Ngubani Onokutolika Isiprofeto?

Iqhina likaGordian lelona lalidida ingqondo ngexesha lika-Alekzandire oMkhulu. Xa athe umntu wakwazi ukulicombulula wayegqalwa njengolumkileyo—nanjengekroti.a UAlekzandire walikhulula eli qhina ngokulisika phakathi ngekrele.

UKUTYHUBELA iinkulungwane loo madoda azizilumko awazange afune ukukhulula amaqhina nje antsonkothileyo kuphela, kodwa kwanezinto eziyinkohla, atolike iziprofeto, ade achaze noko kuqulethwe likamva.

Noko ke, okulusizi kukuba ebengasoloko ekwazi, kuba ezi zinto ayefuna ukuzenza zazingaphaya kwamandla awo. Ngokomzekelo, amadoda aseBhabhiloni awayezizilumko awazange akwazi ukuchaza intsingiselo yombhalo wesandla owathi ngokungummangaliso wabonakala eludongeni lwebhotwe likaKumkani uBheleshatsare ebudeni besihikahika sesidlo. YayinguDaniyeli umprofeti kaYehova uThixo kuphela—owayesele aluphele nowayedume “ngokukhulula amaqhina”—owakwaziyo ukuchaza intsingiselo yesiprofeto. (Daniyeli 5:12) Eso siprofeto, esasiprofeta ngokutshatyalaliswa koBukhosi baseBhabhiloni, sazaliseka kanye ngobo busuku!—Daniyeli 5:1, 4-8, 25-30.

Yintoni Isiprofeto?

Isiprofeto kukuchazwa kwangaphambili kwesiganeko esiza kwenzeka kwixesha elizayo. Isiprofeto sokwenene sisigidimi esiphefumlelweyo esinokubhalwa phantsi okanye sidluliselwe ngomlomo, okanye ukutyhilwa kokuthanda kukaThixo nenjongo yakhe. EBhayibhileni kufumaneka iziprofeto eziphathelele ukuvela nokufanisa uMesiya nezo zichaza ‘ukupheliswa kwenkqubo yezinto,’ kunye nezigidimi zomgwebo ezivela kuThixo.—Mateyu 24:3; Daniyeli 9:25.

“Amadoda azizilumko” anamhlanje—iingcali kwezenzululwazi, ezoqoqosho, ezempilo, ezopolitiko, nezokusingqongileyo, nezinye izifundiswa—zizama ukuchaza ikamva. Nangona uninzi lwezinto abazithethayo ngekamva zisasazwa ngokubanzi ngamajelo eendaba—yaye nabantu basekuhlaleni benomdla kuzo—yintelekelelo nje yezifundiswa ngokusuka kwizinto okanye imeko ekhe yakho ngaphambili nezimvo zazo. Ukongezelela kuluvo ngalunye, kusoloko kukho uthotho lwezinye izimvo neengxoxo eziziphikisayo. Ukuzama ukuchaza ikamva kuyingozi kuba akakho umntu onokulazi.

Umthombo Wesiprofeto Sokwenyaniso

Ngubani, umthombo weziprofeto eziyinyaniso, yaye ngubani onokuyichaza intsingiselo yazo? Umpostile uPetros wabhala wathi: “Akukho siprofeto seSibhalo siphuma nakuyiphi na inkcazelo yobuqu.” (2 Petros 1:20) Igama lesiGrike elithetha “inkcazelo” lithetha “isicombululo okanye ukubhenca,” lidlulisela ingcamango yokuba “loo nto ikhululwayo ibibotshiwe ngaphambili.” Ngenxa yoko iThe Amplified New Testament iguqulela amazwi kaPetros ngokuthi: “Asikho isiprofeto seSibhalo [esingumbandela] wobuqu . . . onokusikhululelwa ngumntu.”

Yiba nomfanekiso kamatiloshe onamava ebopha iqhina elintsonkothileyo. Xa sele egqibile ukulibopha, umntu nje oqhelekileyo unokulibona ukuba liqhina kodwa akanakukwazi ukulikhulula. Ngokufanayo, abantu banokuzibona izinto eziqhubekayo ezikhokelela kwixesha elinzima elizayo, kodwa abayazi ncam into eza kwenzeka ngelo xesha.

Abaprofeti bamandulo abaphefumlelweyo njengoDaniyeli abazange bazihlalutye izinto ezazisenzeka ngaxesha labo baze bazame ukuchaza ikamva ngokuprofeta. Ukuba babezame ukunyanzelisa ikamva ngaloo ndlela ezo ziprofeto zaziza kuba zivela kubo. Ibiya kuba luqikelelo lomntu, olwakhelwe kwisiseko esifokofoko. Kunoko, uPetros wacacisa wathi: “Isiprofeto asizange nangaliphi na ixesha siziswe ngokuthanda komntu, kodwa abantu bathetha ngokuphuma kuThixo njengoko babeqhutywa ngumoya oyingcwele.”—2 Petros 1:21.

“AsikokukaThixo Na Ukutolika”

Kwiminyaka engama-3 700 eyadlulayo amadoda amabini ayevalelwe entolongweni eYiputa. Nganye kuwo yaphupha iphupha elikhwankqisayo. Ekubeni ayengakwazi ukuchazela amadoda azizilumko zelizwe amaphupha awo, achazela enye indoda ayebanjwe nayo, uYosefu, esithi: “Siphuphe iphupha, yaye asinatoliki.” Loo mkhonzi kaThixo wabacela ukuba bambalisele loo maphupha, esithi: “AsikokukaThixo na ukutolika?” (Genesis 40:8) NguYehova uThixo kuphela okwaziyo ukucacisa isiprofeto, kanye njengomatiloshe onamava enokukwazi ukukhulula amaqhina antsonkothileyo. Ngapha koko, yayinguThixo owazidluliselayo iziprofeto ngohlobo lokuba kubenzima ngomntu ukuzicacisa. Ngoko kusengqiqweni, ukulindela kuThixo ukuba ibenguye otyhila intsingiselo yazo. Ewe, uYosefu wenza kakuhle ngokuwuyekela kuThixo loo msebenzi.

Kungayiphi ingqiqo apho ‘ukutolika ikokukaThixo’? Zininzi izihlandlo apho kungqineke kuyinyaniso oku. Ezinye iziprofeto zeBhayibhile zibhalwe nenzaliseko yazo. Ezi kulula ukuziqonda, njengamaqhina anokukhululwa lula ngumatiloshe.—Genesis 18:14; 21:2.

Ezinye iziprofeto zinokuchazwa zize zicaciswe ngokuhlolwa komongo. Umprofeti uDaniyeli wabona isiprofeto esingumbono ‘inkunzi yegusha eneempondo ezimbini’ ihlaselwa “yinkunzi yebhokhwe” ‘enophondo oluphawulekayo phakathi kwamehlo ayo.’ Umongo ubonisa ukuba inkunzi yegusha eneempondo ezimbini “imela ookumkani bamaMedi namaPersi” ibhokhwe yona imela “ukumkani waseGrisi.” (Daniyeli 8:3-8, 20-22) Ngaphezulu kweminyaka engama-200 kamva, “uphondo olukhulu”—uAlekzandire Omkhulu—waqalisa iphulo lakhe lokuhlasela iPersi. Isazi ngembali esingumYuda uJosephus sithi, xa uAlekzandire wayehlasela ummandla waseYerusalem waboniswa esi siprofeto yaye wayekholelwa ukuba sasibhekisela kuye.

‘Ukutolika kokukaThixo nangenye ingqiqo.’ Ekhokelwa ngumoya kaThixo, uYosefu, umkhonzi othembekileyo kaYehova uThixo, wakwazi ukuyiqonda intsingiselo yaloo maphupha antsonkothileyo aloo madoda awayevalelwe nawo. (Genesis 41:38) Nakule mihla xa abakhonzi bengaqinisekanga ngentsingiselo yesiprofeto esithile, bathandazela umoya kaThixo baze baphande nzulu kwiLizwi likaThixo eliphefumlelwe ngomoya. Ngokwalathiswa nguThixo, banokuzazi izibhalo ezinokubanceda baqonde intsingiselo yezo ziprofeto. Ukutolikwa kwazo akwenziwa ngabantu ngommangaliso. Kuvela kuThixo kuba ngumoya neLizwi lakhe eliyenza icace gca intsingiselo yazo. Ukutyhilwa kweziprofeto akubangakho ngenxa yabahlalutyi abangayifundiyo iBhayibhile.—IZenzo 15:12-21.

‘Ukutolika kokukaThixo’ kuba nguye ogqibayo ngexesha isiprofeto esimele siqondwe ngalo ngabakhonzi bakhe abathembekileyo abasemhlabeni. Intsingiselo yesiprofeto inokuqondwa ngaphambi kokuba sizalisekile, ebudeni, okanye emva kokuba sizaliseke. Ekubeni inguThixo oyaziyo intsingiselo yazo, ikwanguye ozityhilayo ngexesha elifanelekileyo—ngexesha lakhe.

Kwimeko kaYosefu namabanjwa amabini, uYosefu wawatolika amaphupha awo kwiintsuku ezintathu ngaphambi kokuba azaliseke. (Genesis 40:13, 19) Kamva, xa uYosefu waziswa phambi kukaFaro ukuba achaze iphupha lakhe, iminyaka esixhenxe yayisele iza kuqalisa. Ngomoya kaThixo wachaza intsingiselo yephupha likaFaro ukuze kuqokelelwe ukutya okuyintabalala.—Genesis 41:29, 39, 40.

Ezinye iziprofeto ziqondwa ngabakhonzi bakaThixo kuphela emva kokuba zizalisekile. Ngokuphathelele ubomi bukaYesu iziganeko ezininzi kwaprofetwa ngazo kuseziinkulungwane ngaphambi kokuba uYesu azalwe, kodwa oko akuzange kuqondwe ngabafundi bakaYesu de kwasemva kokuvuswa kwakhe. (INdumiso 22:18; 34:20; Yohane 19:24, 36) Okokugqibela, ngokwengxelo kaDaniyeli 12:4, ezinye iziprofeto kwafuneka ‘zitywinwe’ “kude kube lixesha lesiphelo,” xa uDaniyeli wathi, “ulwazi lokwenyaniso luya kuba luninzi.” Siphila kanye kwixesha lokuzaliseka kwezo ziprofeto.b

Iziprofeto ZeBhayibhile Kunye Nawe

UYosefu noDaniyeli bema phambi kookumkani bemihla yabo baze bachaza iziprofeto ezachaphazela iintlanga nookumkani. Ngenkulungwane yokuqala amaKristu ema phambi kwabantu belo xesha njengezithethi zikaYehova, uThixo wesiprofeto baza bancedakala gqitha abantu abasabelayo kuzo.

Namhlanje, amaNgqina kaYehova emhlabeni wonke avakalisa isigidimi esingokwesiprofeto—iindaba ezilungileyo zoBukumkani bukaThixo—yaye bachazela abantu ukuba isiprofeto sikaYesu ngokuphathelele ‘ukupheliswa kwenkqubo yezinto’ siya zaliseka. (Mateyu 24:3, 14) Ngaba uyasazi eso siprofeto nendlela esikuchaphazela ngayo wena? AmaNgqina kaYehova aya kuvuyela ukukunceda uqonde uze uzuze kwesinye sezona ziprofeto zeBhayibhile zizukileyo.

[Imibhalo esemazantsi]

[Imifanekiso ekwiphepha 12, 13]

UYosefu noDaniyeli bazukisa uThixo xa babechaza iziprofeto