Qeqesha Abanye Bazabalazele Iimbopheleleko
“Wonk’ ubani oyalelwa ngokugqibeleleyo uya kuba njengomfundisi wakhe.”—LUKA 6:40.
1. UYesu wasibeka njani isiseko sebandla ebudeni bobulungiseleli bakhe basemhlabeni?
UMPOSTILE uYohane waqukumbela ingxelo yakhe yeVangeli ngala mazwi: “Kukho, enyanisweni, nezinye izinto ezininzi uYesu awazenzayo, ezo, ukuba bezibhalwe ngokweenkcukacha ezipheleleyo, ndiba, ihlabathi ngokwalo belingenakuyiqulatha imisongo ebinokubhalwa.” (Yoh. 21:25) Ebudeni bobulungiseleli bakhe obathatha ixesha elifutshane nawazijul’ ijacu kubo, uYesu waphumeza izinto ezininzi eziquka ukukhangela, ukuqeqesha nokulungelelanisa amadoda awayeza kukhokela emva kokubuyela kwakhe ezulwini. Ukubuyela kwakhe ezulwini ngowama-33 C.E., uYesu washiya isiseko sebandla elinabantu ababeza kukhawuleza bande babe ngamawakawaka.—IZe. 2:41, 42; 4:4; 6:7.
2, 3. (a) Kutheni kukho imfuneko engxamisekileyo yokuba amadoda abhaptiziweyo azabalazele iimbopheleleko? (b) Kuza kuhlolisiswa ntoni kweli nqaku?
2 Njengoko kukho abavakalisi boBukumkani abakhutheleyo abangaphezu kwezigidi ezisixhenxe nabakumabandla angaphezu kwe-100 000 ehlabathini jikelele namhlanje, kusekho imfuneko yamadoda okukhokela kwizinto zokomoya. Ngokomzekelo, bafuneka ngamandla abadala abangamaKristu. Sibothulel’ umnqwazi abo bazabalazela eli lungelo lenkonzo, kuba ‘banqwenela umsebenzi omhle.’—1 Tim. 3:1.
3 Kodwa ke, amadoda akasuki nje akufanelekele ukufumana amalungelo athile ebandleni. Imfundo okanye amava obomi awayenzi indoda iwulungele lo msebenzi. Ukuze ikwazi ukukhonza kweso sigxina, indoda imele ibe neemfaneleko zokomoya. Ngaphezu kobuchule bayo okanye izinto eziphumezileyo, ifanele ibe neempawu zokomoya. Anokuncedwa njani amadoda asebandleni ukuba afaneleke? Wathi uYesu: “Wonk’ ubani oyalelwa ngokugqibeleleyo uya kuba njengomfundisi wakhe.” (Luka 6:40) Kweli nqaku, siza kuhlolisisa ezinye iindlela awathi uMfundisi Omkhulu, uYesu Kristu, wanceda ngazo abafundi bakhe ukuba bafanelekele iimbopheleleko ezingakumbi, sibone noko sinokukufunda kwizinto awazenzayo.
“Ndinibize Ngokuthi Ningabahlobo”
4. UYesu wazibonisa njani engumhlobo wokwenene kubafundi bakhe?
4 UYesu wabaphatha njengabahlobo abafundi bakhe, yaye akazange abajongele phantsi. Wachitha ixesha nabo, wabathemba waza ‘wabazisa zonke izinto awaziva kuYise.’(Funda uYohane 15:15.) Khawucinge nje ngendlela ababevuya ngayo xa uYesu waphendula umbuzo wabo othi: “Uya kuba yintoni na umqondiso wobukho bakho nowokupheliswa kwenkqubo yezinto?” (Mat. 24:3, 4) Kanti wayephalaza nembilini yakhe kubalandeli bakhe. Ngokomzekelo, ngobusuku bokungcatshwa kwakhe, uYesu waya noPetros, uYakobi noYohane kumyezo waseGetsemane, apho wathandaza ngokungapheziyo ngenxa yokukhathazeka kwentliziyo yakhe. Kusenokwenzeka ukuba abapostile bakhe abathathu abazange bakuve oko kwakuthethwa nguYesu kuloo mthandazo, kodwa bamele ukuba bakuphawula ukubaluleka kweso sihlandlo. (Marko 14:33-38) Kwakhona, cinga ngendlela ukwenziwa kumila kumbi ekumele ukuba kwaba negalelo ngayo kwaba bathathu. (Marko 9:2-8; 2 Pet. 1:16-18) Ubuhlobo obusenyongweni obakhiwa nguYesu nabafundi bakhe kwabanceda gqitha njengoko kamva bathi banyamekela iimbopheleleko ezingakumbi.
5. Ziziphi ezinye iindlela abanokuthi abadala abangamaKristu basondele ngazo kwabanye?
5 Kanye njengoYesu, abadala abangamaKristu namhlanje banceda abanye baze babe ngabahlobo babo. Bakha ulwalamano olusenyongweni namanye amaKristu ngokuzipha ixesha lokuba nomdla kuwo. Ngoxa abadala beqonda ukubaluleka kokugcina eminye imiba iyimfihlelo, abafihli yonke into. Abadala bayabathemba abazalwana babo baze babelane nabo ngenyaniso abaye bayifunda eZibhalweni. Abadala abazijongeli phantsi izicaka zolungiselelo ekusenokwenzeka ukuba ziselula ngeminyaka. Kodwa, bazijonga njengamadoda okomoya anobuchule, awenzela ibandla inkonzo exabisekileyo.
“Ndinibekela Umzekelo”
6, 7. Khawuchaze umzekelo uYesu awawumisela abafundi bakhe negalelo owaba nalo kubo.
6 Nangona abafundi bakaYesu babezixabisa izinto zokomoya, maxa wambi indlela abacinga ngayo yayiphenjelelwa yimvelaphi nazizithethe abakhulele kuzo. (Mat. 19:9, 10; Luka 9:46-48; Yoh. 4:27) Noko ke, uYesu akazange abagxeke okanye abatyityimbisel’ umnwe abafundi bakhe. Akazange abathwalise imithwalo engeyomfuneko okanye athi mabenze into yena angayenziyo. Kodwa, uYesu wabafundisa ngomzekelo.—Funda uYohane 13:15.
7 UYesu wabashiyela wuphi umzekelo abafundi bakhe? (1 Pet. 2:21) Wagcina ubomi bakhe bulula ukuze akwazi ukulungiselela abanye ngokukhululekileyo. (Luka 9:58) UYesu wayethozamile yaye ngalo lonke ixesha wayesekela iimfundiso zakhe eZibhalweni. (Yoh. 5:19; 17:14, 17) Wayengeneka yaye enobubele. Yonke into awayeyenza yayiqhutywa luthando. (Mat. 19:13-15; Yoh. 15:12) UYesu waba ngumzekelo omhle kubapostile bakhe. Ngokomzekelo, uYakobi akazange akungcangcazelele ukufa kodwa wakhonza uThixo ngokuthembeka de wabulawa. (IZe. 12:1, 2) Ngokuthembeka uYohane walandela emanyathelweni kaYesu ngaphezu kweminyaka engama-60.—ISityhi. 1:1, 2, 9.
8. Abadala bawamisela wuphi umzekelo amadoda aselula nabanye?
8 Abadala abazincamayo, abathobekileyo nabo banothando bawamisela umzekelo omhle amadoda aselula. (1 Pet. 5:2, 3) Ngaphezu koko, abadala abangumzekelo elukholweni, ekufundiseni, kwindlela amele aphile ngayo amaKristu nakubulungiseleli, baba nolwaneliseko lokwazi ukuba abanye banokuluxelisa ukholo lwabo.—Heb. 13:7.
‘UYesu Wabathumela Ebanika Imiyalelo’
9. Sazi njani ukuba uYesu wabaqeqesha abafundi bakhe ukuba benze umsebenzi wokuhambisa ivangeli?
9 Emva kokusebenza ngenzondelelo kubulungiseleli malunga neminyaka emibini, uYesu wawuqhubela phambili umsebenzi wokushumayela ngokuthumela abapostile bakhe abali-12 ukuba baye kushumayela. Noko ke, waqala ngokubanika imiyalelo. (Mat. 10:5-14) Xa wayesele elungele ukondla isihlwele samawakawaka abantu ngokungummangaliso, uYesu waxelela abafundi bakhe indlela afuna ukuba basilungelelanise ngayo baze basabele ukutya. (Luka 9:12-17) Noko ke, licacile elokuba uYesu waqeqesha abafundi bakhe ngokubanika ulwalathiso olucacileyo nolungqalileyo. Le ndlela yokuqeqesha ihambisana nempembelelo enamandla yomoya oyingcwele, yathi kamva yaxhobisa abapostile ukuba balungelelanise umsebenzi ongakumbi wokushumayela owenzeka ngowama-33 C.E. nasemva koko.
10, 11. Abasebatsha banokuqeqeshwa njani ngokuqhubekayo?
10 Namhlanje, indoda iqala ukufundiswa ngezinto zokomoya xa isamkela isifundo seBhayibhile. Kusenokufuneka siyincede ikwazi ukulesa. Siyaqhubeka siyinceda njengoko siyiqhubela isifundo seBhayibhile. Xa isiya rhoqo kwiintlanganiso zamaKristu, iya kwenza inkqubela kuqeqesho lwayo lokomoya njengoko isiba nenxaxheba kwiSikolo Sobulungiseleli Sobuthixo ibe ngumvakalisi ongabhaptizwanga, njalo njalo. Emva kokuba ibhaptiziwe, phakathi kwezinye izinto inokuqeqeshelwa ukunyamekela iHolo Yobukumkani. Ekuhambeni kwexesha, lo mzalwana unokuncedwa abone oko amele akwenze ukuze afanelekele ukuba sisicaka solungiselelo.
11 Xa umdala enika umzalwana obhaptiziweyo isabelo, umele amcacisele kakuhle iindlela anokusiphumeza ngazo ngolungelelwano aze amnike ulwalathiso oluyimfuneko. Umzalwana oqeqeshwayo umele akuqonde oko kulindeleke kuye. Ukuba akakakwazi ukwenza oko acelwa ukuba akwenze, umdala onothando akakhawulezi agqibe ekuthini akafaneleki. Kodwa, lo mdala uthi ngothando amxelele apho anokuphucula khona aze ambonise indlela anokusiphumeza ngayo esi sabelo. Ukubona amadoda esabela kuloo migudu aze afumane uvuyo olubangelwa kukwenzela abanye izinto, kuyabavuyisa abadala.—IZe. 20:35.
“Ophulaphula Icebiso Sisilumko”
12. Yintoni eyayisenza iziluleko zikaYesu zibe namandla?
12 UYesu waqeqesha abafundi bakhe ngokubanika isiluleko esifanele iimfuno zabo. Ngokomzekelo, wakhalimela uYakobi noYohane ababefuna ukuba kuhle umlilo ezulwini ubhubhise amaSamariya athile angazange amamkele. (Luka 9:52-55) Xa unina kaYakobi noYohane waya kubacelela kuYesu ukuba bahlale kwiindawo ezibalulekileyo eBukumkanini, uYesu wathetha nabo ngokuthe ngqo esithi: “Kona ukuhlala ngasekunene kwam nangasekhohlo kwam asikokwam ukunikisa ngako, kokwabo kulungiselelwe bona nguBawo.” (Mat. 20:20-23) Ngawo onke amaxesha, uYesu wanikela isiluleko esicacileyo, esiluncedo nesisekelwe ngokuqinileyo kwimigaqo kaThixo. Wafundisa abafundi bakhe ukuba baqiqe ngaloo migaqo. (Mat. 17:24-27) Kanti uYesu wakuqonda ukusikelwa umda kwabalandeli bakhe yaye akazange alindele ukuba bafezeke. Iziluleko zakhe zaziqhutywa luthando lokwenene.—Yoh. 13:1.
13, 14. (a) Ngubani ofanele alulekwe? (b) Chaza imizekelo yeziluleko ezinokunikelwa ngumdala kumntu ongenzi nkqubela ngokomoya.
13 Kuyafuneka ukuba onke amadoda azabalazela iimbopheleleko kwibandla lamaKristu akhe alulekwe okanye acetyiswe ngeZibhalo maxa wambi. IMizekeliso 12:15 ithi: “Ophulaphula icebiso sisilumko.” Omnye umzalwana oselula uthi: “Ndifumanise ukuba eyona nto ibilucelomngeni kum kukumelana nokungafezeki. Ndancedwa ngomnye umdala ukuze ndilungelelane kulo mba.”
14 Ukuba abadala baphawula ukuba ihambo yomzalwana othile imenza angabi nankqubela ngokomoya, bazimisela ukumnceda ngomoya wobulali. (Gal. 6:1) Maxa wambi, kusenokufuneka umntu alulekwe ngenxa yomkhwa othile. Ngokomzekelo, ukuba umzalwana ubonakala eyekelel’ umxakatho kwinkonzo ayinikelayo, umdala unokumnceda ngokumbonisa ukuba uYesu wayengumvakalisi woBukumkani okhutheleyo owayalela abalandeli bakhe ukuba benze abafundi. (Mat. 28:19, 20; Luka 8:1) Ukuba umzalwana ubonakala ethanda amawonga, umdala unokumbonisa indlela uYesu awabanceda ngayo abafundi bakhe babone ubungozi bokuthanda izikhundla. (Luka 22:24-27) Kuthekani ukuba umzalwana unotyekelo lokungaxoleli? Kunokumnceda gqitha ukukhunjuzwa ngomzekeliso wekhoboka elingazange livume ukuxolela omnye ityala elincinane nakuba lona laxolelwa ityala elikhulu. (Mat. 18:21-35) Xa kufuneka isiluleko, kuhle ukuba abadala basinikele ngokukhawuleza kangangoko kunokwenzeka.—Funda iMizekeliso 27:9.
‘Ziqeqeshe’
15. Intsapho yendoda inokuyinceda njani ikhonze abanye?
15 Ngabadala abakhokelayo ekuqeqesheni amadoda ukuba afikelele iimbopheleleko, kodwa nabanye banokuyixhasa imigudu yabo. Ngokomzekelo, intsapho yendoda inako yaye imele iyincede izabalazele iimbopheleleko ezingakumbi. Yaye ukuba sele ingumdala, kuya kuyinceda kakhulu ukuxhaswa ngumfazi onothando nabantwana abangacingeli iziqu zabo kuphela. Ukuyivumela kwabo ukuba yenze imisebenzi yebandla, kuya kuyinceda kakhulu ukuba ithwale iimbopheleleko zebandla. Umoya wabo wokuzincama uyibangela ukuba yonwabe yaye loo moya uxatyiswa kakhulu nangabanye.—IMize. 15:20; 31:10, 23.
16. (a) Ngubani oyena mntu umele azabalazele iimbopheleleko ezingakumbi? (b) Indoda inokuwazabalazela njani amalungelo angakumbi ebandleni?
16 Nangona abanye benokuyinceda baze bayixhase, yindoda ngokwayo enembopheleleko eyintloko. (Funda eyabaseGalati 6:5.) Kambe ke, akunyanzelekanga ukuba umzalwana abe sisicaka solungiselelo okanye umdala ukuze ancede abanye babe nesabelo kubulungiseleli. Noko ke, ukuzabalazela amalungelo angakumbi ebandleni kuthetha ukwenza umgudu wokufikelela iimfaneleko ezichazwe eZibhalweni. (1 Tim. 3:1-13; Tito 1:5-9; 1 Pet. 5:1-3) Ngoko ukuba indoda inqwenela ukukhonza njengesicaka solungiselelo okanye umdala kodwa ayikamiselwa, ifanele inikele ingqalelo kwiinkalo emele ikhule kuzo ngokomoya. Kufuneka ifunde iBhayibhile rhoqo, ikhuthale kufundisiso, icamngce, ithandaze ngokusuka entliziyweni ize ikhuthale kubulungiseleli bamaKristu. Kungezo ndlela enokuthi isebenzise esi siluleko sikaPawulos kuTimoti: “Yiba nosukelo lokuziqeqesha ngozinikelo lobuthixo.”—1 Tim. 4:7.
17, 18. Umzalwana obhaptiziweyo unokwenza ntoni xa ethintelwa ngamaxhala, ukuziva engafaneleki nakukungabi namdla wokukhonza?
17 Kodwa kuthekani ukuba indoda ayizabalazeli zimbopheleleko zingakumbi ngenxa yamaxhala okanye ukuziva ingafaneleki? Kuya kuba kuhle ukuba icingisise ngoko uYehova uThixo noYesu Kristu basenzela kona. Eneneni, uYehova ‘usithwalela umthwalo mihla le.’ (INdu. 68:19) Ngoko uBawo wethu wasezulwini unokumnceda umzalwana athwale iimbopheleleko zebandla. Umzalwana ongesiso isicaka solungiselelo okanye umdala uya kuncedwa kukucingisisa ngesibakala sokuba efuneka ngamandla amadoda aqolileyo anokunyamekela amalungelo angakumbi enkonzo entlanganweni kaThixo. Ukucingisisa ngezo ngongoma kunokunceda umzalwana ukuba enze umgudu wokoyisa ukuziva engafaneleki. Unokuthandazela umoya oyingcwele, ekhumbula ukuba isiqhamo sawo siquka uxolo nokuzeyisa—mpawu ezo ezifunekayo ukuze atyhalele kude amaxhala okanye ukuziva engafaneleki. (Luka 11:13; Gal. 5:22, 23) Yaye unokuba nentembelo epheleleyo yokuba uYehova ubasikelela bonke abo bazabalazela iimbopheleleko ezingakumbi ngeenjongo ezifanelekileyo.
18 Ngaba kunokwenzeka ukuba, kukungabi namdla wokukhonza okubangela indoda ebhaptiziweyo ingazizabalazeli iimbopheleleko ezingakumbi? Yintoni enokumnceda umzalwana onjalo? Umpostile uPawulos wabhala wathi: “Kuba uThixo nguye osebenzayo kuni ngaphakathi, aninike amandla okunqwenela nawokwenza, ngokokuthanda kwakhe.” (Fil. 2:13) Umnqweno wokukhonza uvela kuThixo yaye umoya kaYehova unokumomeleza umntu ukuze anikele inkonzo engcwele. (Fil. 4:13) Ngaphezu koko, umKristu unokuthandazela ukuba uThixo amncede enze oko kulungileyo.—INdu. 25:4, 5.
19. Ukuveliswa ‘kwabalusi abasixhenxe, ewe, iindwalutho ezisibhozo’ kusiqinisekisa ngantoni?
19 UYehova uyayisikelela imigudu yamadoda amakhulu yokuqeqesha abanye. Kanti usikelela nabo benza umgudu baze bazabalazele amalungelo angakumbi ebandleni. IZibhalo zisiqinisekisa ngelokuba phakathi kwabantu bakaThixo “abalusi abasixhenxe, ewe, iindwalutho ezisibhozo”—inani elifunekayo lamadoda—baya kuveliswa ukuze bakhokele kwintlangano kaYehova. (Mika 5:5) Kuyintsikelelo engathethekiyo ukuba namadoda angamaKristu amaninzi kangaka aqeqeshwayo nathi ngokuthobeka azabalazele amalungelo angakumbi enkonzo ukuze kuzukiswe uYehova!
Unokuphendula Uthini?
• UYesu wabanceda njani abafundi bakhe ukuba bafanelekele iimbopheleleko ezingakumbi?
• Abadala banokumxelisa njani uYesu njengoko benceda amadoda ukuba akhokele ebandleni?
• Intsapho inayiphi indima ekuncedeni indoda ukuba izabalazele iimbopheleleko?
• Yona indoda inokwenza ntoni ukuze izabalazele amalungelo angakumbi?
[Imifanekiso ekwiphepha 31]
Unokusiqeqesha njani isifundo sakho seBhayibhile njengoko sizama ukwenza inkqubela?
[Umfanekiso okwiphepha 32]
Amadoda anokubonisa njani ukuba azabalazela iimbopheleleko?