“Ndiya Kunkwantyiswa Ngubani Na?”
“Nangona kuya kuvuka imfazwe nxamnye nam, kwanangoko ndiya kukholosa.”—INDU. 27:3.
NGOKUTSHO KWEZI NDINYANA ZILANDELAYO, YINTONI ENOKUSINCEDA SIHLAKULELE INKALIPHO?
1. INdumiso 27 iza kusinceda siqonde ntoni?
KUTHENI umsebenzi wethu wokushumayela usenziwa ngomkhamo omkhulu nangona iimeko zehlabathi ziya zisiba mandundu? Kutheni sinikela ngexesha namandla ethu ngesisa ngoxa imeko yezoqoqosho iwohloka kubantu abaninzi? Sinokuhlala njani sinenkalipho ngoxa abantu abaninzi beloyika ikamva? Ingoma ephefumlelweyo kaKumkani uDavide ekwiNdumiso 27, iyasiphendula.
2. Ukunkwantya kwenza ntoni emntwini, kodwa sithembele ngabani?
2 Etshayelela le ndumiso, uDavide uthi: “UYehova kukukhanya kwam nosindiso lwam. Ndiya koyika bani na? UYehova ligwiba lobomi bam. Ndiya kunkwantyiswa ngubani na?” (INdu. 27:1) Ngoxa ukoyika kunokusenza buthathaka, ukunkwantya kona kusichaphazela ngakumbi. Kodwa ukunkwantya akumele kumphazamise umntu owoyika uYehova. (1 Pet. 3:14) Xa uYehova simenza igwiba lethu, ‘siya kuhlala ngonqabiseko size singaphazamiseki ekunkwantyiseni kwentlekele.’ (IMize. 1:33; 3:25) Kutheni kunjalo nje?
“UYEHOVA KUKUKHANYA KWAM NOSINDISO LWAM”
3. UYehova ukuko njani ukukhanya kwethu, kodwa thina yintoni esifanele siyenze?
3 Isafobe esithi “uYehova kukukhanya kwam” sisenza sinikele ingqalelo kwisibakala sokuba uYehova uyasikhulula ekungazini nakubumnyama bokomoya. (INdu. 27:1) Ukukhanya kokoqobo kunokusibonisa ingozi okanye umqobo okwindlela esihamba kuyo kodwa akuwususi. Kufuneka siwuphephe loo mqobo. Ngendlela efanayo, uYehova uyasibonisa intsingiselo yeziganeko zehlabathi. Uyasilumkisa ngeengozi zale nkqubo yezinto. Usinika imigaqo eseBhayibhileni esoloko isinceda kodwa ke kufuneka siphile ngokuvisisana noko sikufundileyo. Ukuba senjenjalo, sinokwenza ngobulumko ngakumbi kuneentshaba nabafundisi bethu.—INdu. 119:98, 99, 130.
4. (a) Kwakutheni ukuze uDavide atsho eqinisekile ukuba: ‘UYehova lusindiso lwam’? (b) Liliphi ixesha elingqalileyo uYehova aya kuba lusindiso lwethu ngalo?
4 Amazwi kaDavide akwiNdumiso 27:1 abonisa ukuba umele ukuba wayesayikhumbula indlela uYehova awamhlangula okanye wamsindisa ngayo kumaxesha adluleyo. Ngokomzekelo, uYehova wamhlangula “ethupheni lengonyama nasethupheni lebhere.” Kwakhona ngenxa kaYehova wayoyisa ingxilimbela enguGoliyati. Kamva, uKumkani uSawule wazama ukuhlaba uDavide ngomkhonto kodwa sihlandlo ngasinye uYehova wamhlangula. (1 Sam. 17:37, 49, 50; 18:11, 12; 19:10) Yiloo nto uDavide watsho eqinisekile ukuba: ‘UYehova lusindiso lwam’! UYehova uya kuphinda asindise abakhonzi bakhe, ngendlela awenza ngayo kuDavide. Uza kukwenza njani oko? Ngokuhlangula abakhonzi bakhe ebudeni ‘bembandezelo enkulu’ ezayo.—ISityhi. 7:14; 2 Pet. 2:9.
KHUMBULA IMPUMELELO NGANYE
5, 6. (a) Ukukhumbula izinto ezakha zenzeka kunokusinceda njani sihlakulele inkalipho? (b) Ingxelo yendlela uYehova awaqhubana ngayo nabakhonzi bakhe ikunceda njani ube nenkalipho?
5 Inkalo ebalulekileyo ekuhlakuleleni inkalipho ichazwa kwiNdumiso 27:2, 3. (Yifunde.) UDavide ukhumbula izihlandlo awahlangulwa ngazo nguYehova. (1 Sam. 17:34-37) Ezo nkumbulo zamnika inkalipho yokujamelana nezona ngxaki zinzima. Ngokusuka kwawakho amava, ngaba ufikelela kwizigqibo ezifanayo? Ngokomzekelo, ngaba uye wathandaza ngokuzingisileyo ngengxaki ekwenza uxinezeleke waza wabona uYehova ekunika ubulumko okanye amandla okumelana nayo? Okanye ngaba usayikhumbula indlela eyasuswa ngayo imiqobo ethile waza wonwaba kwinkonzo okuyo okanye wabona indlela oye wavulelwa ngayo umnyango omkhulu? (1 Kor. 16:9) Ukukhumbula kwakho ezo ziganeko kuye kwakuchaphazela njani? Ngaba ezo nkumbulo azizange ziqhubeke zikweyisela ekubeni uYehova unokukunceda woyise okanye unyamezele imiqobo okanye iingxaki ezingakumbi?—Roma 5:3-5.
6 Kuthekani ukuba abasemagunyeni benza iyelenqe lokuval’ umlomo intlangano yamaNgqina kaYehova? Abantu abaninzi kweli xesha siphila kulo bakhe bayizama loo nto kodwa abakhange baphumelele. Ukucinga ngendlela uYehova aye wabanceda ngayo abantu bakhe mandulo kunokusinceda sibe nenkalipho yokumelana nezinto eziseza kwenzeka kwixesha elizayo.—Dan. 3:28.
LUXABISE UNQULO OLUNYULU
7, 8. (a) INdumiso 27:4, ithi uDavide wacela ntoni kuYehova? (b) Yintoni itempile kaYehova enkulu yokomoya, yaye kunqulwa njani kuyo?
7 Enye into ebalulekileyo ukuze sikhaliphe, kukuluthanda kwethu unqulo lokwenyaniso. (Funda iNdumiso 27:4.) Ngemihla kaDavide, ‘indlu kaYehova’ yayingumnquba. UDavide waceba itempile enkulu eyayiza kwakhiwa ngunyana wakhe, uSolomon. Kwiinkulungwane ezalandelayo, uYesu watyhila ukuba ukunqula ngendlela eyamkelekileyo kuYehova akusayi kuxhomekeka ekubeni nesakhiwo esinye esisikelelwe nguThixo. (Yoh. 4:21-23) KumaHebhere isahluko 8 ukuya kwese-10, umpostile uPawulos wabonisa ukuba, itempile enkulu yokomoya yabakho ngokubhaptizwa kukaYesu ngowama-29 C.E., xa wazinikela ekwenzeni ukuthanda kukaYehova. (Heb. 10:10) Le tempile inkulu yokomoya lilungiselelo elenziwe nguYehova, ukuze xa sinokholo kwidini lentlawulelo likaYesu, sikwazi ukusondela kuThixo ngendlela eyamkelekileyo. Sinqula njani kuloo tempile? Ngokuthandaza “ngeentliziyo ezinyanisekileyo siqiniseke ngokupheleleyo ngokholo”; ngokuvakalisa ngethemba lethu esidlangalaleni ngaphandle kokuxengaxenga; ngokuya, nangokukhuthaza amanye amaKristu xa sihlanganisene kwiintlanganiso zebandla nasebudeni bonqulo lwentsapho. (Heb. 10:22-25) Ukuxabisa amalungiselelo onqulo olunyulu kuyasinceda kule mihla yokugqibela inzima.
8 Ehlabathini lonke, abakhonzi bakaYehova abanyanisekileyo bandisa isabelo sobulungiseleli babo, bafunda ulwimi olutsha, yaye bafudukela kwimimandla efuna abavakalisi boBukumkani abangakumbi. Indlela abazenza ngayo izinto ibonisa ukuba njengomdumisi banento enye abafuna ukuyicela kuYehova. Bafuna ukunandipha ukuthandeka kukaYehova yaye bafuna ukuba nenxaxheba kwinkonzo engcwele enoba kwenzeka ntoni.—Funda iNdumiso 27:6.
THEMBELA NGONCEDO LUKATHIXO
9, 10. Sithetha ukuthini isiqinisekiso esikwiNdumiso 27:10?
9 UDavide uyichaza ngokucacileyo indlela athembele ngayo kuYehova xa esithi: “Nokuba ubawo noma bangandishiya, ke yena uYehova uya kundithabatha.” (INdu. 27:10) Ngenxa yeziganeko ezikweyoku-1 kaSamuweli isahluko 22, sinokuthi abazali bakaDavide abazange bamshiye. Noko ke, abantu abaninzi namhlanje baye balahlwa ngokupheleleyo ziintsapho zabo. Kodwa baye bancedwa baza baziva bekhuselekile ngenxa yothando olukwibandla lamaKristu.
10 Ekubeni uYehova ekulungele ukuxhasa abakhonzi bakhe xa belahliwe, ngaba ebengayi kwenza okufanayo xa bebandezeleka ngezinye iindlela? Ngokomzekelo, ukuba sixhalatyiswa yindlela esinokuzinyamekela ngayo iintsapho zethu ngezinto eziphathekayo, ngaba asinakuqiniseka ukuba uYehova uya kusinceda? (Heb. 13:5, 6) Uyazazi iimeko neemfuno zabo bonke abakhonzi bakhe abanyanisekileyo.
11. Ukukholosa kwethu ngoYehova kunokubachaphazela njani abanye? Yenza umzekelo.
11 Makhe sicinge ngemeko kaVictoria, isifundo seBhayibhile saseLiberia. Njengoko wayesenza inkqubela eza kubhaptizwa, indoda awayehlala nayo yamshiya nabantwana abathathu. Nangona wayengenandawo yokuhlala yaye engaphangeli, waqhubeka esenza inkqubela ngokomoya. Emva kokubhaptizwa kukaVictoria, intombi yakhe eneminyaka eli-13 ubudala yachola isipaji esasinemali eninzi. Ukuze bangahendeki, bagqiba ekubeni bangayibali loo mali. Kunoko, bakhawuleza baqhagamshelana nejoni elalingumnini weso sipaji. Lathi kubo, ukuba bonke abantu bebenyaniseke njengamaNgqina kaYehova, bekuya kuba mnandi ehlabathini kubekho uxolo. UVictoria walityhilela iBhayibhile eli joni, elibonisa ithemba likaYehova lehlabathi elitsha. Lichukunyiswe kukuthembeka kwakhe, eli joni lapha uVictoria imali eninzi kuleyo yayicholwe yintombi yakhe. Eneneni, ukuba nokholo lokuba uYehova uyakwazi ukunyamekela abantu, kwenze amaNgqina kaYehova abalasela ngokuthembeka.
12. Sibonisa ntoni xa siqhubeka sikhonza uYehova nangona singenazinto ziphathekayo? Yenza umzekelo.
12 Khawuthelekelele indlela awavakalelwa ngayo uThomas, ongumvakalisi ongabhaptizwanga waseSierra Leone. Waqalisa ukuba ngutitshala kwisikolo samabanga aphakamileyo, kodwa akazange ahlawulwe phantse unyaka wonke, kuba elinde amaphepha akhe emvume. Yintoni enye into ekwakufuneka uThomas eyenzile ngaphambi kokuba ahlawulwe? Kwakufuneka umphathi wesikolo ongumfundisi aqhube udliwano-ndlebe naye. Lo mfundisi wathi, iinkolelo zamaNgqina kaYehova azivumelani nezo zesikolo. Wanyanzelisa uThomas ukuba akhethe phakathi komsebenzi wakhe neenkolelo ezisekelwe eBhayibhileni. Esakuba encame loo msebenzi wakhe kwakunye nomvuzo wonyaka, uThomas wafumana omnye umsebenzi wokulungisa oonomathotholo neeselfowuni. Njengoko lo mzekelo neminye ibonisa, ukoyika ukuswela kunokwenza abantu bankwantye kodwa oko akunakuthelekiswa nokukholosa ngoMdali wezinto zonke nonguMkhuseli wabantu bakhe.
13. Umsebenzi wokushumayela ngoBukumkani uye wahambela phambili njani kumazwe angenazo kangako izinto eziphathekayo?
13 Kumazwe amaninzi aneemeko zokuphila ezinzima, abavakalisi boBukumkani basoloko benenzondelelo ephawulekayo. Kutheni kunjalo nje? Enye iofisi yesebe ibhala ithi: “Abaninimzi abaninzi abasamkelayo isifundo seBhayibhile abaphangeli yaye ngenxa yoko banexesha elaneleyo lokufunda ebudeni bemini. Nabazalwana banexesha elingakumbi lokushumayela. Abantu abakumazwe athwaxwa kanobom zezoqoqosho bazibonela ngawabo amehlo ukuba siphila kwimihla yokugqibela.” Umthunywa wevangeli okhonze ngaphezu kweminyaka eli-12 kwilizwe elinomvakalisi ngamnye oqhuba ubuncinane izifundo zeBhayibhile ezingaphezu kwezithathu wabhala wathi: “Ekubeni uninzi lwabavakalisi luphila ubomi obulula nobuneziphazamiso ezimbalwa, lunexesha elingakumbi lokushumayela nelokuqhuba izifundo zeBhayibhile.”
14. UThixo unokusikhusela ngaziphi iindlela isihlwele esikhulu?
14 UYehova uthembise ukunceda, ukukhusela nokuhlangula abantu bakhe njengeqela, ngokoqobo nangokomoya yaye sikholose ngaye. (INdu. 37:28; 91:1-3) Eneneni, simele ukuba sikhulu isihlwele esiza kusinda ‘kwimbandezelo enkulu.’ (ISityhi. 7:9, 14) Ngenxa yoko, eso sihlwele siya kukhuselwa njengeqela ukuze singatshabalali siphele kwezi ntsuku ziseleyo zemihla yokugqibela. Siya kunikwa nantoni na eyimfuneko ukuze sinyamezele izilingo size silondoloze ulwalamano lwaso noYehova. Yaye ngasekupheleni kwembandezelo enkulu, uYehova uya kubakhusela abantu bakhe.
“NDIYALELE INDLELA YAKHO, YEHOVA”
15, 16. Singenelwa njani xa sithobela imiyalelo kaThixo? Yenza umzekelo.
15 Ukuze sihlale sikhaliphile, kufuneka siqhubeke sifundiswa iindlela zikaThixo. Oko sikubona kwisicelo sikaDavide esithi: “Ndiyalele indlela yakho, Yehova, undikhokele kumendo wokuthe tye ngenxa yeentshaba zam.” (INdu. 27:11) Ukwenza ngokuvumelana nalo mthandazo kuthetha ukunikela ingqalelo ekhethekileyo kulo naluphi na ulwalathiso olusekelwe eBhayibhileni esilufumana kwintlangano kaYehova size silusebenzise. Abantu abaninzi abaye baphila ngaphandle kwamatyala angeyomfuneko, bazibonele indlela ekuyingenelo ngayo ukuthobela isiluleko sobulumko sokuphila ubomi obulula, kula maxesha anzima kwezoqoqosho. Kunokuba bazithwalise ubunzima ngezinto abangakwaziyo ukuzihlawula, banethuba elaneleyo lokwandisa ubulungiseleli babo. Ngamnye kuthi ufanele azibuze: ‘Ngaba ndikhawuleza ndizisebenzise zonke izinto endizifunda eBhayibhileni nakwiimpapasho zodidi lwekhoboka elithembekileyo neliyingqondi, enoba zifuna ndincame izinto ezithile?’—Mat. 24:45.
16 Ukuba sivumela uYehova ukuba asiyalele aze asikhokelele kwindlela yobulungisa, asiyi kuba nasizathu sakoyika. Xa omnye uvulindlela othe ngxi eUnited States wafaka isicelo sesikhundla esasiza kumnceda ayixhase yonke intsapho yakhe ekwinkonzo yexesha elizeleyo, umphathi wakhe wamxelela ukuba akanakusifumana eso sikhundla engenaso isidanga sakwanokholeji. Ukuba oku kwakunokwenzeka kuwe, ngaba wawuya kuzisola kuba uye waba kwinkonzo yexesha elizeleyo kunokuba ube nemfundo yakwanokholeji? Kwiiveki nje ezimbini kamva, lo mphathi waphelelwa ngumsebenzi kwaza kwangena omnye ezihlangwini zakhe yaye lo umtsha wabuza lo mzalwana ngosukelo lwakhe. Wamchazela ukuba benenkosikazi yakhe bangabalungiseleli bexesha elizeleyo abangamaNgqina kaYehova yaye bafuna ukuqhubeka naloo msebenzi. Ngaphambi kokuba lo mzalwana aqhubeke, lo mphathi wathi: “Ndibonile ukuba ikho le nto yahlukileyo apha kuwe! Xa utata wayeselukhukweni lokufa, amaNgqina amabini ayedla ngokuza kumfundela iBhayibhile suku ngalunye. Ndazixelela ukuba, xa kunokuvela ithuba lokunceda iNgqina likaYehova, ndiya kulixhakamfula.” Ngentsasa elandelayo, lo mzalwana wanikwa laa msebenzi umphathi wangaphambili angazange avume ukumnika. Eneneni, xa sibeka izilangazelelo zoBukumkani kuqala ebomini bethu, uYehova uyasifeza isiqinisekiso sakhe sokuba, asinakuze siziswele izinto eziphathekayo.—Mat. 6:33.
UKHOLO NETHEMBA ZIBALULEKILE
17. Yintoni eya kusinceda sijamelane nekamva sizimisele?
17 Kwakhona, uDavide ubethelela imfuneko yokuba nokholo nethemba esithi: “Ukuba bendingabanga nokholo ekuboneni ukulunga kukaYehova elizweni labo baphilileyo—!” (INdu. 27:13) Eneneni, besiya kuba yintoni ukuba besingenalo ithemba uThixo asinika lona nokuxabisa kwethu izinto ekuxutyushwe ngazo kwiNdumiso 27! Kwanga singaqhubeka ngokuzimisela sithandazela amandla nokuhlangulwa njengoko siza kube sijamelana neziganeko ezikhokelela kwiArmagedon.—Funda iNdumiso 27:14.
[Umfanekiso okwiphepha 23]
UDavide womelela ngenxa yokukhumbula indlela uYehova awabahlangula ngayo abantu bakhe
[Umfanekiso okwiphepha 25]
Ngaba iimeko ezinzima ngokwezoqoqosho sizisebenzisa njengethuba lokwandisa ubulungiseleli bethu?