Imibuzo Evela Kubafundi

Ngaba sinokulazi inani elingqalileyo leziprofeto ezingoMesiya ezikwiZibhalo zesiHebhere?

Ukuzifunda ngocoselelo iZibhalo zesiHebhere kusinceda siqonde iziprofeto ezininzi ezazaliseka kuYesu Kristu. Ezi ziprofeto zachaza iinkcukacha ngemvelaphi kaMesiya, ixesha awayeza kubonakala ngalo, izenzo zakhe, indlela awayeza kuphathwa ngayo nendawo yakhe kwilungiselelo likaYehova uThixo. Xa zizonke zisenza sibe nombono ozukileyo, osinceda siqonde uYesu njengoMesiya. Kodwa ke, ukuba sizama ukuqonda inani elingqalileyo leziprofeto ezingoMesiya ezikwiZibhalo zesiHebhere, kufuneka sichul’ ukunyathela.

Abantu abaninzi abavumelani kumba wokuba sisiphi esona siprofeto sikaMesiya nokuba sisiphi esingesiso. Kwincwadi yakhe ethi The Life and Times of Jesus the Messiah, uAlfred Edersheim wathi imibhalo yoorabhi yamandulo yathetha iindinyana ezingama-456 kwiZibhalo zesiHebhere njengezithetha ngoMesiya, nangona uninzi lwayo lungathethi ngokungqalileyo ngoMesiya. Ukuzihlola ngenyameko ezi ndinyana zingama-456 kuphakamisa imibuzo yokuba ezinye zazo ziziprofeto ezingoYesu Kristu kusini na. Ngokomzekelo, uEdersheim wathi amaYuda ayegqala iGenesis 8:11 njengendinyana eprofeta ngoMesiya. Ayekholelwa ukuba “igqabi lomnquma, eleza nehobe, lalifumaneke kwiNtaba kaMesiya.” Umbhali wathetha nange-Eksodus 12:42. Ecacisa indlela amaYuda awayiqonda phosakeleyo ngayo le ndinyana, wabhala wathi: “Njengoko uMoses waphuma entlango, ngoko noMesiya wayeya kuphuma eRoma.” Ngokuqinisekileyo abaphengululi abaninzi nabanye abantu babeya kukufumanisa kunzima ukuziqonda ezi ndinyana zimbini neengcaciso zazo ezingachananga ezingoYesu Kristu.

Enoba sinikela ingqalelo kuphela kwiziprofeto ezazaliseka kuYesu Kristu, kuba nzima ukuvumelana ngelona nani lazo lingqalileyo. Ngokomzekelo, cinga ngesahluko 53 sencwadi kaIsaya, esineziprofeto ezininzi eziphathelele uMesiya. UIsaya 53:2-7 unesi siprofeto: “Akanabume . . . Wayedeliwe yaye ephetshwa ngabantu . . . Yena wathwala izifo zethu . . . Wahlatywa ngenxa yokunxaxha kwethu . . . Waziswa kanye njengemvu esiwa ekuxhelweni.” Ngaba sonke esi sicatshulwa sikuIsaya isahluko 53 simele sigqalwe njengesiprofeto esinye esingoMesiya, okanye ngaba uphawu ngalunye kwezi mpawu zikaMesiya lumele lujongwe njengesiprofeto esizimeleyo?

Kwakhona, cinga ngoIsaya 11:1, othi: “Kumele kuphume isetyana esiphunzini sikaYese; yaye ihlumelo eliphuma ezingcanjini zakhe liya kuba nesiqhamo.” Kwindinyana ye-10, siphinda sivele esi siprofeto, sibhalwe ngendlela efanayo. Ngaba ezi ziprofeto simele sizigqale njengeziprofeto ezibini ezahlukahlukeneyo okanye njengesiprofeto esinye esichazwe ngokuphindaphindiweyo? Licacile elokuba izigqibo ekunokufikelelwa kuzo ngoIsaya isahluko 53 noIsaya isahluko 11 ziya kulichaphazela inani elipheleleyo leziprofeto ezingoMesiya.

Ngenxa yoko, senza kakuhle xa sikuphepha ukuchaza inani elingqalileyo leziprofeto ezingoMesiya ezikwiZibhalo zesiHebhere. Intlangano kaYehova iye yapapasha uludwe olubonisa inkitha yeziprofeto eziphathelele uYesu nokuzaliseka kwazo.a Olu ludwe lunokuba luncedo nokhuthazo kwisifundo sethu sobuqu nesentsapho kunye nasentsimini. Ngaphezu koko, ezi ziprofeto zininzi zikaMesiya, kungakhathaliseki ukuba zingaphi na, zisinika ubungqina obuqinisekileyo bokuba uYesu nguKristu, okanye uMesiya.

[Umbhalo osemazantsi]