“Izityalo Ezisixhenxe” Zelizwe Elihle

EBHAYIBHILENI, ilizwe lakwaSirayeli lichazwa njengelineenduli neentlambo, amathafa, imilambo nemithombo. Ekubeni wawuneentlobo ntlobo zemihlaba nemozulu, wawuquka neenxalenye ezibuntlangorha ezantsi neentaba ezilala ikhephu emantla, kulo mhlaba kwakutyalwa izityalo ezahlukahlukeneyo. Xa uMoses wayethetha ‘ngelizwe elihle’ kumaSirayeli, wathi ‘lilizwe lengqolowa nerhasi neediliya namakhiwane neerharnati, ezweni leoli yeminquma nobusi,’ wabala izityalo ezisixhenxe.—Duteronomi 8:7, 8.

Nanamhla oku, kusathethwa “ngezityalo ezisixhenxe” xa kuthethwa ngemveliso yeli lizwe. Maxa wambi ezi zityalo ziye zibe kwiingqekembe nakwizitampu zeposi njengemifuziselo yokuchuma kwelizwe. Zazilinywa njani ngamaxesha okubhalwa kweBhayibhile? Zazibuchaphazela njani ubomi babantu? Makhe sibone.

“Ingqolowa Nerhasi” Nangona ingqolowa nerhasi zazityalwa ekwindla, irhasi yayivuthwa kwisithuba senyanga ngaphambi kwengqolowa. Isithungu sentlahlela emva kokuvunwa kwerhasi kwakunikelwa ngaso kuYehova etempileni kuMthendeleko weSonka Esingenagwele, ngoMatshi okanye ngoAprili. Kwakudla ngokunikelwa ngesonka sengqolowa, kuMthendeleko Weeveki, okanye ngePentekoste ngoMeyi.—Levitikus 23:10, 11, 15-17.

Kangangeenkulungwane nakwiminyaka yamvanje, amafama amaSirayeli ayehlwayela ngempama. Iinkozo zerhasi zazisithi saa phezu komhlaba. Noko ke, iinkozo zazidla ngokufuna ukugqunyelelwa. Zazigqunyelelwa ngekhuba elirhuqwa ziinkabi.

IBhayibhile idla ngokuthetha ngokutyala, ukuvuna, ukubhula, ukwela nokuguba. Zonke ezi zinto zazitheza amandla. Yonke imihla, kwakugutywa uze loo mgubo kwenziwe ngawo isonka. Le nto iwenza abe nentsingiselo amazwi kaYesu okuthandazela isonka “semihla ngemihla.” (Mateyu 6:11, iKing James Version) Isonka esenziwe ngengqolowa okanye ngerhasi yayikokona kutya kwakutyiwa ngabantu bamaxesha okubhalwa kweBhayibhile.—Isaya 55:10.

“Idiliya, Amakhiwane Neerharnati” Emva kokukhokela abantu bakhe entlango iminyaka engama-40, uMoses wabathembisa ngokutya iziqhamo zelizwe leSithembiso. Kwiminyaka engamashumi amane ngaphambili, zeza nantoni iintlola kumaSirayeli awayesentlango eyayibubungqina bokuchuma kweLizwe leSithembiso? “Ihlumelo elinesihloko esinye seediliya” esasinzima kangangokuba kwafuneka lithwalwe ‘ngesibonda ngamadoda amabini.’ Beza namakhiwane neerharnati. Zimel’ ukuba zaziginyisa ingwiqi ezo ziqhamo! Ezi yayiziziqalelo nje!—Numeri 13:20, 23.

Imithi yesidiliya ifuna ukunyanyekelwa—ukuthenwa, ukunkcenkceshelwa nokuvunwa—ukuze ihlale inemveliso. Zazibiyelwa ngodonga yaye kwakukho inqaba yomlindi, nto leyo eyayibonisa ukuba eso sidiliya sasinyanyekelwa kakuhle. AmaSirayeli ayesazi ukuba kwakufuneka ukhuthale ukuze unyamekele isidiliya nento eyayiza kwenzeka xa singahoywanga.—Isaya 5:1-7.

Emva kokuba isidiliya sivuniwe, kwakusenziwa iwayini. Izihloko zesidiliya zazixovulwa kwisixovulelo sewayini. Incindi yayidla ngokubiliswa ukuze kukhethwe iswekile okanye iyekwe ukuze ijike ibe yiwayini. Umhlaba wakwaSirayeli wawuvelisa iidiliya ekwakusenziwa ngazo iiwayini.a

Abantu ababehlala kumazwe angenawo amakhiwane babedla ngokubona kuphela omisiweyo naxovuliweyo. Ikhiwane elikhiwe emthini lalahlukile kuba laliba nencasa. Ukuze angaboli, amakhiwane ayedla ngokomiswa aze agcinwe. Kudla ngokuthethwa ‘ngezicumba zamakhiwane’ eBhayibhileni.—1 Samuweli 25:18.

Xa uqhekeza irharnati evuthiweyo, ineenkozo ezininzi ezimnandi nezinesondlo. Kuyabonakala ukuba iirharnati zazibalulekile kuba iingubo zombingeleli omkhulu neentsika zetempile kaSolomon zazihonjiswe ngazo.—Eksodus 39:24; 1 Kumkani 7:20.

‘Iminquma nobusi’ IBhayibhile ineembekiselo eziphantse zibe ngama-60 zeminquma, onokufumana kuzo ukutya neoli. Imithi yomnquma isekho kwaSirayeli nanamhlanje. (Duteronomi 28:40) Nanamhl’ oku, iintsapho zisakuthanda ukuvuna kunye ngo-Oktobha. Abavuni badla ngokubetha emthini baze baqokelele iminquma ewileyo. Iminquma iyagcinwa ize ityiwe yintsapho unyaka wonke okanye imfaxangwe ukuze kwenziwe ioli. Kaloku kuye kwafunyanwa amakhulu ezixovulelwa zamandulo xa bekusembiwa amanxiwa akudala. Kuyamangalisa namhlanje ukubona isixa seoli esigcinelwe ukusetyenziswa unyaka wonke yintsapho okanye ukuze ithengiswe. Ngaphandle kokuba ityiwa, ioli iphinde ithanjiswe ize igalelwe nasezibaneni.

Ubusi athetha ngabo uMoses mhlawumbi babuveliswa ziinyosi okanye ngokumfaxanga idiliya. Ubusi obufunxwa kwezi ziqhamo busasetyenziswa nangoku. Kodwa ubusi ekuthethwa ngabo eBhayibhileni kwingxelo kaSamson nekaYonatan yayibubusi beenyosi zasendle. (ABagwebi 14:8, 9; 1 Samuweli 14:27) Kutshanje kuye kwafunyanwa izisele zeenyosi ezingama-30 eTel Rehov emantla akwaSirayeli nto leyo ebonisa ukuba iinyosi zazifuywa kwangemihla kaSolomon.

Nanamhl’ oku, xa uhambahamba emarikeni kwaSirayeli—kwiivenkile ezithengisa iintlobo ngeentlobo zezonka, iziqhamo nemifuno—uya kufumana intabalala yezi “zityalo zisixhenxe.” Ezi zityalo zisixhenxe libathwana leentlobo ngeentlobo zokutya okuveliswa kweli lizwe. Abalimi bale mihla bayakwazi ukutyala izityalo ezivela kwamanye amazwe. Le ntabalala yemveliso ibonisa kakuhle ukuba esi siqwenga somhlaba ngokwenene ‘lilizwe elihle.’—Numeri 14:7.

[Umbhalo osemazantsi]

[Umfanekiso okwiphepha 11]

Ingqolowa

[Umfanekiso okwiphepha 11]

Irhasi

[Umfanekiso okwiphepha 12]

Idiliya

[Umfanekiso okwiphepha 12, 13]

Amakhiwane

[Umfanekiso okwiphepha 12]

Iirharnati

[Umfanekiso okwiphepha 13]

Iminquma

[Umfanekiso okwiphepha 13]

Ubusi