UKunyamekela Amaxhoba Entlekele YaseRwanda

IRWANDA, emi kumbindi weAfrika, ibibizwa ngokuba “yiSwitzerland yaseAfrika.” Uhlaza olushinyeneyo olubonwa ngabantu xa behamba ngenqwelo-moya kweli lizwe lubenza babe nombono womyezo wase-Eden. Akumangalisi ukuba babedla ngokuyichaza iRwanda njengeparadisi.

Ngaxa lithile, ngomthi ngamnye ogawulwayo, kwakutyalwa emibini. Usuku olunye enyakeni lwalusetyenziselwa ukutyala amahlathi. Imithi yeziqhamo yayityalwa ngasezindleleni. Ukuhambahamba kweli lizwe kwakukhululekile yaye kulula. Iindlela ezinkulu ezidibanisa izithili ezahlukahlukeneyo nekomkhulu, iKigali, zazenziwe ngetha. Ikomkhulu lalikhula ngokukhawuleza. Umsebenzi oqhelekileyo wayefumana umvuzo owaneleyo ukuba ahlawule iindleko zakhe ekupheleni kwenyanga.

Umsebenzi wobuKristu wamaNgqina kaYehova nawo wawunempumelelo eRwanda. Ebutsheni bonyaka ophelileyo angaphezu kwama-2 600 amaNgqina abenenxaxheba ekuvakaliseni iindaba ezilungileyo zoBukumkani bukaThixo kubemi beli lizwe abamalunga nezigidi ezisibhozo uninzi lwabo olungamaKatolika. (Mateyu 24:14) NgoMatshi amaNgqina ayeqhuba izifundo zeBhayibhile ezingaphezu kwe-10-000 emakhayeni abantu. Yaye kwakukho amabandla ali-15 eKigali nakwiindawo ezikufuphi.

Umveleli ohambahambayo wamaNgqina kaYehova wathi: “NgoNovemba 1992, ndandikhonza amabandla ali-18. Kodwa ngoMatshi 1994, la mabandla anda angama-27. Kwakhona inani loovulindlela (abalungiseleli bexesha elizeleyo) lalisanda nyaka ngamnye.” NgoMgqibelo, ngoMatshi 26, 1994, ababekho kwiSikhumbuzo sokufa kukaKristu babengama-9 834.

Kwandula ke, ngephanyazo, imeko yaguquka ngokulusizi eRwanda.a

Ukuphela Ngequbuliso Kocwangco Olumiselweyo

NgoAprili 6, 1994, malunga nentsimbi yesi-8:00 ngokuhlwa, umongameli waseRwanda nowaseBurundi, ababengamaHutu bobabini, bafa kuntlitheko lwenqwelo-moya eKigali. Ngobo busuku amaxilongo amapolisa ayenokuviwa kuyo yonke indawo kwikomkhulu, yaye iindlela zavalwa. Kwandula ke ekuseni, amajoni namadoda awayexhobe ngeesabile aqalisa ukubulala amaTutsi. UNtabana Eugène—umveleli wesixeko wamaNgqina kaYehova eKigali—umkakhe, unyana wakhe, nentombi yakhe babephakathi kwabokuqala ukubulawa.

Enye intsapho yamaNgqina kaYehova engabemi baseYurophu yayifundisisa iBhayibhile nabamelwane bayo abaliqela ababengamaTutsi. Abasithoba kwaba bamelwane bazimela kwikhaya laba bemi baseYurophu njengoko ababulali abanoburhalarhume babengena kwizindlu ngezindlu. Kwimizuzu nje embalwa, abaphangi abamalunga nama-40 babesele besendlwini, bekroboza izinto yaye bebhukuqa ifanitshala. Okubuhlungu kukuba abamelwane abangamaTutsi babulawa. Noko ke, phezu kwayo nje imigudu yokusindisa abahlobo babo, abanye bavunyelwa ukuba basabe ukuze basindise ubomi babo.

Ukubulawa kwabantu kwaqhubeka kangangeeveki. Ekugqibeleni bamalunga nama-500-000 okanye ngaphezulu abemi baseRwanda ekuqikelelwa ukuba babulawa. Amawaka asaba esindisa ubomi bawo, ngokukodwa amaTutsi. Iofisi yesebe yamaNgqina kaYehova yaseZaire yazisa abazalwana baseFransi ngentswelo yabo yezinto zokunceda. Isebe laseZaire liyachaza: “Sacela igongqo elikhulu elinye leempahla ezisetyenzisiweyo. Abazalwana baseFransi basithumelele amagongqo amahlanu inkoliso yawo ineempahla nezihlangu ezitsha.” NgoJuni 11, kwathunyelwa iimpahla eziziitoni ezingama-65. Kwakhona isebe laseKenya lathumelela iimbacu iimpahla namayeza, ndawonye neeMboniselo ngeelwimi zazo zasekuhlaleni.

NgoJulayi imikhosi ekhokelwa ngamaTutsi, ebizwa ngokuba yiRwandan Patriotic Front, yayoyisa imikhosi karhulumente ekhokelwa ngamaHutu. Emva koko, amaHutu angamakhulu amawaka aqalisa ukulinikel’ umva elo lizwe. Kwabakho umbhodamo njengoko abemi baseRwanda abazizigidi ezibini nangaphezulu babegob’ ityholo kwiinkampu ezamiswa buphuthuphuthu kumazwe angabamelwane.

Azama Ukuncedana

Ababini kwabathandathu ababesebenza kwiOfisi Yokuguqulela yamaNgqina kaYehova eKigali babengamaTutsi—uAnanie Mbanda noMukagisagara Denise. Imigudu yokubasindisa yabazalwana abangamaHutu yaphumelela kangangeeveki ezimbalwa. Noko ke, ngasekupheleni kukaMeyi 1994, la maNgqina mabini angamaTutsi abulawa.

Ebeka ubomi bawo esichengeni, yaye ade abuncame, amaNgqina kaYehova azabalazela ukukhusela amanye amaKristu anemvelaphi eyahlukileyo yobuhlanga. (Yohane 13:34, 35; 15:13) Ngokomzekelo, uMukabalisa Chantal ungumTutsi. Xa amalungu eRwandan Patriotic Front ayefuna amaHutu kwibala lemidlalo awayehlala kulo, wangenelela ngenxa yabahlobo bakhe abangamaHutu. Nangona aba bavukeli bacatshukiswa yimigudu yakhe, omnye wadanduluka: “Nina maNgqina kaYehova ninobuzalwana obuluqilima ngokwenene. Unqulo lwenu lolona lulungileyo!”

Ukuhlala Engenantiyo Yobuhlanga

Oku akuthethi kuthi amaNgqina kaYehova akhuseleke ngokupheleleyo kwintiyo yobuhlanga ebikho kangangamakhulu eminyaka kule ndawo yaseAfrika. Elinye iNgqina laseFransi elalinenxaxheba kumsebenzi wokunikela uncedo lathi: “Kwanabazalwana bethu abangamaKristu bamele benze umgudu omkhulu wokuphepha ukwasulelwa yintiyo, eye yafak’ isandla ekubulaweni kwabantu okungathethekiyo.

“Sadibana nabazalwana abazibonela ngawabo amehlo ukubulawa kweentsapho zabo. Ngokomzekelo, omnye udade ongumKristu wayetshate kangangeentsuku ezimbini kuphela xa kwabulawa indoda yakhe. Wambi amaNgqina abona abantwana nabazali bawo bebulawa. Omnye udade, oseUganda sithetha nje, wabona intsapho yakhe yonke ibulawa, kuquka indoda yakhe. Oku kubalaselisa ukubandezeleka, ngokweemvakalelo nasemzimbeni, okuye kwachaphazela intsapho nganye yamaNgqina kaYehova.”

Ewonke, amalunga nama-400 amaNgqina abulawa kugonyamelo lobuhlanga. Ukanti akukho nalinye kula elibulewe ngamanye amaNgqina. Noko ke, amaTutsi namaHutu angamalungu eecawa zamaRoma Katolika nezamaProtestanti, aye abulala amawaka. Njengoko kusaziwa kakuhle, amaNgqina kaYehova ehlabathini lonke akathabathi cala kwaphela kwiimfazwe, iimvukelo, okanye kungquzulwano olunjalo lweli hlabathi.—Yohane 17:14, 16; 18:36; ISityhilelo 12:9.

Ukubandezeleka Ngendlela Engathethekiyo

Kobu busika budluleyo, ehlabathini jikelele abantu bebebona imifanekiso engakholelekiyo yokubandezeleka kwabantu. Amakhulu amawaka eembacu zaseRwanda ayebonwa engumsinga ukuya kumazwe angabamelwane yaye ahlala apho phantsi kwezona meko zingentle ngokwempilo. Omnye wamaNgqina kaYehova ovela eFransi nowayehambisa uncedo wachaza imeko eyabonwa ligqiza lakhe ngoJulayi 30 ngokulandelayo.

“Sasidibana nemibono eyoyikeka kakhulu. Kangangeemayile ezininzi, izidumbu zazikroze endleleni. Amangcwaba asekuhlaleni ayezaliswe ngamawaka ezidumbu. Ivumba elibi njengoko sasidlula kwinyambalala yabantu ababebilile lalinganyamezeleki, nabantwana babedlala ngakwizidumbu. Kwakukho izidumbu zabazali abantwana babo ababesaphila yaye besabeleke kwimiqolo yabo. Imibono enjalo, esayibona ngokuphindaphindiweyo, yasichukumisa ngokunzulu. Umntu ugutyungelwa yimvakalelo yokungabi nakuzinceda ngokupheleleyo, yaye akanakunganxunguphali ngenxa yobuninzi bezinto ezihambis’ umzimba nezibuhlungu.”

Xa iimbacu zazingumsinga ukuya eZaire zingamashumi amawaka phakathi kwinyanga kaJulayi, amaNgqina aseZaire aya emdeni aza aphatha iimpapasho zeBhayibhile ukuze abazalwana bawo abangamaKristu nabantu abanomdla bawabone. Iimbacu ezingamaNgqina ezivela eRwanda zahlanganiswa zaza zasiwa kwiHolo yoBukumkani kwiGoma ekufuphi, apho zanyanyekelwa khona. AmaNgqina anamava kwezonyango azibhokoxa ukuze anciphise ukubandezeleka kwabagulayo, phezu kwako nje ukungabikho kwamayeza aneleyo nezakhiwo ezifanelekileyo.

Ukusabela Ngokukhawuleza Ekubandezelekeni

NgoLwesihlanu, ngoJulayi 22, amaNgqina kaYehova aseFransi afumana iSOS (isicelo soncedo) ngomatshini wokuthumela imiyalezo ebhaliweyo sivela eAfrika. Sachaza imeko emaxongo yabazalwana bawo abangamaKristu abathe bayinikela umva iRwanda. Kwimizuzu emihlanu okanye elishumi besifumene esi saziso, abazalwana bagqiba ekubeni bathumele izinto zokunceda ngenqwelo-moya ethutha iimpahla. Oku kwakhokelela ekubeni ngempela-veki baxakeke belungiselela, nto leyo eyayiphawuleka ngokukhethekileyo ngenxa yokungabi namava kwabo ngokupheleleyo ekulungelelaniseni iphulo lokunikela uncedo elinjalo ukuba likhulu ngexesha elifutshane.

Kwasatyelwa ngendlela engummangaliso kwintswelo yokunikela ngemali yokunceda. AmaNgqina aseBelgium, eFransi naseSwitzerland kuphela anikela ngaphezu kwe-R5 800 000. Kwafunyanwa izinto zokunceda, kuquka ukutya, amayeza, nezixhobo zokubanceda basinde, yaye yonke into yafakwa ezibhokisini yaza yabhalwa kwizakhiwo zamaNgqina kaYehova eLouviers, eFransi, naseBrussels, eBelgium. AmaNgqina asebenza imini nobusuku ukuze izinto ezaziza kuthunyelwa zilungele ukusiwa eOstend, eBelgium. Kwisikhululo seenqwelo-moya salapho, ngoLwesithathu, ngoJulayi 27, kwalayishwa iitoni ezingaphezu kwama-35 kwinqwelo-moya ethutha iimpahla. Kusuku olulandelayo iintwanantwana ezazimele zithunyelwe, ngokuyintloko amayeza, zathunyelwa. NgoMgqibelo, kwiintsuku ezimbini kamva, enye inqwelo-moya yathumela amayeza angakumbi ukwenzela amaxhoba.

AmaNgqina aseFransi, kuquka ugqirha, aya eGoma ngaphambi kokuthunyelwa kwempahla eninzi. NgoMvulo, ngoJulayi 25, xa uGqr. Henri Tallet wafika eGoma, ngamaNgqina amalunga nama-20 awayesele ebulewe sisifo sekholera, ibe amanye ayesifa umhla nezolo. Ngenxa yokuba ezi mpahla zathunyelwayo zazimele zihanjiswe ngendlela yaseBujumbura, eBurundi, ekumgama omalunga neekhilomitha ezingama-250, azizange zifike eGoma de kwangoLwesihlanu kusasa, ngoJulayi 29.

Ukuhlangabezana Nesifo

Ebudeni belo thuba, kwisiza apho yayimi khona iHolo yoBukumkani eGoma, amaNgqina amalunga ne-1 600 nabahlobo bawo axinaniswa ndawonye. Aba bantu bonke, babesebenzisa indlu yangasese enye, kungekho manzi, yaye kukho ukutya okuncinane. Uninzi olwalunesifo sekholera lwaluxinene kwiHolo yoBukumkani. Inani labafayo lalisanda.

Ikholera iwagqiba kuthi tu amanzi emzimbeni womntu. Amehlo abona luzizi aze atshone loxe. Ukuba unyango lokubuyisela amanzi emzimbeni luqaliswe kuselithuba, umntu uyachacha emva kweentsuku ezimbini. Ngoko ke, ngokukhawuleza kwenziwa imigudu yokubuyisela amanzi kubazalwana ngamayeza amancinane awayekho.

Ukongezelela, abazalwana bazama ukubabeka bodwa abagulayo ukuze bangasuleli abanye. Babefuna ukuzifudusa iimbacu kwiimeko ezimaxongo zaseGoma. Indawo efanelekileyo yafunyanwa kufuphi neChibi iKivu, kude eluthulini nevumba lezidumbu elalibophile.

Kwembiwa izindlu zangasese, kwaza kwabekwa imithetho engqongqo yococeko. Le yayiquka ukuhlamba izandla zikabani kwisitya esinezibulala-ntsholongwane namanzi xa evela ngasese. Kwabethelelwa imbaluleka yale milinganiselo, yaye abantu bakwamkela oko babefanele bakwenze. Kungekudala ukusasazeka kwesi sifo sibulalayo kwancitshiswa.

Xa izinto ezininzi zokunceda ezazithunyelwe zafikayo ngoLwesihlanu, ngoJulayi 29, kwasekwa isibhedlele esincinane kwiHolo yoBukumkani yaseGoma. Kwamiswa iibhedi ezisongwayo ezimalunga nama-60, ndawonye nenkqubo yokucoca amanzi. Ukongezelela, kwasiwa iintente kumaNgqina awayehlala ngakwiChibi iKivu. Ngexesha elifutshane, amisa iintente ezingama-50 azikrozisa kakuhle, nangocwangco.

Ngesinye isihlandlo amalunga ne-150 amaNgqina nabahlobo bawo awayegula ngokungaginyisi-mathe. Kwiveki yokuqala ka-Agasti, kwakufe angaphezu kwama-40 eGoma. Kodwa amayeza noncedo lwafika ngexesha ukuze kusindiswe ubomi babaninzi nokuze kupheliswe ukubandezeleka okukhulu.

Abantu Bokomoya, Abanombulelo

Iimbacu ezingamaNgqina zabonisa umbulelo omkhulu ngako konke ezazikwenzelwa. Zachukunyiswa luthando olwaboniswa ngabazalwana bazo abangamaKristu abakwamanye amazwe nabubungqina obucacileyo bokuba ngokwenene zingamalungu obuzalwana bezizwe ngezizwe.

Phezu kwabo nje ubunzima ezikubo, ezi mbacu ziye zabulondoloza ubumoya bazo. Eneneni, omnye umbukeli waphawula ukuba “zibonakala zikuxhalabele ngakumbi ukufumana ukudla kokomoya kunoncedo lwezinto eziphathekayo, nangona ziziswele gqitha izinto ezininzi.” Kusatyelwa kwisicelo sazo, kwathunyelwa imibhalo engama-5 000 yoncedo lokufundisisa iBhayibhile Unokuphila Ngonaphakade KwiParadisi Esemhlabeni ngolwimi lwaseRwanda isiKinyarwanda kwiinkampu zeembacu ezahlukahlukeneyo.b

Iimbacu zazihlolisisa itekisi yeBhayibhile suku ngalunye, yaye zazilungelelanisa iintlanganiso zebandla. Kwakhona kwenziwa amalungiselelo okuqhuba iiklasi zesikolo kusenzelwa abantwana. Abafundisi-ntsapho basebenzisa ezi klasi ukufundisa imithetho yococeko, begxininisa ukuba ukusinda kuxhomekeke ekuyigcineni.

Imfuneko Yokuzinyamekela Ngokuqhubekayo

Amakhulu eembacu ezingamaNgqina ayehlala kwezinye iindawo ngaphandle kwaseGoma, njengaseRutshuru. Kwanikelwa uncedo olufa nayo kwaba bazalwana. NgoJulayi 31, igqiza lamaNgqina asixhenxe lasuka eGoma ngenqwelo-moya ukuya eBukavu emazantsi, apho kwakukho iimbacu ezingamaNgqina ezimalunga nama-450. Uninzi lwazo lwalusuka eBurundi. Kwakuqhambuke isifo sekholera apho, yaye kwanikelwa uncedo ngelinge lokuthintela ukuba bangafi aba bazalwana.

Ngosuku olulandelayo eli gqiza lahamba phantse iikhilomitha ezili-150 ngendlela eya eUvira, eZaire, apho ngasendleleni kwakukho amaNgqina amalunga ne-1 600 kwiindawo ezisixhenxe awayevela eRwanda naseBurundi. Afundiswa indlela yokuzikhusela kwisifo. Ingxelo esekelwe koko kwafunyaniswa leli gqiza yathi: “Oko sele kwenziwe ukuza kuthi ga ngoku sisiqalo nje, yaye sithetha nje bangama-4 700 abantu abafumana uncedo lwethu abasaya kufuna uncedo olungakumbi kangangeenyanga ezininzi.”

Kunikelwa ingxelo yokuba amakhulu amaNgqina abuyela eRwanda ngoAgasti. Ukanti enyanisweni onke amakhaya neempahla zaphangwa. Ngoko kukho ucelomngeni lokwakhiwa kwakhona kwamakhaya neeHolo zoBukumkani.

Abakhonzi bakaThixo bayaqhubeka bebathandazela ngokunyanisekileyo abo baye babandezeleka kakubi ngolo hlobo eRwanda. Siyazi ukuba njengokuba isiphelo sale nkqubo yezinto sisondela, ugonyamelo lusenokwanda. Noko ke, amaNgqina kaYehova ehlabathini lonke aya kuqhubeka egcine ubundilele bawo bobuKristu aze abonakalise uvelwano lwawo olunyanisekileyo.

[Imibhalo esemazantsi]

[Imaphu ekwiphepha 12]

(Ukuba ufuna inkcazelo ehlahlelwe kakuhle, yiya kwimpapasho)

RWANDA

Kigali

UGANDA

ZAIRE

Rutshuru

Goma

Lake Kivu

Bukavu

Uvira

BURUNDI

Bujumbura

[Imifanekiso ekwiphepha 15]

Ngasekhohlo: UNtabana Eugène nentsapho yakhe babulawa. Ekunene: UMukagisagara Denise, ongumTutsi, wabulawa, phezu kwayo nje imigudu yokumsindisa yabazalwana abangamaHutu

[Imifanekiso ekwiphepha 16, 17]

Ngasentla: Ukunyamekela abagulayo kwiHolo yoBukumkani eGoma. Ezantsi ngasekhohlo: Iitoni ezingaphezu kwama-35 zezinto zokunceda ezalungiselelwa ngamaNgqina zaza zathunyelwa ngenqwelo-moya ethutha iimpahla. Ngezantsi: Kufuphi neChibi iKivu, apho afuduselwa khona amaNgqina. Ezantsi ngasekunene: Iimbacu zaseRwanda kwiHolo yoBukumkani eZaire