Azisekho Iintlekele!

UBUYA kuthini ukuba uthile uthi kuwe, “Kungekudala azizukubakho iintlekele”? Usenokuthi: “Hayi wethu musa ukuphupha. Iintlekele ziya kuhlala zikho.” Okanye usenokuthi: ‘Ucinga ukuba angaqhatha bani?’

Nangona kubonakala ngathi iintlekele zemvelo ziza kuhlala zikho, sikho isizathu sokuba nethemba lokuba izinto ziza kutshintha. Noko ke, olu tshintsho aluzukubangelwa ngabantu. Abantu abakwazi kuyiqonda ngokupheleleyo indlela nesizathu sokuba izinto zenzeke ngale ndlela kwindalo, singasathethi ke ngokuyilawula okanye ukutshiyintsha. Ukumkani uSolomon wakwaSirayeli wamandulo, ngenxa yobulumko nokondela kwakhe izinto wabhala oku: “Uluntu olungakwazanga ngayo ukukuqonda okwenziweyo phantsi kwelanga; noko ke, kungakhathaliseki ukuba uluntu lusebenza nzima kangakanani na lufuna ukukuqonda, kodwa aluze lukuqonde. Kwanokuba lungathi luzizilumko ngokwaneleyo ukuba lukuqonde, alunakukuqonda.”—INtshumayeli 8:17.

Ukuba abantu abanakukwazi ukulawula iintlekele, ngubani okwaziyo? IBhayibhile ithi nguMdali wethu okwaziyo ukwenza olu tshintsho. Nguye owadala inkqubo yomjikelo njengalowo wamanzi. (INtshumayeli 1:7) Ngokwahlukileyo kubantu, uThixo unamandla angapheliyo. Engqinela esi sibakala umprofeti uYeremiya wathi: “Awu, Nkosi enguMongami Yehova! Yabona, wena wenze amazulu nomhlaba ngamandla akho amakhulu nangengalo yakho eyoluliweyo. Lo mbandela uphela awukunqabelanga wena.” (Yeremiya 32:17) Ekubeni uThixo wenza umhlaba nazo zonke izinto ezikuwo, uyazi kakuhle indlela yokuzilawula ezi zinto ukuze abantu bahlale kuwo ngoxolo nangonqabiseko.—INdumiso 37:11; 115:16.

Ngoko ke, uThixo uza kulwenza njani utshintsho? Uya kukhumbula ukuba inqaku lesibini kolu ngcelele likhankanye izinto ezimanyumnyezi ezenzekayo namhlanje ukuba ‘zingumqondiso’ obonisa ‘ukupheliswa kwale nkqubo yezinto.’ UYesu wathi: “Xa nibona ezi zinto zisenzeka, yazini ukuba ubukumkani bukaThixo bukufuphi.” (Mateyu 24:3; Luka 21:31) UBukumkani bukaThixo, obungurhulumente wasezulwini omiselwe nguThixo, buya kuzisa utshintsho olukhulu emhlabeni, bude bulawule nendalo. Nangona uYehova uThixo enawo amandla okwenza oku, ukhethe ukuba ibe nguNyana wakhe owenza lo msebenzi. Ethetha ngako oku umprofeti uDaniyeli wathi: “Wanikwa ulawulo nesidima nobukumkani, ukuze zonke izizwana neentlanga neelwimi zimkhonze.”—Daniyeli 7:14.

UNyana kaThixo, uYesu Kristu, unikwe amandla ukuze akwazi ukwenza zonke ezi nguqu zifunekayo ukuze kube mnandi emhlabeni. Kwiminyaka engamawaka amabini eyadlulayo, xa wayelapha emhlabeni uYesu, wabonisa kancinane amandla akhe okukwazi ukulawula indalo. Ngesinye isihlandlo xa yena nabafundi bakhe babesesikhepheni kuLwandle lwaseGalili, “kwaqhambuka isaqhwithi somoya omkhulu, yaye amaza ayentlaleka esikhepheni, kangangokuba isikhephe saphantse sazala ngamanzi.” Abafundi bakhe baqalisa ukuphakuzela. Besoyikisela ubomi babo, bakhala kuYesu. Yena wenza ntoni? “wawukhalimela umoya waza wathi kulwandle: ‘Yithi tu! Uzole!’ Wadamba umoya, kwabakho ukuzola okukhulu.” Abafundi bakhe bamangaliswa baza babuzana ukuba: “Ngubani ngokwenene lo, le nto ade athotyelwe ngumoya nalulwandle?”—Marko 4:37-41.

Ukususela ngelo xesha, uYesu uye wakummandla womoya yaye unikwe amandla angakumbi negunya. NjengoKumkani woBukumkani bukaThixo, unembopheleleko namandla okwenza iinguqu ezifunekayo ukuze abantu banandiphe ubomi obuseluxolweni nobukhuselekileyo emhlabeni.

Noko ke, njengoko sele sibonile, uninzi lweengxaki neentlekele zibangelwe ngabantu, okanye zenziwe zamandundu ngakumbi ngabantu abanyolukileyo nabacingela iziqu zabo. Yintoni eza kwenziwa buBukumkani ngabantu abangafuniyo ukutshintsha kwiindlela zabo ezimbi? IBhayibhile ithetha ngeNkosi uYesu eza “ivela ezulwini kunye neengelosi zayo ezinamandla isemlilweni odangazelayo, ibaphindezela abo bangamaziyo uThixo nabo bangazithobeliyo iindaba ezilungileyo ezingeNkosi yethu uYesu.” Ewe, ‘uya kubonakalisa abo bawonakalisayo umhlaba.’—2 Tesalonika 1:7, 8; ISityhilelo 11:18.

Emva koko, lo “Kumkani wookumkani,” uYesu Kristu, uza kuwalawula ngokupheleleyo amandla endalo. (ISityhilelo 19:16) Uya kuqinisekisa ukuba abalawulwa boBukumkani abasayi kuphinda babandezeleke ngenxa yeentlekele. Uya kusebenzisa amandla akhe ukuze alawule ubume bemozulu namaxesha onyaka ukuze kulungelwe abantu. Umphumo iya kuba koko uYehova uThixo wakuthembisa abantu bakhe mandulo: “Ngokuqinisekileyo ndoninika iziphango zenu zemvula ngexesha lazo elifanelekileyo, lize ilizwe lininike ngenene imveliso yalo, nemithi yentsimi ivelise iziqhamo zayo.” (Levitikus 26:4) Abantu baya kukwazi ukwakha izindlu bengenaxhala lokuba zisenokutshatyalaliswa ziintlekele: “Ngokuqinisekileyo baya kwakha izindlu baze bahlale; batyale izidiliya baze badle isiqhamo sazo.”—Isaya 65:21.

Umele Wenze Ntoni?

Ngaphandle kwamathandabuzo njengabo bonke abanye abantu, unomdla ekuphileni kwihlabathi elingenazo iintleke. Kodwa ke, yintoni omele uyenze ukuze ube lapho? Ekubeni “abo bangamaziyo uThixo nabo bangazithobeliyo iindaba ezilungileyo” abayi kukufanelekela ukuphila kwihlabathi elingenazo iintlekele, kucacile ngoku ukuba ubani umele afunde ngoThixo aze axhase amalungiselelo okulawulwa komhlaba. UThixo ufuna simazi size sithobele iindaba ezilungileyo zoBukumkani aye wazenza zafumaneka ngoNyana wakhe.

Eyona ndlela yokwenza oku kukufundisisa iBhayibhile. Iqulathe iimfundiso ezinokusinceda sikufanelekele ukuphila phantsi kweemeko ezikhuselekileyo eziza kubakho ngaphantsi kolawulo loBukumkani. Kutheni ungaceli amaNgqina kaYehova akufundise oko kufundiswa yiBhayibhile? Akulungele ukukunceda. Into eqinisekileyo—kukuba ukuba wenza umgudu wokumazi uThixo uze uthobele neendaba ezilungileyo, aya kuba yinyani amazwi abhalwe kwiMizekeliso 1:33 athi: “Yena ke ondiphulaphulayo, uya kuhlala ngonqabiseko aze angaphazamiseki ekunkwantyiseni kwentlekele.”