ndifunda ngokungxama, isazela sam siye sindikhathaze kuba andingenelwa kangako. Ngokuqhelekileyo oko ndikufundayo kuye kungayifikeleli intliziyo yam.” Ngoko ke, ziphe ixesha elaneleyo lokufunda.

Lilangazelele ngakumbi ilizwi likaThixo. Umpostile uPetros wathi: “Njengeentsana ezisandul’ ukuzalwa, langazelelani ubisi olungangxengwanga lwelizwi, ukuze ngalo nikhulele elusindisweni.” (1 Pet. 2:2) Akukho mfuneko yokuba iintsana zenze umgudu ukuze zilangazelele ubisi. Ngokuzenzekelayo ziyalulangazelela. Kodwa iZibhalo ziyavuma ukuba sifanele sizame ukulangazelela ilizwi likaThixo. Ukuba ufunda iphepha nje elinye leBhayibhile suku ngalunye, ngexesha elingephi uya kuba sele uyilangazelela. Into ebisenokubonakala inzima ekuqaleni kungekudala iya kukuvuyisa ngakumbi.

Camngca ngeendinyana zeZibhalo. Xa ucamngca ngoko ukufundayo ufumana iingenelo ezingakumbi. Oku kuya kukunceda unxulumanise imibandela yokomoya oye waphanda ngayo. Kungekudala uya kuba nobulumko—eyona nto iyolisayo.—INdu. 19:14; IMize. 3:3.

Ixesha Elisetyenziswe Kakuhle

Ukuhlala unemikhwa emihle yokufunda kufuna umgudu, kodwa zona iintsikelelo azinakulinganiswa nanto. Indlela oziqonda ngayo iZibhalo iya kuphucuka. (Heb. 5:12-14) Ukuqonda nobulumko obufumana kwiZibhalo eziphefumlelweyo zibangela uvuyo noxolo. Ubulumko obufumaneka kwiLizwi likaThixo eliphefumlelweyo “bungumthi wobomi” kwabo babusebenzisayo.—IMize. 3:13-18.

Ukufunda iLizwi likaThixo ngenyameko kunokubangela ukuba ube nentliziyo enokuqonda. (IMize. 15:14) Oko kuya kukunceda ukwazi ukunikela isiluleko esisekelwe eBhayibhileni. Ukuba uvumela ukuba izigqibo zakho zikhokelwe koko ukufunda eZibhalweni nakwiimpapasho ‘zekhoboka elithembekileyo neliyingqondi,’ iLizwi likaYehova liya kukuhlaziya lize likomeleze. (Mat. 24:45) Uya kuhlala unesimo sengqondo esakhayo, unethemba ngekamva yaye zonke izinto ozenzayo ziya kuphenjelelwa liLizwi likaYehova. Ngaphezu koko, yonke into echaphazela ulwalamano lwakho noThixo iya kuphumelela.—INdu. 1:2, 3.

Ukuba uThixo umthanda ngentliziyo yakho yonke uya kuxelela abanye ngezinto ozikholelwayo. Nako oku kunokuba nomvuzo gqitha. USophia uzabalazela ukukhumbula nokusebenzisa iZibhalo ezahlukahlukeneyo ukuze athimbe ingqalelo yomninimzi nokuze ubulungiseleli bakhe buphumelele buze buvuyise. Uthi: “Kuyavuyisa ukubona indlela abantu abasabela ngayo xa besiva oko kuthethwa yiBhayibhile.”

Noko ke, eyona ndlela ibalaseleyo sinokungenelwa ngayo xa siyoliswa liLizwi likaThixo, kukuba nolwalamano olusondeleyo noYehova. Ufundo lweBhayibhile lukunceda uyazi imilinganiselo yakhe uze uqonde ukuba unothando, unesisa nokusesikweni. Ayikho into ebaluleke nenomvuzo ngaphezu kwale. Zibhokoxe ekufundeni iLizwi likaThixo. Xa usenjenjalo uya kuba ulisebenzisa kakuhle ixesha lakho.—INdu. 19:7-11.

[Ibhokisi/Imifanekiso ekwiphepha 5]

UKUFUNDA ILIZWI LIKATHIXO: UKUZIBEKELA USUKELO NENDLELA YOKULUFIKELELA

▪ Thandaza ngaphambi kokuba ufunde iBhayibhile ukuze ukwazi ukunikel’ ingqalelo.

▪ Kuxabise oko ukufundayo.

▪ Zibekele usukelo onokulufikelela.

▪ Khangela iindlela ezintsha zokuqiqa ngeZibhalo.

▪ Zenzele umfanekiso-ngqondweni weengxelo eziseBhayibhileni.

▪ Zibekele ixesha lokuqwalasela iZibhalo ezinzima nengcaciso yazo ukuze uziqonde ngokucacileyo.

▪ Kuphephe ukufunda ngokungxama.

▪ Lilangazelele ngakumbi ilizwi lika-Thixo.

▪ Camngca ngeendinyana zeZibhalo.

[Umfanekiso okwiphepha 4]

Xa ufunda ingxelo yeBhayibhile, yiba nomfanekiso-ngqondweni wakho ukwimeko efanayo