Ngaba AmaKristu Enkulungwane Yokuqala Aba Nenxaxheba Kwimicimbi Yezopolitiko?

▪ Ngaphambi kokuba enyukele ezulwini, uYesu wanika abafundi bakhe imiyalelo ecacileyo ngendlela yokushumayela, kodwa akazange abanike cebiso ngokuphathelele imicimbi yezopolitiko. (Mateyu 28:18-20) Ngenxa yoko, abafundi bakhe baphila ngokuvisisana nomgaqo uYesu awabanika wona othi: “Buyiselani izinto zikaKesare kuKesare, kodwa izinto zikaThixo kuThixo.”—Marko 12:17.

Loo mgaqo wabanceda njani abalandeli bakaYesu bakwazi ukuphila kwihlabathi ababengeyonxalenye yalo? Bazimisela njani ukubuyisela izinto zikaRhulumente okanye uKesare kuKesare nezikaThixo kuThixo?

Umpostile uPawulos wakujonga ukuba nenxaxheba kwezopolitiko njengokwaphula umthetho kaYesu. Incwadi ethi Beyond Good Intentions—A Biblical View of Politics ithi: “UPawulos wayekulungele ukusebenzisa ilungelo lakhe lokuba ngummi waseRoma ukuze azikhusele ematyaleni, kodwa akazange agaye inkxaso yabemi ukuze baxhase imigaqo nkqubo karhulumente.”

Yiyiphi imigaqo umpostile uPawulos awayinika amanye amaKristu? Kwale ncwadi ithi: “Iileta zakhe ezazisiya kwizixeko ezibalulekileyo ezinjengeKorinte, iEfese neRoma zabonakalisa ukungabi namdla kwiingxwabangxwaba zezopolitiko.” Iphinda ithi uPawulos “wayalela ukuba bathotyelwe oorhulumente, kodwa akukho kwanokuba ibenye kwezo leta eyathetha ngokweenkcukacha ngomthetho welizwe apho abongoza icawa ukuba iyokwenza uthethathethwano nemibutho yezopolitiko.”—Roma 12:18; 13:1, 5-7.

AmaKristu awaphila kumashumi eminyaka kamva emva kokufa kompostile uPawulos aqhubeka ekwazi kakuhle ukwahlula phakathi kweembopheleleko anazo kuThixo nakurhulumente. Ahlala ewahlonela amagunya ezopolitiko kodwa ayengabi nanxaxheba kwimicimbi yawo. Incwadi ethi Beyond Good Intentions ithi ngala makholwa: “Nangona ayekholelwa ukuba ayemele awahlonele amagunya alawulayo, la maKristu enkulungwane yokuqala ayengayikholelwa into yokuba afanele abandakanyeke kwezopolitiko.”

Noko ke, malunga neminyaka engama-300 emva kokufa kukaKristu, izinto zatshintsha. Umfundi ngezonqulo, uCharles Villa-Vicencio uthi: “Xa iinkqubo zopolitiko zatshintshayo phantsi kukaConstantine, amaKristu agxalathelana ukuya kuba nenxaxheba kwimicimbi yasekuhlaleni nasemkhosini nokwamkela izikhundla kwezopolitiko.” (Between Christ and Caesar) Waba yintoni umphumo? Ngasekupheleni kwenkulungwane yesine yeXesha Eliqhelekileyo, loo ngxube vange yonqulo nezopolitiko yaba yicawa kaRhulumente woBukhosi baseRoma.

Namhlanje, iicawa ezininzi ezithi zilandela uKristu zikhuthaza amarhamente azo ukuba abandakanyeke kwezopolitiko. Noko ke, ezo cawa azimxelisi uKristu, zingalandeli nomzekelo wamaKristu enkulungwane yokuqala.