IBhayibhile Iyabutshintsha Ubomi Babantu
Yintoni eyanceda ibhinqa lakwiiPhilippines layeka ukusebenzisa kakubi utywala laza laphucula ubomi balo? Yintoni eyanceda umdlali wekarati otsha zintambo waseOstreliya wangumshumayeli onoxolo? Khawuzivele ukuba bathini.
“Utshintsho Aluzange Lwenzeke Nje Ngobusuku Obunye.”—UCARMEN ALEGRE
UNYAKA WOKUZALWA: 1949
ILIZWE: KWIIPHILIPPINES
UBOMI BANGAPHAMBILI: WAYESIYA NGAMANDLA EBHEKILENI
INDLELA ENDANDIPHILA NGAYO NGAPHAMBILI: Ndazalelwa eSan Fernando, idolophu ekwiphondo laseCamarines Sur. Kodwa ngoku sendimdala, phantse bonke ubomi bam, bendihlala eAntipolo, ekwiPondo iRizal. IAntipolo ekummandla weentaba, ingca nemithi emininzi, yayiyidolophu ethuleyo ukufika kwam kuyo. Kwakunqabile ukubona umntu ohamb’ ebusuku. Kodwa ngoku, iAntipolo iye yakhula yasisixeko esikhulu esinabantu abaninzi.
Ethubeni emva kokuba ndifudukele eAntipolo, ndadibana nendoda ebizwa ngokuba nguBhenjamin, yaye ekuhambeni kwexesha satshata. Ndafumanisa ukuba ubomi bomtshato bunzima kunokuba ndandicinga. Ngelizama ukuphepha iingxaki zam, ndaqalisa ukuya ngamandla ebhekileni. Ndaba nobuntu obungathandekiyo, obabubonakala kwindlela endandimphatha ngayo umyeni wam nabantwana. Ndandingabinawo umonde xa ndiqhubana nabo. Ndandingamhloneli umyeni. Akuyomfuneko ndichaze ukuba ubomi bentsapho yam babukwimeko embi.
INDLELA EBUTSHINTSHE NGAYO UBOMI BAM IBHAYIBHILE: Indodakazi yam uEditha, uliNgqina likaYehova, yaye wacebisa ukuba uBhenjamin nam sifunde iBhayibhile namaNgqina. Salamkela elo cebiso, sinethemba lokuba oko kuya kuyinceda intsapho yethu.
Njengoko sasiqhubeka sifunda iBhayibhile, safunda iinyaniso ezininzi. Ndachukunyiswa ngamazwi akwiSityhilelo 21:4. Ngokuphathelele abo baya kuphila kumhlaba oyiparadesi phantsi koBukumkani bukaThixo, le vesi ithi uThixo “uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona.” Ndafuna ukuba phakathi kwabantu abaza kuxhamla kwezo ntsikelelo.
Ndaye ndafumanisa ukuba kufuneka ndenze utshintsho olukhulu kwimikhwa yam nakwisimo sam sengqondo. Utshintsho aluzange lwenzeke nje ngobusuku obunye, kodwa kwaba yinto eqhubekayo de ndakwazi ukuphuncuka ekusebenziseni kakubi utywala. Kwakhona ndafunda ukuba nobubele nomonde xa ndiqhubana nentsapho yam. Ngaphezu koko, ndafunda ukumhlonela umyeni wam, nokusebenzisana naye njengoko ekhokela intsapho.
Xa saqalisa ukuya kwiintlanganiso zamaNgqina kaYehova, samangaliswa yinto esayibona apho. AmaNgqina akangcakazi, akaseli ngokugqithiseleyo utywala yaye akanamkhethe. Abaphatha abanye ngesidima nangentlonelo. Saseyisekile ukuba silufumene unqulo lokwenyaniso.—Yohane 13:34, 35.
INDLELA ENDINGENELWE NGAYO: Ubomi bentsapho buye baphucuka ngendlela encomekayo. Mna noBhenjamin sonwabile emtshatweni, yaye siyakuvuyela ukufundisa abanye iBhayibhile. Oonyana bethu nabafazi babo nabo baqalisile ukufunda iBhayibhile. Sinethemba lokuba ekuhambeni kwexesha nabo baza kusithelela ekunquleni uYehova. Ngokwenene le yeyona ndlela ifanelekileyo yokuphila.
“Ndandivakalelwa Kukuba Akukho Nto Inokundoyisa.”—UMICHAEL BLUNSDEN
NYAKA WOKUZALWA: 1967
ILIZWE: EOSTRELIYA
UBOMI BANGAPHAMBILI: UMDLALI WEKARATI OTSHA ZINTAMBO
INDLELA ENDANDIPHILA NGAYO NGAPHAMBILI: Ndakhulela eAlbury, isixeko esihle nesityebileyo eNew South Wales. Njengezinye izixeko, nayo inalo ulwaphulo mthetho. Kodwa ke, yaziwa njengendawo ekhuselekileyo ubani anokuhlala kuyo.
Ndikhule kakuhle. Nangona abazali baqhawula umtshato xa ndandineminyaka esixhenxe, kodwa baqinisekisa ukuba umkhuluwa wam noodade wethu ababini kunye nam asisweli nto. Ndafumana imfundo esemgangathweni kwisikolo sabucala kuloo mmandla. Utata wayefuna ndibe ngusomashishini xa ndigqibile esikolweni. Noko ke, mna ndandinomdla kwezemidlalo, apho ndanditshatshela kumdyarho weebhayisikile nakwikarati. Ndaphela ndisebenza kwindawo yokulungisa izithuthi, apho ndandikwazi ukuya nakwezemidlalo.
Ndandikukhuthalele ukuzilolonga. Ngamanye amaxesha ndandiye ndivakalelwe kukuba akukho nto inokundoyisa. Kwakunokuba lula ukuba ndibaxhaphaze abanye. Kodwa umqeqeshi wam wekarati, owayebona ukuba ndinomoya kaphuma silwe, wabethelela ukuba nembeko nokuziphatha. Wayesoloko egxininisa imbaluleka yokuthobeka nokunyaniseka.
INDLELA EBUTSHINTSHI NGAYO UBOMI BAM IBHAYIBHILE: Xa ndaqalisa ukufunda iBhayibhile, ndafumanisa ukuba uYehova uluthiyile ugonyamelo. (INdumiso 11:5) Ekuqaleni, ndaqiqa ngelithi ikarati ayilulo ugonyamelo kodwa ngumdlalo oqheliselwa phantsi kweemeko zokhuseleko. Ndandivakalelwa kukuba imilinganiselo yokuziphatha eyikhuthazayo yayihambisana noko kufundiswa yiBhayibhile. Isibini esingamaNgqina esasindifundela sasinomonde kakhulu. Asizange sindixelele ukuba mandiyeke ikarati, kodwa sasuka nje saqhubeka sindifundisa iBhayibhile.
Njengoko ulwazi lwam ngeBhayibhile lwalukhula yaye nobuhlobo bam noYehova bukhula, ndaqalisa ukuzibona izinto ngenye indlela. Ndachukumiseka ndakufunda ngomzekelo omhle owabekwa nguNyana kaYehova, uYesu. Nangona uYesu wayenamandla gqitha, kodwa akazange abhenele kwizigalo. Amazwi akhe abhalwe kuMateyu 26:52 andibetha eluphondweni. Athi: “Bonke abathabatha ikrele baya kutshabalala ngekrele.”
Okukhona ndifunda ngoYehova, kwaba kokukhona ndaya ndimthanda yaye kwaba kokukhona ndisiba nentlonelo ngaye. Ukucinga ukuba uMdali wethu, ulumkile yaye unamandla, futhi undikhathalele kwandichukumisa ngokunzulu. Ndachukumiseka nakukufunda ukuba nangona ndiye ndamkhathaza okanye ndaziva ndifuna ukunikezela ngenxa yobunzima, akanakuze andityeshele lo gama nje ndiqhubeka ndizama. Ndathuthuzelwa gqitha sisithembiso sakhe esithi: “Mna, Yehova uThixo wakho, ndibamba isandla sakho sasekunene, ndithi kuwe, ‘Musa ukoyika. Mna ngokwam ndiza kukunceda.’” (Isaya 41:13) Xa ndafumanisa ukuba uye wabonakalisa uthando okunjalo, ndandingazimiselanga kwaphela ukunikezela.
Ndandisazi ukuba ukuyeka ikarati kuza kuba yeyona nto yakhe yanzima. Kodwa ndandisazi nokuba oko kuya kumkholisa uYehova, yaye ndandeyisekile ukuba ukumkhonza kwakuthetha nokuncama ezi zinto. Ndiyacinga ukuba awona mazwi andibeth’ andichitha abhalwe kuMateyu 6:24: “Akukho bani unokukhonza iinkosi ezimbini.” Ndaqonda ukuba ayinakwenzeka into yokuba ndikhonze uYehova ngokupheleleyo ndibe ndisaqhubeka nekarati, ekubeni eyona nto eyayiza kuza kuqala yayiza kuphela isiba yikarati. Ixesha lalifikile lokuba ndikhethe phakathi kukaYehova nekarati.
Akuzange kube lula ukuyeka ikarati. Ndandilwisana neemvakalelo ezingqubanayo. Ndaba noyolo kukwazi ukuba ndivuyisa uYehova. Kodwa kwangaxeshanye, ndandivakalelwa kukuba ndiyamngcatsha umqeqeshi wam wekarati. Abo baqhelisela umdlalo wekarati badla ngokujonga ukungcatsha umntu njengesono esingenakuxoleleka. Abanye bade bakhethe ukuzibulala kunokuba bajamelane nelo hlazo.
Ndandingazi ukuba ndiza kuyicacisa njani kumqeqeshi wam into yokuba ndiyamshiya ngoku. Endaweni yoko, ndasuka ndaqhawula unxibelelwano naye kuquka nabanye endandiqhelisela nabo ikarati. Ndandisazi ukuba ndenza into efanelekileyo ngokuyeka ikarati. Sekunjalo ndaziva ndinetyala ngokungabacaciseli ngeenkolelo zam ezintsha. Ndavakalelwa kukuba ndiye ndamona uYehova kwangaphambi kokuba ndiqalise ukumkhonza. Konke oku kwakunditya. Akho amaxesha apho ndandiye ndizame ukuthandaza kuYehova kodwa suke ngoku ndizibone sendilila ngenxa yentlungu.
UYehova umele ukuba wabona okuthile okuhle kum, kuba waqhuba abazalwana noodade ebandleni uza kundomeleza. Uthando lwabo, intuthuzelo yabo nobuhlobo babo baba luncedo. Kwakhona ndathuthuzelwa nayingxelo yeBhayibhile kaDavide noBhatshebha. Nangona uDavide wenza izono ezinzulu, uYehova wamxolela emva kokuba eguquke ngokunyaniseka. Xa ndacamngca ngaloo ngxelo, ndancedakala ukuze ndizijonge iziphoso zam ngenye indlela.
INDLELA ENDINGENELWE NGAYO: Ngaphambi kokuba ndifunde iBhayibhile, ndandingamkhathalelanga omnye umntu—indim obalulekileyo. Kodwa ngoncedo lukaYehova nomfazi wam ebenditshate naye kangangeminyaka esixhenxe, ndaqalisa ukuba novelwano. Siye sasikelelwa ngokufunda nabanye iBhayibhile, abaquka abaneemeko ezibuhlungu. Ukubona uthando lukaYehova luchukumisa abanye kwandizisela uyolo olungakumbi kunokuba bendinokuba yintshatsheli enamandla yekarati.
[Amagama acatshulweyo akwiphepha 14]
“Ukucinga ukuba uMdali wethu, ulumkile yaye unamandla, futhi undikhathalele kwandichukumisa ngokunzulu”
[Ibhokisi/Umfanekiso okwiphepha 15]
“Sibamba Ngazibini Ngolu Ngcelele Lusemagqabini!”
Ngaba ukunandiphile ukufunda la mava? Zimbini kuphela kwezingaphezu kwama-50 eziye zapapashwa kwiMboniselo ukususela ngoAgasti 2008. Ungcelele lwamanqaku athi “IBhayibhile Iyabutshintsha Ubomi Babantu” aye angawona athandwayo ngabafundi bethu. Kutheni abanye beye bawafumanisa enomtsalane?
Abantu ekuthethwa ngabo kula manqaku baneemvelaphi ezahlukahlukeneyo. Ngaphambi kokuba bafunde ngoYehova uThixo, abanye izinto bezibahambela kakuhle ukusa kumlinganiselo othile kodwa bengenayo injongo yokwenene ebomini. Abanye bebe neengxaki ezinkulu, njengokuba nephuku okanye ukusebenzisa kakubi iziyobisi okanye utywala. Iqaqobana likhule limazi uYehova kodwa liye layeka ukumnqula kangangexesha elithile. Onke la mava abonisa ukuba ukwenza utshintsho ngenjongo yokukholisa uThixo kunokwenzeka. Yaye ukwenjenjalo kusoloko kuneengenelo. Zibachaphazele njani abanye abafundi bethu ezi ngxelo?
Omnye umfundi uchaza indlela inqaku elikwinkupho kaFebruwari 1, 2009, eliye lawanceda ngayo amanye amabanjwa akwintolongo yamabhinqa.
◼ Uthi: “Amabanjwa amaninzi aneemeko ezifanayo nezo zabantu ekuthethwa ngabo kweli nqaku. Imifanekiso ‘yangaphambili’ ‘neyasemva kokuba benze utshintsho’ kunye neenkcukacha zangaphambili zomntu ngamnye, zawachukumisa gqitha. Amabanjwa amaninzi aneemvelaphi ezifanayo nezabantu ekuthethwa ngabo kula manqaku, amabanjwa amabini aqalisa ukufunda iBhayibhile.”—C. W.
Amava akolu ngcelele aye aba chukumisa gqitha abanye abafundi. Ngokomzekelo, inkupho ka-Aprili 1, 2011, inamava kaGuadalupe Villarreal, owayekayo ukuba lifanasini ukuze akhonze uYehova. Khawuve iileta ezimbini ezivela kubafundi bethu ngenxa yebali lakhe.
◼ “Amava kaGuadalupe andikwazi kuyichaza indlela andichukumise ngayo. Kumangalisa ngokwenene ukubona indlela uthando ngoYehova neLizwi lakhe elinokumtshintsha ngayo ngokupheleleyo umntu!”—L. F.
◼ “Kwixa elidlulileyo, ndiye ndazama ukwabelana naye wonke ubani ngokholo lwam, kuquka namafanasini. Mvanje, ndiye ndaqaphela ukuba ndiyababukula aba bantu okanye ndide ndibaphephe. Eli nqaku liye landinceda ngokwenene. Liye landinceda ndabajonga ngendlela uYehova abajonga ngayo—njengabantu abanokuba ngabanquli bakhe.”—M. K.
Amanye amava aye achukumisa abafundi abaninzi ngalawo kaVictoria Tong, ibali lakhe livela kwinkupho ka-Agasti 1, 2011. UVictoria ubalisa indlela ebuhlungu awakhula ngayo. Uyavuma ukuba wakufumanisa kunzima ukuziva ethandwa nguYehova, kwanasemva kokumkhonza iminyaka. Uchaza into eye yamnceda wamkela uthando lukaYehova ngokuthe ngcembe. Khawuve ukuba baye bathini abanye abafundi ngebali lakhe.
◼ “Amava kaVictoria abhekisa kum. Ndiye ndehlelwa zizinto ezininzi ezibuhlungu ebomini. Ndisoloko ndisilwa neengcinga eziphosakaleyo—kwanasemva kweminyaka ndiliNgqina elibhaptiziweyo. Kodwa amava kaVictoria andenza ndisebenze nzima ukuze ndibone lento ibonwa nguYehova kum.”—M. M.
◼ “Xa ndandiselula ndalwisana, nomkhwa wokubukela iphonografi. Kutshanje, ndiye ndavukwa likakade. Ndiye ndacela uncedo kubadala abangamaKristu, kwaye ndiye ndenza inkqubela ekulweni nale ngxaki. Abadala baye bandiqinisekisa ukuba uThixo unothando nenceba. Sekunjalo, ngamanye amaxesha ndiye ndizive ndingento yanto, ngokungathi uYehova akandithandi. Ukufunda amava kaVictoria kuye kwandinceda ngokwenene. Ngoku ndiyaqonda ukuba xa ndicinga ukuba uThixo akanakundixolela, ndithi idini lentlawulelo lonyana wakhe alanelanga ukugubungela izono zam. Ndiye ndalisika eli nqaku ukuze lihlale likum ukwenzela ukuba xa ndivakalelwa kukuba andinto yanto ndilifunde. Sibamba ngazibini ngolu ngcelele lusemagqabini!”—L. K.