Sondela KuMphulaphuli Wemithandazo

ABANTU abaninzi abathi bayakholelwa kuThixo abakwazi ukuchaza izizathu ezivakalayo zokuba kutheni benokholo. Abakwazi nokucacisa ukuba kutheni unqulo lusoloko lusenza izinto ezimbi okanye kutheni uThixo evumele ukubandezeleka. Ekuphela kwento, abakwaziyo ukuyenza kukuthandaza kuThixo abangamaziyo.

Kodwa wena, unako ukusondela kuThixo ngendlela eyiyo. Unokwakhela ukholo lwakho ekumazini uThixo okwenza umthande yaye umxabise. Ukholo lokwenene lusekelwe kubungqina. (Hebhere 11:1) Ukuba ufunda inyaniso ngoThixo, uya kumazi uze uthethe naye njengomhlobo. Khawuhlolisise amava abanye ababethandaza nangona babenamathandabuzo ngobukho bukaThixo.

◼ UPatricia, okhankanywe kwinqaku lokuqala. “Ngenye imini ndandikunye nabahlobo bam abamalunga neshumi xa baqalisa ukuncokola ngonqulo. Ndabaxelela ukuba ndiye ndaphuma endlini kuba ndibaleka ingxoxo eyayiphakathi kotata ongakholelwayo kuThixo neNgqina likaYehova, elalityelele ekhaya. Omnye wabo bahlobo bam wathi: ‘Mhlawumbi ikho into enokutsitsa kumaNgqina kaYehova.’

“Omnye wathi: ‘Kutheni singakhe siye kwenye yeentlanganiso zawo?’ Senza kanye loo nto. Nangona sasithandabuza, abanye bethu baqhubeka besiya kwiintlanganiso zawo kuba nje ayenobuhlobo.

“Noko ke, ngenye iCawa ndeva into eyatshintsha isimo sam sengqondo. Isithethi sacacisa isizathu sokuba abantu bebandezeleka. Ndandingazange ngaphambili ndazi ukuba ekuqaleni umntu wenziwa wagqibelela nokuba isono nokufa kwaqala ngomntu omnye kwaza kwalutyhutyha lonke uluntu. Kwakhona isithethi sacacisa ukuba kwakutheni ukuze kube yimfuneko ukuba uYesu afe ukuze kubuyiswe oko umntu wokuqala waphulukana nako.a (Roma 5:12, 18, 19) Ngequbuliso, ndaqalisa ukuqonda zonke izinto. Ndatsho ndaqonda ukuba, ‘Ngokwenene ukho uThixo osikhathaleleyo.’ Ndaqhubeka nesifundo seBhayibhile yaye, okokuqala ebomini bam, ndafumanisa ukuba ndinako ukuthandaza kuthile okhoyo ngokwenene.”

◼ UAllan, naye okhankanywe kwinqaku lokuqala Uthi: “Ngenye imini amaNgqina kaYehova atyelela ekhayeni lethu, yaye umfazi wam wabamkela kuba wayenomdla koko ayekuthetha ngokuphathelele ukuphila emhlabeni ngonaphakade. Ndaba bucaphuka. Ndawashiya kwigumbi lokuhlala ndaza ndacela umfazi ukuba siye ekhitshini ndaza ndathi, ‘musa ukuqhatheka msinya. Awunakuzikholelwa izinto ezinjalo!’

“‘Yena waphendula wathi: Kulungile ke, wena yiya pha kuwo uze uwabonise ukuba awachananga.

“Kakade ke, akukho nto endandinokuyithi thaca phezu kwetafile. Kodwa abonisa ububele aze andishiyela incwadi ethetha ngokuba ngaba ubomi badalwa okanye bazivelela. Indlela awayeqiqa ngayo nam yayicacile yaye ayixhasa kakuhle ndaza ndagqiba kwelokuba ndifune ukwazi okungakumbi ngoThixo. Ndaqalisa ukufunda iBhayibhile namaNgqina, yaye ngokukhawuleza ndaye ndafumanisa ukuba oko ikuthethayo kwahlukile kuzo zonke izinto endandizicingela ngaphambili ngonqulo. Njengoko ndandifunda ngoYehova, ndaqalisa ukuthandaza ngendlela ecacileyo. Ndandinesimo sengqondo esingathandekiyo, ngoko ke, ndathandaza ndicela uncedo. UYehova wayiphendula loo mithandazo.”

◼ UAndrew, ohlala eNgilani. Uthi: “Ndandibambelele ngokuqinileyo kwiimbono zam yaye ndinomdla kwezenzululwazi, Ndandikholelwa kwinkolo yokuba izinto zazivelela kuba abanye abantu babesithi inobungqina. Ndandingakholelwa kuThixo ngenxa yezinto ezimbi ezenzekayo.

“Sekunjalo, ngamanye amaxesha ndandiye ndicinge oku: ‘Ukuba ukho uThixo, kuza kufuneka ndazi oko kuthethwa koko. Kutheni kukho ulwaphulo mthetho olungaka nemfazwe?’ Xa kunzima, ndikhe ndithandaze ndicela uncedo, kodwa bendingazi ukuba ndithetha nabani.

“Ekuhambeni kwexesha uthile wanika umfazi wam iphecana elipapashwe ngamaNgqina kaYehova elinomxholo othi Ngaba Eli Hlabathi Liya Kusinda? Lowo yayingumbuzo kanye endandinawo engqondweni. Eli phecana labangela ukuba ndibe nemibuzo ngeBhayibhile, ‘Ngaba iimpendulo zalo zinokundinceda?’ Kamva, ngoxa ndandisekhefini, umntu othile wandinika incwadi ethi IBhayibhile—Ngaba IliLizwi LikaThixo Okanye Lomntu?b Xa ndafumanisa ukuba iBhayibhile iyavisisana nezenzululwazi, ndavakalelwa kukuba kuza kufuneka ndazi okungakumbi ngayo. Ngoko ke, xa omnye wamaNgqina kaYehova wacela ukufunda iBhayibhile kunye nam, ndavuma. Njengoko ndandisiya ndiyiqonda injongo kaYehova, ndavakalelwa kukuba ndimazi njengomntu wokwenene, umntu endandinokuthetha naye ngokukhululekileyo emthandazweni.”

◼ UJan owakhuliselwa kubuProtestanti eLondon. Uthi: “Uhanahaniso kunqulo nokubandezeleka okwandayo kwandikhokelela ekubeni ndilulahle unqulo. Ndayeka nezifundo zam zakwanokholeji ndaze ndaqalisa ukucula nokudlala isiginkci ukuze ndifumane imali. Sabonana ngelo xesha noPat. Yena wakhuliselwa kubuKatolika waza naye njengam wayeka ukuhamba icawa.

“Sasihlala kwindlu eyayingesahlalwa mntu nabanye abashiya isikolo nababenomdla kunqulo lwaseMpuma. Sasiba neengxoxo ezishushu eziphathelele injongo yobomi de kube sezinzulwini zobusuku. Nangona mna noPat sasingakholelwa kuThixo, sasivakalelwa ukuba kumele ukuba ‘ukho umoya ophilayo odala uze unyamekele ubomi.’

“Emva kokuba sifudukele kumantla eNgilani ngelikhangela isingxungxo, ndaba nonyana. Ngobunye ubusuku wagula, ndaze ndazibhaqa sendithandaza kuThixo endandingakholelwa kuye. Ngokukhawuleza emva koko, ulwalamano phakathi kwam noPat lwaphela, ndaza ndemka nomntwana wethu. Kwakhona, ndathandaza ndicela uncedo, ukuba kwakunokuthi kanti ukho umntu ophulaphuleyo. Ndingayazi loo nto, kwathi kanti naye uPat wenza okufanayo.

“Ngaloo mini, amaNgqina kaYehova amabini ankqonkqoza endlini kaPat aza amnika amacebiso asebenzisekayo asekelwe eBhayibhileni. Waye wandifowunela waza wandibuza ukuba andingethandi kusini na ukuba sifunde iBhayibhile namaNgqina. Kungekudala safunda ukuba ukuze sikholise uThixo, kuza kufuneka siwubhalise ngokusemthethweni umtshato wethu. Yayibonakala iyinto enzima kuthi leyo.

“Safuna ukwazi okungakumbi ngeziprofeto zeBhayibhile, isizathu sobukho kokubandezeleka nentsingiselo yoBukumkani bukaThixo. Ngokuthe ngcembe, saqonda ukuba uThixo uyakhathala, yaye safuna ukwenza kanye njengoko ethetha. Saye satshata. Ubulumko beLizwi likaThixo basinceda sakwazi ukukhulisa abantwana bethu abathathu. Siziva siqinisekile ukuba uYehova wayiphulaphula imithandazo yethu.”

Zihlolele Ngokwakho Ubungqina

Njengezinye izigidi, aba bantu bacatshulwe kweli nqaku bakwazi ukwahlula unqulo lobuxoki baze bafumanisa isizathu sokuba uThixo avumele ukubandezeleka. Ngaba uqaphele ukuba kwimeko nganye kwezi kukuba nolwazi oluchanileyo ngeBhayibhile okuye kweyisela aba bantu baqonda ukuba uYehova uyayiphulaphula ngokwenene imithandazo?

Ngaba ungathanda ukuhlolisisa ubungqina bokuba uThixo ukho? AmaNgqina kaYehova aya kukuvuyela ukukunceda ufunde inyaniso ngoYehova nendlela onokusondela ngayo ‘kumphulaphuli wemithandazo.’—INdumiso 65:2.

[Imibhalo esemazantsi]

[Amagama acatshulweyo akwiphepha 10]

“Njengoko ndandisiya ndiyiqonda injongo kaYehova, ndavakalelwa kukuba ndimazi njengomntu wokwenene, umntu endandinokuthetha naye ngokukhululekileyo emthandazweni”

[Umfanekiso okwiphepha 9]

Ukholo lokwenene lusekelwe kubungqina nakumnqweno wokufuna ukwazi inyaniso ngoThixo