UYesu Ube Nguye Nini UKumkani?

Eli nqaku libuza imibuzo ekunokwenzeka ukuba ukhe wazibuza yona lize likubonise iimpendulo zalo eBhayibhileni. AmaNgqina kaYehova aya kukuvuyela ukuthetha nawe ngeempendulo zale mibuzo.

1. Bubuphi ubukumkani uYesu awabuthenjiswayo?

UThixo wathembisa ukuba umntu owayeza kuphuma kumnombo kaKumkani uDavide wayeza kuhlala etroneni Yakhe ukusa kwixesha elingenammiselo. Loo mntu wayethenjisiwe nguYesu, kwaye ngoku ulawula ezulwini njengoKumkani woBukumkani bukaThixo.—Funda iNdumiso 89:4; Luka 1:32, 33.

Xa uDavide wayeselityendyana, uThixo wamkhetha ukuba abe ngukumkani wabantu amaSirayeli. Emva kokufa kukaDavide, uSolomon owakhethwa nguYehova, “wahlala etroneni kaYehova.” (1 Kronike 28:4, 5; 29:23) Emva kokufa kukaSolomon, baba baninzi ookumkani abalawula eYerusalem, kodwa uninzi lwabo lwalunganyanisekanga. Ekugqibeleni, uYehova wavumela imikhosi yaseBhabhiloni ukuba itshabalalise iYerusalem ize ishenxise ookumkani ababelawula. Oko kwenzeka ngo-607 B.C.E. Ukususela ngelo xesha, akukho kumkani womnombo kaDavide owaphinda walawula eYerusalem.—Funda uHezekile 21:27.

2. Kuthathe ixesha elingakanani bungekho uBukumkani obumela uThixo emhlabeni?

Kancinane nje emva kokutshatyalaliswa kweYerusalem, uYehova waxelela umprofeti uDaniyeli ukuba uza kukhetha ukumkani oza kulawula esezulwini. Wayeza kuqalisa nini ukulawula?—Funda uDaniyeli 7:13, 14.

UDaniyeli watolika umbono apho uThixo wayalela ukuba umthi omkhulu ugawulwe, kanye njengokuba wayalelayo ukuba ubukumkani baseYerusalem butshatyalaliswe. Kodwa wathi isiphunzi saloo mthi masishiywe emhlabeni ukuze sikhule kwakhona “emva kwamaxesha asixhenxe.” IBhayibhile ibonisa ukuba isithathu esinesiqingatha “samaxesha” silingana neentsuku ezili-1 260, ngoko ke, “amaxesha asixhenxe” alingana neentsuku ezingama-2 520. (ISityhilelo 12:6, 14) Kwisiprofeto seBhayibhile, ngokuqhelekileyo iintsuku zithetha iminyaka. (Numeri 14:34) Ngoko ke, uBukumkani bukaThixo babuza kuhlala bungalawuli kangangeminyaka engama-2 520.—Funda uDaniyeli 4:10-17.

3. UYesu waba nguye nini uKumkani?

UThixo wathwesa uYesu njengoKumkani ezulwini ngo-1914, kanye emva kweminyaka engama-2 520 yatshatyalaliswayo kweYerusalem. Into yokuqala eyenziwa nguYesu njengoKumkani kukugxotha uSathana needemon zakhe emazulwini. (ISityhilelo 12:7-10) Eso siganeko sasingabonakali emehlweni abantu, kodwa imiphumo yaso yaba yintlekele ebonakalayo kuluntu. (ISityhilelo 12:12) Iziganeko eziqhubekayo ukususela ngo-1914 zingqina ukuba uYesu waba nguKumkani ngaloo nyaka.—Funda uMateyu 24:14; Luka 21:10, 11, 31.

4. Buthetha ntoni kuwe ubukumkani bukaYesu?

Ukuzaliseka kweziprofeto ezingobukumkani bukaYesu kungqina ukuba unokuthembela eLizwini likaThixo. Kungekudala, uYesu uza kusebenzisa amandla akhe ukuze akhulule uluntu kuko konke ukubandezeleka.—Funda iNdumiso 72:8, 12, 13; Daniyeli 2:44.

Ukuze ufumane inkcazelo engakumbi, funda amaphepha 215-218 sencwadi ethi, Yintoni Ngokwenene Efundiswa YiBhayibhile?, epapashwe ngamaNgqina kaYehova.

[Isicangca esikwiphepha 16, 17]

(Ukuba ufuna inkcazelo ehlahlelwe kakuhle, yiya kwimpapasho)

Oktobha

607 B.C.E. ← iminyaka engama-2 520 → 1914 C.E.

1000 B.C.E. | 1 B.C.E. | 1 C.E. | 1000 C.E. | 2000 C.E.

← iminyaka engama-606.25 →← iminyaka eli-1 913.75

Ubukumkani baseYerusalem buyatshatyalaliswa

Khawubale: 606.25 + 1 913.75 = 2 520

UThixo wenza uYesu uKumkani onamandla phezu kwazo zonke iintlanga