Ibali Lobomi
“Imfihlelo” Esiyifunde Kwinkonzo Yethu Engcwele
Kubalisa uOlivier Randriamora
“Eneneni ndiyazi ukuba kunjani ukuhlwempuzeka, ndiyazi ukuba kunjani ukuba nentabalala. Kuzo zonke izinto nakuzo zonke iimeko ndiye ndayifunda imfihlelo yokuba kunjani ukuhlutha nokulamba . . . Ezintweni zonke ndinamandla ngenxa yalowo undomelezayo.”—Fil. 4:12, 13.
LA MAZWI kampostile uPawulos ebesoloko esikhuthaza kakhulu mna nenkosikazi yam, uOly. NjengoPawulos, siye safunda “imfihlelo” ngokuthembela ngokupheleleyo kuYehova ngoxa simkhonza apha eMadagascar.
Xa amaNgqina kaYehova aqalisa ukufunda iBhayibhile nomama kaOly ngowe-1982, mna noOly sasisele sithandana. Nam ndasamkela isifundo seBhayibhile, kamva noOly wandithelela ekufundeni. Satshata ngowe-1983, sabhaptizwa ngowe-1985 yaye kamsinya nje emva koko saqalisa ukuba ngoovulindlela abangabancedani. NgoJulayi 1986, saba ngoovulindlela abathe ngxi.
NgoSeptemba 1987, saqalisa ukuba ngoovulindlela abakhethekileyo. Ukuqala kwethu sathunyelwa kwidolophu encinane ekumntla-ntshona weMadagascar yaye apho kwakungekho bandla. Kukho malunga neentlanga ezili-18 kuquka nezizwe ezininzi eMadagascar, yaye amasiko nezithethe zasekuhlaleni azifani. Olona lwimi luthethwa apho sisiMalagasy, kodwa kukwakho neziyelelane. Ngoko safunda iziyelelane kwisabelo sethu esitsha yaye oko kwasinceda samkeleka ekuhlaleni.
Ekuqaleni, ndandinikela intetho yesidlangalala ngazo zonke iiCawa, emva kwayo uOly wayeqhwaba ngokuzimisela. Yayiba sithi kuphela ababedla ngokubakho. Kwakhona sasiba nocwangciso olupheleleyo lweSikolo Sobulungiseleli Sobuthixo, uOly ezibuza eziphendula ngokungathi unomninimzi. Kwatsho kwathi qabu noko xa ngobubele umveleli wesiphaluka owayesityelele wacebisa ukuba siyitshintshe indlela esiziqhuba ngayo iintlanganiso!
Ngenxa yokungabi nazigqibo kweposi, sasikhe singayifumani imali esasibonelelwa ngayo nyanga zonke. Ngenxa yoko, safunda ukuphila ngaloo nto incinane sinayo. Ngesinye isihlandlo, sasingenamali yaneleyo yokuhlawula ibhasi ukuze siye kwindibano yesiphaluka eyayikude ngeekhilomitha ezili-130. Sakhumbula elinye icebiso elihle lelinye iNgqina: “Mchazeleni uYehova ngeengxaki zenu. Kakade ke, ngumsebenzi wakhe lo niwenzayo.” Ngoko sathandaza saza sagqiba ekubeni sihambe ngeenyawo. Noko ke, ngaphambi nje kokuba sihambe, singalindelanga satyelelwa ngomnye umzalwana waza wasipha imali—leyo kanye yayilingene ukuhlawulela ibhasi!
UMSEBENZI WESIPHALUKA
NgoFebruwari 1991, ndamiselwa njengomveleli wesiphaluka. Ngelo xesha, iqela lethu elincinane lalisele landile linabavakalisi abasithoba, abathathu kubo babebhaptiziwe yaye ngokomlinganiselo abantu ababesiza ezintlanganisweni babengama-50. Emva kokuba siqeqeshiwe, sakhonza kwisiphaluka esikwikomkhulu, eliyiAntananarivo. Ngowe-1993, satshintshwa sasiwa kwisiphaluka esikwimpuma yeli lizwe. Iimeko zokuphila zalapho zazahluke kakhulu kwezasesixekweni.
Ukuze sifikelele emabandleni nakumaqela akwanti, sasibetha ngezikaTshiwo maxa wambi side sihambe phakathi kwamahlathi asezintabeni kangangeekhilomitha ezili-145. Umthwalo wethu wawusoloko ulula. Kakade ke, xa intetho yesidlangalala yomveleli wesiphaluka ineeslides njengoko yayidla ngokuba njalo ngezo mini, umthwalo wethu wawusinda. UOly wayephatha umatshini weeslides ngoxa mna ndiphethe ibhetri eneevolti ezili-12.
Sasisoloko sihamba iikhilomitha ezingama-40 suku ngalunye ukuya kwibandla elilandelayo. Endleleni, sasinyuka siphinde sihle ezintabeni, sinqumla imilambo yaye sigxampuza eludakeni. Maxa wambi, sasilala ecaleni kwendlela kodwa sasidla ngokukhangela indawo yokulala kwiilali ezikufutshane. Sasikhe sicele indawo yokulala kubantu esingabaziyo. Sakuba siyifumene, sasiqala ngokulungiselela into esiwa phantsi kwempumlo. UOly wayeboleka imbiza aze ahambe aye kumlambo okufutshane aye kukha amanzi. Ngoxa engekho, ndandiboleka izembe ndize ndicande iinkuni zokupheka. Yonk’ into yayithath’ ixesha. Sasikhe sithenge inkuku ephilayo, siyinqumle size siyixhwithe.
Emva kokuba sityile, sasisikha amanye amanzi okuhlamba. Maxa wambi, sasilala ekhitshini. Xa kusina, sasilala ngaseludongeni ngenxa yokuvuza kophahla.
Sasisoloko siqiniseka ukuba siyashumayela kubantu esifikele kubo. Abazalwana noodadewethu abangamaKristu babesamkela ngobubele obungathethekiyo. Indlela ababeluxabisa ngayo utyelelo lwethu yayisenza silibale ngento yokuba sikhe sasokola endleleni.
Xa sikumakhaya amaNgqina, sasikuvuyela ukuncedisa kwimisebenzi yasekhaya. Oku kwakubenza bakwazi ukuya nathi entsimini. Sasingalindelanga bunewunewu okanye ukutya okukhethekileyo, okwakungenakufikelelwa ngabantu esasifikela kubo.
UKUTYELELA AMAQELA AKWANTI
Sakuvuyela ukutyelela amaqela akwanti, kuba sasisithi sifika nje babe abazalwana besinika ucwangciso olunezinto esiza kuzenza. Sasingafane sibe nalo ixesha ‘lokuphumla kancinane.’ (Marko 6:31) Kwenye indawo, isibini esingamaNgqina samemela ekhayeni laso zonke izifundo zaso zeBhayibhile—ezingama-40—ukuze sifunde nazo. UOly kunye nalo dade baqhuba ezingama-20 ngoxa mna nomyeni wakhe saqhuba ezingama-20. Kwakuphuma isifundo seBhayibhile kuze kuqaliswe esinye ngokukhawuleza. Ebudeni bemini sasinqumama ukuze sibe neentlanganiso, kuphinde kuqalwe apho bekuyekwe khona ngezifundo zeBhayibhile. Loo msebenzi wawuphela emva kwentsimbi yesibhozo ngokuhlwa.
Xa satyelela elinye iqela, sasuka ngentsimbi yesibhozo kusasa sisiya kwilali eselumelwaneni. Sonke sasinxibe iimpahla ezindala. Emva kokuba sihambe ixesha elide emahlathini, saya kufika kuloo mmandla emini emaqanda. Sanxiba iimpahla ezicocekileyo saza sakhawuleza saqalisa ukushumayela kwindlu ngendlu. Izindlu zazimbalwa yaye abavakalisi babebaninzi. Ngoko sawugubungela loo mmandla malunga nemizuzu nje engama-30. Emva koko saya kwilali elandelayo. Sakuba sishumayele apho, kwafuneka sihambe umgama omde sibuyela ekhaya. Ekuqaleni, le ndlela sasisebenza ngayo yasityhafisa kancinane. Sasichitha ixesha elininzi sisebenza kunye kodwa sasishumayela iyure enye nje kuphela kwindlu ngendlu. Noko ke, amaNgqina asekuhlaleni akazange akhalaze. Aqhubeka enenzondelelo.
Elinye iqela elikwanti eTaviranambo lalikufutshane nenkcochoyi yentaba. Apho safumana intsapho yamaNgqina ehlala kwindlu enegumbi elinye. Kwakukho ke nesinye isakhiwo esincinane ekwakuhlanganiswana kuso. Kungekudala, lo mzalwana sasifikele kuye wakhwaza ngelizwi elikhulu esithi, “Bazalwana!” Kwenye inkcochoyi yentaba ekufutshane elinye ilizwi laphendula, “Ewe!” Lo mzalwana sasifikele kuye wakhwaza kwakhona, “Umveleli wesiphaluka ufikile!” Laphendula ilizwi lathi, “Kulungile!” Lo myalezo wafika nakwabanye ababehlala kude. Kungekudala, abantu baqalisa ukuhlanganisana, yaye ukuqalisa kweentlanganiso kwakukho abantu abangaphezu kwe-100.
IINGXAKI ZOTHUTHO
Ngowe-1996 sathunyelwa kwisiphaluka esikufutshane neAntananarivo, kwiintaba ezisembindini. Naso esi siphaluka sasineengxaki zaso. Zazingasoloko zikho izithuthi zikawonkewonke eziya kwimimandla esemaphandleni. Kwakulindeleke ukuba sityelele iqela elaliseBeankàna (Besakay), iikhilomitha ezimalunga nama-240 ukusuka eAntananarivo. Emva kokuba sicele kumqhubi, wasikhwelisa kwilori yakhe encinane eyayisiya kuloo mmandla. Abantu ababekhwele kule lori babemalunga nama-30, abanye babeseluphahleni kanti abanye babejinga ngasemva.
Njengoko kusoloko kusiba njalo, le lori yonakala yaye saqhubeka nohambo lwethu ngeenyawo. Emva kokuba sihambe kangangeeyure eziliqela, kweza ilori enkulu. Nakuba yayisele izele ngabantu neempahla, umqhubi wamisa. Sakhwela saza saxolela ukuma ngeenyawo. Sathi xa safika ngasemlanjeni, safumanisa ukuba ibhulorho iyalungiswa. Saphinda sehla sahamba ngeenyawo yaye sada saya kufika kule lali incinane neyayinoovulindlela abakhethekileyo. Nangona babengasilindelanga, sashumayela kunye nabo ngoxa sasilinde ukuba kugqitywe ukulungiswa kwebhulorho, silindele nokuba kudlule esinye isithuthi.
Kwathi sele kudlule iveki kwathi gqi isithuthi, sasikhwelisa saza saqhubeka nohambo lwethu. Indlela yayizele yimingxuma emikhulu. Sasidla ngokuncedisa ekutyhaleni imoto siyikhuphe kumanzi awayesima emadolweni, sityibilika yaye sisiwa. Sagaleleka ngenj’ ixukuxa kwenye ilali encinane saza sehla apho. Sayishiya indlela enkulu, saza sahamba ngeenyawo sinqumla kumasimi erayisi awayephakathi kumanzi anodaka abetha esinqeni ukuze siye kufika apho sasisiya khona.
Sasiqala ngqa ukutyelela kuloo mmandla, ngoko sashumayela kwabanye abasebenzi bamasimi erayisi saza sababuza ngendawo ahlala kuyo amaNgqina alapho. Savuya gqitha sakufumanisa ukuba enyanisweni abo basebenzi babengabazalwana bethu bokomoya!
UKUKHUTHAZA ABANYE UKUBA BABE KWINKONZO YEXESHA ELIZELEYO
Ukutyhubela iminyaka, kusivuyise kakhulu ukubona iziqhamo zokukhuthaza abanye ukuba babe kwinkonzo yexesha elizeleyo. Ngoxa sasityelele elinye ibandla elalinoovulindlela abathe ngxi abasithoba, sakhuthaza ukuba uvulindlela ngamnye azibekele usukelo lokunceda umvakalisi omnye abe nguvulindlela. Xa sasityelele emva kweenyanga ezintandathu, oovulindlela babesele bengama-22. Oodade ababini abangoovulindlela babekhuthaze ooyise ababengabadala ukuba babe ngoovulindlela abathe ngxi. Aba bazalwana bakhuthaza nomnye umdala wesithathu ukuba abe nguvulindlela. Kungabanga thuba lide, lo mdala wesithathu waba nguvulindlela okhethekileyo. Kamva, ekunye nenkosikazi yakhe baqalisa umsebenzi wesiphaluka. Kuthekani ngabanye abadala ababini? Omnye ungumveleli wesiphaluka, yaye omnye litsha-ntliziyo kumsebenzi wokwakha iiHolo zoBukumkani.
Simbulela suku ngalunye uYehova kuba esinceda, njengoko kungekho nto sinokuyiphumeza ngamandla ethu. Eneneni, sikhe sidinwe size sigule, sekunjalo siyavuya xa sicinga ngemiphumo yokuba sentsimini. UYehova uwenza uqhubeke umsebenzi wakhe. Siyavuya kuba sinokuthile esimenzela kona, ekubeni ngoku singoovulindlela abakhethekileyo. Eneneni, siyifundile “imfihlelo” yokuthembela ngoYehova, osinika ‘amandla.’
[Amagama acatshulweyo akwiphepha 6]
Siyifundile “imfihlelo” yokuthembela ngoYehova
[Imaphu/Imifanekiso ekwiphepha 4]
IMadagascar, ebizwa ngokuba yiBig Red Island, isisiqithi sesine ngobukhulu emhlabeni. Sinomhlaba obomvu kwakunye nezilwanyana ezininzi ezingaqhelekanga
[Umfanekiso okwiphepha 5]
Siyakuvuyela ukuqhuba izifundo zeBhayibhile
[Imifanekiso ekwiphepha 5]
Ukuhamba kwakulolona celomngeni lunzima sasijamelene nalo