“Ukuxhathisa Okufanele Kothulelwe Umnqwazi”

NGEXESHA lokulawula kukaAdolf Hitler eJamani ngokungenalusini wabhalelwa amawaka waka eeleta. Ngowe-1945, xa imikhosi yaseRashiya yathimba imihlaba engqonge iBerlin, uninzi lwezo leta lwaya kugcinwa eMoscow. Ingcali yembali uHenrik Eberle uye wafunda loo mawaka eeleta kumathala aseMoscow ukuze abone ukuba ngoobani ababebhalela uHitler yaye kwakutheni. Lo kaEberle wabhala izigqibo afikelela kuzo kwincwadi yakhe ethi Briefe an Hitler (Iileta ezibhalelwe uHitler).

Ugqr. Eberle uthi: “Ootishala nabafundi, oonongendi nabefundisi, abantu abangaphangeliyo noosomashishini, abaphathi-mikhosi namajoni bonke babhalela uHitler. Abanye babemjonga njengoMesiya ozelwe ngokutsha; abanye babemjonga njengobungendawo bumntwisiwe.” Ngaba uHitler wafumana iileta kumagosa eecawa awayekhalazela izinto ezimbi ezazisenziwa ngamaSoshiyali, okanye ngamaNazi? Zazikho kodwa zazimbalwa.

Noko ke, kumathala aseMoscow, uEberle wafumana ifayile eyayineeleta ezininzi ezazibhalelwe uHitler ngamaNgqina kaYehova esuka kwiindawo ngeendawo zaseJamani, ekhalazela izinto ezazisenziwa ngamaNazi. AmaNgqina athumelela uHitler izikhalazo ngeeleta nangeengcingo ezingama-20 000 ezivela kumazwe angama-50. Kwabanjwa amawaka amaNgqina, aze amakhulu awo abulawa okanye afa ngenxa yokuphathwa kakubi. UGgr. Eberle ugqiba kwelokuba: “Ngenxa yezigidi zamaxhoba olawulo lwamaNazi, eli nani [lamaNgqina] lisenokubonakala lilincinane. Nakuba kunjalo libonisa ubungqina bokuxhathisa obufanele bothulelwe umnqwazi.”