Ileta Evela ECongo (EKinshasa)
Ithunzi LeNtaba Yomlilo
NJENGOKO ilanga liphuma kwisixeko saseGoma, kubonakala umsobomvu. INtaba yaseNyiragongo entle, enye yezona ntaba mlilo zithanda ukugqabhuka ehlabathini, siyibona mihla le. Kusoloko kuphuma umsi kuyo. Ebusuku lo msi uba bomvu, ngenxa yodaka olushushu olungaphakathi kuyo.
NgesiSwahili, le ntaba kuthiwa yiMulima ya Moto—iNtaba Yomlilo. Le ntaba mlilo yaseNyiragongo igqibele ukugqabhuka ngowama-2002. Abahlobo nabamelwane bethu abaninzi eGoma baphulukana nazo zonke izinto zabo. Kwiindawo esishumayela kuzo nomyeni wam, sihamba kudaka lwayo olomileyo, nto leyo endenza ndizibuze ukuba kunokuba njani xa ndihamba elangeni. Abantu bale ndawo abafani nolu daka lomileyo. Banobubele yaye bayazithanda iindaba ezilungileyo zeBhayibhile esizishumayelayo. Loo nto yenza kube mnandi ukushumayela kweli Thunzi leNtaba Yomlilo.
Ndandikhangele phambili kwintsasa yangoMgqibelo. Mna, umyeni wam, abahlobo bethu ababesityelele nabanye abathunywa bevangeli, siza kuchitha usuku lonke sishumayela kwinkampu yeembacu eMugunga, esecaleni kwesixeko esisentshona. Abantu abaninzi abalapha babhaca kwiidolophu zabo.
Sipakisha uncwadi lweBhayibhile lwesiFrentshi, isiKiswahili nesiKinyarwanda elorini. Emva koko siqalisa uhambo lwethu. Njengoko sihamba kule ndlela inamagingxigingxi ngaseRoute Sake, isixeko siqalisa ukuphithizela. Sele kukho abafana abarhuqa iichukudus (iinqwelo ezenziwe ngeplanga). Abafazi abanxibe impahla enemibala eqaqambileyo bahamba ecaleni kwendlela bethwele iinyanda. Iinqwelo mafutha zithutha abantu abaya emsebenzini nasezivenkileni. Izindlu zalapha zenziwe ngamaplanga zaze zafulelwa ngezinki elipeyintwe blowu.
Sifika kwiHolo yoBukumkani eNdosho ukuze sidibane namaNgqina kaYehova esiza kushumayela nawo kule nkampu. Kuyandichukumisa ukubona ulutsha, abahlolokazi, iinkedama nabantu abaneziphene. Abanye babo baye babandezeleka ngendlela engathethekiyo kodwa baye baphucula ubomi babo ngokukhetha ukulandela imigaqo yeBhayibhile. Isithembiso seBhayibhile sithe thaa ezingqondweni zabo yaye bafuna ukwabelana ngaso nabanye. Emva kwentlanganiso emfutshane sifumana amacebiso ngendlela esiza kushumayela ngayo ukuze sikhuthaze abantu esidibana nabo, siphuma sili-130 ngeebhasi ezintlanu ezincinane nelori.
Emva kwemizuzu emalunga nama-30, sifika enkampini, eyayinamakhulu eentente ezimhlophe. Embindini wenkampu kukho udederhu lwezindlu zangasese neendawo zokuhlamba iimpahla. Kuyo yonke indawo ubona abantu behlamba iimpahla, bepheka, bechuba iimbotyi yaye betshayela amabala.
Sidibana nendoda ekuthiwa nguPapa Jacques, engusibonda wecandelo elithile lale nkampu. Ixhalatyiswe yindlela abaza kukhula ngayo abantwana bayo kula maxesha obunzima. Yavuya gqitha sakuyishiya nencwadi ethi Imibuzo Yabantu Abaselula—Iimpendulo Eziluncedo yaza yathi ufuna ukuyifunda ize ibe neqela elifundisayo.
Singekayishiyi ukuya phi loo ndawo, sidibana noMama uBeatrice. Usibuza ukuba kutheni uThixo evumela ukubandezeleka. Ucinga ukuba uThixo uyamohlwaya, kuba umyeni wakhe wabulawa emfazweni, intombi yakhe inomntwana unyana wakhe yena wathinjwa kwiinyanga ezidluleyo. Akakeva nto ngaye.
Isikhalo sikaMama uBeatrice sindikhumbuza indlela amele ukuba wavakalelwa ngayo uYobhi xa weva iindaba ezibuhlungu. Sambonisa isizathu sokubandezeleka kwakhe saza samqinisekisa ukuba akohlwaywa nguThixo. (Yobhi 34:10-12; Yakobi 1:14, 15) Sathetha nangeenguqulelo eziza kwenziwa nguThixo emhlabeni ngoBukumkani bakhe. Inkxalabo yakhe iyaphela aze ancume yaye uthi uzimisele ukuqhubeka efunda iBhayibhile nokuthandazela uncedo kuThixo.
Wonke umntu okwelo qela uyavuya yaye sivakalelwa kukuba uYehova usincedile sakwazi ukunceda abantu baba nethemba baza bakhuthazeka. Njengoko siyishiya le nkampu, abantu bawangawangisa besithi ndlela ntle ngamaphecana, amaphephancwadi neencwadi zabo.
Njengoko sibuyela ekhaya siyacamngca. Andinakuze ndilulibale olo suku lukhethekileyo. Ndikhumbula indlela awayenoxabiso ngayo uPapa uJacques, isiqabu esasibonakala kuMama uBeatrice nomama osele ekhulile oye wandincumela kuba engakwazi ukuthetha nam. Ndicinga ngabantwana abafikisayo ababuza imibuzo enengqondo ebonisa ukuqola. Iyandimangalisa indlela abomelele ngayo aba bantu bonwabileyo nangona bebandezeleke kakhulu.
Kule nxalenye yehlabathi sibona imigudu enyanisekileyo yabantu abazama ukuzisa isiqabu kubantu ababandezelekileyo. Namhlanje siye saba nelungelo lokusebenzisa iBhayibhile ukuze sibonise abantu isicombululo seengxaki zabo. Ndiziva ndonwabile ngokuba yinxalenye yeyona ntlangulo inkulu yokomoya kwezakha zakho ehlabathini.