Zintsapho ZamaKristu—“Hlalani Nilungile”

“Hlalani nilungile, ngenxa yokuba uNyana womntu uza ngelixa eningalicingelanga.”—LUKA 12:40.

1, 2. Kutheni sifanele sisebenzise isibongozo sikaYesu ‘sokuhlala silungile’?

“XA UNYANA womntu efika esebuqaqawulini bakhe” aze “abahlule abantu omnye komnye,” kuya kwenzeka ntoni kuwe nentsapho yakho? (Mat. 25:31, 32) Ekubeni oku kuza kwenzeka ngelixa esingalicingelanga, kubaluleke ngokwenene ukuba sisebenzise isibongozo sikaYesu ‘sokuhlala silungile’!—Luka 12:40.

² Inqaku elandulela eli lixubushe ngendlela ilungu ngalinye lentsapho elinokunceda ngayo intsapho iphela ukuba ihlale iphaphile ngokomoya ngokungayithathi lula imbopheleleko yalo. Makhe sihlole ezinye iindlela esinokufak’ isandla ngazo ukuze intsapho ihlale iphilile ngokomoya.

Gcina Iliso Lakho ‘Lingenakumbi’

3, 4. (a) Yintoni iintsapho zamaKristu ezifanele ziyilumkele? (b) Kuthetha ntoni ukugcina iliso lethu ‘lingenakumbi’?

³ Ukuze zikulungele ukuza kukaKristu, iintsapho zimele zikulumkele ukutyeshela izinto eziphathelele unqulo lwenene. Zifanele ziziphephe izinto eziphazamisayo. Ekubeni ukuthanda izinto eziphathekayo kungumgibe obambise iintsapho ezininzi, hlolani oko kwathethwa nguYesu ngokugcina iliso lethu ‘lingenakumbi.’ (Funda uMateyu 6:22, 23.) Njengoko isibane sinokusikhanyisela endleleni ukuze singawi, oko sikujonga ‘ngamehlo entliziyo’ kunokusinceda siziphathe ngendlela efanelekileyo size singakhubeki.—Efe. 1:18.

⁴ Ukuze iliso lokoqobo libone ngokucacileyo, limele lisebenze kakuhle lize likwazi ukukhangela ngqo kuloo nto liyijongileyo. Kunjalo nangeliso lentliziyo. Ukuba neliso elingenakumbi kuthetha ukuba sinikel’ ingqalelo kwinjongo enye. Kunokuba siphile ubomi bokuthanda izinto eziphathekayo size sizixhalabise ngokugqithiseleyo ngokunyamekela iimfuno zentsapho zokwenyama kuphela, sigcina iliso lethu lijoliswe kwizinto zokomoya. (Mat. 6:33) Oku kuthetha ukuba sifanele saneliswe zizinto eziphathekayo esinazo size sibeke inkonzo kaThixo kwindawo yokuqala kubomi bethu.—Heb. 13:5.

5. Intwazana ekwishumi elivisayo yabonisa njani ukuba “iliso” layo lijoliswe ekukhonzeni uYehova?

⁵ Kunokuba nemiphumo emihle ngokwenene ukuqeqesha abantwana bagcine iliso labo lingenakumbi! Cinga ngomzekelo wentwazana ekwishumi elivisayo kwilizwe lase-Ethiopia. Yaziphumelela emagqabini izifundo zayo zesikolo kangangokuba yathenjiswa ngokunikwa imali eyayiza kuyinceda ifumane imfundo ephakamileyo. Noko ke, ekubeni yayinikel’ ingqalelo ekukhonzeni uYehova, yayilandula loo mali. Kungekudala emva koko, yathenjiswa ngomsebenzi owawuza kuyihlawula i-R28 200 ngenyanga—umvuzo ongaphezulu lee kunemivuzo ehlawulwa abantu elizweni layo. Kodwa “iliso” lale ntwazana lalithe ntsho kwinkonzo yobuvulindlela. Akuzange kufuneke iqale ebazalini ukuze ilandule loo msebenzi. Baziva njani abazali xa besiva ngento eyenziwe yintombi yabo? Bavuya kunye nayo baza bayixelela ukuba baneqhayiya ngayo!

6, 7. Yiyiphi ingozi esimele ‘sigcine amehlo ethu evulekile’ kuyo?

⁶ Amazwi kaYesu abhalwe kuMateyu 6:22, 23 alumkisa ngeliphandle ngokubawa. UYesu akazange athelekise igama elithi ‘iliso elingenakumbi’ nesichasi salo, kodwa wasebenzisa ibinzana elithi ‘iliso elingendawo.’ ‘Iliso elingendawo’ ‘libi; linomona,’ oko kukuthi, linenkanuko okanye liyabawa. (Mat. 6:23) UYehova uvakalelwa njani ngokuba nenkanuko okanye ukubawa? IBhayibhile ithi: “Uhenyuzo nako konke ukungahlambuluki nokubawa [okanye, “inkanuko”] makungakhe kukhankanywe kwaukukhankanywa phakathi kwenu.”—Efe. 5:3.

⁷ Ngoxa kusenokuba lula ukubabona abantu ababawayo, kodwa kunokuba nzima ukuba thina sizibone. Ngenxa yoko, siya kuba silumkile xa sisebenzisa eli cebiso likaYesu: “Gcinani amehlo enu evulekile nize nizilinde kulo lonke uhlobo lwenkanuko.” (Luka 12:15) Ukuze senze loo nto kuya kufuneka sizihlole size sibone ukuba yiyiphi eyona nto siyixabisileyo. Iintsapho zamaKristu zimele zizikise ukucinga ngexesha nemali eziyichitha ekuzonwabiseni, ekuzihlaziyeni nakwizinto eziphathekayo.

8. ‘Sinokuwagcina njani amehlo ethu evulekile’ xa kufuneka sithenge into ethile?

⁸ Kunokusuka nje uthenge into kuba ifikeleleka kufuneka ucinge ngaphambi kokuba uyithenge. Zibuze imibuzo efana nale: ‘Ngaba ndiya kuyisebenzisa phofu le nto ndifuna ukuyithenga ndize ndikwazi nokuyinyamekela? Kuza kundithatha ixesha elingakanani ukufunda ukuyisebenzisa kakuhle?’ Nina baselula, musani ukukholelwa yonk’ into le esasazwa ngabathengisi, nize nifune ukuthengelwa iimpahla ezinexabiso eliphezulu okanye ezinye izinto ezingayiwayo. Zimiseleni ukuzeyisa. Kwakhona, cinga enoba ukuthenga ezo zinto kuya kuyinceda kusini na intsapho yakowenu ukuba ikulungele ukufika koNyana womntu. Yiba nentembelo kwesi sithembiso sikaYehova: “Andiyi kuze ndikushiye, ndingayi kuze ndikutyeshele.”—Heb. 13:5.

Yiba Nosukelo Lwezinto Zokomoya

9. Ukusukela izinto zokomoya kunokuyinceda njani intsapho?

⁹ Enye indlela amalungu entsapho anokulomeleza ngayo ukholo lwawo aze abe negalelo kwimpilo-ntle yentsapho yonke kukuba azibekele usukelo lwezinto zokomoya aze alufikelele. Ukwenjenjalo kuya kunceda iintsapho zibone indlela eziqhuba ngayo enkonzweni kaYehova zize zigqibe ukuba ziziphi ezona zinto zibalulekileyo ebomini bazo.—Funda eyabaseFilipi 1:10.

10, 11. Luluphi usukelo enizimisele ukulufikelela njengentsapho, yaye luluphi usukelo eninokuzibekela lona kwixesha elizayo?

¹⁰ Kwanokuzibekela usukelo olusengqiqweni lwezinto ekunokuba lula phantse kuwo onke amalungu entsapho ukuzifikelela kunokuba neengenelo ezininzi. Ngokomzekelo, cinga ngosukelo eninokuzibekela lona lokuxubusha itekisi yosuku imihla ngemihla. Amagqabaza anikelwa ngamalungu entsapho anokunceda intloko-ntsapho iqonde indlela intsapho emthanda ngayo uYehova. Usukelo lokufunda iBhayibhile rhoqo kunye njengentsapho lunokuvelisa ithuba elihle lokuba abantwana baphucule ubuchule babo bokuyifunda nokuyiqonda kakuhle iBhayibhile. (INdu. 1:1, 2) Yaye ngaba asinakuzibekela usukelo lokuphucula imithandazo yethu? Kwakhona, ukuhlakulela iinkalo zesiqhamo somoya kunokuba lolona sukelo luhle sinokuzibekela lona. (Gal. 5:22, 23) Okanye kuthekani ngokukhangela iindlela esinokubonisa ngazo uvelwano kubantu esidibana nabo entsimini? Ukuzama ukwenza oko njengentsapho kunokunceda abantwana bafunde ukuba nemfesane, ibe banokuba nomnqweno wokukhonza njengoovulindlela abathe ngxi okanye abathunywa bevangeli.

¹¹ Kutheni ningaxubushi ngezinye zezinto eninokuzibekela usukelo lwazo njengentsapho? Ngaba aninakuzibekela usukelo lokuchitha ixesha elingakumbi entsimini? Ngaba ninokuzama ukoyisa uloyiko lokunikela ubungqina ngomnxeba, esitratweni okanye kwiindawo zamashishini? Kuthekani ngokukhonza apho kufuneka abavakalisi boBukumkani abangakumbi khona? Ngaba elinye ilungu lentsapho alinakufunda olunye ulwimi ukuze likwazi ukushumayela iindaba ezilungileyo kubantu bezinye iintlanga?

12. Yintoni enokwenziwa ziintloko-ntsapho ukunceda iintsapho zazo zikhule ngokomoya?

¹² Njengentloko-ntsapho, jonga iinkalo intsapho yakho enokwenza kuzo inkqubela ngokomoya. Emva koko zibekeleni usukelo olucacileyo lokufikelela ezo nkalo. Njengentsapho nimele nizibekele usukelo olusengqiqweni neninokukwazi ukulufikelela ngokweemeko namandla enu. (IMize. 13:12) Ewe kona, ukufikelela usukelo olubalulekileyo kuthatha ixesha. Ngoko yongani ixesha enilichitha nibukele umabonwakude nize nilisebenzise kwizinto zokomoya. (Efe. 5:15, 16) Sebenza nzima ukuze ufikelele usukelo olubekele intsapho yakho. (Gal. 6:9) Intsapho esukela izinto zokomoya iya kwenza ukuhambela kwayo phambili “kubonakale ebantwini bonke.”—1 Tim. 4:15.

Yisebenziseni Ingokuhlwa YoNqulo Lwentsapho

13. Kuye kwenziwa luphi utshintsho kucwangciso lweentlanganiso zebandla, yaye yiyiphi imibuzo esimele sizibuze yona?

¹³ Enye into esemagqabini enokunceda iintsapho ‘zihlale zikulungele’ ukuza koNyana womntu, lutshintsho oluye lwenziwa kucwangciso lweentlanganiso zeveki ngeveki olwaqalisa ngoJanuwari 1, 2009. Akusekho mfuneko yokudibana ngexesha elahlukileyo evekini kwintlanganiso eyayibizwa ngokuba siSifundo Sencwadi Sebandla. Le ntlanganiso ngoku idityaniswe neSikolo Sobulungiseleli Sobuthixo kwakunye neNtlanganiso Yenkonzo. Olu tshintsho lwenzelwa ukuba iintsapho zamaKristu zomeleze ubumoya bazo ngokuzibekela ingokuhlwa yokuba nonqulo lwentsapho veki nganye. Ekubeni sekudlule ixesha ukususela oko kwenziwa olo tshintsho, sinokuzibuza: ‘Ngaba eli xesha ndilinikiweyo ndilisebenzisela ingokuhlwa yoNqulo Lwentsapho okanye isifundo sobuqu? Ngaba ndiye ndalisebenzisa ngempumelelo eli lungiselelo?’

14. (a) Yiyiphi eyona njongo yokuzibekela ingokuhlwa yoNqulo Lwentsapho okanye isifundo sobuqu? (b) Kutheni ukuzibekela ingokuhlwa yokufunda kubalulekile?

¹⁴ Injongo eyintloko yokuba nengokuhlwa yoNqulo Lwentsapho okanye ixesha lesifundo sobuqu kukusondela kuThixo. (Yak. 4:8) Xa sichitha ixesha sifunda iBhayibhile rhoqo size simazi ngakumbi uMdali, ulwalamano lwethu naye luyomelela. Okukhona sisondela kuYehova, kokukhona siya kukhuthazeka ngakumbi ukuba simthande ‘ngentliziyo yethu iphela, ngomphefumlo wethu uphela, ngengqondo yethu iphela nangamandla ethu ephela.’ (Marko 12:30) Ngokuqinisekileyo, siya kuzimisela ukuthobela uThixo size simxelise. (Efe. 5:1) Ukusebenzisa ingokuhlwa yoNqulo Lwentsapho rhoqo, kuyeyona nto ibalulekileyo ukunceda onke amalungu entsapho ‘ahlale elungile’ ngokomoya njengoko silindele “imbandezelo enkulu” ekwaprofetwa ngayo. (Mat. 24:21) Kubalulekile ukwenza oko ukuze sisinde.

15. Ingokuhlwa yoNqulo Lwentsapho inokuwanceda njani amalungu entsapho kwindlela ajongana ngayo?

¹⁵ Kukho nenye injongo yeli lungiselelo loNqulo Lwentsapho—ukunceda amalungu entsapho asondelelane. Ukuchitha ixesha kunye nixubusha imibandela yokomoya veki nganye kunempembelelo ephawulekayo kwindlela amalungu entsapho ajongana ngayo. Ayithetheki indlela amaqabane omtshato amanyana ngakumbi ngayo xa efunda kunye iBhayibhile ezele luvuyo! (Funda iNtshumayeli 4:12.) Abazali nabantwana abanqula kunye banamathuba amaninzi okumanyana eluthandweni, kuba “lungumxokelelwane ogqibeleleyo womanyano.”—Kol. 3:14.

16. Khawubalise indlela oodade abathathu abathanda izinto zokomoya abaye bangenelwa ngayo kwingokuhlwa yofundo lweBhayibhile.

¹⁶ Cinga ngendlela oodade abathathu abaxabise izinto zokomoya abaye bangenelwa ngayo kwilungiselelo lokuzibekela ingokuhlwa yesifundo seBhayibhile. Nangona bengezozalamane, aba bahlolokazi bakhulileyo bahlala kwisixeko esinye yaye bebengabahlobo kangangeminyaka eliqela. Ekubeni babefuna ukuchitha ixesha elingakumbi kunye yaye kwangaxeshanye befuna ukulichithela kwizinto zokomoya kunokuba bancokole nje ezabo, bagqiba ekubeni bazibekele ingokuhlwa ababeza kudibana ngayo ukuze bafunde iBhayibhile. Baqalisa ukwenza oku besebenzisa incwadi ethi ‘Ukunikela Ubungqina Obucokisekileyo’ NgoBukumkani BukaThixo. Omnye wabo uthi: “Ithuba esidibana ngalo silinandipha kangangokuba siye sichithe ixesha elingaphaya kweyure. Siye sizame ukuzenzela umfanekiso-ngqondweni weemeko ababekuzo abazalwana bethu benkulungwane yokuqala size sixubushe ngento esasiya kuyenza ukuba sasikwimeko yabo. Emva koko siye sizame ukuzisebenzisa entsimini izinto esizifunde kwingxubusho yethu. Oku kuye kwasenza sawunandipha ngakumbi umsebenzi wethu wokushumayela ngoBukumkani nowokwenza abafundi yaye siye sanempumelelo kunangaphambili.” Ukongezelela ekubomelezeni ngokomoya, eli lungiselelo labangela ukuba aba bahlobo bathathu bamanyane nangakumbi. Bathi: “Siyalixabisa eli lungiselelo.”

17. Ziziphi izinto ezenza ingokuhlwa yoNqulo Lwentsapho iphumelele?

¹⁷ Kuthekani ngawe? Ungenelwa njani kwingokuhlwa ebekelwe unqulo lwentsapho okanye isifundo sobuqu? Ukuba oku nikwenza manqaphanqapha, eli lungiselelo aliyi kuyifeza injongo yalo. Lungu ngalinye lentsapho lifanele libe sele likulungele ukufunda xa kubetha ixesha elibekiweyo. Animele nivumele izinto ezingenamsebenzi ziphazamisane nale ngokuhlwa. Ngaphezu koko, imibandela enikhetha ukuyifunda ifanele iyilungele intsapho yenu. Yintoni onokuyenza ukuze la maxesha okufunda abe zizihlandlo ezonwabisayo? Fundisa ngendlela edlamkileyo, uze ugcine eso sihlandlo sinesidima yaye sinenzolo.—Yak. 3:18.a

‘Hlalani Niphaphile’ Yaye “Nilungile”

18, 19. Ukwazi ukuba ukufika koNyana womntu kusemnyango kufanele kukuchaphazele njani wena nentsapho yakho?

¹⁸ Imeko yeli hlabathi eya isiba mandundu ibonisa ngokuqinisekileyo ukuba ukususela ngowe-1914, ihlabathi likaSathana elingendawo likwimihla yalo yokugqibela. IArmagedon ayifikanga igalelekile. Kungekudala uNyana womntu uza kufika ezokuphumeza umgwebo kaYehova kwabo bangamhloneliyo uThixo. (INdu. 37:10; IMize. 2:21, 22) Ngaba ukwazi loo nto akumele kube negalelo kubomi bakho nobentsapho yakho?

¹⁹ Ngaba uyalisebenzisa icebiso likaYesu lokugcina liso lakho ‘lingenakumbi’? Ekubeni abantu beli hlabathi besukelana nobutyebi, udumo, okanye izikhundla, ngaba intsapho yakho inosukelo lwezinto zokomoya? Ngaba uyalisebenzisa ilungiselelo lengokuhlwa yoNqulo Lwentsapho okanye lexesha lesifundo sobuqu? Ngaba uyazifeza iinjongo zeli lungiselelo? Njengoko kuxutyushwe kwinqaku elandulela eli, ngaba uyaziphumeza iimbopheleleko zakho ezichazwe ziZibhalo njengendoda, umfazi okanye umntwana, ukuze uncede intsapho iphela ‘ihlale iphaphile’? (1 Tes. 5:6) Ukuba wenjenjalo, uya ‘kuhlala ukulungele’ ukufika koNyana womntu.

[Umbhalo osemazantsi]

Ufunde Ntoni?

• Chaza indlela iintsapho zamaKristu ‘ezinokuhlala ngayo zilungile’ . . .

ngokuba neliso ‘elingenakumbi.’

ngokuzibekela usukelo lwezinto zokomoya nokulufikelela.

ngokusebenzisa ingokuhlwa yoNqulo Lwentsapho.

[Umfanekiso okwiphepha 13]

Iliso ‘elingenakumbi’ liya kusinceda sixhathise izinto eziphazamisayo zeli hlabathi