Apho Imida Ingabalulekanga Nganto
AmaNgqina kaYehova azama ukoyisa imiqobo ephakathi kwabantu. Awuthabathela entliziyweni umgaqo owachazwa nguYesu kubafundi bakhe othi: “nonke nina ningabazalwana.” (Mateyu 23:8) Lo mgaqo ubonakala kakuhle kwiindawo ezimbini anqulela kuzo amaNgqina enye isePortugal enye iseSpeyin.
ISIXEKO esibiyelwe ngeendonga esiseValença do Minho, emantla ePortugal, sakhiwa ngamaxesha ayingozi. Udonga oluseluphahleni lwenqaba lwenza kube lula ukubona ngaphesheya koMlambo iMinho, ongumda ophakathi kweSpeyin nePortugal. Ngaphesheya komlambo kukho isixeko saseSpeyin esibizwa ngokuba yiTui, nendlu yetyalike enkulu ebonakala ngathi yinqaba. Le nqaba yaseTui neyaseValença zakhiwa ngenkulungwane ye-17, xa iSpeyin nePortugal zazisilwa.
Ngowe-1995, imida phakathi kwala mazwe mabini oManyano lwaseYurophu yavulwa. Kodwa ukumanyanisa abantu kufuna okungakumbi kunokubhangisa nje imida. Kubandakanya ukufikelel’ ingqondo neentliziyo. EValença kukho isakhiwo esincinane esinomtsalane esibonisa indlela enokoyiswa ngayo imiqobo phakathi kwabantu. Sisakhiwo sonqulo—iHolo yoBukumkani yamaNgqina kaYehova—esetyenziswa ngamaNgqina aseSpeyin nawasePortugal.
Eli bali laqala ngowama-2001, xa amaNgqina aseTui ayefuna iHolo yoBukumkani entsha. Kwaye kwanyanzeleka ukuba emke kwindawo awayeqashe kuyo yaye ayengenamali yaneleyo yokwakha iholo entsha. Naloo ndawo ayeyiqashile ayengasakwazi ukuyiqasha kuba ayengenayo imali yaye ibandla labo lalilincinane kakhulu. Ngoko ke, la maNgqina aseSpeyin acela abazalwana bawo abaseValença ePortugal ukuba abanakubavumela kusini na basebenzise iholo yabo, ekumgama weekhilomitha ezimbalwa kumbindi wesixeko saseTui.
UEduardo Vila, ilungu leBandla laseTui eSpeyin uthi: “Sawugwadla lo mbandela kwintlanganiso eyayingoDisemba 2001. Ukumka kwam kuloo ntlanganiso ndaqonda ukuba uYehova uye wazichukumisa iintliziyo zabazalwana bethu basePortugal. Bangena ezindlekweni ezinkulu ukuze bakhe iHolo yoBukumkani entle, yaye kwakusomeleza ukholo ukubona ukuba babekulungele ukusivumela nathi siyisebenzise.”
UAmérico Almeida iNgqina elingumPhuthukezi elalikho nalo kule ntlanganiso lithi: “Sabamkela abazalwana bethu baseSpeyin kwiHolo yoBukumkani yethu. Saba nentembelo yokuba uYehova uza kusisikelela esi sigqibo, yaye sasivumelene ngamxhelo mnye.” AmaNgqina kuwo omabini la mazwe asebenzisana kakuhle kakhulu. UPaolo ovela eValença uthi: “Isenokubonakala ingaqhelekanga into yokuba sivela kumazwe amabini ahlukeneyo, kodwa asiyiboni thina loo nto. Singabazalwana bokomoya.”
Into yokuqala ebonwa ziindwendwe xa zifika kwiHolo yoBukumkani, ziiwotshi ezimbini ezinamaxesha angafaniyo. Ilizwe laseSpeyin lingaphambili ngeyure kwelasePortugal, yaye koko kwahluka kwamaxesha kuphela into engaqhelekanga kwiHolo yoBukumkani. Xa kwakufuneka sihlaziywe isakhiwo, iKomiti Yenqila Yokwakha yaseSpeyin yongamela abasebenzi bawo omabini loo mabandla. UPaolo ukhumbula oku: “Abazalwana abanobuchule bokwakha beza bevela eSpeyin kumgama weekhilomitha ezili-160 ukuze basincedise. Lo msebenzi waqinisa amaqhina othando phakathi kwala mabandla.”
Makhe sithethe ngomzekelo wesibini wokoyiswa komqobo womda.
Umanyano Kwingxingwa Eyahluleleneyo
IPuigcerdá sisixeko saseSpeyin esikumda welizwe laseFransi. Isembindini wengxingwa echumayo nengqongwe ziincopho eziphakamileyo zeentaba zePyrenees. Le ngxingwa ebizwa ngokuba yiCerdaña yayisakufudula iyeyaseSpeyin. Kodwa ngowe-1659, kwisivumelwano soXolo sasePyrenees, iSpeyin sanika ilizwe laseFransi inxalenye yomhlaba wale ngxingwa.
Namhlanje, abantu baseFransi bathenga ePuigcerdá, esona sixeko sikhulu kule ngxingwa. Ukususela ngowe-1997, amaNgqina kaYehova ePuigcerdá nawo aye avuma ukuba iHolo yoBukumkani yawo isetyenziswe ngabazalwana babo baseFransi. Ngaloo nyanga amaNgqina aseFransi ayeka ukusebenzisa isakhiwo esiqeshisayo. Eyona Holo yoBukumkani ikufutshane eFransi yayikumgama weyure xa uhamba ngemoto, yaye ngeenyanga zasebusika indlela enamajikojiko ehamba entabeni isoloko igqunywe likhephu.
Xa amaNgqina aseFransi achaza ukuba ayefuna indawo yokuhlanganyela ngokungxamisekileyo, ngoko nangoko amaNgqina aseSpeyin anikela ngeHolo yoBukumkani yawo. UPrem oliNgqina lasekuhlaleni ukhumbula ukuba: “Bonke abazalwana abathetha iSpanish babenehlombe kuba beza kuyisebenzisa nabanye abazalwana iholo yabo. Kakade ke, loo moya wokufuna ukunceda ubangelwa luqeqesho lweZibhalo esiye salufumana ukutyhubela iminyaka. Emva kweeveki nje ezimbalwa, saqalisa ukuyisebenzisa sonke iHolo yoBukumkani, yaye besiyisebenzisa kunye iminyaka eli-13.”
UEric ongumveleli webandla lesiFrentshi uthi: “IPuigcerdá yaba yindawo efanelekileyo yokuba sakhe iHolo yoBukumkani. Yaye ndisayikhumbula kakuhle indlela abasamkela ngayo ngokufudumeleyo abazalwana abathetha iSpanish. Iholo yabo bayihombisa ngesipha esikhulu seentyatyambo sibhalwe amazwi athi: ‘Namkelekile bazalwana noodade wethu abathandekayo.’”
UEric uphinda ongezelele athi: “Abantu bacinga ukuba ukuvalwa kweHolo yoBukumkani eFransi kwakuthetha ukuba ibandla libhangile. Kodwa ukushumayela kwethu rhoqo kulo mmandla—okwakuquka ukusasaza izimemo ezimemela abantu kwiintlanganiso eSpeyin—kwabonisa ukuba ibandla lethu alivalwanga. Abantu abanomdla bayakuvuyela ukuza kwiintlanganiso eSpeyin. Ukongezelela koko, isibakala sokuba sisebenzisa iholo nabazalwana bethu baseSpeyin senze sasondelelana. Ngaphambili, sasisazi ukuba likho ibandla labazalwana leSpanish ngapha komda, kodwa sasingafane sidibane. Ekubeni ngoku sibonana rhoqo, asiziva singamakheswa kule ngxingwa.”
Ngaba iinkcubeko yadala umsantsa? INgqina elingumFrentshi elisele liyigabhule iminyaka engama-80 lavuma ukuba: “Xa ndevayo ukuba iintlanganiso zethu ziza kuqhutyelwa eSpeyin, ndaba madolw’ anzima. Kodwa ndibamba ngazibini ngendlela abasamkela ngayo nobuhlobo ababubonisayo abazalwana basePuigcerdá, olu tshintsho aluzange lube namagingxigingxi konke konke. Ngokwahlukileyo koko, lwavulela ithuba lokuqinisa umanyano lwabantu bakaYehova bezizwe ngezizwe.”
Isiseko Sokusondelelana
Abaseki bemanyano yaseYurophu bathi amazwe angamalungu “ayezimisele ukubeka isiseko esimanyanisa abantu baseYurophu.” Ukuchithwa kwemida ngeminyaka yee-1980 neye-1990 kwakwenzelwe ukukhawulezisa le njongo. Kodwa imiqobo kufuneka isuswe nasengqondweni.
AmaNgqina kaYehova azimisele ukulisiphula neengcambu ikhethe nokungathembani. Ayaqonda ukuba ukwahlukana ngokwenkcubeko kuyawanceda aqonde imvelaphi yawo nokuba “uThixo akakhethi buso.” (IZenzo 10:34) Kwiindibano zawo zezizwe ngezizwe nakwiiHolo zoBukumkani zawo, ayibonile “indlela ekulunge nekuthandeka ngayo ukuba abazalwana bahlale ndawonye ngomanyano!” (INdumiso 133:1) Umanyano lwamaNgqina aseValença nawasePuigcerdá nabazalwana babo bamazwe aselumelwaneni bubungqina obungenakuphikiswa boko.
[Amagama acatshulweyo akwiphepha 13]
“Isenokubonakala ingaqhelekanga into yokuba sivela kumazwe amabini ahlukeneyo, kodwa asiyiboni thina loo nto. Singabazalwana bokomoya”
[Amagama acatshulweyo akwiphepha 14]
“Lo msebenzi waqinisa amaqhina othando phakathi kwala mabandla”
[Amagama acatshulweyo akwiphepha 15]
“Hayi indlela ekulunge nekuthandeka ngayo ukuba abazalwana bahlale ndawonye ngomanyano!” INDUMISO 133:1
[Umfanekiso okwiphepha 12, 13]
Ummandla waseTui nakuMlambo iMinho xa ungakudonga lwesixeko saseValença do Minho
[Umfanekiso okwiphepha 14]
Kuhlaziywa iHolo yoBukumkani
[Umfanekiso okwiphepha 15]
Iintaba zePyrenees nengxingwa iCerdaña
[Umfanekiso okwiphepha 15]
Abadala bala mabandla omabini—owaseSpeyin nowaseFransi—ahlanganyela kule kwiHolo yoBukumkani esePuigcerdá