Ukuzikhusela Kwiintlekele Zemvelo

Suka kwindawo eyingozi.

IBhayibhile ithi: “Onobuqili ubona intlekele azifihle, kodwa abangenamava bayadlula baze bafumane isohlwayo.” (IMizekeliso 22:3) Eli cebiso lobulumko linokusetyenziswa naxa kuvela intlekele. Ukuba kukhutshwe isilumkiso sokuba kuza kubakho ugqabhuko dubulo lwentaba mlilo, mhlawumbi iimpuphuma okanye inkanyamba ubulumko kukuba abo bakuloo mimandla bafudukele kwindawo ekhuselekileyo. Ubomi bubalukile kunendlu okanye ubunewenewu beli hlabathi.

Abanye, iimeko ziyabavumela ukuba bahlale kwindawo ezingeyongozi. Omnye usomaqhuzu uthi: “Iintlekele ziba kwiindawo ezithile emhlabeni. Yimimandla emincinane nje eMhlabeni ethandwa ziintlekele yaye ikwayiyo ekubonakala ukuba iya kuphinda intlithwe zizo nakwixa elizayo.” Oku kunokuba yinyaniso, ngokomzekelo, kwimimandla egudle unxweme okanye iindawo ezithandwa yinyikima. Ukuba ungakwazi ukuyishiya imimandla enjalo okanye ufudukele kwiindawo ezikhuselekileyo, unokuwanciphisa amathuba okuntlithwa ziintlekele.

Yazi ukuba uza kuthini xa kuvela intlekele.

Nangona usenokuthobela zonke izilumkiso, usenokuzibhaqa ulixhoba lentlekele obungayilindelanga. Ukuzikhusela kuyo kunokuba lula ukuba ubusazi kwangaphambili ukuba uza kuthini xa ivela. Oku kuyavisisana necebiso elikwiMizekeliso 22:3, ebicatshulwe ngasentla. Ngaba zikho izinto ozipakishileyo ukwenzela xa kuvela intlekele? Impapasho ebizwa ngokuba yi1-2-3 of Disaster Education icebisa ukuba kuqukwe ezi zinto zilandelayo xa kulungiselelwa imfuduko ngexesha lentlekele: Izinto zoncedo lokuqala, ibhotile enamanzi, ukutya okungazukonakala msinya namaxwebhu abalulekileyo. Kunokuba kuhle ukuba nithethe njengentsapho ngeentlekele ezidla ngokubakho kwindawo yenu noko kufanele kwenziwe xa zinokubakho.

Lugcine luluhle ulwalamano lwakho noThixo.

Oku kunokunceda kuyo nayiphi na imeko. IBhayibhile ithetha ngoThixo ‘njengoYise onenceba noThixo wentuthuzelo yonke, osithuthuzelayo kuyo yonke imbandezelo yethu.’ Enye ivesi imchaza njengoThixo “obathuthuzelayo abo badakumbileyo.”—2 Korinte 1:3, 4; 7:6.

Ewe, uThixo uziqonda kakuhle iimeko abatyhubela kuzo abo bakholose ngaye. UnguThixo wothando yaye ukhuthaza ngeendlela ezahlukahlukeneyo. (1 Yohane 4:8). Umoya oyingcwele unokusinceda sikhumbule iivesi zeBhayibhile ezinokusithuthuzela phantsi kwezo meko. Ngokwenene, abakhonzi bakaThixo abathembekileyo banokuvakalelwa njengoDavide, ukumkani wamandulo wakwaSirayeli, owathi: “Nangona ndihamba kwintlambo yethunzi elimnyama, andoyiki nto imbi, kuba unam wena; intonga yakho nomsimelelo wakho ziyandithuthuzela.”—INdumiso 23:4.

AmaKristu ayancedana.

Kwinkulungwane yokuqala, omnye umprofeti owayengumKristu ogama linguAgabho wabonisa ukuba “kuza kubakho indlala enkulu kumhlaba omiweyo uphela; leyo yabakho ngexesha likaKlawudiyo.” Le ndlala yabathwaxa kanobom abafundi bakaYesu ababekwelakwaYuda. Enza ntoni amanye amaKristu ahlala kwezinye iindawo xa evayo ngentlekele eyehlele amanye amaKristu? Ingxelo ithi: “Abo babengabafundi bazimisela, ngamnye kubo kangangoko wayenako, ukuthumela ulungiselelo lwamancedo kubazalwana ababehlala kwelakwaYuda.” (IZenzo 11:28, 29) Ngothando athumela izinto zokunceda.

Xa iintlekele zibakho namhlanje, abakhonzi bakaThixo basabela ngendlela efanayo. AmaNgqina kaYehova aziwa ngokuncedana. Ngokomzekelo, xa inyikima enamandla yantlitha ilizwe laseChile ngoFebruwari 27, 2010, amaNgqina kaYehova anceda ngokukhawuleza abo babechaphazelekile. UKarla, onendlu eyatshayelwa yitsunami, uthi: “Kwakuthuthuzela yaye kukhuthaza ukubona kusuku olulandelayo kufika [amaNgqina] avela kweminye imimandla ukuza kusinceda. Ngaphandle kwamathandabuzo, uYehova wasithuthuzela ngezinto ezintle esazenzelwa ngalo matsha-ntliziyo. Ndaziva ndithandwa yaye ndikhuselekile.” Uyisemkhulu ongelo Ngqina, wazibonela xa amaNgqina encedana. Wathi: “Oku kwahluke ngokupheleleyo koko bendikubona kusenziwa kangangeminyaka ecaweni.” Oko wakubonayo kwamenza wacela amaNgqina kaYehova ukuba amfundise iBhayibhile.

Ukuba kunye nabantu abathanda uThixo kunokuba luncedo kakhulu ngamaxesha obunzima. Nakuba kunjalo, ngaba liya kuze libekho ixesha apha emhlabeni ekungasayi kuze kubekho isiqalekiso seentlekele? Masibone oko kuthethwa yiBhayibhile ngalo mbandela.