Ukungcatsha—Umqondiso Owoyikekayo Wamaxesha!

‘Sahlala sinyanisekile, singamalungisa yaye singabangasolekiyo phakathi kwenu makholwa.’—1 TES. 2:10.

HLALUTYA EZI NGONGOMA ZIZIINTLOKO:

Ziziphi izifundo ezisilumkisayo esinokuzifunda ngokunganyaniseki kukaDelila, uAbhisalom noYudas Skariyoti?

Sinokukuxelisa njani ukunyaniseka okwaboniswa nguYonatan noPetros?

Sinokuhlala njani sinyanisekile kumaqabane ethu omtshato nakuYehova?

1-3. (a) Nguwuphi umqondiso owoyikekayo wamaxesha, yaye ubandakanya ntoni? (b) Yiyiphi imibuzo emithathu esiza kuyiphendula?

UDELILA, uAbhisalom noYudas Skariyoti bafana ngantoni? Bonke babenganyanisekanga—uDelila wayenganyanisekanga kwindoda eyayimthanda, uMgwebi uSamson; uAbhisalom enganyanisekanga kuyise, uKumkani uDavide; yena uYudas akazange anyaniseke kwiNkosi yakhe, uKristu Yesu. Ukunganyaniseki kwabo xa bebonke, kwabaphazamisa abanye! Kodwa kutheni oku kumele kusixhalabise thina?

² Umbhali wale mihla uyakufaka ukungcatsha xa ebala eyona mikhwa ixhaphakileyo namhlanje. Kulindelekile oko, kuba xa wayechaza umqondiso ‘wokupheliswa kwenkqubo yezinto,’ uYesu wathi: ‘Abaninzi baya kungcatshana.’ (Mat. 24:3, 10) ‘Ukungcatsha’ kuthetha “ukunikela, ukudlulisela kutshaba, ngobuqhophololo okanye ukunganyaniseki.” Ukunganyaniseki okulolo hlobo kuqinisekisa isibakala sokuba siphila ‘kwimihla yokugqibela’ awathi uPawulos waprofeta ukuba abantu abasayi ‘kunyaniseka, bengabangcatshi.’ (2 Tim. 3:1, 2, 4) Nangona ababhali beencwadi nabemidlalo yeqonga bedla ngokuzenza umdlalo okanye bazenze zingabonakali zizibi kangako izenzo zobuqhophololo kwiincwadi nakwiimovie zabo, enyanisweni ukunganyaniseki nokungcatsha kunokubangela intlungu nokubandezeleka. Izenzo ezinjalo zingumqondiso owoyikekayo wamaxesha!

³ Sinokufunda ntoni eBhayibhileni ngabo bangazange banyaniseke kwixa elidluleyo? Yiyiphi imizekelo yabantu abanyanisekayo kwabanye esinokuyixelisa? Yaye ngubani esimele sinyaniseke kuye ngokungagungqiyo? Makhe sibone.

IMIZEKELO ESISILUMKISO YEXA ELIDLULEYO

4. UDelila wamngcatsha njani uSamson, yaye kutheni loo nto yayisenyanyeka nje?

⁴ Okokuqala, khawucinge ngoDelila onamayelenqe, owayethandana noMgwebi uSamson. USamson wayezimisele ukulwela abantu bakaThixo kumaFilisti. Mhlawumbi ziqonda ukuba uDelila akamthandi ngokunyanisekileyo uSamson, iinkosi ezintlanu zamaFilisti zathembisa ngokumnyoba ngemali enkulu, ukuba wayenokufumanisa imfihlelo yamandla akhe amakhulu ukuze zimcim’ igama. Umbulalikazi onguDelila wasamkela esi sinyobo, kodwa imigudu yakhe yokutyhila imfihlelo kaSamson yasilela kangangezihlandlo ezithathu. Waqhubeka emxina “ngamazwi akhe ngalo lonke ixesha kwaye eqhubeka embongoza.” Ekugqibeleni, “umphefumlo wakhe waphelelwa ngumonde ukusa kwinqanaba lokufa.” Ngenxa yoko, wamxelela ukuba iinwele zakhe azizange zichetywe yaye ukuba zazinokuchetywa, wayenokuphelelwa ngamandla.a Esazi oko, uDelila wazicheba iinwele zikaSamson ngoxa wayelele ethangeni lakhe, waza wamnikela kwiintshaba zakhe ukuze zimenze nantoni na eziyithandayo. (ABagwe. 16:4, 5, 15-21) Yenyanyeka ngokwenene into awayenzayo! Ngenxa yokunyoluka kwakhe, uDelila wangcatsha umntu owayemthanda.

5. (a) UAbhisalom wazingqina njani enganyanisekanga kuDavide, yaye loo nto yatyhila ntoni ngaye? (b) Wavakalelwa njani uDavide ngokujika kuka-Ahitofele abe ngumngcatshi?

⁵ Kwakhona cinga nje ngoAbhisalom oliqhophololo. Ethe phithi kukunyolukela igunya, wazimisela ukubhukuqa itrone kayise, uKumkani uDavide. UAbhisalom waqala ‘ngokuba iintliziyo zamadoda akwaSirayeli’ ngokuzithandisa kuwo, ewaqhatha yaye esenza ngathi uyawathanda. Wayewawola aze awaphuze, ngokungathi unomdla wokwenene kuwo nakwiimfuno zawo. (2 Sam. 15:2-6) UAbhisalom wada weba nentliziyo yendoda eyayithenjiwe nguDavide ezityand’ igila kuyo, uAhitofele, owajika wangumngcatshi waza waba yinxalenye yolo bhukuqo. (2 Sam. 15:31) KwiNdumiso 3 neyama-55, uDavide uyayichaza indlela oku kunganyaniseki okwamchaphazela ngayo. (INdu. 3:1-8; funda iNdumiso 55:12-14.) UAbhisalom wabonisa ukungalukhathaleli ngokuphandle ulongamo lukaThixo ngokumenzela amayelenqe ukumkani omiselwe nguYehova ngenxa yokunyolukela igunya. (1 Kron. 28:5) Ekugqibeleni, yaphanza loo mvukelo yaye uDavide waqhubeka elawula njengomthanjiswa kaYehova.

6. UYudas wamngcatsha njani uYesu, yaye igama elithi Yudas belinxulunyaniswa nantoni?

⁶ Ngoku khawucinge ngoko umngcatshi onguYudas Skariyoti wakwenza kuKristu. KwiPasika yokugqibela uYesu awayinandipha nabapostile bakhe abali-12, wathi kubo: “Inene ndithi kuni, Omnye wenu uya kundingcatsha.” (Mat. 26:21) Kamva ngobo busuku, uYesu wamxelela oku uPetros, uYakobi noYohane kumyezo waseGetsemane: “Khangelani! Umngcatshi wam usondele.” Akuzange kube kudala, uYudas wathi gqi apho emyezweni ehamba namahlakani akhe, “kwaye esiya ngqo kuYesu wathi: ‘Bhota, Rabhi!’ waza wamanga.” (Mat. 26:46-50; Luka 22:47, 52) UYudas ‘wangcatsha igazi elinobulungisa’ waza wanikela uYesu Kristu kwiintshaba zakhe. Yaye uYudas onyolukileyo wakwenza ngamalini oku? Ngeengqekembe nje ezingama-30 zesilivere! (Mat. 27:3-5) Ukususela ngoko, igama elithi Yudas belisoloko lihamba kunye nelo lithi “umngcatshi,” ingakumbi lowo ungcatsha omnye, abe esithele ngesebe lokuba ungumhlobo.b

7. Sifunde ntoni (a) kuAbhisalom, uYudas kwakunye (b) noDelila?

⁷ Sifunde ntoni kule mizekelo isisilumkiso? UAbhisalom noYudas baba nesiphelo esilusizi ngenxa yokuba bajikela abathanjiswa bakaYehova baza babangcatsha. (2 Sam. 18:9, 14-17; IZe. 1:18-20) Igama likaDelila liya kusoloko linxulunyaniswa nobuqhophololo nothando lwenkwalambisa. (INdu. 119:158) Kubaluleke ngokwenene ukuba siphephe naluphi na utyekelo esinokuba nalo lokunyolukela igunya ngendlela emfamekileyo okanye olokubawa, nto leyo enokubangela ukuba uYehova angakholiswa sithi! Ngaba ikho nayiphi na eminye imizekelo enokusinceda siphephe lo mkhwa wenyanyekayo wokunganyaniseki?

XELISA ABO BAZINGQINA BENYANISEKILE

8, 9. (a) Kwakutheni ukuze uYonatan enze umnqophiso wokunyaniseka kuDavide? (b) Sinokumxelisa njani uYonatan?

⁸ Kwakhona iBhayibhile ithetha ngabantu abaninzi ababenyanisekile. Makhe sithethe ngababini kubo size sibone oko basifundisa kona, siqale ngendoda eyazingqina inyaniseke kuDavide. Kusenokwenzeka ukuba, uYonatan, owayelizibulo likaKumkani uSawule, wayeza kuba yindlalifa kwitrone kaSirayeli, kodwa wawumnye umqobo. UYehova wakhetha uDavide ukuba abe ngukumkani olandelayo wakwaSirayeli. UYonatan wasihlonela isigqibo sikaThixo. Akazange aqhutywe ngumona ajonge uDavide njengotshaba. Kunoko ‘umphefumlo kaYonatan wabophana nomphefumlo kaDavide’ njengoko wayenze umnqophiso wokunyaniseka kuye. Wada wanika uDavide iimpahla zakhe, ikrele, isaphetha nebhanti, ngaloo ndlela emnika uzuko lwasebukhosini. (1 Sam. 18:1-4) UYonatan wenza yonke into awayenokuyenza ‘ukomeleza isandla sikaDavide,’ ukusa kwinqanaba lokuba abeke ubomi bakhe esichengeni ukuze athethelele uDavide kuSawule. Ngokunyaniseka uYonatan wathi kuDavide: “Wena kanye uya kuba ngukumkani phezu koSirayeli, mna ke ndiya kuba ngowesibini kuwe.” (1 Sam. 20:30-34; 23:16, 17) Ayisimangalisi into yokuba, emva kokufa kukaYonatan, uDavide avakalise intlungu nothando awayenalo ngaye ngengoma.—2 Sam. 1:17, 26.

⁹ UYonatan wayenganyanisekanga ngendlela egqwethekileyo. Wazithoba ngokupheleleyo kuMongami, uYehova, wamxhasa ngokupheleleyo uDavide njengomthanjiswa kaThixo. Nanamhlanje, enoba asinikwanga lungelo likhethekileyo ebandleni, sifanele sibaxhase ngokuzithandela abazalwana abamiselweyo abakhokelayo phakathi kwethu.—1 Tes. 5:12, 13; Heb. 13:17, 24.

10, 11. (a) Kwakutheni ukuze uPetros ahlale noYesu ngokunyaniseka? (b) Sinokumxelisa njani uPetros, yaye oko kumele kusishukumisele ukuba senze ntoni?

¹⁰ Omnye umzekelo omhle esiza kuthetha ngawo ngokampostile uPetros, owenza umnqophiso wokunyaniseka kuYesu. Xa uKristu wathetha phandle ngentetho efuziselayo, ebethelela ukubaluleka kokuba nokholo kwinyama negazi lakhe elaliza kunikelwa kungekudala, abaninzi kubafundi bakhe bawafumanisa esothusa amazwi akhe baza bamshiya. (Yoh. 6:53-60, 66) Ngoko uYesu waphethukela kubapostile bakhe abali-12 waza wababuza: “Ngaba nani nifuna ukumka?” NguPetros owaphendula wathi: “Nkosi, siya kumka siye kubani na? Nguwe onamazwi obomi obungunaphakade; yaye sikholiwe saza safikelela ekwazini ukuba wena unguLowo Ungcwele kaThixo.” (Yoh. 6:67-69) Ngaba oku kwakuthetha ukuba uPetros wayekuqonda ngokupheleleyo konke oko kwakusandul’ ukuthethwa nguYesu ngedini lakhe awayeza kulinikela? Kusenokwenzeka ukuba wayengakuqondi. Sekunjalo, uPetros wayezimisele ukunyaniseka kuNyana kaThixo othanjisiweyo.

¹¹ UPetros akazange acinge ukuba uYesu ubona izinto ngendlela ephosakeleyo yaye ekuhambeni kwexesha uza kuwajika amazwi awathethileyo. Kodwa ngokuthobeka, uPetros waqonda ukuba uYesu ‘unamazwi obomi obungunaphakade.’ Ngokufanayo namhlanje, sithini xa sibona ingongoma ekwiimpapasho zethu zamaKristu ezivela ‘kwigosa elithembekileyo’ ekunzima ukuyiqonda okanye engavumelaniyo nendlela esicinga ngayo? Sifanele sizame nzima ukuyiqonda kunokulindela ukuba kuza kubakho utshintsho oluvumelana neembono zethu.—Funda uLuka 12:42.

HLALA UNYANISEKILE KWIQABANE LAKHO LOMTSHATO

12, 13. Ukungcatsha kungangenelela njani emtshatweni, yaye kutheni umntu engenakuyithethelela loo nto ngeminyaka yakhe yobudala?

¹² Ukungcatsha sisenzo esenyanyekayo esingamele sivunyelwe siphazamisane noxolo nomanyano lwentsapho yamaKristu nebandla. Sinoko engqondweni, makhe sihlolisise indlela esinokuzimisela ngayo ukunyaniseka kumaqabane ethu omtshato nakuThixo wethu.

¹³ Ukrexezo luyenye yeendlela ezilihlazo zokungcatsha. Lowo ukrexezayo wonakalisa ukunyaniseka kwakhe kwiqabane lakhe lomtshato aze anikele ingqalelo komnye umntu. Iqabane elingcatshwayo likhawuleza libe lilolo—lishiywe enyanyeni. Yenzeka njani into enjalo kubantu abakhe bathandana? Ixesha elininzi, inyathelo lokuqala elikhokelela apho kukungakhathalelani kwamaqabane atshatileyo. UNjingalwazi weNzululwazi Yabantu, uGabriella Turnaturi uthi, “ukunganyaniseki kuqala xa ungazinikelanga ngokupheleleyo kulwalamano lwakho neqabane lakho.” Nabantu abasele beqinile ngeminyaka baye bangawakhathaleli amaqabane abo. Ngokomzekelo, indoda etshatileyo eneminyaka engama-50 ubudala iqhawula umtshato nomfazi wayo othembekileyo, ebitshate naye kangangeminyaka engama-25 ukuze iye kuhlala nelinye ibhinqa elithandileyo. Abanye bathethelela eli khondo ngokuthi yintlekele nje efikela abantu abasele beqinile ngeminyaka. Noko ke, kunokuba siyenze ibe ngathi yinto engenakuphetshwa, masithethe inyaniso—kukungcatsha okwenziwa ngabantu abasele bekhulile.c

14. (a) Uvakalelwa njani uYehova ngobuqhophololo emtshatweni? (b) Wathini uYesu ngokunyaniseka emtshatweni?

¹⁴ Uvakalelwa njani uYehova ngabo bashiya amaqabane abo ngaphandle kwesizathu esiseZibhalweni? UThixo “uluthiyile uqhawulo-mtshato,” yaye uthetha qatha nxamnye nabo bathi baphathe kakubi baze bashiye amaqabane abo omtshato. (Funda uMalaki 2:13-16.) Ngokuvisisana namazwi kaYise, uYesu wafundisa ukuba umntu akanakugxotha okanye alahle iqabane elimsulwa kuze kube ngathi akukho nto yenzekileyo.—Funda uMateyu 19:3-6, 9.

15. Abo batshatileyo banokukomeleza njani ukunyaniseka kwabo kumaqabane abo?

¹⁵ Abo batshatileyo banokuhlala njani benyanisekile kumaqabane abo? ILizwi likaThixo lithi: ‘Yiba nemihlali ngumfazi [okanye umyeni] wobutsha bakho’ uze ‘udle ubomi nomfazi [okanye umyeni] omthandileyo.’ (IMize. 5:18; INtshu. 9:9) Njengoko omabini amaqabane ekhula, amele ‘azinikele ngokupheleleyo’ kulwalamano lwawo, ngokoqobo nangokweemvakalelo. Loo nto ithetha ukuba amaqabane makakhathalelane, achithe ixesha kunye aze asondelelane. Amele anikele ingqalelo ekulondolozeni umtshato wawo nolwalamano lwawo noYehova. Ukuze zikwenze oko, izibini ezitshatileyo zimele zifundisise iBhayibhile kunye, zisebenze kunye rhoqo entsimini zize zithandaze kunye zicele intsikelelo kaYehova.

HLALA UNYANISEKILE KUYEHOVA

16, 17. (a) Ukunyaniseka kwethu kuThixo kunokuba sesichengeni njani entsatsheni nasebandleni?(b) Nguwuphi umzekelo obonisa ukuba ukuthobela umyalelo kaThixo wokunganxulumani nezalamane ezisuswe kubudlelane kunokuba nemiphumo emihle?

¹⁶ Kukho amalungu ebandla aye enza izono ezinzulu aza ohlwaywa ‘ngokuqatha, ukuze aphile elukholweni.’ (Tito 1:13) Ngenxa yehambo yabo, kuye kwafuneka abanye basuswe kubudlelane. Ingqeqesho iye yabanceda ukuba bachache ngokomoya, ‘abo baqeqeshiweyo yiyo.’ (Heb. 12:11) Kuthekani ukuba sinesalamane okanye umhlobo wethu osenyongweni osuswe kubudlelane? Ngoko kufuneka sinyaniseke kuThixo, kungekhona kuloo mntu. UYehova usijongile enoba siza kuwuthobela kusini na umyalelo wakhe, wokunganxulumani naye nabani na osuswe kubudlelane.—Funda eyoku-1 kwabaseKorinte 5:11-13.

¹⁷ Khawuve nje umzekelo wemiphumo emihle enokubakho xa ngokunyaniseka intsapho ibambelela kumthetho kaYehova wokunganxulumani nezalamane ezisusiweyo kubudlelane. Omnye umfana wasuswa kubudlelane kangangeminyaka elishumi, yaye ngelo xesha uyise, unina nabantakwabo abane ‘bayeka ukunxulumana’ naye. Maxa wambi, wayekhe azame ukuzifaka kwizinto abazenzayo, kodwa xa iyonke intsapho yakowabo ingagungqi ayizange inxulumane naye. Emva kokuba ebuyiselwe, wayitsho into yokuba ebesoloko elukhumbula unxulumano lwentsapho yakowabo, ingakumbi ngokuhlwa xa eyedwa. Kodwa wavuma ukuba ebesoloko ebawela nentwana le yolwalamano nentsapho yakowabo. Noko ke, ngenxa yokuba ingazange ifune ukuba nento yokwenza naye, umnqweno onamandla wokunxulumana nayo uye wamnceda kakhulu ukuba afune ukulungisa ulwalamano lwakhe noYehova. Uze ukukhumbule oko nanini na uhendelwa ekubeni waphule umthetho kaThixo, ngokunxulumana nezalamane zakho ezisuswe kubudlelane.

18. Emva kokuxubusha ngeengenelo zokunyaniseka kunye nemiphumo yokunganyaniseki, uzimisele ukwenza ntoni?

¹⁸ Siphila kwihlabathi elinobuqhophololo nelinganyanisekanga. Sekunjalo, kwibandla lamaKristu singqongwe ngabantu abayimizekelo emihle yokunyaniseka. Ikhondo labo liyabathethelela ngokungathi lithi: “Ningasingqinela ngokwenu, kanti noThixo ngenkqu ukwalingqina, lendlela esahlala ngayo sinyanisekile, singamalungisa yaye singabangasolekiyo phakathi kwenu makholwa.” (1 Tes. 2:10) Ngamana sonke singahlala sinyanisekile kuThixo nakwamanye amaKristu.

[Imibhalo esemazantsi]

[Umfanekiso okwiphepha 10]

UPetros wayenyanisekile kuNyana kaThixo othanjisiweyo nangona abanye bamgatyayo