Funda KwiLizwi LikaThixo
Usinceda Njani Umthetho KaThixo?
Eli nqaku libuza imibuzo ekunokwenzeka ukuba ukhe wazibuza yona lize likubonise iimpendulo zalo eBhayibhileni. AmaNgqina kaYehova aya kukuvuyela ukuthetha nawe ngeempendulo zale mibuzo.
1. Kutheni sifanele sithobele uThixo?
Simele simthobele uThixo kuba wasidala. KwanoYesu wayesoloko emthobela uThixo. (Yohane 6:38; ISityhilelo 4:11) Imithetho kaThixo isinika indlela yokubonisa ukuba siyamthanda.—Funda eyoku-1 kaYohane 5:3.
Yonke imithetho kaYehova uThixo yenzelwe thina. Isifundisa indlela efanelekileyo yokuphila ubomi ngoku ize isibonise indlela esinokufumana ngayo ikamva likanaphakade.—Funda iNdumiso 19:7, 11; uIsaya 48:17, 18.
2. Imithetho kaThixo isinceda njani ngokwasempilweni?
Umthetho kaThixo owalela ukunxila uyasikhusela kwizifo ezibulalayo nakwiingozi. Ukusela ngokugqithiseleyo kuyachewula yaye kunokusiqhubela ekubeni senze izinto zobudenge. (IMizekeliso 23:20, 29, 30) UYehova uyasivumela ukuba sibusele ngobungcathu utywala.—Funda iNdumiso 104:15; 1 Korinte 6:10.
UYehova ulumkisa ngokuba nomona, umsindo ongalawulekiyo nezinye izimo zengqondo eziyingozi. Siyakuba sempilweni ukuba siyalisebenzisa icebiso lakhe.—Funda iMizekeliso 14:30; 22:24, 25.
3. Unokusikhusela njani umthetho kaThixo?
Umthetho kaThixo uyakwalela ukuba neentlobano zesini ngaphandle komtshato. (Hebhere 13:4) Izibini ezithobela lo mthetho ziziva zikhuseleke ngakumbi ize loo nto yenze abantwana bakhulele kwimeko entle. Kwelinye icala, ukwabelana ngesondo nomntu ongatshatanga naye kudla ngokubangela ukuba ube nezifo, uqhawulo mtshato, ugonyamelo, udandatheko nomzali okhulisa abantwana eyedwa.—Funda iMizekeliso 5:1-9.
Xa siphepha iimeko ezenza sabelane ngesondo nabantu esingatshatanga nabo, sikhusela ubuhlobo bethu noThixo. Sikhusela nabanye ezintlungwini.—Funda eyoku-1 kwabaseTesalonika 4:3-6.
4. Kusikhusela njani ukuhlonela ubomi?
Abantu abasihlonelayo isipho sikaThixo sobomi baba sempilweni xa beyeka ukutshaya neminye imikhwa eyingozi. (2 Korinte 7:1) UThixo uyabuxabisa nobomi bomntwana ongekazalwa. (Eksodus 21:22, 23) Ngoko asimele siqhomfe. Nabo banembono kaThixo ngobomi bayazikhusela emsebenzini, ekhaya nakwizithuthi zabo. (Duteronomi 22:8) Ukongezelela koko, abayidlali imidlalo ebeka ubomi babo esichengeni, kuba ubomi sisipho esivela kuThixo.—Funda iNdumiso 36:9.
5. Businceda njani ubungcwele begazi?
Igazi lingcwele kuba uThixo uthi limela ubomi okanye umphefumlo wesidalwa. (Genesis 9:3, 4) Umthetho kaThixo, othi ixabiso legazi liyalingana nobomi uyasinceda. Njani? Libangela kuxolelwe izono.—Funda iLevitikus 17:11-13; Hebhere 9:22.
Igazi likaYesu lalixabiseke ngakumbi kuba wayefezekile. UYesu wanikela kuThixo into eyayimela ubomi bakhe—igazi lakhe. (Hebhere 9:12) Igazi lakhe elaphalalayo lenza sikwazi ukufumana ubomi obungunaphakade.—Funda uMateyu 26:28; Yohane 3:16.
Ukuze ufumane inkcazelo engakumbi, funda isahluko 12 nese-13 sencwadi ethi, Yintoni Ngokwenene Efundiswa YiBhayibhile?, epapashwe ngamaNgqina kaYehova.