Ukukhokelwa Ngumoya KaThixo Ngenkulungwane Yokuqala Nanamhlanje
“Konke oku kwenziwa ngumoya omnye nofanayo.”—1 KOR. 12:11.
1. Ziziphi iingongoma esiza kunyathela phezu kwazo kweli nqaku?
IPENTEKOSTE. Zimangalisa ngokwenene iziganeko ezithi qatha engqondweni kwakuthethwa ngelo gama! (IZe. 2:1-4) Ukuthululwa komoya oyingcwele ngeso sihlandlo kwinkulungwane yokuqala kwabonisa utshintsho oluphawulekayo kwindlela uThixo awayeqhubana ngayo nabakhonzi bakhe. Kwinqaku elidluleyo, siye sahlolisisa ezinye iindlela umoya kaThixo oye wabanceda ngazo abantu abathembekileyo bamandulo bathwala izabelo ezinzima nezineenkcukacha. Kodwa nguwuphi umahluko phakathi kwendlela umoya kaThixo owawusebenza ngayo ngamaxesha angaphambi kwawobuKristu nendlela owawusebenza ngayo ngenkulungwane yokuqala? Yaye aye angenelwa njani amaKristu kwindlela umoya kaThixo osebenza ngayo namhlanje? Makhe sibone.
“Khangela! Ikhobokazana LikaYehova!”
2. UMariya wakubona njani ukusebenza komoya oyingcwele?
2 Wayekho uMariya kwigumbi elikhulu eliphezulu eYerusalem xa kwathululwa umoya oyingcwele owawuthenjisiwe. (IZe. 1:13, 14) Sekunjalo ngaphezu kweminyaka engamashumi amathathu ngaphambi kweso siganeko, wayebone iindlela ezimangalisayo osebenza ngazo umoya kaYehova. UYehova wayedlulisele ubomi boNyana wakhe emhlabeni, ebangela ukuba akhawulwe kwisibeleko sikaMariya ngoxa wayeseyintombi enyulu. Wayekhawule “ngomoya oyingcwele.”—Mat. 1:20.
3, 4. UMariya wabonisa siphi isimo sengqondo, yaye sinokumxelisa njani?
3 Kwakutheni ukuze uMariya ajizekwe elo lungelo lingenakuthelekiswa nanto? Emva kokuba ingelosi ichazele uMariya ukuthanda kukaYehova ngokuphathelele yena, uMariya wadanduluka: “Khangela! Ikhobokazana likaYehova! Ngamana kungenzeka kum ngokwendlela ovakalise ngayo.” (Luka 1:38) Xa wathetha ngolo hlobo, uMariya wabonisa isimo sengqondo awayesele esiphawule uThixo. Indlela awasabela ngayo ibonisa ukuba wayekulungele ukwamkela ukuthanda kukaThixo kulo mba. Akazange azikhathaze ngendlela abantu basekuhlaleni ababeza kukujonga ngayo ukumitha kwakhe, engazange azikhathaze nangendlela oko okwakuza kuluchaphazela ngayo ulwalamano lwakhe nendoda awayeza kutshata nayo. Ngokubhekisela kwisiqu sakhe njengoyena mkhonzi uphantsi, uMariya wabonisa ukuba wayethembele ngokupheleleyo kuYehova njengeNkosi yakhe.
4 Ngaba maxa wambi ukhe uzive usonganyelwa lucelomngeni okanye iimbopheleleko onazo kwinkonzo kaThixo? Kuya kuba kuhle ukuba ngamnye wethu azibuze, ‘Ngaba ndithembela ngokupheleleyo ngoYehova ukuba alungelelanise izinto ngokuvisisana nokuthanda kwakhe? Ngaba ngokwenene ndibonisa umoya wokuzincama?’ Qiniseka ukuba uThixo uyabanika umoya wakhe abo bathembele kuye ngeentliziyo ezipheleleyo baze bathobele ukuthanda kwakhe.—IZe. 5:32.
UPetros Wancedwa Ngumoya Oyingcwele
5. Ziziphi ezinye iindlela uPetros awabona umoya oyingcwele usebenza ngazo ngaphambi kwePentekoste yowama-33 C.E.?
5 Kanye njengoMariya, umpostile uPetros wazibonela ngawakhe amehlo ukuba namandla komoya oyingcwele kaThixo ngaphambi kwePentekoste yowama-33 C.E. UYesu wanika yena nabanye abapostile igunya lokukhupha iidemon. (Marko 3:14-16) Nangona iZibhalo zingasiniki zinkcukacha zininzi, kubonakala ngathi uPetros walisebenzisa elo gunya. Kanti amandla kaThixo abonakala xa uYesu wacela uPetros ukuba eze kuye ehamba kuLwandle lwaseGalili waza uPetros wakwenza oko. (Funda uMateyu 14:25-29.) Lizicacele elokuba, uPetros wathembela kumoya oyingcwele ukuze umncede enze ezo zenzo zimangalisayo. Kwakungazi kuba kudala, loo moya usebenze kuPetros nabanye abafundi ngezinye iindlela.
6. Encedwa ngumoya kaThixo, yintoni eyayinokwenziwa nguPetros ebudeni nasemva kwePentekoste yowama-33 C.E.?
6 KuMthendeleko wePentekoste yowama-33 C.E., ngokungummangaliso uPetros nabanye banikwa amandla okuthetha ngeelwimi zeendwendwe ezazityelele eYerusalem. Emva koko, uPetros wakhokela ekuthetheni naloo ndimbane. (IZe. 2:14-36) Ngokwenene, le ndoda yayikhe ibe sisingxami okanye yoyike, yazaliswa yinkalipho ukuze inikele ubungqina nakuba yayisongelwa okanye itshutshiswa. (IZe. 4:18-20, 31) Yaba nolwazi ngokutyhilelwa nguThixo. (IZe. 5:8, 9) Kanti yanikwa namandla okuvusa umntu owayefile.—IZe. 9:40.
7. Ziziphi iimfundiso zikaYesu ezakhanyayo kuPetros emva kokuba ethanjisiwe?
7 Kwanangaphambi kwePentekoste, uPetros waqonda iinkalo ezininzi zenyaniso eyayifundiswa nguYesu. (Mat. 16:16, 17; Yoh. 6:68) Kodwa kwakukho iinkalo zeemfundiso zikaYesu ezazingekacaci kuye ngaphambi kwePentekoste. Ngokomzekelo, uPetros wayengekaqondi ukuba uKristu wayeza kuvuswa engumoya kusuku lwesithathu; nokuba wayengekafumanisi ukuba uBukumkani babuza kuba sezulwini. (Yoh. 20:6-10; IZe. 1:6) Ingcamango yokuba kukho abantu abaza kuba zizidalwa zomoya baze balawule kuBukumkani basezulwini wayengayiqondi uPetros. Wathi akubhaptizwa ngomoya oyingcwele waza wanikwa ithemba lokuphila ezulwini, waqala waziqonda iimfundiso zikaYesu eziphathelele loo miba.
8. Abathanjiswa kunye ‘nabezinye izimvu’ banokufumana luphi ulwazi?
8 Emva kokuthululwa komoya oyingcwele phezu kwabo, abafundi bakaYesu batsho baqonda nezinye izinto ababengaziqondi ngaphambili. Bephefumlelwe, ababhali beZibhalo ZamaKristu ZesiGrike babhala—ukuze kungenelwe thina—iinkalo ezimangalisayo zenjongo kaYehova. (Efe. 3:8-11, 18) Namhlanje, abo bathanjiswe ngomoya nabo ‘bezinye izimvu’ batya kunye ngokomoya, befunda inyaniso efanayo. (Yoh. 10:16) Ngaba uyaluxabisa ulwazi nokuqonda kweLizwi likaThixo olutyhilwe kuwe ngumoya oyingcwele?
UPawulos ‘Wazaliswa Ngumoya Oyingcwele’
9. Yintoni uPawulos awayifezayo encedwa ngumoya oyingcwele?
9 Malunga nesithuba sonyaka emva kwePentekoste yowama-33 C.E., omnye umntu wafumana isipho sikaThixo somoya oyingcwele. Loo mntu yayinguSawule, owaba nguPawulos kamva. Umoya wasebenza kuye ngeendlela ezisincedayo nathi namhlanje. Umpostile uPawulos waphefumlelwa ukuba abhale iincwadi zeBhayibhile ezili-14. Ibe kanye njengoko kwenzekayo kuPetros, umoya kaThixo wenza ukuba uPawulos aqonde aze abhale ngokucacileyo ngethemba lokungafi nokungonakali emazulwini. Encedwa ngumoya oyingcwele, uPawulos wanyanga abantu abagulayo, wakhupha iidemon waza wavusa nabafileyo! Noko ke, amandla awafunyanwa ngomoya oyingcwele aba nenjongo ebaluleke ngakumbi, leyo bonke abakhonzi bakaThixo namhlanje bayifumanayo, nangona ingenzeki ngokungummangaliso.
10. Umoya oyingcwele waba naliphi igalelo ekunikeni uPawulos amandla okuthetha?
10 UPawulos, ‘owazaliswa ngumoya oyingcwele,’ wakhalimela indoda eyayingumkhafuli. Oko kwaba negalelo elingathethekiyo kumlawuli oyintloko waseSipro, owayeyiphulaphule yonke loo ncoko! Elo bamba layamkela inyaniso, “njengoko lalithe khamnqa yimfundiso kaYehova.” (IZe. 13:8-12) Licacile elokuba, uPawulos wayekuqonda kakuhle ukubaluleka komoya oyingcwele kaThixo xa kufikelelwa kumbandela wokuthetha inyaniso. (Mat. 10:20) Kamva wabongoza ibandla lase-Efese ukuba lenze isikhungo ngokuphathelele yena ukuze anikwe “amandla okuthetha.”—Efe. 6:18-20.
11. UPawulos wakhokelwa njani ngumoya kaThixo?
11 Umoya oyingcwele awuzange uphelele ekunikeni uPawulos amandla okuthetha, kodwa maxa wambi wamthintela ukuba athethe kwiindawo ezithile. Njengoko wayekuhambo lwakhe lobuvangeli basemazweni, uPawulos wayekhokelwa ngumoya kaThixo. (IZe. 13:2; funda iZenzo 16:6-10.) UYehova usawukhokela umsebenzi wokushumayela esebenzisa umoya wakhe. NjengoPawulos, bonke abakhonzi bakaYehova abathobekileyo benza konke abanako ukuze bavakalise inyaniso ngenkalipho nangenzondelelo. Nangona uYehova engasalathisi ngokucacileyo ngendlela awayesenza ngayo ngexesha likaPawulos, sinokuqiniseka ukuba usebenzisa umoya wakhe oyingcwele ukuqinisekisa ukuba abo bafanelekayo bayayiva inyaniso.—Yoh. 6:44.
“Iintlobo Ngeentlobo Zokusebenza”
12-14. Ngaba umoya kaThixo usebenza ngendlela efanayo kubo bonke abakhonzi bakhe? Cacisa.
12 Ngaba iingxelo zokusikelela kukaYehova ibandla lenkulungwane yokuqala labathanjiswa, ziyabakhuthaza abakhonzi bakaThixo abazahluleleyo namhlanje? Ngaphandle kwamathandabuzo ziyabakhuthaza! Khumbula amazwi aphefumlelweyo kaPawulos awayesiya kwibandla laseKorinte ngokuphathelele iziphiwo ezingummangaliso zomoya ngomhla wakhe: “Ke kaloku kukho iintlobo ngeentlobo zeziphiwo, kodwa mnye wona umoya; yaye kukho iintlobo ngeentlobo zobulungiseleli, ukanti inye yona iNkosi; kukwakho neentlobo ngeentlobo zokusebenza, ukanti nguThixo omnye owenza konke oko kusebenza kubo bonke abantu.” (1 Kor. 12:4-6, 11) Ewe, umoya oyingcwele unako ukusebenza ngeendlela ezingafaniyo kubakhonzi bakaThixo abahlukahlukeneyo ngenjongo ethile. Enyanisweni, umoya oyingcwele ukho ‘kumhlambi omncinane’ kaKristu ‘nakwezinye izimvu.’ (Luka 12:32; Yoh. 10:16) Kodwa awusoloko usebenza ngendlela efanayo kwilungu ngalinye lebandla.
13 Ngokomzekelo, abadala bamiselwa ngomoya oyingcwele. (IZe. 20:28) Kodwa asingabo bonke abathanjiswa ababa ngabaveleli emabandleni. Ngokusuka koku, sinokugqiba kwelithini? Ngokucacileyo sinokugqiba kwelokuba umoya kaThixo usebenza ngeendlela ezahlukeneyo kumalungu ebandla.
14 Laa moya ubangela ukuba abathanjiswa ‘bazive bengoonyana,’ ikwangulowo wathi uYehova wavusa ngawo okuphela koNyana amzeleyo kwabafileyo waza wafumana ubomi bokungafi ezulwini. (Funda eyabaseRoma 8:11, 15.) Ikwanguloo moya awathi uYehova wadala ngawo isijikelezi-langa sisonke. (Gen. 1:1-3) Kwangaloo moya mnye, uYehova wenza uBhetsaleli wafanelekela umsebenzi okhethekileyo emnqubeni, wanika uSamson amandla okwenza izinto ezifuna amandla angathethekiyo waza wabangela ukuba uPetros ahambe emanzini. Ngenxa yoko, masingabhidanisi ukuba nomoya kaThixo nokuthanjiswa ngomoya kaThixo, kuba ukuthanjiswa ngomoya kaThixo kungumsebenzi okhethekileyo walo moya. Ukuthambisa ngomoya kuxhomekeke kuThixo.
15. Ngaba ukubhaptiza ngomoya oyingcwele kuya kuqhubeka ngonaphakade? Cacisa.
15 Umoya kaThixo oyingcwele nosebenzayo ubusebenza ngeendlela ezahlukahlukeneyo kubakhonzi bakhe ukususela oko waba nabakhonzi abathembekileyo, ewe, kangangamawakawaka eminyaka ngaphambi kokuba aqale ukuthambisa ngomoya. NgePentekoste yowama-33 C.E, kwaqalisa ukuthanjiswa ngomoya, kodwa oko akusayi kuqhubeka ixesha elingenasiphelo. Ukubhaptiza ngomoya kuya kuphela, kodwa umoya oyingcwele uya kuqhubeka usebenza kubantu bakaThixo ukuze benze ukuthanda kwakhe ngonaphakade.
16. Bencedwa ngumoya wakhe, benza ntoni ngoku abakhonzi bakaThixo?
16 Yintoni ngokukhethekileyo eyenziwa emhlabeni ngomoya oyingcwele kaYehova ngoku? ISityhilelo 22:17 sithi: “Umoya nomtshakazi bathi: ‘Yiza!’ Lowo uvayo makathi: ‘Yiza!’ Lowo unxaniweyo makeze; lowo uthandayo makawathabathe amanzi obomi ngesisa.” Eqhutywa ngumoya kaThixo, amaKristu namhlanje adlulisela isimemo sikaYehova esinika ubomi ‘kuye nabani na othandayo’ ukwamkela amanzi obomi. AmaKristu athanjisiweyo ayakhokela ekwenzeni oku. Sekunjalo, abo bezinye izimvu bayawancedisa ekudluliseleni esi simemo. Omabini la maqela ayasebenzisana nalo moya uyingcwele ekuphumezeni lo msebenzi. Aye afuzisela ukuzahlulela kwawo ngokubhaptizwa “egameni loYise neloNyana nelomoya oyingcwele.” (Mat. 28:19) Yaye bonke abakula maqela bayawuvumela umoya kaThixo ukuba usebenze kubomi babo, bewuvumela nokuba uvelise isiqhamo sawo kubo. (Gal. 5:22, 23) Ngokufanayo nabathanjiswa, ezinye izimvu ziye zawuvumela umoya kaThixo ukuba uzincede. Ngoncedo lwawo, zenza unako nako wokufikelela imilinganiselo kaYehova yobungcwele.—2 Kor. 7:1; ISityhi. 7:9, 14.
Qhubeka Ucela Umoya Oyingcwele
17. Sinokungqina njani ukuba sinomoya kaThixo?
17 Ngoko enoba uThixo ukunike ithemba lokuphila ngonaphakade ezulwini okanye emhlabeni, unako ukukunika “amandla angaphaya koko kuqhelekileyo” ukuze ukwazi ukugcina ingqibelelo uze ufumane umvuzo. (2 Kor. 4:7) Ukuqhubeka kwakho ushumayela iindaba ezilungileyo zoBukumkani kunokubangela ukuba ugculelwe. Kodwa khumbula ukuba, ‘ukuba uyangcikivwa ngenxa yegama likaKristu, unoyolo, ngenxa yokuba umoya wozuko, oko kukuthi, umoya kaThixo, uphumle phezu kwakho.’—1 Pet. 4:14.
18, 19. UYehova uya kukunceda njani ngomoya wakhe oyingcwele, ibe uzimisele ukwenza ntoni kule nkalo?
18 Umoya oyingcwele usisipho sikaThixo sesisa kwabo basifuna ngokunyanisekileyo. Awupheleli nje ekuphuculeni ubuchule onabo kodwa uphucula nomnqweno onawo wokwenza konke okusemandleni akho kwinkonzo oyinikela kuye. “UThixo nguye osebenzayo kuni ngaphakathi, aninike amandla okunqwenela nawokwenza, ngokokuthanda kwakhe.” Isipho esixabisekileyo somoya oyingcwele, kunye nokuzama kwethu ngamandla ‘ukubambelela ngokuqinileyo kwilizwi lobomi,’ kuya kusenza ‘sihlale silufezekisa usindiso lwethu ngoloyiko nangokungcangcazela.’—Fil. 2:12, 13, 16.
19 Ngoko uthembele ngokupheleleyo kumandla omoya kaThixo, zimisele kuso nasiphi na isabelo osinikiweyo, ube nobuchule kuyo nayiphi na into ocelwa ukuba uyenze, uze ucele uncedo lukaYehova. (Yak. 1:5) Uya kukunika oko ukufunayo ukuze uqonde iLizwi lakhe, umelane neengxaki zobomi uze ushumayele iindaba ezilungileyo. “Qhubekani nicela, niya kunikwa; qhubekani nifuna, niya kufumana; qhubekani ninkqonkqoza niya kuvulelwa,” ibe oko kuquka ukufumana umoya oyingcwele. (Luka 11:9, 13) Ewe, qhubeka ucela uYehova ukuba akuncede ufane nabathembekileyo—abamandulo nabale mihla—ababekhokelwa ngumoya oyingcwele kaThixo.
Ngaba Unokucacisa?
• NjengoMariya, sisiphi isimo sengqondo esinokusibonisa nesiya kusizisela iintsikelelo?
• UPawulos wakhokelwa ngumoya kaThixo ngayiphi ingqiqo?
• Namhlanje abakhonzi bakaThixo bakhokelwa njani ngumoya wakhe?
[Umfanekiso okwiphepha 24]
Umoya kaThixo wamnceda uPawulos ukuze oyise impembelelo yoomoya abangendawo
[Umfanekiso okwiphepha 26]
Namhlanje umoya oyingcwele ukho ukuze uncede amaKristu, enoba analiphi na ithemba