Ngaba Uyakhumbula?

Ngaba uye wazifunda ngokucokisekileyo iiMboniselo zakutshanje? Sicela uzame ukuphendula le mibuzo ilandelayo:

Solomon unokuba nguwo njani umzekelo osisilumkiso kuthi?

UThixo wamsikelela waza wamsebenzisa uKumkani uSolomon. Noko ke, ngexesha lolawulo lwakhe, uSolomon wayeka ukuthobela uThixo. Watshata nentombi kaFaro engumhedeni, watshata nabanye abafazi abaninzi waza wavumela la mabhinqa angabahedeni ukuba athi ngcembe ukumqhubela kunqulo lobuxoki. Simele sikuphephe ukuvumela utyekelo olubi ukuba lungene kuthi ngokuthe ngcembe. (Dut. 7:1-4; 17:17; 1 Kum. 11:4-8)—12/15, iphepha 10-12.

Kutheni sinokugqala uSara njengebhinqa eloyika uThixo nomfazi oxabisekileyo?

Ukuyalela kukaThixo uAbraham ukuba ashiye iUre, kwakuthetha ukuba uza kushiya intsapho, abahlobo nendlela awayephila ngayo ukuze aye kwindawo angayaziyo. Kodwa uSara wavuma ukuhamba, enentembelo yokuba uThixo uya kumsikelela. Wamhlonela uAbraham, ebonisa iimpawu ezintle.—1/1, iphepha 8.

Kwakutheni ukuze uYehova acele uAbraham ukuba abingelele ngonyana wakhe amthandayo?

Kubalulekile ukukhumbula ukuba uThixo akazange ade amvumele uAbraham ukuba abingelele ngoIsake. Oku kwakubonisa indlela aya kuthi uThixo, engena kwiindleko ezinkulu, abingelele ngoNyana wakhe, uYesu.—1/1, iphepha 23.

Yintoni ebonisa ukuba ukususela kwinkulungwane yokuqala ukuya phambili, ebebakho amaKristu athanjisiweyo okwenyaniso emhlabeni?

Kumzekeliso kaYesu ophathelele ‘ingqolowa’ ‘nokhula,’ “imbewu entle” yayibhekisela ‘koonyana bobukumkani.’ (Mat. 13:24-30, 38) Ukhula lwaluza kukhula kunye nengqolowa de kufike ixesha lokuvuna. Ngenxa yoko, nangona singenakutsho siqiniseke ukuba ngabaphi ababengabodidi lwengqolowa, bamele ukuba bebesoloko bebakho de kwaba lixesha lethu.—1/15, iphepha 7.

Ziziphi iziganeko eziya kukhokelela ngokuthe ngqo kwiArmagedon?

Iintlanga ziya kuvakalisa ngokucacileyo zithi: “Luxolo nonqabiseko!” (1 Tes. 5:3) Oorhulumente baya kuluhlasela unqulo lobuxoki. (ISityhi. 17:15-18) Kuya kuhlaselwa nabanquli bokwenyaniso. Emva koko siya kufika isiphelo.—2/1, iphepha 9.

Sinokwenza ntoni ukuze soyise utyekelo lokuba nomona?

Nanga amanyathelo anokusinceda: Hlakulela uthando nomsa wobuzalwana, nxulumana nabantu aboyika uThixo, zama ukwenza okulungileyo, ‘yiba nemihlali kunye nabo banemihlali.’ (Roma 12:15)—2/15, iphepha 16-17.

Ngoobani abathetha ulwimi lwesiNahuatl, yaye yintoni eyenziwayo ngenxa yabo?

Olu yayilulwimi lwama-Aztec amandulo, yaye lusathethwa ngabantu abasisi-1,5 sezigidi eMexico. NamaNgqina ayashumayela ngesiNahuatl, yaye olunye uncwadi lwethu luyaveliswa ngaso.—3/1, iphepha 13-14.

Xa sicebisa abanye, yiyiphi imigaqo esimele siyikhumbule?

Yiqonde eyona meko ibandakanyekileyo. Musa ukungxama. Ngokuthobeka sebenzisa iLizwi likaThixo. Ukuba kunokwenzeka, sebenzisa uncwadi lombutho. Musa ukubenzela izigqibo abanye.—3/15, iphepha 7-9.

UYesu wabongoza abaphulaphuli bakhe ukuba bahambe nemayile yesibini. (Mat. 5:41) Wayethetha ukuthini?

Ngelo xesha kwaSirayeli, amaRoma awayelawula elo, ayenokunyanzela umntu ukuba enze inkonzo ethile. Xa wayebongoza abaphulaphuli bakhe ukuba bahambe nemayile yesibini, uYesu wayesithi ngaphandle kwengqumbo, kwakufuneka benze iinkonzo ababeyalelwa ukuba bazenze ngokusemthethweni ngabo basegunyeni.—4/1, iphepha 9.