Abantu Abathembekileyo Bamandulo—Bakhokelwa Ngumoya KaThixo
“INkosi enguMongami uYehova indithumile, wona kanye umoya wayo.”—ISA. 48:16.
1, 2. Yintoni efunekayo ukuze sibonise ukholo, yaye luluphi ukhuthazo esinokulufumana ngokuqwalasela abathembekileyo bamandulo?
NANGONA belubonakala ukususela ngemihla ka-Abheli, “ukholo asinto banayo bonke abantu.” (2 Tes. 3:2) Ngoko kutheni umntu esiba nolu phawu yaye yintoni emenza athembeke? Ngomkhamo omkhulu, ukholo lulandela izinto ezifundwe kwiLizwi likaThixo. (Roma 10:17) Luyinkalo yesiqhamo somoya kaThixo. (Gal. 5:22, 23) Ngenxa yoko, ukuze sibonise ukholo, kufuneka umoya oyingcwele.
2 Bekuya kuba yimpazamo ukugqiba kwelokuba amadoda namabhinqa okholo azalwa enjalo, okuthetha ukuba iyazenzekela into yokuba babe nokholo. Abakhonzi abangumzekelo esifunda ngabo eBhayibhileni babengabantu ‘abaneemvakalelo ezinjengezethu.’ (Yak. 5:17) Babenamathandabuzo, ukungazithembi kunye nobuthathaka kodwa “benziwa baba namandla” ngomoya kaThixo ukuze bamelane nobunzima. (Heb. 11:34) Ngokujonga indlela umoya kaYehova owawusebenza ngayo kubo, nathi namhlanje singakhuthazelwa ekubeni siqhubeke sithembekile, size siphile ngendlela esenza ngayo ngoku nakubeni ukholo lwethu luvavanywa.
Umoya KaThixo Wamnika Amandla UMoses
3-5. (a) Sazi njani ukuba uMoses wancedwa ngumoya oyingcwele kwizinto awayezenza? (b) Umzekelo kaMoses usifundisa ntoni ngokusinika kukaYehova umoya wakhe?
3 Kubo bonke abantu ababephila ngowe-1513 B.C.E., uMoses ‘wayengoyena ululamileyo.’ (Num. 12:3) Lo mkhonzi unobulali wanikwa imbopheleleko enkulu kuhlanga lwakwaSirayeli. Umoya kaThixo wanika uMoses amandla okuprofeta, ukugweba, ukubhala, ukukhokela kwanokwenza imimangaliso. (Funda uIsaya 63:11-14.) Sekunjalo, uMoses wakha wakhala esithi lo mthwalo uyamsinda. (Num. 11:14, 15) Ngoko uYehova “wacaphula kumoya” owawukuMoses waza wanika amanye amadoda angama-70 awayeza kumncedisa kulo mthwalo. (Num. 11:16, 17) Nangona umthwalo kaMoses wawubonakala unzima kakhulu, enyanisweni wayengawuthwalanga yedwa—namadoda angama-70 awamiselwa ukuba amncedise ayengazi kuwuthwala odwa.
4 UMoses wayenikwe umoya oyingcwele owanele umsebenzi awayewunikiwe. Emva kolo tshintsho, uMoses wayesenawo umoya awayewudinga. UMoses wayengenamoya umncinane, namadoda amakhulu angama-70 ayengenamoya umninzi gqitha. UYehova usinika umoya esiwufunayo, ngokweemeko zethu. “Akawunikeli ngomlinganiselo umoya” kodwa usinika ‘ngokokuzala kwakhe.’—Yoh. 1:16; 3:34.
5 Ngaba unyamezele izilingo? Ngaba kukho izinto ezibalulekileyo ezithatha ixesha lakho? Ngaba uzama ukunyamekela intsapho yakho ngokomoya nangokwenyama ngoxa uhlangabezana nokunyuka kwamaxabiso okanye ukuxhalabela impilo? Ngaba uneembopheleleko ezinzima ebandleni? Qiniseka ukuba uThixo unokukunika amandla omoya wakhe oyingcwele ukuze ukwazi ukuhlangabezana nayo nayiphi na imeko.—Roma 15:13.
Umoya Oyingcwele Wenza UBhetsaleli Wafaneleka
6-8. (a) Umoya kaThixo wabanceda benza ntoni uBhetsaleli no-Oholiyabhi? (b) Yintoni ebonisa ukuba uBhetsaleli no-Oholiyabhi babekhokelwa ngumoya kaThixo? (c) Kutheni amava kaBhetsaleli esikhuthaza ngokukhethekileyo?
6 Ingxelo yendoda eyayiphila ngaxeshanye noMoses, uBhetsaleli ityhila okungakumbi ngendlela umoya kaThixo onokusebenza ngayo. (Funda iEksodus 35:30-35.) UBhetsaleli wamiselwa ukuba akhokele ekwenzeni impahla eyayifuneka emnqubeni. Ngaba wayekwazi ukwenza imisebenzi yobugcisa ngaphambi kwalo msebenzi mkhulu? Kusenokwenzeka ukuba kwakunjalo, kodwa kungenzeka ukuba owona msebenzi wayesawukhumbula kukwenzela amaYiputa izitena. (Eks. 1:13, 14) Ngoko uBhetsaleli wayeza kuwufeza njani lo msebenzi wakhe unzima? UYehova ‘wamzalisa ngomoya wakhe ngobulumko, ngokuqonda nangokwazi nangobungcibi bohlobo lonke ukuba ayile amacebo aze enze imveliso yohlobo lonke lobugcisa.’ Nayiphi na ingqondo yemveli awayenayo uBhetsaleli yaphuculwa ngumoya oyingcwele. Kwaba njalo nango-Oholiyabhi. Kumele ukuba uBhetsaleli no-Oholiyabhi babefundiswe kakuhle, kuba abazange baphelele nje ekwenzeni umsebenzi wabo kodwa bafundisa nabanye oko babemele bakwenze. Ngokwenene, uThixo wakubeka ezintliziyweni zabo ukufundisa.
7 Enye into engqina ukuba uBhetsaleli no-Oholiyabhi babekhokelwa ngumoya kaThixo kukomelela ngendlela engathethekiyo kwempahla abayenzayo. Izinto abazenzayo zazisasetyenziswa kwanakwiminyaka emalunga nama-500 kamva. (2 Kron. 1:2-6) Ngokungafaniyo nabavelisi bezinto bezi mini, uBhetsaleli no-Oholiyabhi babengenamdla wokufaka igama labo kwizinto ababezenza. Lonke uzuko lwaya kuYehova ngezinto abazenzayo.—Eks. 36:1, 2.
8 Namhlanje, sinokujamelana nomsebenzi onzima ofuna ubugcisa obukhethekileyo, njengokwakha, ukushicilela, ukulungiselela iindibano, ukunikela uncedo ngamaxesha entlekele nokuthetha noogqirha nabasebenzi basesibhedlele ngokuma kwethu okuseZibhalweni ngokuphathelele ukusetyenziswa kwegazi. Maxa wambi, le misebenzi yenziwa ngabasebenzi abanobuchule, kodwa amaxesha amaninzi yenziwa ngamatsha-ntliziyo angenabuchule kangako kuloo msebenzi. Umoya kaThixo ubangela ukuba iphumelele imigudu abayenzayo. Ngaba ukhe akwavuma ukwamkela isabelo esithile kwinkonzo kaYehova, uvakalelwa kukuba bakho abanye abantu abasifanelekela bhetele kunawe? Khumbula ukuba umoya kaYehova unokuluphucula ulwazi nobugcisa onabo uze ukuncede ufeze nasiphi na isabelo akunika sona.
UYoshuwa Waphumelela Ngoncedo Lomoya KaThixo
9. AmaSirayeli azifumana ekweyiphi imeko emva kokuphuma kwawo eYiputa, yaye oko kwaphakamisa wuphi umbuzo?
9 Umoya kaThixo wakhokela omnye umkhonzi owayephila ngexesha likaMoses noBhetsaleli. Kungekudala emva kokuphuma kwabo eYiputa, ama-Amaleki abahlasela bengalindelanga abantu bakaThixo. Lalifikile ixesha lokuba amaSirayeli ayilwe le nto. Nangona ayengaqhelananga kwaphela nemfazwe, kwafuneka amaSirayeli athi sele ekhululekile aqale idabi lawo lokuqala. (Eks. 13:17; 17:8) Kwakufuneka umntu oza kukhokela umkhosi. Yayiza kuba ngubani lowo?
10. Kwakutheni ukuze amaSirayeli phantsi kolawulo lukaYoshuwa oyise edabini?
10 Kwakhethwa uYoshuwa. Kodwa ukuba kwakuza kufuneka achaze umsebenzi awayewenza ngaphambili ukuze afanelekele olo thumo, ziintoni angewayezichazile? Ngaba wayenokuthi kukusebenza njengekhoboka? Ukuxuba iindiza? Ukuqokelela imana? Enyanisweni, utatomkhulu kaYoshuwa, uElishama wayeyinkosana yohlanga lwakwaEfrayim yaye kuyabonakala ukuba wayekhokela amadoda ali-108 100 ezizwe ezithathu zakwaSirayeli. (Num. 2:18, 24; 1 Kron. 7:26, 27) Sekunjalo, uYehova walathisa ngoMoses ukuba, yayingengoElishama okanye unyana wakhe uNun, kodwa yayinguYoshuwa owayeza kukhokela imikhosi eyayiza kutshayela utshaba. Eli dabi lathatha phantse imini yonke. Ngenxa yokuthobela ngokunyaniseka kukaYoshuwa nokuluxabisa kwakhe ulwalathiso lomoya oyingcwele kaThixo, uSirayeli woyisa.—Eks. 17:9-13.
11. Sinokuyinikela njani ngempumelelo inkonzo engcwele kanye njengokuba wenzayo uYoshuwa?
11 Kamva uYoshuwa, ‘ezele ngumoya wobulumko,’ wangena ezihlangwini zikaMoses. (Dut. 34:9) Umoya oyingcwele awuzange umnike amandla okuprofeta okanye awokwenza imimangaliso njengoko kwaba njalo kuMoses, kodwa wamnceda uYoshuwa wakwazi ukukhokela uSirayeli kumadabi ekoyiswa amaKanan kuwo. Namhlanje, sinokuvakalelwa kukuba asinamava okanye asikufanelekeli ukuphumeza iinkalo ezithile zenkonzo yethu engcwele. Kodwa, njengoYoshuwa, siqinisekile ukuba siya kuphumelela ukuba silulandela ngokusondeleyo ulwalathiso lukaThixo.—Yosh. 1:7-9.
“Umoya KaYehova Wamgubungela UGidiyon”
12-14. (a) Isibakala sokuba amadoda angama-300 oyise umkhosi omkhulu wamaMidiyan sityhila ntoni? (b) UYehova wamqinisekisa njani uGidiyon? (c) UThixo usiqinisekisa njani namhlanje?
12 Emva kokufa kukaYoshuwa, uYehova waqhubeka ebonisa indlela amandla akhe anokubomeleza ngayo abantu abathembekileyo. Incwadi yaBagwebi izaliswe ziingxelo zabantu abathi “bekwimo yobuthathaka basuka benziwa baba namandla.” (Heb. 11:34) Ngomoya oyingcwele, uThixo wanceda uGidiyon walwela abantu Bakhe. (ABagwe. 6:34) Noko ke, kumkhosi owaqokelelwa nguGidiyon, joni ngalinye lalijongene namajoni amaMidiyan amane. Emehlweni kaYehova, kwanaloo mkhosi mncinane wamaSirayeli wawumkhulu gqitha. Kabini wayalela uGidiyon ukuba awuphungule loo mkhosi de ijoni ngalinye lakwaSirayeli lijongane namaMidiyan angama-450. (ABagwe. 7:2-8; 8:10) UYehova wayefuna ukuba iimeko zime ngolo hlobo. Ngoko, ukuba kwakuza kubakho uloyiso olungathethekiyo, ngubani owayenokuzingomb’ isifuba athi koyiswe ngenxa yemigudu nobulumko bakhe?
13 UGidiyon namajoni akhe babesele belilungele idabi ngomlinganiselo othile. Ukuba wawuphakathi kwelo butho lamajoni ambalwa, ngaba ngewawuzive ukhuselekile kukwazi ukuba amanye amajoni awoyikayo nangengomakroti aphungulwe? Okanye ngaba ngewawunayo indawana yokuxhalaba njengoko ucinga ngendlela izinto ezisenokwenzeka ngayo? Akuyomfuneko ukufunisela ngendlela uGidiyon awayevakalelwa ngayo. Wenza kanye njengoko wayexelelwe! (Funda ABagwebi 7:9-14.) UYehova akazange acatshukiswe kukuba uGidiyon eye wacela kuye umqondiso ongqina ukuba uThixo uya kumxhasa. (ABagwe. 6:36-40) Kunoko, walomeleza ukholo lukaGidiyon.
14 Amandla kaYehova okusindisa akasikelwanga mda. Unokubasindisa abantu bakhe nakweyiphi na ingxaki, ekwasebenzisa nabantu ababonakala bebuthathaka. Maxa wambi sinokuziva singenamandla okanye sikwimeko emaxongo. Asilindelanga ukufumana isiqinisekiso esingummangaliso njengoGidiyon, kodwa sinokukhokelwa size siqinisekiswe liLizwi likaThixo nalibandla elikhokelwa ngumoya wakhe. (Roma 8:31, 32) Izithembiso zothando zikaYehova zomeleza ukholo lwethu zize zisiqinisekise ukuba ngokwenene unguMncedi wethu!
“Umoya KaYehova Wafika KuYifeta”
15, 16. Kwakutheni ukuze intombi kaYifeta ibe nesimo sengqondo esihle, yaye kunokubakhuthaza njani abazali oku?
15 Khawuqwalasele omnye umzekelo. Xa kwafuneka ukuba amaSirayeli alwe idabi nama-Amoni, umoya kaYehova “wafika kuYifeta.” Elangazelela ukoyisa ukuze kuzukiswe igama likaYehova, uYifeta wenza isibhambathiso ekwaba buhlungu ukusizalisekisa. Wabhambathisa wathi ukuba uThixo unokunikela ama-Amoni esandleni sakhe, umntu wokuqala ukuya kumkhawulela xa efika emzini wakhe, uya kumnika uYehova. Ukubuya kwakhe evela koyisa ama-Amoni uYifeta, intombi yakhe yabaleka ukuza kumkhawulela. (ABagwe. 11:29-31, 34) Ngaba le nto yamothusa uYifeta? Kusenokungabi njalo, kuba wayenomntwana omnye. Wafeza isibhambathiso awasenzayo ngokunikela ngentombi yakhe kwinkonzo ekhethekileyo kwingcwele kaYehova eShilo. Njengoko yayingumkhonzi onyanisekileyo kaYehova, intombi kaYifeta yayiqinisekile ukuba isibhambathiso esenziwa nguyise sasifanele sifezekiswe. (Funda ABagwebi 11:36.) Umoya kaYehova wabanika bobabini amandla ababewafuna.
16 Intombi kaYifeta yayiwufumana phi umoya onjalo wokuzincama? Akuthandabuzeki ukuba ukholo lwayo lwakhula njengoko yayibukele inzondelelo kayise nokuzinikela kwakhe kuThixo. Bazali, abantwana bayawubona umzekelo wenu. Izigqibo enizenzayo zibonisa ukuba niyakukholelwa oko nikutshoyo. Abantwana benu bayayibukela indlela imithandazo yenu engapheziyo nemfundiso entle edibana ngayo nomzekelo wenu woko kuthethwa kukukhonza uYehova ngentliziyo epheleleyo. Njengoko abantwana besenjenjalo, baya kuba nomnqweno ongakumbi wokuzinikela kwinkonzo kaYehova. Oku kubangela uvuyo.
“Umoya KaYehova Wasebenza” KuSamson
17. Yintoni eyenziwa nguSamson encedwa ngumoya kaThixo?
17 Khawucinge ngomnye umzekelo. Xa uSirayeli wathinjwa ngamaFilisti, “ekuhambeni kwexesha umoya kaYehova wamqhuba” uSamson ukuba akhulule uSirayeli. (ABagwe. 13:24, 25) USamson womelezelwa ukuba enze izenzo ezifuna amandla angathethekiyo. Xa amaFilisti eyisela amanye amaSirayeli ukuba ambambe, “umoya kaYehova wasebenza kuye, yaye iintsontelo ezazisezingalweni zakhe zaba ngathi yimisonto yelinen etshiswe ngomlilo, kangangokuba amakhamandela akhe anyibilika ezandleni zakhe.” (ABagwe. 15:14) Kwanaxa wayebuthathaka emzimbeni ngenxa yokungasebenzisi kwakhe ingqiqo, uSamson wenziwa waba namandla ‘ngenxa yokholo.’ (Heb. 11:32-34; ABagwe. 16:18-21, 28-30) Umoya kaYehova wasebenza kuSamson ngendlela ekhethekileyo ngenxa yeemeko ezazingaqhelekanga. Sekunjalo, ezi ziganeko zembali zisikhuthaza gqitha. Njani?
18, 19. (a) Amava kaSamson asiqinisekisa ngantoni? (b) Ungenelwa njani ngokuhlolisisa imizekelo yabantu abathembekileyo ekweli nqaku?
18 Sithembele kwakulaa moya uyingcwele wayenawo uSamson. Sikwenza oko ngokuqhubeka nomsebenzi uYesu awawunika abalandeli bakhe, ‘wokushumayela ebantwini nowokunikela ubungqina obucokisekileyo.’ (IZe. 10:42) Esi sabelo sifuna ubuchule obungenakuzizela. Sinombulelo ongazenzisiyo kuba uYehova esebenzisa umoya wakhe ukusinceda sifeze iimbopheleleko ezininzi asinike zona! Ngenxa yoko, njengoko siphumeza uthumo lwethu, sinokuthetha la mazwi omprofeti uIsaya: “INkosi enguMongami uYehova indithumile, wona kanye umoya wayo.” (Isa. 48:16) Ngokwenene ngumoya kaThixo osithumileyo! Sinikela ingqalelo kumsebenzi esiwenzayo siqinisekile ukuba uYehova uya kusenza sifaneleke ngakumbi njengoko wenzayo kuMoses, uBhetsaleli noYoshuwa. Sithatha ‘ikrele lomoya, oko kukuthi ilizwi likaThixo,’ siqinisekile ukuba uya kusomeleza kanye ngendlela awamomeleza ngayo uGidiyon, uYifeta noSamson. (Efe. 6:17, 18) Ngokwayama ngoncedo lukaYehova ukuze simelane nemiqobo, sinokomelela ngokomoya kanye njengokuba uSamson wayomelele emzimbeni.
19 Ngokucacileyo, uYehova uyabasikelela abo balumela ngenkalipho unqulo lokwenyaniso. Njengoko sisalathiswa ngumoya oyingcwele kaThixo, ukholo lwethu luyakhula. Ngenxa yoko, kuya kuba mnandi ukuhlola ezinye iziganeko ezivuyisayo ezikwiZibhalo ZamaKristu ZesiGrike. Oku kuya kusibonisa indlela umoya kaYehova owasebenza ngayo kubakhonzi bakhe abathembekileyo benkulungwane yokuqala, ngaphambi nasemva kwePentekoste yowama-33 C.E. Ezi ngxelo ziza kuhlolisiswa kwinqaku elilandelayo.
Kutheni kukukhuthaza ukwazi indlela umoya kaThixo owasebenza ngayo . . .
• KuMoses?
• KuBhetsaleli?
• KuYoshuwa?
• KuGidiyon?
• KuYifeta?
• KuSamson?
[Amagama acatshulweyo akwiphepha 22]
Umoya kaThixo unokusinika amandla ngokomoya njengoko wanika uSamson amandla okoqobo
[Umfanekiso okwiphepha 21]
Bazali, umzekelo wenu wokuzimisela uyabetheleleka kubantwana benu