Vakalisa Iindaba Ezilungileyo Imihla Ngemihla
1 Elinjani lona ukuvuyisa ilungelo lokuba nesabelo rhoqo ekuvakaliseni isigidimi sobukumkani! Hayi indlela esisikelelwe ngokutyebe ngayo ngokudlulisela kwabanye esi sigidimi! Njengoko sisabelana nabanye ngesi sigidimi, siyomelela kukholo nakwinzondelelo yethu. Iintliziyo zethu ziyavuya njengoko sithobela isiluleko ‘sokuvuma kuYehova, sibonge igama lakhe.’—INdu. 96:2-4.
2 Ngaba ukwenza usukelo lwakho ukuthetha ngesigidimi sosindiso mihla le? Abo babandakanyeka kumsebenzi wobuvulindlela babancedani okanye obuthe ngxi badla ngokuba nesabelo samihla le ekuthetheni ngeendaba ezilungileyo. Ngaba unokukwenza oku? Ukuba akunakwenjenjalo, ngaba ubuncinane unokuba nesabelo esithile, kwanesabelo esincinane esingacwangciswanga, suku ngalunye? Okunjani kona ukuhlokoma okukhulu kwendumiso eya kuYehova okuya kuvakala ukuba thina sonke besinokukwenza oku! Uya kufumana uyolo lukaYehova olulungileyo kwanezinye iintsikelelo ezityebileyo njengoko uvakalisa ithemba loBukumkani suku ngalunye.
3 Njengoko amalungu entsapho esebenza kunye ngokumanyeneyo ‘ekunikeni uYehova uzuko namandla,’ anokunandipha iintsikelelo ezininzi ezityebileyo. (INdu. 96:7) Ulwalamano lwentsapho nolokomoya luyomelezwa xa kucwangciswa ixesha lokusebenza kubulungiseleli njengentsapho.
SEBENZISA INCWADI ETHI UNOKUPHILA NGONAPHAKADE
4 Ebudeni bukaSeptemba siya kube sinikela incwadi ethi Unokuphila Ngonaphakade, uhlelo oluqhelekileyo noluncinane. Abantu bakuxhalabele ukuphila kwamihla le ibe banqwenela ikamva elonwabisayo. Abantu abantliziyo zinyanisekileyo bayavuyiswa kukufunda ngethemba lobomi obude obungenangxaki zixhaphake kangaka kuluntu namhlanje. Ulwazi oluchanileyo ngeli themba, nokholo kwinto yokuba kungekudala liza kuzaliseka, lufanele lusishukumisele ukuba senze ngokungqalileyo ekunikeleni isigidimi soBukumkani.
5 Ngomthandazo kucinge kusengaphambili oko uya kukuthetha ukuze wenze intshumayelo yakho ibe nomtsalane. Emva kokuzazisa, usenokuthetha into efana nale: “Luhlobo luni lwekamva obungathanda ukuba libe lelakho wena nentsapho yakho? [Vumela impendulo.] Thina sonke siyabunandipha ubomi ibe sinqwenela ukuphila ithuba elide kangangoko sinako. Kanti, kukho iingxaki ezininzi gqitha ibe zibonakala zisongela ubomi esibuphilayo ngoku. Ngenxa yoku usenokuba nomdla ekufundeni ngesigidimi seBhayibhile sekamva eliqaqambileyo nendlela yokuhlangabezana namaxhala obomi.” Kweli thuba unokubalaselisa izibhalo ezikuMxholo Wencoko wangoku. Sebenzisa iingongoma ezingqalileyo ekunokuthethwa ngazo ezinjengezo zikwiphepha 9, 11-13, 161, nele-162 kwincwadi Unokuphila Ngonaphakade, ukugxininisa ikamva eliqaqambileyo elingaphambili.
6 Esinjani isigidimi ukuvuyisa nokomelez’ ukholo uYehova asinike sona ukuba sisivakalise! Sikwanelungelo elikhulu lokusebenza ngokusondeleyo nabanye abanoxabiso olunzulu ngamadinga kaYehova azukileyo. Ekubeni umsebenzi esiwenzayo ngoku ungenakuze uphinde wenziwe ibe kungekudala uza kufikelela esiphelweni sawo, ngaba asifanele silisebenzise ixesha elifumanekayo nobuncwane bethu ekuthetheni ngeendaba ezilungileyo zosindiso suku ngalunye?