Balandele Ngentembelo Abo Bakhokelayo
1 UThixo ngothando uye wenza ukuba ibandla lamaKristu libe nabaveleli abakhokela ngendlela ehlaziyayo nesifanele sibe nentembelo kubo. Ngokwahlukileyo kwimigudu esilelayo yeenkokeli zehlabathi, umprofeti uIsaya waxela ngenx’ engaphambili ukuba abaveleli abamiselwe nguThixo babeya kuba “njengendawo yokuzimela umoya, neyokusithela esiphangweni; [babe] njengemijelo yamanzi emqwebedwini, njengomthunzi wengxondorha enkulu ezweni elibharhileyo.” (Isa. 32:1, 2) Ukululandela ngentembelo ukhokelo lwamadoda anjalo kunokuba ngumthombo wokwenene wenkuselo nentsikelelo.
“NIXELISE BONA ELUKHOLWENI LWABO”
2 Umpostile uPawulos wawabhalela oku amaKristu angamaHebhere: “Bakhumbuleleni abakhokeli benu, abalithethayo kuni ilizwi likaThixo; nisingasinga impumelelo yehambo yabo, nixelise bona elukholweni lwabo.” (Heb. 13:7) Lukholo lwala madoda olumele luxeliswe. Ukubonela ihambo yawo ngokuvisisana nomzekelo owamiselwa nguYesu nemigaqo yeLizwi likaThixo kuyasikhuthaza ukuba sihlale somelele elukholweni. (INdu. 119:105) Sifanele sikuvuyele ukwamkela isiluleko nolwalathiso oluvela kubaveleli abathembekileyo abanjalo abakhokelayo phakathi kwethu size sibabeke ngokugqithiseleyo kakhulu ukubathanda, ngenxa yomsebenzi wabo.—1 Tes. 5:12, 13.
3 Noko ke, ukuze singenelwe ngokuzeleyo kwezi “zipho ezikubantu” (NW), simele sixhathise naluphi na utyekelo lokubalaselisa iintsilelo zabo okanye ukungafezeki kobuntu size ngenxa yoko sisityeshele isiluleko sabo okanye sisithabathe lula. Kunoko, sifanele sisamkele isiluleko nolwalathiso lwabo olusekelwe eBhayibhileni njengolo luvela kuYehova. Ngale ndlela siya kuba silandela ngokunentembelo Lowo uyintloko yebandla, uKristu.—Efe. 4:8, 11-15.
4 Sinokukubonisa njani ukuzithoba kwethu nokuthobela ukuvelela okunothando kwabadala? Ukuba kuyenzeka sibe nolwazi ngengxaki esebandleni, ngaba siyayichaza kubadala size silinde ngomonde nangentembelo yokuba umbandela uconjululwe ngokwendlela yolawulo lobuthixo? (Lev. 5:1) Ekubeni sinentembelo kwilungiselelo lolawulo lobuthixo, asifanele siphazamiseke ngokungeyomfuneko ukuba izinto azenziwanga ngendlela yethu okanye ngexesha esicinga ukuba zimele zenziwe ngalo. Kunoko, siya kulindela kuYehova nakuKristu Yesu ukuba basebenzise amadoda amiswe ngomoya ukuba athabathe inyathelo ngexesha elifanelekileyo nangendlela efanelekileyo.—IMize. 14:29.
IMIPHUMO EMIHLE
5 Ukubalandela ngentembelo abo bakhokelayo kuzisa imiphumo emihle yokholo olomeleleyo nehambo yobuthixo. Ukungazithobi bekuya kubangela ubunzima kwabo bakhokelayo yaye oko bekuya kuba yingozi kwabo bathobelayo. (Heb. 13:17) Ngokwamkela ukhuthazo nesiluleko sokomoya esivela kubadala, siyancedwa ukuba soyise ubuthathaka size senze uhlengahlengiso olufunekayo oluqinisekisa ukukhula ngokomoya. Ngokusebenzisana nolwalathiso lwabo, kulondolozwa umanyano ebandleni, yaye siyakhuselwa kwiziqalelo eziyingozi nobungendawo bale nkqubo yezinto. Kwakhona, ngokulandela umzekelo nokhokelo lwabo kubulungiseleli, siyakhuthazwa ukuba sihlale sikhuthele ekushumayeleni iindaba ezilungileyo.
6 Xa sihlolisisa indima yabadala kwibandla lamaKristu namhlanje, siyabona ukuba inkoliso yabo ngabantu abazincamayo ibe bakhokela ngendlela entle. Simbulela ngokusuk’ ezintliziyweni uYehova ngokusungula ilungiselelo elinjalo lothando. Amadoda anjalo afanelwe yimbeko ephindwe kabini, yaye ke sinesizathu sokululandela ukhokelo lwawo ngentembelo.—1 Tim. 5:17.