Nceda Amadoda Enze Inkqubela Yokomoya

“Ukususela ngoku uya kubambisa abantu bephila.”—LUKA 5:10.

1, 2. (a) Asabela njani amadoda kwiimfundiso zikaYesu? (b) Yintoni esiza kuyiqwalasela kweli nqaku?

KUHAMBO lokushumayela eGalili, uYesu nabafundi bakhe bakhwela isikhephe besiya kwindawo esecaleni. Kodwa izihlwele zabalandela zihamba ngeenyawo. Ababekho ngaloo mini “yayingamadoda amalunga namawaka amahlanu, ngaphandle kwabafazi nabantwana abaselula.” (Mat. 14:21) Ngesinye isihlandlo, isihlwele seza kuYesu sifuna ukuphiliswa nokuze simve ethetha. Apho kwakukho “amadoda angamawaka amane, ngaphandle kwabafazi nabantwana abaselula.” (Mat. 15:38) Kuyacaca ukuba, amadoda amaninzi ayekho phakathi kwabantu ababesiya kuYesu enomdla kwiimfundiso zakhe. Enyanisweni, wayelindele ukuba kusabele abantu abangakumbi, kuba emva kokuba encede abafundi bakhe babambisa iintlanzi ngokungummangaliso, uYesu wathi kubo: ‘Ukususela ngoku niya kubambisa abantu bephila.’ (Luka 5:10) Abafundi bakhe babeza kuthoba iminatha yabo kulwandle lwabantu baze balindele ‘ukubambisa’ zonke iindidi zabantu, kuquka amadoda amaninzi.

² Ngokufanayo namhlanje, amadoda aba nomdla kwisigidimi esiseZibhalweni esisishumayelayo yaye ayasabela kuso. (Mat. 5:3) Noko ke, amadoda amaninzi aba madolw’ anzima, nto leyo eyenza kube nzima ukwenza inkqubela yokomoya. Sinokuwanceda njani? Nangona uYesu wayengenantshumayelo ikhethekileyo eyayilungiselelwe amadoda, ngokuqinisekileyo wathetha ngezinto ezazichaphazela amadoda ngomhla wakhe. Sisebenzisa umzekelo wakhe, makhe sibone indlela esinokuwanceda ngayo amadoda ahlangabezane nezinto ezintathu ezixhalabisayo namhlanje: (1) indlela yokuziphilisa, (2) ukoyika oko kuthethwa ngabantu, kwakunye (3) nokuziva ungafaneleki.

Indlela Yokuziphilisa

3, 4. (a) Yintoni eyona nto ixhalatyelwe ngamadoda amaninzi? (b) Kutheni amanye amadoda ebeka phambili ukuzama ukuziphilisa kunosukelo lokomoya?

³ Omnye umbhali wathi kuYesu: “Mfundisi, ndiza kukulandela naphi na apho uya khona.” Noko ke, xa uYesu wamxelela ukuba “uNyana womntu akanayo nendawo le yokufaka intloko,” lo mbhali wathandabuza. Kuyabonakala ukuba, akazange ayiginye ncam into yokungaqiniseki ngento yokutya nendawo yokuhlala, kuba ayikho into ebonisa ukuba wada waba ngumlandeli kaKristu.—Mat. 8:19, 20.

⁴ Amadoda asoloko exhalabele ukukhuseleka ngokwezimali kunezinto zokomoya. Ukufumana imfundo ephakamileyo nomsebenzi ohlawula kakuhle, kudla ngokuba zizinto eziphambili kumadoda amaninzi. Ngokwendlela acinga ngayo, umvuzo wemali ungxamisekile yaye uluncedo ngaphezu kwazo naziphi na iingenelo ezifumaneka ekufundeni iZibhalo nasekuzameni ukuba nolwalamano olusenyongweni noThixo. Nakuba esenokukuthanda oko kufundiswa yiBhayibhile, kodwa “amaxhala ale nkqubo yezinto namandla akhohlisayo obutyebi” aminxa nawuphi na umdla anokuba nawo. (Marko 4:18, 19) Qwalasela indlela uYesu awabanceda ngayo abalandeli bakhe bazibeke kwindawo yokuqala izinto ezibalulekileyo.

5, 6. Yintoni eyanceda uAndreya, uPetros, uYakobi noYohane ukuba balungelelanise izinto eziza kuqala kubo ngokuphathelele ukuba nesabelo kwabo kumsebenzi wokushumayela nomsebenzi wokuziphilisa?

⁵ UAndreya kunye nomntakwabo uSimon Petros babeqhuba kunye ishishini lokuloba. UYohane, umntakwabo uYakobi kwakunye noyise uZebhedi babenelabo ishishini. Ishishini laliqhuba kakuhle kangangokuba babeqeshe abanye abantu. (Marko 1:16-20) Xa uYohane uMbhaptizi waqala wachazela uAndreya noYohane ngoYesu, baqiniseka ukuba bamfumene uMesiya. Emva kokuba eve ezi ndaba, uAndreya waya kuxelela umntakwabo uSimon Petros yaye mhlawumbi noYohane wenza loo nto kumntakwabo uYakobi. (Yoh. 1:29, 35-41) Kwiinyanga ezalandelayo, bonke aba bane bachitha ixesha kunye noYesu njengoko wayeshumayela eGalili, kwaYuda naseSamariya. Emva koko, aba bafundi bane babuyela kwishishini labo lokuloba. Babenawo umdla kwizinto zokomoya, kodwa ubulungiseleli babungeyiyo eyona nto iphambili babeyixhalabele.

⁶ Ekuhambeni kwexesha, uYesu wacela uPetros noAndreya ukuba bamlandele baze babe ‘ngabalobi babantu.’ Basabela njani aba babini? ‘Bayishiya kwaoko iminatha yabo baza bamlandela.’ Wenza ngendlela efanayo noYakobi noYohane. ‘Basishiya kwaoko isikhephe noyise, bamlandela.’ (Mat. 4:18-22) Yintoni eyanceda la madoda angena kubulungiseleli bexesha elizeleyo? Ngaba esi yayisisigqibo esenziwa ngesiquphe? Akunakuba kwakunjalo! Kwiinyanga ezingaphambi koko, la madoda amphulaphula uYesu, ambona esenza imimangaliso, abukela indlela awayenenzondelelo ngayo ngobulungisa aza abona indlela ababesabela ngayo abantu awayeshumayela kubo. Ngenxa yoko, ukholo ababenalo kuYehova nentembelo yabo zomelela ngakumbi!

7. Sinokuzinceda njani izifundo zeBhayibhile ukuba zithembele kumandla kaYehova okunyamekela abantu bakhe?

⁷ Singamxelisa njani uYesu ekuncedeni izifundo zeBhayibhile zibe nentembelo kuYehova? (IMize. 3:5, 6) Indlela esifundisa ngayo ibaluleke kakhulu kulo mba. Xa sifundisa, sinokubalaselisa isithembiso sikaThixo sokusisikelela ngokuyintabalala xa sibeka uBukumkani kwindawo yokuqala. (Funda uMalaki 3:10; noMateyu 6:33.) Nakuba sinokusebenzisa izibhalo ezahlukahlukeneyo ukuze sibethelele indlela uYehova abanyamekela ngayo abantu bakhe, asimele sikulibale ukubaluleka komzekelo thina esiwubonisayo. Ukubalisa amava ethu kunokuzinceda kakhulu izifundo zethu zithembele ngakumbi ngoYehova. Singabalisa namava akhuthazayo esifunda ngawo kwiincwadi zethu.a

8. (a) Kutheni kubalulekile ukuba isifundo seBhayibhile ‘singcamle size sibone ukuba uYehova ulungile’? (b) Singazinceda njani izifundo zethu ukuba zingcamle ukulunga kukaYehova?

⁸ Ukuba nokholo olomeleleyo akupheleli nje ekufundeni nasekuveni ngendlela abanye abaye bazifumana ngayo iintsikelelo zikaYehova. Isifundo seBhayibhile simele sikungcamle ngokwaso ukulunga kukaYehova. Umdumisi wacula wathi: “Ngcamlani nibone ukuba uYehova ulungile; inoyolo indoda eyomeleleyo esabela kuye.” (INdu. 34:8) Singasinceda njani isifundo seBhayibhile sibone ukulunga kukaYehova? Masithi lowo simfundelayo uneengxaki zemali yaye uzama ukulwisana nomkhwa ombi, onjengokutshaya, ukungcakaza okanye ukunxila. (IMize. 23:20, 21; 2 Kor. 7:1; 1 Tim. 6:10) Akungebi eyona ndlela ifanelekileyo yokumnceda abone ukulunga kukaYehova kukumfundisa ukuba athandazele uncedo lukaThixo ukuze alwe nalo mkhwa mbi? Kanti cinga ngoko kunokwenzeka ukuba besinokukhuthaza umntu esimfundelayo ukuba abeke kuqala izinto zokomoya ngokuba nexesha lokufundisisa iBhayibhile veki nganye aze alungiselele yaye abekho kwiintlanganiso zamaKristu. Kaloku, njengoko sibona indlela uYehova ayisikelela ngayo imigudu yaso, ukholo lwaso luya komelela ngakumbi!

Ukoyika Oko Kuthethwa Ngabantu

9, 10. (a) Yintoni eyayisenza uNikodemo noYosefu waseArimathiya bakufihle ukuthanda kwabo uYesu? (b) Kutheni amanye amadoda namhlanje eziziliza ukulandela uKristu?

⁹ Ngenxa yengcinezelo yoontanga, amanye amadoda asenokuziziliza ukulandela uKristu ngokupheleleyo. UNikodemo noYosefu waseArimathiya bakugcina kuyimfihlelo ukumthanda kwabo uYesu kuba babesoyika oko kwakunokuthethwa okanye kwenziwe ngamanye amaYuda xa esiva oko. (Yoh. 3:1, 2; 19:38) Babenesizathu sokoyika. Indlela iinkokeli zonqulo ezazimthiye ngayo uYesu yaya isithi chatha kangangokuba nabani na owayesithi ukholelwa kuye wayegxothwa kwindlu yesikhungu.—Yoh. 9:22.

¹⁰ Kwezinye iindawo namhlanje, ukuba indoda iba nomdla kakhulu kuThixo, eBhayibhileni, okanye kunqulo, inokugculelwa ngabo isebenza nabo, abahlobo bayo okanye izalamane zayo. Kanti kwezinye iindawo, kusenokuba yingozi kwaukuthetha ngokutshintsha unqulo lwakho. Ingcinezelo yoontanga inokuthi kratya xa indoda ililungu lomkhosi, ikwiipolitiki okanye ibandakanyekile kwimiba yasekuhlaleni. Ngokomzekelo, enye indoda eJamani yavuma yathi: “Oko nikufundisayo nina maNgqina ngeBhayibhile kuyinyaniso. Kodwa xa bendinokuba liNgqina namhlanje, ngomso ibiya kuba sele isaziwa ngumntu wonke loo nto. Bebeya kucinga ntoni abo ndisebenza nabo, abamelwane, nabombutho esiyinxalenye yawo nentsapho yam? Andinakukwazi ukumelana naloo nto.”

11. UYesu wabanceda njani abafundi bakhe bahlangabezane nokoyika abantu?

¹¹ Nakuba kwakungekho namnye uligwala kubapostile bakaYesu, bonke babelwisana nokoyika abantu. (Marko 14:50, 66-72) UYesu wabanceda njani ukuba benze inkqubela nakuba babejamelene nengcinezelo emandla yoontanga? UYesu wathabatha amanyathelo okulungiselela abafundi bakhe inkcaso ababeza kuyifumana. Wathi: “Ninoyolo xa sukuba abantu benithiyile, naxa sukuba benikhuphela bucala yaye beningcikiva kwaye beliphosela phandle igama lenu njengelingendawo ngenxa yoNyana womntu.” (Luka 6:22) UYesu wabalumkisa abalandeli bakhe ukuba bamele bakulindele ukugculelwa. Nakuphi na ukugculelwa kwakusenziwa “ngenxa yoNyana womntu.” Kwakhona uYesu wabaqinisekisa ukuba uThixo uya kubaxhasa logama nje bethembele kumandla nakuncedo Lwakhe. (Luka 12:4-12) Ngaphezu koko, uYesu wamema abatsha ukuba basondelelane baze bakhe ubuhlobo nabafundi bakhe.—Marko 10:29, 30.

12. Ziziphi iindlela esinokunceda ngazo abatsha boyise ukoyika abantu?

¹² Nathi simele sizincede izifundo zethu zeBhayibhile zoyise ukoyika abantu. Ngokuqhelekileyo kulula ukujamelana nocelomngeni xa ululindele. (Yoh. 15:19) Ngokomzekelo, kutheni ungasincedi isifundo ukuba silungiselele iimpendulo ezilula, ezisengqiqweni nezisekelwe eBhayibhileni zemibuzo neengxubusho ezinokuvuswa ngabo sisebenza nabo nangabanye? Ukongezelela ekubeni wena ube ngumhlobo osondeleyo kuso, unokusazisa kwabanye abantu abasebandleni, ingakumbi kwabo kusenokwenzeka ukuba sinezinto esifana ngazo nabo. Ngaphezu koko, sifanele sisifundise ukuthandaza rhoqo ngokusuka entliziyweni. Oku kunokusinceda sisondele kuThixo size simenze uYehova iLiwa nendawo yaso yokusabela.—Funda iNdumiso 94:21-23; noYakobi 4:8.

Ukuziva Ungafaneleki

13. Ukuziva engafaneleki kunokumenza njani umntu angabi nenxaxheba kwizinto zokomoya?

¹³ Amadoda athile akabandakanyeki kwizinto zokomoya kuba engakwazi ukufunda kakuhle okanye ukuthetha ngendlela ecacileyo okanye kuba nje eneentloni. Amanye amadoda akakhululeki ukuvakalisa izimvo okanye iimvakalelo zawo esidlangalaleni. Ukucinga nje ngokuba kufuneka efundile, agqabaze kwiintlanganiso zamaKristu, okanye axelele abanye ngeenkolelo zawo kunokuwenza atyhwatyhwe. Omnye umzalwana uthi: “Xa ndandiselula ndandikhawuleza ndiye kufika emnyango ndenze ngathi ndiyankqonkqoza ndize ndichwechwe ndijike ngethemba lokuba akukho mntu undivileyo nondibonileyo. . . . Ukucinga nje ngokuya kwindlu ngendlu kwakundenza ndigule.”

14. Yintoni eyabangela ukuba abafundi bakaYesu bangakwazi ukuphilisa inkwenkwe enedemon?

¹⁴ Khawucinge nje ngokungazithembi kwabafundi bakaYesu xa bengazange bakwazi ukunyanga inkwenkwe eneedemon. Uyise waloo nkwenkwe waya kuYesu waza wathi: “[Unyana wam] unesathuthwane kwaye uyagula, kuba uwa ngokufuthi emlilweni nangokufuthi emanzini; yaye ndimzise kubafundi bakho, kodwa abakwazanga ukumphilisa.” UYesu wayigxotha loo demon, yaza yaphila loo nkwenkwe. Kamva abafundi baya kuYesu baza bambuza besithi: “Kutheni singabanga nako ukuyikhupha?” UYesu wabaphendula ngelithi: “Kungenxa yokholo lwenu oluncinane. Kuba inene ndithi kuni, Ukuba ninokholo olulingana nokhozo lwemostade, niya kuthi kule ntaba, ‘Suka apha uye phaya,’ isuke, kungabikho nto eninqabelayo.” (Mat. 17:14-20) Kufuneka sibe nokholo kuYehova ukuze soyise imiqobo efana neentaba. Kuthekani ukuba umntu uyakulibala oku aze athembe amandla akhe? Ukoyisakala kwakhe kuya kumenza angazithembi.

15, 16. Singabanceda njani abo sifunda nabo iBhayibhile ukuba boyise ukuziva bengafaneleki?

¹⁵ Enye indlela efanelekileyo yokunceda umntu olwisana nokuziva engafaneleki kukumkhuthaza ukuba anikele ingqalelo kuYehova kunakwisiqu sakhe. UPetros wabhala: “Zithobeni . . . phantsi kwesandla esinamandla sikaThixo, ukuze aniphakamise ngexesha elililo; liphoseni kuye lonke ixhala lenu.” (1 Pet. 5:6, 7) Oku kufuna ukuba sincede abo sifunda nabo iBhayibhile bakhule ngokomoya. Umntu ozithandayo izinto zokomoya ngokuzenzekelayo udla ngokuzixabisa. Uyalithanda iLizwi likaThixo yaye “isiqhamo somoya” siyabonakala ebomini bakhe. (Gal. 5:22, 23) Uyakuxabisa ukuthandaza. (Fil. 4:6, 7) Ngaphezu koko, uthembela kuThixo ukuba amnike inkalipho namandla okujamelana nayo nayiphi na imeko okanye akwazi ukuphumeza kakuhle nasiphi na isabelo.—Funda eyesi-2 kuTimoti 1:7, 8.

¹⁶ Abanye esibafundelayo basenokufuna uncedo ekufundeni, kwiincoko zabo, okanye ekuphuculeni ubuchule bokuthetha. Abanye basenokuziva bengakufanelekeli ukukhonza uThixo ngenxa yezinto ezimbi abaye bazenza ngaphambi kokufunda ngoYehova. Kuyo nayiphi na imeko uncedo lwethu oludluliselwa ngothando nokuba nomonde lusenokubanceda kakhulu. UYesu wathi: “Kubantu abasempilweni akufuneki gqirha, kodwa kwabagulayo uyafuneka.”—Mat. 9:12.

‘Bambisa’ Amadoda Angakumbi

17, 18. (a) Sinokukwazi njani ukufikelela amadoda angakumbi entsimini? (b) Yintoni eza kuxutyushwa kwinqaku elilandelayo?

¹⁷ Sinomnqweno wokuba amadoda amaninzi asabele kwisigidimi esihlaziya ngokwenene esifumaneka eBhayibhileni kuphela. (2 Tim. 3:16, 17) Ngoko singakwazi njani ukufikelela amadoda angakumbi entsimini? Ngokuthi sichithe ixesha elingakumbi sishumayela ngamarhatya, ngeemvakwemini zangempelaveki, okanye ebudeni beeholide xa uninzi lwamadoda lusemakhayeni awo. Xa iimeko zivuma sinokucela ukuthetha namadoda angabaninimzi. Masishumayele ngokungacwangciswanga kumadoda esisebenza nawo xa kufanelekile ukwenjenjalo size sifikelele nakubayeni abangakholwayo boodade abasebandleni.

¹⁸ Njengoko sishumayela kuye wonke umntu esidibana naye, sinokuqiniseka ukuba abo baneentliziyo ezinoxabiso baya kusiva. Ngomonde masincede bonke abo babonisa umdla onyanisekileyo ngenyaniso. Kodwa ke, singawanceda njani amadoda abhaptiziweyo ebandleni ukuba azabalazele aze afanelekele iimbopheleleko kwintlangano kaThixo? Inqaku elilandelayo liza kuwuxubusha lo mbuzo.

[Umbhalo osemazantsi]

Ubuya Kuphendula Uthini?

• Angancedwa njani amadoda ukuze azibeke kwindawo yokuqala izinto zokomoya?

• Singabanceda njani abasebatsha ukuba bajamelane nengcinezelo yoontanga?

• Yintoni enokunceda abanye boyise ukuziva bengafaneleki?

[Umfanekiso okwiphepha 25]

Ngaba uyawenza umgudu wokufikelela amadoda ngeendaba ezilungileyo?

[Umfanekiso okwiphepha 26]

Unokumnceda njani lowo ufunda naye iBhayibhile ukuba ajamelane neemvavanyo?