Ngaba Ubusazi?

Yintoni ‘umchako omfusa’ ekuthethwa ngawo kwincwadi yeEksodus?

▪ Ngokwengxeko eseBhayibhileni, amalaphu entente ekwakwenziwe ngawo amacala nomkhusane womnquba, eyona ndawo ayenqulela kuyo amaSirayeli, ayenziwe ‘ngelinen ecikizekileyo ephothiweyo, nangemisonto eluhlaza nangoboya obudaywe bamfusa bubomvu nangomchako omfusa.’ (Eksodus 26:1; 38:18) “Izambatho ezingcwele” zababingeleli kwakufuneka zenziwe ‘ngomchako omfusa.’—Eksodus 28:1-6.

Umchako omfusa, nowaziwa ngokuba yikermes, yidayi evelisa umbala obomvu oqaqambileyo, okanye omfusa. Le dayi yayifunyanwa kuhlobo oluthile lwesinambuzane. Ezi zinambuzane zingenamaphiko zazihlala kumthi wom oki obizwa ngokukuba yikermes (Quercus coccifera), ofumaneka eMbindi Mpuma nakunxweme lweMeditera. Lo mbala umfusa ufumaneka kumaqanda ezi zinambuzane. Xa esi sinambuzane sithwele la maqanda, siye sifane nequnube elilingana nokhozo lwe-ertyisi, elikumagqabi nakumasetyana omthi womoki oyikermes. Emva kokuba ziye zacunyuzwa ezi zinambuzane, kuye kuvele umbala omfusa, nonokuwajika amanzi ukuze abe yidayi yamalaphu. Umbhali-mbali ongumRoma uPliny Omdala uthetha ngomchako omfusa nombala wawo nowawubalelwa phakathi kweyona mibala igqwesileyo ngexesha lakhe.

Ngabaphi Ababhali Beencwadi ZeZibhalo ZamaKristu ZesiGrike Ababekho NgePentekoste Yowama- 33 C.E.?

▪ Kunokwenzeka ukuba ngamadoda amathandathu kwasibhozo awabhala le nxalenye yeZibhalo awayekho.

Ngokwengxelo ekwiZenzo, uYesu wayalela abafundi bakhe wathi: “Ningemki eYerusalem, kodwa hlalani nilindele oko kuthenjiswe nguBawo.” (IZenzo 1:4) Kwale ngxelo iphinda ibonise ukuba abo babeza kubhala iBhayibhile kamva uMateyu, uYohane, noPetros nabo bawuthobela lo myalelo. Bahlanganisana “kwindawo enye,” nabanye abafundi bakaYesu. Nabo abantakwe bakaYesu babelapho. (IZenzo 1:12-14; 2:1-4) Ababini kubo, uYakobi noYude (uYudas), babhala iincwadi ezithiywe ngamagama abo.—Mateyu 13:55; Yakobi 1:1; Yude 1.

Kwincadi yakhe yeVangeli, uMarko uthetha ngomfana oselula owabalekayo ngobusuku bokubanjwa kukaJesu. Ubungqina bubonisa ukuba wayebhekisela kuye, ekubeni abanye abafundi babesele bebalekile. (Marko 14:50-52) Ngoko ke, kubonakala ukuba uMarko wayengumfundi wokuqala, yaye kusenokwenzeka ukuba naye wayekho ngePentekoste.

Ababhali ababini abaseleyo beZibhalo zamaKristu zesiGrike yayinguPawulos noLuka. NgePentekoste yowama- 33 C.E., uPawulos wayengekabinguye umlandeli kaKristu. (Galati 1:17, 18) Mhlawumbi, noLuka wayengekho, kuba akaziquki ‘kumangqina okuzibonela’ ubulunguiseleli bukaYesu.—Luka 1:1-3.

[Umfanekiso okwiphepha 22]

Izinambuzane ekwenziwe ngazo idayi

[Inkcazelo]

Courtesy of the SDC Color Experience (www.dc.org.uk)

[Umfanekiso okwiphepha 22]

UPetros xa wayethetha ngePentekoste yowama-33 C.E.