Ubomi Bethu Bonke Siye Safundiswa NguMyaleli Ozukileyo Wethu

IZINTO ENDAZIFUNDA KUBAZALI BAM

Ngasekupheleni kweminyaka yoo-1950, abazali bam bemka eItaly baya kuhlala eKindersley, eseSaskatchewan, eCanada. Kungekudalanga befikile apho, bafunda inyaniso yaza yaba yeyona nto ibalulekileyo kubomi bethu. Ndikhumbula ndisengumntwana ndishumayela iiyure ezininzi ngosuku nabantu basekhaya, kangangokuba ndiye ndihlekise abantu ndisithi ndaba nguvulindlela ongumncedani ndiseneminyaka eyi-8.

Abazali bam babehlupheka; kodwa sayibona kubo indlela ekubaluleke ngayo ukuncama izinto ngenxa kaYehova. Ngokomzekelo, ngo-1963 bathengisa izinto zabo ezininzi ukuze bafumane imali yokuya kwindibano yezizwe ngezizwe eyayisePasadena, eseCalifornia, eU.S.A. Ngo-1972 saya kuhlala eTrail eseBritish Columbia, eCanada, ukuze sincede kwintsimi yesiTaliyane. Loo ndawo yayimalunga neekhilomitha eziyi-1 000 ukusuka apho sasikade sihlala khona. Umsebenzi katata yayikukuklina izakhiwo ezikhulu. Wayengavumi ukunyuselwa emsebenzini ukuze kungabikho nto imphazamisayo ekukhonzeni uYehova.

Ndiyababulela abazali bam ngezinto abaye basifundisa zona, mna nabantwana basekhaya abathathu. Ezo yaba zizinto zokuqala ezandiqeqeshela ukukhonza uYehova. Ndafunda nale nto endingasoze ndiyilibale ubomi bam bonke: Ukuba ndifuna uBukumkani kuqala uYehova uza kundikhathalela.​—Mat. 6:33.

UKUQALA KWAM INKONZO YEXESHA ELIZELEYO

Ngo-1980, ndatshata noDebbie, udade omhle nowayeqinisekile ngezinto afuna ukuzenzela uYehova. Sasifuna ukungenela inkonzo yexesha elizeleyo, ngoko uDebbie waqalisa ukuba nguvulindlela kwiinyanga nje ezintathu emva kokuba sitshatile. Emva konyaka sitshatile saya kukhonza kwibandla elincinci elalidinga abavakalisi, ndaza nam ndanguvulindlela.

Ekuhambeni kwexesha satyhafa, saza sagqiba ekubeni simke apho. Kodwa saqala sathetha nomveleli wesiphaluka. Wathetha phandle kodwa ngothando wathi: “Nini abayenza ibe nzima kakhulu le ngxaki. Nijonga kuphela izinto ezingahambi kakuhle ebomini benu. Kodwa ukuba nikhangela ezinihambela kakuhle, niza kuzifumana.” Elo cebiso lafika ngexesha elifanelekileyo. (INdu. 141:5) Sakhawuleza salisebenzisa. Kungekudala safumanisa ukuba nyhani zininzi izinto ezintle ezazisenzeka. Babebaninzi abantu ababefuna ukumsebenzela kakhulu uYehova. Phakathi kwabo kwakukho abantu abasebatsha nabantu abatshate nabantu abangakholwayo. Eso yayisisifundo esibaluleke kakhulu kuthi. Safunda ukukhangela izinto ezintle size silindele ukuba uYehova uza kuyilungisa ingxaki esenokubonakala inzima. (Mika 7:7) Saphinda sonwaba, nezinto zaya zisiba bhetele.

Abazalwana ababesifundisa kwisikolo sokuqala soovulindlela esaya kuso babekhe bakhonza kwamanye amazwe. Njengoko babesibonisa iifoto, bethetha ngeengxaki neentsikelelo abazifumanayo, basenza sanomdla wokuba ngabathunywa bevangeli. Ngoko sagqiba ekubeni sibe ngabo.

Ukuze sibe ngabo, ngo-1984 saya kuhlala kwindawo ekuthethwa isiFrentshi kuyo, eQuebec, ekwiikhilomitha ezingaphezu kwe-4 000 ukusuka eBritish Columbia. Kwafuneka sifunde ukuthetha ulwimi lwalapho nokuphila ngendlela ekuphilwa ngayo. Enye ingxaki esasiba nayo kukuba sasidla ngokungabi nayo imali eyaneleyo yokufumana izinto esizidingayo. Omnye umfama wasivumela ukuba sichola-chole iitapile ezishiyeke kwintsimi yakhe. Kwahamba ixesha sisitya ezo tapile kangangokuba noDebbie wayesele eneendlela ezahlukahlukeneyo zokuzipheka. Sazimisela ukuzinyamezela ezo ngxaki sivuya. Phezu kwazo zonke ezo zinto sabona ukuba uYehova usikhathalele.​—INdu. 64:10.

Ngenye imini safowunelwa singalindelanga simenyelwa ukuya kukhonza kwiBheteli yaseCanada. Sasifake isicelo sokuya kwiSikolo saseGiliyadi. Nangona sasikuvuyela ukufumana esi simemo, sasisafuna nokuya kwiSikolo SaseGiliyadi. Savuma ukuya eBheteli. Ukufika kwethu eBheteli sabuza umzalwana okwiKomiti yeSebe, uKenneth Little, sathi, “Kuza kwenzeka ntoni ngesicelo sethu sokuya eGiliyadi?” Waphendula wathi, “Sakubona xa nimenywa ukuba masenze ntoni.”

Nyhani ke emva kweveki, mna noDebbie samenyelwa eGiliyadi. Ngoko kwafuneka sikhethe. UMzalwan’ uLittle wathi: “Nokuba nikhethe esiphi isabelo, ngezinye imini nisenokuthi akwaba besikhethe esiya. Asikho isabelo esibhetele kunesinye kuba uYehova unokusikelela nokuba sesiphi.” Savuma ukuya eGiliyadi. Kwiminyaka eyalandelayo sabona ukuba uMzalwan’ uLittle wayenyanisile. Xa sicebisa abanye ekufuneka bakhethe ukuba baza kwenza esiphi isabelo, besisoloko sibaxelela kanye le nto wasixelela yona.

XA SASINGABATHUNYWA BEVANGELI

Sakuvuyela ukuba phakathi kwabafundi abayi-24 beklasi ye-83 yaseGiliyadi eyayiseBrooklyn, eNew York, ngoAprili 1987. Abona bazalwana ababengootitshala bethu yayingu-Ulysses Glass noJack Redford. Iinyanga eziyi-5 zeso sikolo zakhawuleza zaphela, saza sagreda ngoSeptemba 6, 1987. Thina, uJohn, noMarie Goode sathunyelwa eHaiti.

Emva kokuba eHaiti kugxothwe abathunywa bevangeli abasuka eGiliyadi ngo-1962, zange kuphinde kuthunyelwe abanye. Emva kweeveki ezintathu sigredile, sakhonza kwibandla elincinci laseHaiti elalinabavakalisi abayi-35, nelalisezintabeni. Yayininzi into ekwakusafuneka siyifunde kuba sasisebancinci, sihlala sodwa kwikhaya labathunywa bevangeli. Abantu balapho babehlupheka, abaninzi kubo bengakwazi nokufunda. Xa sasisandul’ ukuba ngabathunywa bevangeli kwabakho iimfazwe ezazisiliwa ngabantu balapho, bezama ukubhukuqa urhulumente, betshisa izinto ezivale indlela, kukho neenkanyamba.

Ininzi into esasinokuyifunda kwindlela ababomelele nababevuya ngayo abazalwana noodade baseHaiti. Kwabaninzi ubomi babunzima kodwa babemthanda uYehova nentsimi. Omnye udade wayemdala engakwazi nokufunda, kodwa wayesazi izibhalo ezimalunga ne-150 ngentloko. Izinto ezazisenzeka yonke imihla apho zazisenza sikufune nyhani ukuqhubeka sixelela abantu ukuba buBukumkani BukaThixo kuphela obuza kuphelisa iingxaki zabo. Kuyasivuyisa ukubona ukuba abantu bokuqala esafunda nabo iBhayibhile apho, baba ngoovulindlela abathe ngxi, oovulindlela abakhethekileyo nabadala.

Apho eHaiti, ndadibana noTrevor, umfana owayengumvangeli wecawa yamaMormon. Mna noTrevor sasikhe sincokole ngeBhayibhile. Emva kweminyaka, ndafumana ileta eyayivela kuye ndingalindelanga. Kuloo leta wayesithi: “Ndiza kubhaptizwa kule ndibano izayo futhi ndifuna ukubuyela eHaiti, ndibe nguvulindlela okhethekileyo kula ndawo ndandingumvangeli ongumMormon kuyo.” Wenza kanye loo nto kangangeminyaka emininzi, ekunye nomfazi wakhe.

EYUROPHU​—EMVA KOKO E-AFRIKA

Sathunyelwa komnye ummandla waseYurophu, apho kwakusiya kusiba lula ukushumayela khona. Ngo-1992 safikela eLjubljana, eSlovenia, kufutshane nalapho abazali bam bakhulela khona ngaphambi kokuba baye kuhlala eItaly. Kwakusekho imfazwe kwiindawo ezaziphantsi kwelizwe elalikade liyiYugoslavia. Isebe eliseVienna, eAustria, neeOfisi eziseZagreb, eCroatia, neziseBelgrad, eSerbia, zazijongene nomsebenzi owawusenziwa eYugoslavia. Ngoku ilizwe ngalinye elizimeleyo kwakufuneka libe neBheteli yalo.

Le nto yayithetha ukuthi siza kuphinda sifunde ulwimi olutsha nendlela ekuphilwa ngayo apho. Abantu basekuhlaleni babedla ngokuthi, “Jezik je težek,” le nto ithetha ukuthi olu lwimi lunzima. Babenyanisile. Sasikuhlonipha ukuthembeka kwabazalwana noodade abakhawuleza bazamkela izinto ezazitshintshwa yintlangano sibona nendlela uYehova awabasikelela ngayo. Saphinda sabona ukuba uYehova uzilungisa njani izinto ngothando nangexesha elifanelekileyo. Iminyaka esayiphila eSlovenia yasenza sakhumbula izinto ezininzi esasizifundile saza safunda ezintsha.

Zazininzi izinto ezaziseza kutshintsha. Ngo-2000 sathunyelwa eCôte d’Ivoire, eseNtshona Afrika. Ngenxa yemfazwe eyayisiliwa kwelo lizwe, ngoNovemba 2002 sabalekiselwa eSierra Leone. Ukufika kwethu apho kwakusandul’ ukuphela imfazwe eyathatha iminyaka eyi-11. Kwakunzima ukuyishiya ngokukhawuleza ngolo hlobo iCôte d’Ivoire. Kodwa izinto esazifundayo zasinceda sahlala sivuya.

Sahoya kakhulu abantu abaninzi balapho ababenomdla nabazalwana noodade ababenyamezele imfazwe kangangeminyaka. Babengenazinto zininzi, kodwa babefuna ukusipha loo nto banayo. Omnye udade wapha uDebbie iimpahla. Xa uDebbie wayengaqinisekanga nokuba azithathe na, lo dade wathi: “Xa bekukho imfazwe siye sancedwa ngabazalwana bamanye amazwe, ngoku sithi abaza kunceda nina.” Saye sazimisela ukulinganisa umzekelo wabo.

Saphinda sabuyela eCôte d’Ivoire, kodwa ngenxa yeengxaki zepolitiki zalapho, kwaqala omnye umlo. Ngoko ngoNovemba 2004, sabalekiswa ngehelikopta siphethe nje iibhegi ezimbini ezincinci. Ngobo busuku salala phantsi kwinkampu yamajoni aseFransi, savuka sakhwela inqwelo-moya eya eSwitzerland. Safika kwisebe lalapho ezinzulwini zobusuku. Abazalwana abakwiKomiti yeSebe kunye nabafundisa kwiSikolo Sokuqeqesha Abalungiseleli nabafazi babo, basamkela ngobubele, basipha ukutya okushushu, neetshokolethi ezininzi. Saziva sithandwa kakhulu.

Sathunyelwa eGhana okwexeshana kodwa wathi wakwehla umlo owawubangelwa ziingxaki zepolitiki eCôte d’Ivoire sabuyela khona. Ububele esabenzelwa ngabazalwana noodade basinceda sakwazi ukunyamezela istres sokuhlala sibalekiswa nesokufumana izabelo zokwexeshana. Mna noDebbie savumelana ukuba nangona luqhelekile uthando olunje kwintlangano kaYehova, soze siluthathe kancinci. Phofu nakuloo maxesha ayenzima, zikhona izinto ezibalulekileyo esazifundayo.

SAYA KUMBINDI MPUMA

Ngo-2006 safumana ileta evela kwikomkhulu lehlabathi lamaNgqina KaYehova isithi sifumene isabelo esitsha kuMbindi Mpuma. Saphinda sadibana nezinye iingxaki, safunda iilwimi ezintsha, iindlela zokuphila, nezinye izinto. Yayininzi into ekwakufuneka siyifunde kule ndawo yayineengxaki ezibangelwa ziipolitiki neenkolo. Sasikuthanda ukubona amabandla anabavakalisi abathetha iilwimi ezahlukahlukeneyo, sabona nomanyano olubangelwa kukuthobela imiyalelo yentlangano kaYehova. Into eyayisenza sibathande abazalwana kukuba abaninzi kubo babenyamezele ukungafunwa ngabantu abazalana nabo, abafunda nabo, abasebenza nabo nabamelwane babo.

Ngo-2012 saya kwindibano ekhethekileyo eyayiseTel Aviv, kwaSirayeli. Babegqibele ngePentekoste 33 C.E ukuba nendibano enkulu kangako kuloo mmandla abantu bakaYehova. Soze siyilibale loo ndibano!

Kuloo minyaka, sathunyelwa kwilizwe owawubekelwe imithetho kulo umsebenzi wethu. Saza nezinye iimpapasho zethu sashumayela entsimini, saza saya kwiindibano ezincinci. Kuyo yonke indawo kwakukho amajoni aphethe imipu emikhulu kuvalwe neendlela, sekunjalo sasiye sizive sikhuselekile kuba sasiye sihambe nabavakalisi abambalwa sikulumkele nokubhaqwa.

SABUYELA EAFRIKA

Ngo-2013 sathunyelwa kwiofisi yesebe laseCongo eseKinshasa. ICongo lilizwe elikhulu elihle kodwa ekusoloko kusiliwa kulo nelinabantu abasokola kakhulu. Ekuqaleni sasisithi, “Siyayazi iAfrika, sikulungele ukuya khona.” Kodwa zininzi izinto ekwakusafuneka sizifunde, ngokukodwa xa kuza kufuneka sihambe kwiindawo ezingenandlela zintle nezingenabhulorho. Sekunjalo, zininzi izinto ezintle esasinokucinga ngazo, ezinjengokuvuya nokunyamezela kwabazalwana ngoxa beneengxaki zemali, indlela abayithanda ngayo intsimi, neenzame abazenzayo ukuze bakwazi ukuya kwiintlanganiso nakwiindibano. Sazibonela ngokwethu indlela owawuhambela phambili ngayo umsebenzi woBukumkani ngenxa yokuba uYehova wayewuxhasa futhi ewusikelela. Iminyaka sikwinkonzo yexesha elizeleyo eCongo yasifundisa izinto ezibaluleke kakhulu, safumana nabahlobo abafana nentsapho kuthi.

Ekupheleni kuka-2017, saphinda sathunyelwa kwesinye isabelo eMzantsi Afrika. Eli lelona sebe likhulu kwesakha sakhonza kuwo, nemisebenzi esafika sayenza yayimitsha kuthi. Nalapha zininzi izinto ekuye kwafuneka sizifunde, kodwa izinto esizifunde ngaphambili ziye zasinceda. Siyabathanda abazalwana noodade abaninzi abasele beneminyaka benyamezele. Kuvuyisa nyhani ukubona intsapho yaseBheteli emanyeneyo ngoxa ingabantu abaziintlanga ezahlukeneyo nabakhule ngeendlela ezingafaniyo. Kucacile ukuba uYehova ubanceda bahlalisane ngoxolo abantu bakhe njengoko benxiba ubuntu obutsha, futhi bephila ngemigaqo yeBhayibhile.

Kuyo yonke le minyaka, mna noDebbie siye safumana izabelo ezivuyisayo, saqhelana neendlela zokuphila ezahlukeneyo, safunda neelwimi ezintsha. Bekungasoloko kulula, kodwa uYehova ebesoloko esibonisa ukuba usithanda ngokungagungqiyo, esebenzisa intlangano yakhe nabazalwana noodade. (INdu. 144:2) Siyathemba ukuba uqeqesho esilufumene kwinkonzo yexesha elizeleyo lusenze samkhonza bhetele uYehova.

Ndiyayibulela indlela abandikhulise ngayo abazali bam, indlela andixhase ngayo umfazi wam uDebbie, nezinto endizifunde kubazalwana noodade abasemhlabeni wonke. Njengoko siqhubeka nobomi, sizimisele ukuhlala sifunda kuMyaleli Ozukileyo wethu.