Kutheni Ufanele Uphile Ngemilinganiselo YeBhayibhile?
NGABA imbono yeBhayibhile ngesini iphelelwe lixesha yaye ingqongqo? Akunjalo. Ngokwahlukileyo koko, imbono yeBhayibhile ngesini inokusinceda siphephe:
▪ Izifo ezidluliselwa ngesini
▪ Ukukhulelwa ungatshatanga nokuba nomntwana ngaphandle komtshato
▪ Imiphumo ebuhlungu yokuqhawuka kwemitshato
▪ Umvandedwa
▪ Nokuziva uxhatshaziwe
Umdali wethu, uYehova uThixo,a ufuna sizinandiphe izipho asiphe zona. UThixo “ukufundisa okuyingenelo kuwe.” (Isaya 48:17) Umntu ophila ngokuvisisana nemithetho kaThixo elawula isini uzuza ezi zinto zilandelayo:
▪ UThixo uyakholiswa nguye
▪ Uxolo lwengqondo
▪ Intsapho emanyeneyo
▪ Igama elihle
▪ Ukuzihlonela
Kuthekani ukuba ngoku akuphili ngokuvisisana nemilinganiselo yeBhayibhile? Ngaba ungakwazi ukuyitshintsha indlela ophila ngayo? Ngaba uThixo uza kukuphendulisa ngezinto ozenze kwixesha elidluleyo?
Khawucinge ngoku: Bambi kwibandla lamaKristu lenkulungwane yokuqala babengabahenyuzi, abakrexezi namafanasini. Bakhetha ukuyitshintsha indlela ababephila ngayo yaye bancedakala ngokwenjenjalo. (1 Korinte 6:9-11) Namhlanje, amawaka abantu ehlabathini jikelele baye benza ukhetho olufanayo. Baye bazikhulula kubomi boburheletyo kwaye baye bancedakala ngokuvisisanisa ubomi babo nemigaqo yeBhayibhile. Ngokomzekelo, cinga ngamava kaSarah okhankanywe ekuqaleni kolu ngcelele.
“Ndafumana Isiqabu”
USarah wafumanisa ukuba indlela awayephila ngayo ayizange imzisele ulwaneliseko nenkululeko nto ezo awayezilangazelela. Uthi: “Ndandivakalelwa kukuba isazela sam sifile. Ndandineentloni yaye ndixhalabele ukuba ndisenokukhulelwa okanye ndifumane isifo esosulelayo. Andizange ndiyeke ukukholelwa ukuba uThixo ukho yaye ndandisazi ukuba ikhondo lam liyamkhathaza. Ndandiziva ndingacocekanga yaye oko kwakundingcungcuthekisa.”
Ekugqibeleni uSarah wade wawafumana amandla okutshintsha indlela awayephila ngayo. Wacela uncedo kubazali bakhe abangamaNgqina kaYehova. Waphinda wacela uncedo nakubadala bebandla. USarah uthi: “Ndamangaliswa bubele nothando lwabazali nolwabadala bebandla, ndafumana isiqabu.”
Ngoku uSarah ukhulisa abantwana bakhe ababini. USarah uthi: “Ndithetha phandle nabantwana bam ngokhetho endalwenzayo. Ndifuna bazi indlela ekundichaphazele ngayo ukungayinanzi imilinganiselo kaThixo. Ngokuphathelele isini usukelo lwam kukubanceda baxabise indlela umntu anokuncedakala ngayo ngokwasenyameni, engqondweni nangokwemvakalelo xa ephila ngemilinganiselo kaThixo.” Woleka umsundulo athi: “Ndeyisekile kukuba uThixo usinika imilinganiselo efanelekileyo yokuziphatha kuba akafuni senzakale.”
Nawe usenokungenelwa ngokulandela imithetho kaThixo yothando. IBhayibhile ithembisa oku: “Imiyalelo evela kuYehova ithe tye, iyibangela ibe nemihlali intliziyo; umyalelo kaYehova uhlambulukile, uwenza akhanye emehlo. . . . ekuzigcineni kukho umvuzo omkhulu.”—INdumiso 19:8, 11.b
[Imibhalo esemazantsi]
a UYehova ligama likaThixo elichazwe eBhayibhileni.
b Ukuze ufunde okungakumbi ngala macebiso eBhayibhile, thetha namaNgqina kaYehova kuloo ndawo uhlala kuyo. Okanye unokubhalela kwenye yedilesi ezikwiphepha 4 okanye uye kwiWebhusayithi yethu ethi www.watchtower.org.
[Amagama acatshulweyo akwiphepha 8]
Abo bangayinanziyo imilinganiselo yeBhayibhile badla ngokudandatheka
[Amagama acatshulweyo akwiphepha 9]
Abo baphila ngemilinganiselo yeBhayibhile baba nezazela ezicocekileyo kwaye baba neentsapho ezimanyeneyo