Likhathalele “Ikhaka Elikhulu Lokholo” Lwakho

1-2. (a) AmaEfese 6:16 athi kutheni kufuneka sibe ‘nekhaka elikhulu lokholo’? (b) Yeyiphi imibuzo esiza kuyiphendula?

NGABA unalo “ikhaka elikhulu lokholo”? (Funda eyabase-Efese 6:16.) Ngokuqinisekileyo unalo. Ukholo lwakho lufana nekhaka elikhulu elikhusela umzimba kuba lukukhusela ekuziphatheni kakubi, ekuthandeni umlo nakuyo nantoni na angayithandiyo uThixo.

² Kule ‘mihla yokugqibela,’ ukholo lwethu luza kuhlala luvavanywa. (2 Tim. 3:1) Unokwenza njani ukuze ubone ukuba ikhaka lokholo lwakho lisomelele? Yintoni onokuyenza ukuze ulibambe nkqi? Ngoku siza kuphendula loo mibuzo.

NGABA UHLALA ULIJONGA IKHAKA LAKHO?

3. Amajoni ayewenza ntoni amakhaka awo, ibe ngoba?

³ Ngamaxesha okubhalwa kweBhayibhile, amajoni ayesoloko enamakhaka agqunywe ngofele. Ayewaqaba ngeoyile ukuze ufele lungonakali nokuze intsimbi yawo ingabi narusi. Ukuba ijoni liyabona ukuba ikhaka lalo lonakele, laliqiniseka ukuba liyalungiswa ukuze likwazi ukulisebenzisa emfazweni. Lo mzekelo udibana njani nokholo lwakho?

4. Kutheni kufuneka usoloko ulijonga ikhaka lokholo lwakho, ibe unokuyenza njani loo nto?

⁴ Njengala majoni, umele uhlale ulijonga ikhaka lokholo lwakho ukuze ukwazi ukulisebenzisa emfazweni. Thina maKristu silwa noSathana needemon zakhe kuba bafuna simshiye uThixo. (Efe. 6:10-12) Akukho mntu uza kusoloko ekujongela ikhaka lokholo lwakho. Unokuqiniseka njani ukuba uza kukwazi ukujongana neemvavanyo? Okokuqala, thandaza ucele uThixo akuncede. Emva koko, funda iLizwi LikaThixo ukuze likuncede ubone ukuba into oyenzayo ivumelana nokuthanda kwakhe. (Heb. 4:12) IBhayibhile ithi: “Kholosa ngoYehova ngayo yonke intliziyo yakho, ungayami ngokwakho ukuqonda.” (IMize. 3:5, 6) Unesi Sibhalo engqondweni, khawucinge ngento esand’ ukwenzeka eye yafuna wenze isigqibo. Ngokomzekelo, ngaba ukhe wanengxaki yemali? Ngaba uye wacinga ngento uYehova akuthembise yona kumaHebhere 13:5 esithi: “Andiyi kuze ndikushiye”? Ngaba loo mazwi akwenze waqiniseka ukuba uYehova uza kukunceda? Ukuba uye waqiniseka, kuyabonakala ukuba ikhaka lokholo lwakho uligcine likwimeko efanelekileyo.

5. Unokufumanisa ntoni xa ujonga ukholo lwakho?

⁵ Inokukothusa into onokuyibona xa ujonga ukholo lwakho. Unokufumanisa ukuba zikhona izinto olungaqinanga kuzo ukholo lwakho. Ngokomzekelo, unokufumanisa ukuba, ukuba nexhala kakhulu, ubuxoki nokutyhafa ziye zalwenza alwaqina ukholo lwakho. Ukuba le nto iye yenzeka kuwe, unokuncedwa yintoni?

LUMKELA UKUBA NEXHALA KAKHULU, UBUXOKI NOKUTYHAFA

6. Zeziphi izinto ekufunekayo ukuba nexhala lazo?

⁶ Zikhona izinto ezifuna sibe nexhala. Ngokomzekelo, siba nexhala lokwenza izinto uYehova noYesu abangazithandiyo. (1 Kor. 7:32) Xa siye senza isono esinzulu, siba nexhala size sifune ukuphinda sibe ngabahlobo bakaThixo. (INdu. 38:18) Kwakhona, siba nexhala kuba sifuna ukuvuyisa abayeni namakhosikazi ethu, amalungu eentsapho nabazalwana noodadewethu.​—1 Kor. 7:33; 2 Kor. 11:28.

7. Sicinga ngeMizekeliso 29:25, kutheni singamele siboyike abantu?

⁷ Kwelinye icala, ukuba nexhala kakhulu kunokwenza ukholo lwethu lungaqini. Ngokomzekelo, sisenokuhlala sinexhala kuba singenampahla nokutya okwaneleyo. (Mat. 6:31, 32) Le nto inokusenza sifune ukuba nezinto. Sisenokuzibhaqa sesithanda nemali. Ukuba sinokuvumela loo nto yenzeke, ukholo lwethu aluzukuqina ibe sisenokuyeka nokuba ngabahlobo bakaYehova. (Marko 4:19; 1 Tim. 6:10.) Enye into enokusenza sibe nexhala kakhulu, kukufuna ukuthandwa ngabantu. Sisenokoyika ukuphathwa kakubi ngabantu ngaphezu kokoyika ukwenza izinto ezingafunwayo nguYehova. Ukuze ingenzeki kuthi loo nto, kufuneka simcele uYehova asenze sibe nesibindi nokholo.​—Funda iMizekeliso 29:25; Luka 17:5.

8. Simele senze ntoni xa kuxokwa ngentlangano kaYehova?

⁸ USathana ‘nguyise wobuxoki’ ibe usebenzisa abantu bakhe ukuze axoke ngoYehova nangabazalwana noodadewethu. (Yoh. 8:44) Ngokomzekelo, abawexuki baxoka ngentlangano kaYehova kwiiwebhsayithi, kwiTV, kumaphephandaba, kwirediyo nakwiimagazini. Obo buxoki yeminye ‘yemijukujelwa evuthayo’ kaSathana. (Efe. 6:16) Simele senze ntoni xa umntu ethetha ngobo buxoki? Asimmameli nokummamela. Kutheni singafuni ukummamela? Kuba sinokholo kuYehova kwaye siyabathemba abazalwana bethu. Phofu asifuni kwanto esidibanisa nabawexuki. Asivumeli mntu okanye nantoni na, nokuthanda kwethu ukwazi kusenze sibe sihlisana sinyusana nabo.

9. Yintoni enokwenzeka xa sityhafile?

⁹ Ukutyhafa kunokulwenza lungaqini ukholo lwethu. Asinakuzibaleka iingxaki esinazo. Ukuba siyazibaleka sakub’ asikhathali. Ngamany’ amaxesha zinokude zisityhafise. Kodwa simele silumkele ukuhlala sicinga ngeengxaki esinazo. Loo nto inokusenza sizilibale izinto ezivuyisayo esizithenjiswe nguYehova. (ISityhi. 21:3, 4) Ukutyhafa kunokusenza siyeke ukukhonza uYehova. (IMize. 24:10) Asimele siyivumele yenzeke loo nto kuthi.

10. Yintoni oyifundayo kwileta eyabhalwa ngudade waseMerika?

¹⁰ Khawuve indlela omnye udade waseMerika alugcina luqine ngayo ukholo lwakhe ngoxa egulelwa ngumyeni. Wabhalela ikomkhulu lamaNgqina KaYehova esithi: “Imeko yethu isenza sibe nestres size sityhafe ngamanye amaxesha, kodwa sihlala sinethemba. Ndiyibulela kakhulu yonke into asenzela yona uYehova ukuze asikhuthaze luze ukholo lwethu luhlale luqinile. Siwadinga nyhani amacebiso asinika wona nendlela asikhuthaza ngayo. Asinceda singayeki ukumkhonza kwaye sikwazi ukunyamezela xa uSathana esivavanya.” Le nto ithethwa ngulo dade isinceda sibone ukuba lunokuqina ukholo lwethu nokuba sineengxaki. Njani? Ngokuba sazi ukuba sivavanywa nguSathana. Simele sazi ukuba uYehova uza kusithuthuzela, sibulele nezinto asenzela zona ukuze luqine ukholo lwethu.

11. Ukuze siqiniseke ukuba ukholo lwethu luqinile, yeyiphi imibuzo esimele sizibuze yona?

¹¹ Ngaba zikhona izinto ezikwenza ucinge ukuba ukholo lwakho alukaqini ncam? Kwezi nyanga zidlulileyo, ukwazile ukungabi nexhala kakhulu? Ngaba khange ubamamele abawexuki okanye ube uhlisana unyusana nabantu abakubuza ngobuxoki ababuthethayo ngathi? Ukwazile ukungatyhafi xa ubunengxaki? Ukuba ukwazile ukungazenzi ezi zinto, ukholo lwakho lukwimeko efanelekileyo. Kodwa simele sihlale sithe qwa kuba uSathana unezinye izixhobo azisebenzisayo. Makhe sithethe ngesinye sazo.

SUKUTHANDA IZINTO ZELI HLABATHI

12. Yintoni enokwenzeka xa sithanda izinto zeli hlabathi?

¹² Ukuthanda izinto zeli hlabathi kunokulwenza lungaqini ukholo lwethu size singazinikeli kuYehova. Umpostile uPawulos wathi: “Akukho joni lizibandakanya kumashishini ezorhwebo, ukuze likholise umphathi walo.” (2 Tim. 2:4) Kaloku, amajoni aseRoma ayengavumelekanga ukuba enze eminye imisebenzi. Kwakunokwenzeka ntoni ukuba ijoni lalingawuthobeli loo mthetho?

13. Kutheni kwakungafuneki ukuba ijoni lenze eminye imisebenzi?

¹³ Khawucinge ngale nto. Iqela lamajoni lichitha intsasa yonke liziqeqeshela ukusebenzisa imikhonto yalo, kodwa elinye lawo alikho. Lithengisa ukutya emarikeni. Ngorhatya, amajoni ajongisisa izinto azikhusela ngazo aze alole amakrele awo. Kodwa eliya belisemarikeni, lixakekile lilungisa ukutya eliza kukuthengisa ngosuku olulandelayo. Ngentsasa elandelayo, kufika utshaba lungalindelwanga. Leliphi ijoni eliza kukwazi ukulwa kakuhle nolo tshaba neliza kuvuyisa umphathi walo? Ukuba ubungomnye waloo majoni, ubuza kufuna ukulwa ecaleni kweliphi, ecaleni kweliya belilola ikrele lalo okanye kweli belisemarikeni?

14. Yintoni ebalulekileyo kuthi majoni kaKristu?

¹⁴ Njengejoni eliwuthandayo umsebenzi walo, asifuni nto eza kusiphazamisa kweyona nto ibalulekileyo kuthi, ukuthandwa ngabaphathi bethu ababini, uYehova noKristu. Ukuthandwa ngabo kubaluleke kakhulu kunokufumana nantoni na kweli hlabathi likaSathana. Siyaqiniseka ukuba sinexesha namandla okukhonza uYehova kwaye ikhaka lokholo lwethu, nazo zonke ezinye izinto esilukhusela ngazo, zihlala zikwimeko efanelekileyo.

15. Wasilumkisa wathini uPawulos, ibe ngoba?

¹⁵ Simele sihlale sithe qwa. Ngoba? Umpostile uPawulos wathi “abo bazimisele ukuba zizityebi” baza ‘kulahlekana nokholo.’ (1 Tim. 6:9, 10) Igama elithi ‘ukulahlekana’ lithetha ukuba sinokuphazanyiswa kukuzama ukufuna izinto ezingenamsebenzi. Sinokufuna izinto ‘ezininzi ezingekho ngqiqweni nezenzakalisayo.’ Kunokuba sibe sifunana nezo zinto, simele sazi ukuba zizixhobo nje ezisetyenziswa nguSathana eziza kwenza ukholo lwethu lungaqini.

16. Ibali lomfana ekuthethwa ngaye kuMarko 10:17-22 likwenza uzibuze eyiphi imibuzo?

¹⁶ Masithi unayo imali yokuthenga izinto ezininzi ozifunayo. Ngaba wenza into embi xa uthenga izinto ongazidingiyo? Hayi kangako. Kodwa khawucinge ngale mibuzo: Nokuba unayo imali yokuthenga loo nto uyifunayo, ngaba uza kuba nalo ixesha namandla okuyisebenzisa nokuyigcina ikwimeko efanelekileyo? Kwakhona, ngaba zingabaluleka kakhulu kuwe izinto onazo? Ngaba ukuzithanda kwakho kungakwenza ufane nomfana ongazange avume ukulandela uYesu? (Funda uMarko 10:17-22.) Kubhetele ungathandi ukuba nezinto ezininzi ukuze uchithe ixesha namandla akho usenza izinto ezithandwa nguThixo.

LIBAMBE NKQI IKHAKA LOKHOLO LWAKHO

17. Yintoni esimele singaze siyilibale?

¹⁷ Singaze silibale ukuba sisemfazweni ibe yonke imihla sifanele sikulungele ukulwa. (ISityhi. 12:17) Abazalwana noodadewethu abanakusiphathela ikhaka lokholo lwethu. Sithi abamele babambelele nkqi kulo.

18. Yintoni eyayisenza amajoni akudala aqiniseke ukuba abuya namakhaka awo?

¹⁸ Kudala, ijoni lalinconywa kakhulu xa liye lalwa ngesibindi emfazweni. Kodwa laliba neentloni kakhulu xa lingabuyanga nekhaka lalo. Umbhali-mbali waseRoma uTacitus wathi: “Xa ijoni lilahle ikhaka, lalihlazeka kakhulu.” Eso sasisesinye sezizathu zokuba amajoni aqiniseke ukuba abuya namakhaka awo.

19. Simele senze ntoni ukuze sihlale silibambe nkqi ikhaka lokholo lwethu?

¹⁹ Sihlala silibambe nkqi ikhaka lokholo lwethu ngokuya qho kwiintlanganiso nangokuthetha nabantu ngegama likaYehova nangoBukumkani bakhe. (Heb. 10:23-25) Enye into, sifunda iLizwi LikaThixo yonke imihla size sithandaze simcela ukuba asincede senze loo nto lithi masiyenze. (2 Tim. 3:16, 17) Ukuba siyazenza ezi zinto, akukho sixhobo sikaSathana sinokusenzakalisa. (Isa. 54:17) “Ikhaka elikhulu lokholo” lwethu liza kusikhusela. Siza kusebenza nabazalwana noodadewethu ngesibindi. Siza koyisa kwimfazwe yokugcina ukholo lwethu luqinile esiyilwa yonke le mihla. Kodwa eyona nto ibalulekileyo kukuba, siza kuma ngakwicala likaYesu xa esoyisa kwimfazwe aza kuyilwa noSathana nabantu abamlandelayo.​—ISityhi. 17:14; 20:10.