Intlanganiso Engasoze Ilibaleke

“EKUPHELENI kwale ntlanganiso, niya kuthi, ‘Eneneni, asisoze siyilibale le ntlanganiso yonyaka!’” Ngaloo mazwi, uStephen Lett weQumrhu Elilawulayo lamaNgqina kaYehova wavuselela umdla kwisihlwele esasiphulaphule loo ntlanganiso. Babehlanganisene kwintlanganiso yonyaka ye-126 yeWatch Tower Bible and Tract Society of Pennsylvania, ebingo-Oktobha 2, 2010, kwiHolo yeNdibano yamaNgqina kaYehova eJersey City, eNew Jersey, eUnited States. Ziziphi izinto eziye zabalaseliswa kule ntlanganiso ibiyimbalasane?

Intetho yokuvula eyanikelwa ngehlombe nguMzalwan’ uLett yayithetha ngenqwelo kaYehova yasezulwini njengoko ichazwe eBhayibhileni kwincwadi kaHezekile. Le nqwelo inkulu nezukileyo ifanekisela intlangano kaThixo, elawulwa nguYehova ngokupheleleyo. UMzalwan’ uLett wathi, inxalenye yayo esezulwini, enezidalwa zokomoya, ihamba ngesantya sombane—isantya seengcinga zikaYehova. Inxalenye esemhlabeni yentlangano kaYehova uThixo nayo ihamba ngesantya esifanayo. UMzalwan’ uLett wachaza izinto eziliqela nezivuyisayo ezenzekayo kwiminyaka yakutshanje kwinxalenye ebonakalayo yentlangano kaThixo.

Ngokomzekelo, amasebe athile aye adityaniswa ukuze enze amasebe amakhulu, nto leyo eya kuvulela ithuba abaninzi abebekhonza kumakhaya aseBheteli kuloo mazwe ukuba banikele ingqalelo kumsebenzi wokushumayela. UMzalwan’ uLett wabongoza abaphulaphuli ukuba baqhubeke bethandazela iQumrhu Elilawulayo, elingummeli wodidi lwekhoboka, ukuba linganeli nje ukuqhubeka lithembekile, kodwa lisebenzise ubulumko okanye libe yingqondi.—Mat. 24:45-47.

Iingxelo Nodliwano-Ndlebe Olukhuthazayo

UTab Honsberger, okwiKomiti yeSebe yaseHaiti, wanikela ingxelo echukumisayo ngoko kwenzekayo emva kwenyikima kaJanuwari 12, 2010, eyabulala abantu abamalunga nama-300 000 kwelo lizwe. Wathi abefundisi bebexelela abantu ukuba uThixo uye wabohlwaya abo bantu ngenxa yokungabi nalukholo waza wasindisa abalungileyo. Sekunjalo, amawaka amabanjwa akhululeka xa iindonga zenye intolongo zadilizwa yinyikima. Ngoko ke abantu abaninzi abanyanisekileyo baseHaiti bathuthuzelwa kukwazi esona sizathu sokuba siphila kumaxesha anzima. UMzalwan’ uHonsberger wacaphula amazwi awathethwa ngumzalwana waseHaiti owaphulukana nomfazi wakhe kuloo ntlekele, owathi: “Ndisalila nangoku. Andazi ukuba ndiza kukhala ixesha elingakanani, kodwa ndiyavuyiswa kukubona uthando oluphakathi kwentlangano kaYehova. Ndinethemba, yaye ndizimisele ukuxelela abanye ngalo.”

UMark Sanderson, ngoku olilungu lentsapho yaseBheteli eBrooklyn, wanikela ingxelo ngeePhilippines. Njengowayesakuba lilungu leKomiti yeSebe lalapho, wayevuya njengoko wayebaxelela ngeencopho ezingama-32 ezilandelelanayo zabavakalisi boBukumkani nendlela izifundo zeBhayibhile ezilodlula ngayo inani labavakalisi. Wabalisa ngomzalwana ogama linguMiguel owabulawelwa umzukulwana. UMiguel wenza konke okusemandleni akhe ukuze loo mbulali agwetywe aze aphoswe entolongweni. Kamva, xa wayeshumayela entolongweni, uMiguel wadibana naloo mbulali. Nangona wayesoyika, uMiguel wathetha naye kakuhle. Ekugqibeleni wayiqhubela isifundo le ndoda yaye yasabela kakuhle yaza yamthanda uYehova. Ngoku ibhaptiziwe. Bangabahlobo yaye uMiguel ulwela ukuba lo mzalwana wakhe akhululwe entolongweni.a

Emva koko kwalandela udliwano-ndlebe olwalusenziwa nguMark Noumair, umhlohli kwiSebe leZikolo Zobuthixo. Wadlan’ indlebe nezibini ezithathu—uAlex noSarah Reinmueller, uDavid noKrista Schafer kunye noRobert noKetra Ciranko. UAlex Reinmueller, oncedisa iKomiti Yokupapasha, wachaza indlela awayifaka ngayo inyaniso entliziyweni yakhe ngoxa wayenguvulindlela eKhanada, eneminyaka eli-15 kuphela ubudala, yaye edla ngokusebenza yedwa entsimini. Xa ebuzwa ngoyena mntu oye waba lukhuthazo olukhulu kuye eBheteli, uMzalwan’ uReinmueller wakhankanya amadoda amathathu, waza wachaza nendlela nganye kuwo eye yamnceda ngayo ukuba akhule ngokomoya. Umfazi wakhe uSarah, uye wachaza ngolwalamano abe nalo nomnye udade, oye wanyamezela amashumi eminyaka evalelwe kwiintolongo zaseTshayina ngenxa yokholo lwakhe. USarah uthi uye wafunda ukuthembela kuYehova ngomthandazo.

UDavid Schafer, oncedisa iKomiti Yokufundisa, wancoma unina ngokholo lwakhe olomeleleyo waza wabalisa nangabazalwana abagawula imithi baza bamnceda ukuba abe nguvulindlela ongumncedani ngoxa wayeselula. Umfazi wakhe, uKrista, uthetha kakuhle ngendlela aye waphenjelelwa ngayo ngamalungu akhulileyo entsapho yaseBheteli aye ‘athembeka nakokona kuncinane,’ njengoko wacebisayo uYesu.—Luka 16:10.

URobert Ciranko, oncedisa iKomiti Yokubhala, uthetha ngabazali babazali bakhe abane, abafudukela eHungary nababengamaKristu athanjisiweyo. Eseyinkwenkwana, wamangaliswa gqitha xa waya kwiindibano ezinkulu ngeminyaka yee-1950 waza wafumanisa ukuba intlangano kaYehova inkulu kakhulu, ayiphelelanga nje ebandleni lakhe. Umfazi wakhe, uKetra, uchaza indlela awafunda ngayo ngokunyaniseka xa wayekhonza njengovulindlela kwibandla elinabawexuki nezinye iingxaki. Wanyamezela yaye ekugqibeleni wabelwa ukuba akhonze njengovulindlela okhethekileyo kwibandla elalimanyene ngeyona ndlela, nto leyo eyamchukumisa gqitha.

Emva koko, uManfred Tonak wanikela ingxelo nge-Ethiopia. Eli lizwe lalisele likho ngamaxesha okubhalwa kweBhayibhile, yaye ngoku lisikelelwe ngabavakalisi beendaba ezilungileyo abangaphezu kwama-9 000. Abaninzi kubo bahlala kufutshane nekomkhulu, iAddis Ababa. Ngoko ke, iindawo ezisemaphandleni zisafuna abavakalisi abangakumbi. Ukuze ahlangabezane nale ngxaki, amaNgqina ase-Ethiopia ahlala kwamanye amazwe amenywa ukuba atyelele kwelo, ukuze ashumayele kwezinye zeendawo ezisemaphandleni. Kweza abaninzi, baza bakhuthaza namaNgqina asekuhlaleni, yaye bafumana abantu abanomdla.

Eyona nxalenye yayibangel’ umdla, lungcelele oluthetha ngamaNgqina kaYehova eRashiya nendlela aye akulwela ngayo ukumiselwa ngokusemthethweni. UAulis Bergdahl weKomiti yeSebe eRashiya wabalisa ngendlela awayetshutshiswa ngayo amaNgqina eRashiya, ingakumbi eMoscow. UPhilip Brumley weSebe Lezomthetho kwisebe laseUnited States wabalisa ngezinto ezichwayitisayo eziye zenzeka kwiinyanga zakutshanje xa iNkundla Yamalungelo Abantu YaseYurophu yaphulaphula izityholo ezisithoba ezityatyekwa amaNgqina. Le Nkundla iye yafumanisa ukuba zonke ezi zityholo azinasihlahla, yada yachaza nezizathu zokuba ezinye zezi zityholo zibubuxoki. Ngoxa kusalindelwe isigqibo senkundla, uMzalwan’ uBrumley ubonakalise ithemba ngendlela iNkundla eza kuwasingatha ngayo amanye amatyala kumazwe athile.

Emva kwezi ndaba zimnandi kangaka, uMzalwan’ uLett uye wenza isaziso sokuba iNkundla Yamalungelo Abantu YaseYurophu iye yakubona kufanelekile ukuchophela ityala ekudala lixoxwa elibandakanya urhulumente waseFransi namaNgqina kaYehova. Le Nkundla ihlonelwa gqitha ayifane iwamkele amatyala amaninzi. Ukuza kuthi ga ngoku, iNkundla Yamalungelo Abantu YaseYurophu iye yachophela amatyala angama-39 abandakanya amaNgqina kaYehova, yaye kwangama-37 kuwo iye yawathethelela. UMzalwan’ uLett uye wakhuthaza bonke abantu bakaThixo ukuba bawuthandazele kuYehova uThixo lo mbandela.

Ingxelo yokugqibela yanikelwa nguRichard Morlan, umhlohli kwiSikolo Sabadala Bebandla. Wathetha ngehlombe ngesi sikolo nendlela abadala abaye babonakalisa umbulelo ngayo ngaso.

Ezinye Iintetho Zamalungu EQumrhu Elilawulayo

UGuy Pierce weQumrhu Elilawulayo wanikela intetho echukumisayo ethetha ngomxholo wonyaka wowama-2011 othi, “Sabela egameni likaYehova.” (Zef. 3:12) Wakhankanya ukuba nangona eli ilixesha elivuyisayo ngeendlela ezininzi kubantu bakaYehova, ikwalixesha elibalulekileyo nesingamele silithathe lula. Imini kaYehova enkulu ikufuphi; sekunjalo abantu basasabela kunqulo lobuxoki, kwipolitiki, kubutyebi, ukungazinanzi izinto ezenzekayo nakwezinye izinto. Ukuze sifumane ikhusi lokwenene, sifanele sibize egameni likaYehova, nto leyo equka ukumazi, ukumhlonela ngokunzulu nokumthemba uMntu omelwe lelo gama, size simthande ngayo yonke into esinayo.

UDavid Splane weQumrhu Elilawulayo walandela ngentetho echukumisayo enomxholo othi, “Ngaba Ungenile Ekuphumleni KukaThixo?” Wachaza ukuba ukuphumla kuThixo akuthethi ukungasebenzi, ekubeni uYehova noNyana wakhe ‘besasebenza’ ebudeni bemini yokuphumla yokomfuziselo ukuze injongo kaThixo yezinto ezidaliweyo ngokuphathelele umhlaba iphumelele. (Yoh. 5:17) Ngoko ke, sinokungena njani ekuphumleni kukaThixo? Ezinye zeendlela kukuyeka isono nemisebenzi yokuzingca. Sifanele sibe nokholo size siphile sicinga ngenjongo kaThixo, senze konke esinako ukuze kufezeke loo njongo. Maxa wambi, kusenokungabi lula ukwenjenjalo, kodwa sifanele samkele isiluleko size sisebenzisane nolwalathiso lwentlangano kaYehova. UMzalwan’ uSplane wabongoza abaphulaphuli ukuba benze konke okusemandleni abo ukuze bangene ekuphumleni kukaThixo.

Intetho yokuqukumbela, yanikelwa nguAnthony Morris weQumrhu Elilawulayo, yaye yayinomxholo othi “Silinde Ntoni?” UMzalwan’ uMorris wakhuthaza abaphulaphuli ngehlombe ngeziprofeto eziza kuzaliseka ezilindelwe ngabo bathembekileyo. Ziquka ixesha laxa abantu baya kuthi “Luxolo nonqabiseko!” nokutshatyalaliswa konqulo lobuxoki. (1 Tes. 5:2, 3; ISityhi. 17:15-17) UMzalwan’ uMorris walumkisa ukuba singathi, “Le yiArmagedon,” xa sibona iziganeko ezindabeni ezingazalisekisi ziprofeto. Wakhuthaza abantu ukuba babe nesimo sengqondo sovuyo, sokuba nomonde nokulinda esichazwe kuMika 7:7. Kodwa ke kwangaxeshanye wabongoza wonke umntu ukuba asondelelane neQumrhu Elilawulayo, kanye njengamajoni akummandla kafayayo edabini. Wathi: “Ngamana iintliziyo zenu zingomelela, nonke nina balindela kuYehova.”—INdu. 31:24.

Ekupheleni kocwangciso kwenziwa izaziso ezivuyisayo nezingasayi kuze zilibaleke. UGeoffrey Jackson weQumrhu Elilawulayo wenza isaziso ngelungiselelo leMboniselo efundwayo enesiNgesi esilula, kwabo bangakwazi kakuhle ukufunda isiNgesi. Emva koko, uStephen Lett wachaza ukuba iQumrhu Elilawulayo liza kulungiselela ukuba kwenziwe amatyelelo okwalusa kubaveleli bezithili nabafazi babo eUnited States. Emva koko wachaza ukuba ISikolo Sokuqeqesha Abalungiseleli siza kwaziwa ngokuba siSikolo SeBhayibhile Sabazalwana Abangatshatanga. Kungekudala kuza kubakho neSikolo SeBhayibhile Sezibini EzingamaKristu. Esi sikolo siza kuqeqesha izibini ukuze zisetyenziswe ngakumbi kwintlangano kaYehova. UMzalwan’ uLett wenza nesaziso sokuba iSikolo Sabaveleli Abahambahambayo Nabafazi Babo kwakunye neSikolo Samalungu Ekomiti Yesebe Nabafazi Bawo siza kuba neeklasi ezimbini nyaka ngamnye ePatterson, kwenziwa ilungiselelo lokuba nabo bakhe baya kuso ngaphambili baye okwesibini.

Olu cwangciso lwaqukunjelwa ngeyona ndlela ichukumisayo xa uJohn E. Barr, oneminyaka engama-97 ubudala nolilungu elingumakad’ enetha leQumrhu Elilawulayo watsho ngomthandazo othobekileyo nosuk’ entliziyweni.b Wonke umntu wavakalelwa kukuba olu suku alusayi kuze lulibaleke.

[Imibhalo esemazantsi]

[Amagama acatshulweyo akwiphepha 19]

Bonke ababekho baluvuyela udliwano-ndlebe

[Amagama acatshulweyo akwiphepha 20]

UYehova uye wawusikelela umsebenzi wokushumayela e-Ethiopia