‘Umveleli Nomhlobo Othandekayo’

UJOHN (JACK) BARR, owayelilungu leQumrhu Elilawulayo lamaNgqina kaYehova, ugqibe ikhondo lakhe lasemhlabeni ngentsasa yangoMgqibelo, ngoDisemba 4, 2010. Ebeneminyaka engama-97 ubudala. Ebesoloko echazwa “njengomveleli nomhlobo othandekayo.”

UMzalwan’ uJack Barr wazalelwa eAberdeen, eSkotlani, engoyena mncinane kubantwana abathathu. Abazali bakhe bobabini babethanjisiwe. UMzalwana uBarr wayesoloko ethetha kakuhle ngobomi bakhe eselula; wayenombulelo ngomzekelo omhle awawumiselwa ngabazali bakhe abathandayo.

Xa wayekwishumi elivisayo, uJack oselula wayekufumanisa kunzima ukuthetha nabantu angabaziyo. Noko ke, wasebenza nzima ukoyisa loo ngxaki, yaye ngenye injikalanga yangeCawa ngowe-1927, xa wayeneminyaka eli-14 ubudala, waxelela uyise ukuba ukulungele ukumkhapha ukuya kumsebenzi wendlu ngendlu. Eso yaba sisiqalo sokuzinikela kwakhe kwinkonzo kaYehova. Ukususela ngoko ukusa ekufeni kwakhe, uMzalwan’ uBarr wahlala engumshumayeli okhutheleyo weendaba ezilungileyo.

Ingozi emasikizi eyaphantse yabulala unina yabangela ukuba uJack oselula acinge nzulu ngobomi bakhe, yaye ngowe-1929 wazahlulela kuYehova, waza zisuka nje ngowe-1934 wafuzisela uzahlulelo lwakhe. Emva koko, ngowe-1939 waba lilungu lentsapho yaseBheteli yaseLondon, eNgilani. Ngaloo ndlela wayeqalisa inkonzo yexesha elizeleyo aye wachitha kuyo iminyaka engama-71.

Ngo-Oktobha 29, 1960, uMzalwan’ uBarr watshata noMildred Willett, owayenexesha elide enguvulindlela okhutheleyo nomthunywa wevangeli yaye wayesithi ‘babenolwalamano olukhethekileyo.’ UMzalwana noDad’ uBarr babesisibini esaziwa ngokuba ngumzekelo nesizinikeleyo yaye baqhubeka benjalo de uMildred waligqiba ikhondo lakhe lasemhlabeni ngo-Oktobha 2004. UMzalwana noDad’ uBarr babefunda kunye iBhayibhile yonke imihla njengesibini esitshatileyo.

Abo bamaziyo uJack Barr baya kumkhumbula njengomntu obesoloko enikela amacebiso asengqiqweni—alungeleleneyo, obubele nasekelwe eZibhalweni. Ebesebenza nzima, engumveleli onothando nobacingelayo abanye yaye ekwangumhlobo onyanisekileyo. Amagqabaza, iintetho nemithandazo yakhe ibibonisa indlela aqole ngayo ngokomoya nendlela asondelelene ngayo noYehova.

Nangona siya kumkhumbula uMzalwana wethu othandekayo uBarr, sivuyisana naye ngokufumana isipho sokungafi—ilungelo abejonge phambili kulo nabesoloko ethetha ngalo. Ebelilangazelela ngokwenene.—1 Kor. 15:53, 54.a

[Umbhalo osemazantsi]