Ngubani Umphulaphuli Wemithandazo?
UKUBA UKHO uMphulaphuli wemithandazo, kumele ukuba ikwanguye noMdali. Ibinokuba ngubani omnye ingenguye Lowo wayila ingqondo yomntu okwaziyo ukubona iingcamango zakho? Ngubani omnye okwaziyo ukuphendula imithandazo nokwaziyo ukunceda uluntu? Kodwa usenokuzibuza, ‘Ngaba kusengqiqweni ukukholelwa kuMdali?’
Uninzi lwabantu lucinga ukuba ukuze ukholelwe kuMdali, kuza kufuneka ubukhanyele ubungqina obukhoyo bezenzululwazi. Kodwa ukucinga ukuba ukukholelwa kuThixo akuvumelani nezenzululwazi akuyonyaniso. Khawuhlolisise oku kulandelayo.
◼ Uphando lwakutshanje oluye lwenziwa koonjingalwazi bezenzululazi abali-1 646 kwiiyunivesithi ezingama-21 ezizezona ziphambili eMerika luye lwadiza ukuba ngunjingalwazi omnye kwabathathu oye wakhetha ukuthi “Andikholelwa kuThixo” xa echaza uluvo lwakhe.
Inyaniso kukuba uninzi lwezazinzulu luyakholelwa kubukho bukaThixo.
Ubungqina bokuba ukho uMdali
Ngaba sifanele siyamkele ngaphandle kobungqina into yokuba ukho uMphulaphuli wemithandazo? Akunjalo. Ingcamango yokuba ukholo luthetha ukukholelwa ngaphandle kobungqina iyimpazamo. IBhayibhile iluchaza ukholo ‘njengobungqina obucacileyo bezinto zokwenene nangona zingabonwa.’ (Hebhere 11:1) Enye inguqulelo ithi ukholo “kukweyiseka kubukho bezinto ezingabonwayo.” (IBhayibhile YesiXhosa) Ngokomzekelo, awunako ukuwabona amaza omoya kodwa, ukusebenza kweselfowuni yakho kububungqina bokuba akho lo maza. Ngokufanayo, nangona singenako ukumbona uMphulaphuli wemithandazo, sinokuhlola ubungqina obukhoyo obunokusenza seyiseke ukuba ukho.
Singabufumana phi ubungqina bokuba uThixo ukho? Ngokujonga izinto ezisingqongileyo. Bhayibhile iqiqa ngelithi: “Kambe ke, ndlu nganye inomakhi wayo, kodwa lowo wazakhayo zonke izinto nguThixo.” (Hebhere 3:4) Ngaba uyavumelana nala mazwi? Mhlawumbi xa uhlola indlela elungelelaniswe ngayo indalo, imvelaphi yobomi okanye indlela entsonkothe ngayo ingqondo yomntu kwindalo eyenziweyo, usenokucinga ukuba kumele kubekho into ephakame ngakumbi kunabantu.a
Kodwa zimbalwa izifundo esinokuzifunda ngoThixo kwindalo. Ukukhangela kwindalo ubungqina ngobukho bukaThixo kufana nokuva izingqi zomntu oza kwakho kodwa ube uluvalile ucango. Uyaqonda ukuba kukho umntu ozayo, kodwa ungubani? Ukuze wazi ukuba ngubani, kufuneka uvule ucango. Kufuneka senze okufanayo ukuze sikwazi ukumbona uMntu owadala zonke izinto.
IBhayibhile ngumnyango okhokelela kulwazi ngoThixo. Xa uvula loo mnyango uze uhlolisise ngokweenkcukacha ezinye zeziprofeto nokuzaliseka kwazo, uya kufumana ubungqina bokuba uThixo ukho.b Kodwa okungakumbi kunoko, ingxelo yeenkqubano zikaThixo nabantu ibonisa obona buntu boMphulaphuli wemithandazo.
Unjani Umphulaphuli Wemithandazo?
IBhayibhile ithi uMphulaphuli wemithandazo ngumntu—onokumazi. Ngokuqinisekileyo ngumntu kuphela okwaziyo ukuphulaphula. Kuyasiqinisekisa ukufunda la mazwi: “Owu mphulaphuli wemithandazo, abantu bayo yonke inyama baya kuza kuwe.” (INdumiso 65:2) Uyabaphulaphula abo bathandaza kuye benokholo. Yaye unegama. IBhayibhile ithi: “UYehova ukude nabangendawo, kodwa umthandazo wamalungisa uyawuva.”—IMizekeliso 15:29.
UYehova uneemvakalelo. “UnguThixo wothando” yaye ukwabizwa nangokuba ‘nguThixo onoyolo.’ (2 Korinte 13:11; 1 Timoti 1:11) Ngokuphathelele indlela awasabela ngayo xa ububi babubalasela, iBhayibhile ithi: “Yaba buhlungu intliziyo yakhe.” (Genesis 6:5, 6) Ibango lokuba nguThixo obangela ukubandezeleka ukuze avavanye abantu aliyonyaniso. IBhayibhile ithi: “Makube lee kuThixo oyinyaniso ukwenza ngobungendawo.” (Yobhi 34:10) Sekunjalo, usenokuba uyazibuza, ‘Ukuba uThixo nguMdali uSomandla, kutheni evumela ukubandezeleka kuqhubeke?’
UYehova unike uluntu inkululeko yokuzikhethela, yaye loo nto isixelela okuthile ngohlobo uThixo alulo. Ngaba asiyixabisi inkululeko esinayo yokuzikhethela indlela esifuna ukuphila ngayo? Kodwa okubuhlungu, kukuba abantu abaninzi bayisebenzisa kakubi inkululeko yabo baze babangela ukubandezeleka kubo nakwabanye. Ngoku khawucingisise nzulu ngalo mbuzo: UThixo unokukuphelisa njani ukubandezeleka engakhange ahluthe inkululeko umntu anayo? Lo mbuzo uza kuphendulwa kwinqaku elilandelayo.
[Imibhalo esemazantsi]
a Ukuze ufumane inkcazelo engakumbi ngobungqina bobukho bukaThixo, funda incwadana ethi The Origin of Life—Five Questions Worth Asking nethi Is There a Creator Who Cares About You? zombini zipapashwe ngamaNgqina kaYehova.
b Incwadana ithi Incwadi Yabantu Bonke nethi IBhayibhile—Ngaba Ililizwi likaThixo okanye Lomntu? ezipapashwe ngamaNgqina kaYehova zinokukunceda ubone ubungqina bokuba iBhayibhile iphefumlelwe nguThixo.
[Ibhokisi ekwiphepha 5]
Ngaba Unqulo Lukwenza Uthandabuze Ukuba UThixo Ukho?
Okubuhlungu, kukuba lunqulo ngokwalo olubangela abantu abaninzi bathandabuze ukuba ukho uMphulaphuli wemithandazo onemfesane. Ukubandakanyeka konqulo kwimfazwe, kubugrogrisi nokukuqwabazela iliso ukuxhatshazwa abantwana kuye kwabangela nabantu abathandazayo bathi: “Andikholelwa kuThixo.”
Kutheni unqulo lunempembelelo embi? Ngamafutshane singathi: Abantu ababi baye benza izinto ezimbi egameni lonqulo. IBhayibhile yatsho kusengaphambili ukuba ubuKristu babuza kuxhwilwa buze busetyenziswe kakubi. Umpostile uPawulos waxelela amadoda akhokelayo angamaKristu oku: “Phakathi kwenu kuya kusuka amadoda aze athethe izinto ezijijekileyo ukuze abatsale abafundi emva kwawo.”—IZenzo 20:29, 30.
UThixo uyalucekisa unqulo lobuxoki. Eneneni, iLizwi likaThixo, libeka unqulo lobuxoki ityala ngenxa ‘yegazi . . . labo bonke abaye babulawa ngogonyamelo emhlabeni.’ (ISityhilelo 18:24) Ekubeni unqulo lobuxoki luye lwasilela ukufundisa abantu ngoThixo oyinyaniso, onolona phawu lubalaseleyo uthando, lunetyala legazi emehlweni kaThixo.—1 Yohane 4:8.
“UMphulaphuli wemithandazo” unovelwano ngabo baye bacinezelwa lunqulo. Kungekudala, uthando lukaThixo luza kumqhubela ekubeni agwebe abo bahanahanisayo kunqulo esebenzisa uYesu. UYesu wathi: “Abaninzi baya kuthi kum ngaloo mini, ‘Nkosi, Nkosi, asizange na siprofete egameni lakho?’ . . . Ukanti ndiya kwandula ndivume kubo ndithi: Andizange ndinazi! Mkani kum, nina benzi bokuchasene nomthetho.”—Mateyu 7:22, 23.