Ukulondoloza Indlela Esiziphatha Ngayo ‘Njengabemi Bokwexeshana’

1, 2. Wayebhekisela koobani uPetros xa wayethetha ‘ngabo banyuliweyo,’ yaye kwakutheni ukuze athi ‘bangabemi bokwexeshana’?

KWIMINYAKA emalunga nama-30 emva kokuba uYesu enyukele ezulwini, umpostile uPetros wabhala ileta eyayisiya ‘kubemi bokwexeshana abachithachitheke ePonto, eGalati, eKapadokiya, eAsiya, naseBhithiniya, abo banyuliweyo.’ (1 Pet. 1:1) Licacile elokuba xa uPetros wayethetha ‘ngabo banyuliweyo,’ wayebhekisela kwabo babethanjiswe ngomoya oyingcwele njengaye, baza ‘bazalwa ngokutsha ngokubhekisele kwithemba eliphilayo’ lokulawula noKristu emazulwini. (Funda eyoku-1 kaPetros 1:3, 4.) Kodwa kutheni kamva wabiza aba banyuliweyo ngokuthi ‘bangabaphambukeli nabemi bokwexeshana’? (1 Pet. 2:11) Yaye oku kuthetha ntoni kuthi, ekubeni elibathwana ehlabathini amaNgqina athanjisiweyo?

² Kwakufanelekile ukuba asebenzise ibinzana elithi ‘abemi bokwexeshana’ xa ethetha ngabathanjiswa benkulungwane yokuqala. Kanye njengokuba kunjalo ngentsalela yeli qela esaphilayo ngoku, ayengazi kuhlala ngokusisigxina emhlabeni. Umpostile uPawulos owayeyinxalenye ‘yomhlambi omncinane’ othanjisiweyo, wathi: “Thina ke, singabemi basemazulwini, apho silindele ngentumekelelo ukuba kuya kuvela khona umsindisi, iNkosi uYesu Kristu.” (Luka 12:32; Fil. 3:20) Ngenxa yokuba ‘bengabemi basemazulwini,’ xa besifa, abathanjiswa bayemka emhlabeni ukuze bafumane eyona nto ibhetele, ubomi bokungafi ezulwini. (Funda eyabaseFilipi 1:21-23.) Ngeliphandle, banokubizwa ‘njengabemi bokwexeshana’ kweli hlabathi lilawulwa nguSathana.

3. Kuphakama wuphi umbuzo ‘ngezinye izimvu’?

³ Kodwa kuthekani ‘ngezinye izimvu?’ (Yoh. 10:16) Ngaba akanathemba liqinisekileyo elisekelwe eZibhalweni lokuba aza kuba ngabemi abasisigxina emhlabeni? Eneneni aza kuphila kulo mhlaba ngonaphakade! Sekunjalo, nawo ngandlel’ ithile anokugqalwa njengabemi bokwexeshana okwangoku. Ngayiphi ingqiqo?

“YONKE INDALO IYAGCUMA”

4. Yintoni engenakuze ithintelwe ziinkokeli zehlabathi?

⁴ Logama nje le nkqubo ingendawo kaSathana isavunyelwe ukuba ibekho, wonke umntu, kuquka namaKristu, uza kuqhubeka ethwaxwa yimiphumo yokuvukela kukaSathana uYehova. EyabaseRoma 8:22 ithi: “Siyazi ukuba yonke indalo iyagcuma kwaye isentlungwini de kube ngoku.” Iinkokeli zehlabathi, izazinzulu kwakunye nabo balwela amalungelo abantu, abakwazi kuyithintela le ngxaki, enoba banganeenjongo ezintle kangakanani na.

5. Liliphi inyathelo eliye lathatyathwa zizigidi ngezigidi zabantu, ukususela ngowe-1914, yaye ngoba?

⁵ Ukususela ngowe-1914, izigidi ngezigidi zabantu ziye zakhetha ukuba ngabalawulwa abathobelayo bakaKumkani omiselwe nguThixo, uKristu Yesu. Azifuni kuba yinxalenye yenkqubo kaSathana. Azilixhasi ihlabathi likaSathana. Kunoko zisebenzisa ubomi bazo kwakunye nezinto zazo ukuze zixhase uBukumkani bukaThixo.—Roma 14:7, 8.

6. AmaNgqina kaYehova anokubizwa ngokuba ngabemi basemzini ngayiphi ingqiqo?

⁶ Ngokwenene, amaNgqina kaYehova angabemi abathobela umthetho kumazwe angaphezu kwama-200, kodwa enoba ahlala phi na, afana nabemi basemzini. Enoba sekutheni na, akangeni kwimiba yezopolitiko neyasekuhlaleni. Sele ezigqala njengabemi behlabathi elitsha likaThixo. Iyawavuyisa into yokuba, iintsuku zawo njengabemi bokwexeshana kule nkqubo ingendawo zicutheka ngokukhawuleza.

7. Kuya kwenzeka njani ukuba abakhonzi bakaThixo babe ngabemi abasisigxina, yaye baya kuhlala phi?

⁷ Kungekudala, uKristu uza kusebenzisa igunya lakhe ekutshabalaliseni le nkqubo ingendawo kaSathana. Urhulumente kaKristu ogqibeleleyo uya kukhulula abantu kwisono neentlungu. Uya kususa imiphumo ebonakalayo kwanaleyo ingabonakaliyo yokuvukelwa kolongamo lukaYehova. Abakhonzi bakaThixo abathobelayo baya kuba ngabemi abasisigxina kumhlaba oyiParadesi. (Funda iSityhilelo 21:1-5.) Ngengqiqo epheleleyo, kuya kuthi ngelo xesha ‘indalo ikhululwe ekukhotyokisweni kukonakala ize ibe nenkululeko ezukileyo yabantwana bakaThixo.’—Roma 8:21.

YINTONI ELINDELEKILEYO KUMAKRISTU OKWENYANISO?

8, 9. Chaza oko abhekisela kuko uPetros xa ethetha ‘ngokuzikhwebula kwiminqweno yenyama.’

⁸ UPetros uyayichaza into elindeleke kumaKristu xa esithi: “Zintanda, ndiyanibongoza njengabaphambukeli nabemi bokwexeshana ukuba nizikhwebule kwiminqweno yenyama, enxamnye nomphefumlo.” (1 Pet. 2:11) Ekuqaleni elo cebiso lalijoliswe kumaKristu athanjisiweyo, kodwa lisebenza ngendlela efanayo nakwezinye izimvu zikaYesu.

⁹ Eminye iminqweno ayiphosakalanga xa isaneliswa ngendlela emiselwe nguMdali. Eneneni, yenza ubomi bube myoli. Ngokomzekelo, kukho iminqweno eqhelekileyo equka ukunandipha ukutya neziselo ezimnandi, ukuzihlaziya nokunandipha ubuhlobo obanelisayo. Kwanokunqwenela ukuba neentlobano zesini neqabane lakho lomtshato kufanelekile. (1 Kor. 7:3-5) Noko ke, efanele, uPetros wayethetha ‘ngeminqweno yenyama’ “enxamnye nomphefumlo.” UYehova usichazele indlela afuna siphile ngayo size sanelise iminqweno yemvelo. Ukuba asikwenzi oko, sinokuba sengozini yokufa.

10. Ziziphi ezinye iindlela ezisetyenziswa nguSathana ukuze enze amaKristu abe yinxalenye yehlabathi lakhe?

¹⁰ Usukelo lukaSathana kukuphazamisa ukuzimisela kwamaKristu okwenyaniso ukuzijonga ‘njengabemi bokwexeshana’ kule nkqubo. Ukuthanda ubunewunewu, ukunqwenela ukuziphatha okubi, ukufuna udumo, ukucingela iziqu zethu kuphela nomoya wokuthand’ izwe—yonke leyo yimigibe kaSathana esimele siyilumkele. Xa sizimisela ukuyiphepha le minqweno mibi yenyama, siya kubonisa ngokucacileyo ukuba asifuni kuba yinxalenye yehlabathi elingendawo likaSathana. Siya kubonisa ukuba siphila nje kulo okwexeshana. Eyona nto siyifunayo nesiyizamayo kukuba ngabemi abasisigxina kwihlabathi elitsha likaThixo lobulungisa.

IHAMBO ENTLE

11, 12. Bajongwa njani maxa wambi abantu basemzini, yaye kunokuthiwani ngamaNgqina kaYehova?

¹¹ Kwindinyana 12 uPetros uqhubeka athi xa echaza oko kulindeleke ‘kubemi bokwexeshana’ abangamaKristu: “Ihambo yenu mayibe ntle phakathi kweentlanga, ukuze, nokuba zithetha kakubi ngani njengabenzi-bubi, zithi ngokubona imisebenzi yenu emihle, zimzukise uThixo ngemini yokuvelela kwakhe.” Abantu basemzini okanye abemi bokwexeshana abakwelinye ilizwe, badla ngokuhlatyw’ amadlala. Kuba bengafani nabantu bendawo abahlala kuyo, basenokujongwa njengabenzi-bubi. Indlela abathetha ngayo, izinto abazenzayo, indlela abanxiba ngayo kwanenkangeleko yabo isenokwahluka ngandlel’ ithile. Xa besenza izinto ezintle, oko kukuthi xa benehambo entle, izinto abatyholwa ngazo zidla ngokungabi nasihlahla.

¹² Ngokufanayo, amaKristu okwenyaniso ayahluka kuninzi lwabamelwane bawo, ngenxa yendlela ancokola ngayo okanye indlela akhetha ukuzihlaziya ngayo. Indlela anxiba ngayo idla ngokwahluka kweyabantu abaninzi abangabamelwane bawo. Maxa wambi, ukwahluka kwawo kuye kwabangela ukuba abantu abangazazi kakuhle izinto, bawatyhole ngokuba ngabenzi bobubi. Noko ke, abanye abantu bayawancoma ngendlela aphila ngayo.

13, 14. Ubulumko ‘bungqineka njani bububulungisa ngemisebenzi yabo’? Zekelisa.

¹³ Ngokwenene, ihambo entle inokusithethelela xa sihlatyw’ amadlala. KwanoYesu, owayekuphela komntu owathembeka ngokugqibeleleyo kuThixo, watyholwa. Abanye abantu bambiza ngokuba ‘ngumntu olidla-kudla nozinikela ekuseleni iwayini, umhlobo wabaqokeleli berhafu naboni.’ Eneneni, ukwenza kwakhe ngobulumko nokukhonza uThixo ngokuthembeka kwayingqina ibubuvuvu into yokuba ungumenzi-bubi. UYesu wathi: “Ubulumko bungqineka bububulungisa ngemisebenzi yabo.” (Mat. 11:19) Kusenjalo nanamhlanje. Ngokomzekelo, abazalwana noodade abakwiBheteli yaseSelters, eJamani agqalwa njengaphila ubomi obungaqhelekanga ngabantu abahlala kufutshane nalapho. Kodwa usodolophu walapho wawathethelela ngelithi: “AmaNgqina ahlala kula ndawo aphila ngendlela yawo, kodwa loo ndlela ayiphazamisani neyabanye abahlali.”

¹⁴ Kusandul’ ukuthethwa into efanayo ngamaNgqina kaYehova ahlala eMoscow, eRashiya. Aye atyholwa ngezinto ezininzi ezimbi. Kuthe ngoJuni 2010, iNkundla Yamalungelo Abantu YaseYurophu, eStrasbourg, eFransi, yakhupha esi sigqibo: “Le Nkundla ifumanise ukuba bekungafanelanga ukuba [iMoscow] iphazamisane nenkululeko yabamangali yonqulo neyokunxulumana. Iinkundla ezingaphantsi azikhange zize nobungqina ‘obubambekayo nobaneleyo’ bokuba abamangali” banetyala lokuqhekeza iintsapho, elokukhuthaza abantu ukuba bazibulale, okanye elokungalufuni unyango. Ngaloo ndlela “ezi nkundla ziye zaqatha kwisigwebo ezisiwise kumaNgqina zisebenzisa umthetho welizwe ongqongqo.”

UKUTHOBELA OKUFANELEKILEYO

15. Nguwuphi umgaqo weBhayibhile othotyelwa ngamaKristu okwenyaniso ehlabathini lonke?

¹⁵ AmaNgqina kaYehova asehlabathini lonke, kuquka lawo aseMoscow athobela umgaqo omnye obekelwe amaKristu, njengoko wachazwa nguPetros. Wabhala wathi: “Ngenxa yeNkosi zithobeni kuyo yonke indalo engabantu: enoba kukukumkani njengowongamileyo okanye kukwiirhuluneli.” (1 Pet. 2:13, 14) Nangona engeyonxalenye yeli hlabathi lingendawo, amaKristu okwenyaniso awathobela ngokuzithandela amagunya aseburhulumenteni ‘akwizikhundla zawo ezilinganiselweyo,’ ngokuvisisana nomyalelo kaPawulos.—Funda eyabaseRoma 13:1, 5-7.

16, 17. (a) Yintoni ebonisa ukuba asibachasanga oorhulumente? (b) Ziye zathini ezinye iinkokeli zopolitiko?

¹⁶ Xa amaNgqina kaYehova eziphatha ‘njengabemi bokwexeshana’ kule nkqubo, oko akakwenzi kuba egwayimba; akaphikisi okanye aphazamisane nokhetho olwenziwa ngabanye ngokuphathelele umntu omele alawule. Ngokungafaniyo nezinye iinkonzo, amaNgqina kaYehova akabandakanyeki kwezopolitiko. Akacebisi nto kwimithetho eyenziwa ziinkokeli zopolitiko. Akayicingi nokuyicinga into yokuphazamisana nocwangco kwakunye nokusebenza kukarhulumente!

¹⁷ Ngokuthobela amagunya aseburhulumenteni ngokuvisisana namazwi kaPetros ayalela ukuba ‘abe nembeko kukumkani,’ amaKristu aba nembeko nentlonelo efanele izikhundla zaloo magosa. (1 Pet. 2:17) Maxa wambi, amagosa aseburhulumenteni aye afumanisa ukuba akanasizathu sibambekayo sokuzikhathaza ngamaNgqina kaYehova. Ngokomzekelo, inkokeli yezopolitiko yaseJamani, uSteffen Reiche, owayekhe wangumphathiswa kwikhabhinethi yaseBrandenburg waza kamva waba lilungu lepalamente yaseJamani wathi: “Ihambo yamaNgqina kaYehova ngoxa ayevalelwe kwiinkampu nasezintolongweni yabonisa iimpawu, ezazibalulekile nezikwanjalo nanamhlanje kwilizwe elinomgaqo-siseko nelilawulwa yidemokhrasi: eziquka ukungagungqi nakuba ayedlakazeliswa ngamagosa angama-SS nokubonisa kwawo ubuntu kwamanye amabanjwa. Akwaba abantu belizwe lethu bebenokukhe babonise ezo mpawu kunokukhohlakalela abantu basemzini kwanabo bakwimibutho yezopolitiko eyahlukileyo kweyabo.”

UKUBA NOTHANDO

18. (a) Kutheni siluthanda lonke umanyano lwabazalwana? (b) Baye bathini abantu abangengomaNgqina?

¹⁸ Umpostile uPetros wathi: “Yibani nothando ngomanyano lwabazalwana luphela, moyikeni uThixo.” (1 Pet. 2:17) AmaNgqina kaYehova ayakoyika ukungamkholisi uThixo yaye oku kuyawakhuthaza ukuba enze ukuthanda kwakhe. Ayakuvuyela ukukhonza uYehova kunye nabazalwana noodade abamanyeneyo abanomnqweno ofana nowawo ehlabathini lonke. Ngenxa yoko, ‘anothando ngomanyano lwabazalwana luphela.’ Olo thando lobuzalwana lunqabe okwezinyo lenkuku kweli hlabathi licingela iziqu zalo, luyabamangalisa maxa wambi abantu abangengomaNgqina. Ngokomzekelo, omnye usisi osebenza kwiziko lezokhenketho laseMerika, okhenkethisa abantu, wamangaliswa luthando nokuncedana kweendwendwe ezingamaNgqina, ezazize kwiindibano zezizwe ngezizwe zowama-2009 eJamani. Wayitsho into yokuba kuyo yonke iminyaka yokukhenkethisa abantu, uyaqala ukuyibona intw’ enje. Kamva, elinye iNgqina lathi: “Wawumva kwasekuthetheni ukuba umangalisiwe yaye unomdla kwangaxeshanye.” Ngaba wakha waya endibanweni waza weva abantu bethetha ngolo hlobo ngamaNgqina?

19. Sifanele sizimisele ukwenza ntoni yaye ngoba?

¹⁹ Ngezi ndlela sele sizikhankanyile nangezinye, amaNgqina kaYehova abonisa ngokwenene ukuba ‘angabemi bokwexeshana’ kule nkqubo kaSathana. Ibe azimisele ukuqhubeka esenjenjalo. Anethemba eliqinisekileyo lokuba kungekudala aza kuba ngabemi abasisigxina kwihlabathi elitsha likaThixo lobulungisa. Ngaba nawe ukhangele phambili kwelo themba?