Ukuxabisa Oovulindlela Abakunye Nathi
1 Abo basebenzisanayo ngenxa yoBukumkani bukaThixo bayomelezana. (Kol. 4:11) Xa siqwalasela into yokuba owona msebenzi uphambili kwibandla lamaKristu kukushumayela iindaba ezilungileyo, kukho izizathu ezinyanzelisayo zokuxabisa abasebenzi bexesha elizeleyo abaphakathi kwethu.—Marko 13:10; Roma 16:2; Fil. 4:3.
NGOBA?
2 Ngendlela engqalileyo, oovulindlela bayalakha ibandla ngokuthi basebenze nabavakalisi abangenamava kangako kwiinkalo ezakhukahlukeneyo zomsebenzi wokushumayela. Oku kuquka ukunikela ubungqina ngamaphephancwadi, ukulungiselela nokwenza amabuyelo, nokuqalisa izifundo zeBhayibhile zamakhaya nokuziqhuba ngokunempumelelo. Ukongezelela, oovulindlela banokumisela umzekelo ekunikeleni ngenkalipho ubungqina obungacwangciswanga. Ukuxhasa kwabo amalungiselelo okunikela ubungqina njengeqela phakathi evekini kubanika ithuba elihle lokuba luncedo kwabanye. Impembelelo yabo ekhuthazayo entsimini inokuviwa ngokukhethekileyo xa oovulindlela bexhasa inkonzo yasentsimini ngempelaveki, ixesha laxa inkoliso yabanye abavakalisi inako ukuba nesabelo.
3 Oovulindlela bayalinceda ibandla ukuba ligubungele intsimi ngokucokisekileyo nangokuthe rhoqo. Oku kwenza abantu baqhelane ngakumbi nesigidimi sethu baze bazive bekhululeke ngakumbi xa sibatyelela kuba bayasazi ukuba singoobani. Iiyure ezininzi oovulindlela abazichithela kwintsimi abayisebenzayo beshiya uncwadi kubantu abanomdla kwaye behlakulela umdla—ngokwenjenjalo, betyala baze bankcenkceshele imbewu yenyaniso—zinokukhokelela kuphela kumhlaba onemveliso engakumbi.—1 Kor. 3:6.
EBANDLENI
4 Abaninzi baye bakhuthazelwa ukuba bangenele inkonzo yexesha elizeleyo ngenxa yokuba iintliziyo zabo ziye zachukunyiswa yinzondelelo nehlombe abanalo oovulindlela abathembekileyo. Omnye udade wayemathidala ukuba abe nguvulindlela othe ngxi kuba kwakungekho namnye ebandleni. Kodwa xa wakhuthazwa ngumveleli wesiphaluka, wabhalisa. Kungekudala nabanye balandela, ibe ngoku elo bandla lineqela elihle loovulindlela abanenzondelelo.
5 Kusengakho amaxesha apho abadala baya kucela uvulindlela ukuba ancede umntu oye waba ngoxhiphulisayo okanye opholileyo. Olu ncedo lunokuquka ukuqhuba isifundo seBhayibhile nomntu lowo. Ngaloo ndlela ukholo nenzondelelo kavulindlela zinokufak’ isandla ekuvuseleleni uthando lomntu lowo ngenyaniso kuze kumncede kumvuselele ukuba asebenzele ekuphumezeni iimbopheleleko zozahlulelo lwakhe.—1 Tes. 5:14.
BAKHUTHAZE OOVULINDLELA
6 Oovulindlela, ngoxa besenza okuninzi ekukhuthazeni abanye, nabo bayalufuna ukhuthazo ukuze baqhubeke bevuya kwinkonzo yabo. (Roma 1:12) Ngaba uthetha ngendlela ekhuthazayo ngenkonzo yobuvulindlela? Ugqibele nini ukumncoma uvulindlela ngomsebenzi wakhe nomoya wokuzincama awubonakalisayo? Oovulindlela bayixabisa ngokukhethekileyo into yokuba babe nothile osebenza nabo kwinkonzo yasentsimini ebudeni bezo yure zasemini xa abavakalisi abambalwa bephumile. Ngaba unokubapheleka oovulindlela uze mhlawumbi uchithe iiyure ezingakumbi uxhasa umsebenzi wokushumayela?
7 Yiyiphi enye indlela onokubakhuthaza ngayo oovulindlela? Ngaphandle kokubancoma, unokubonisa uxabiso lwakho ngendlela ebonakalayo ngabanjalo abasebenza nzima ngokuthi wabelane nabo ngesidlo, ngokuthi ngokuzithandela ubancede ngeendleko zabo zohambo, nangezinye iindlela ubaxhasa kangangoko unako.—Thelekisa eyoku-1 kwabaseTesalonika 5:12, 13.
8 Bekunye nabadala nezicaka zolungiselelo ezithabatha ukhokelo ebandleni, oovulindlela nabavakalisi baya kunikela inkxaso ezeleyo kumalungiselelo acetywe kakuhle enkonzo. Ngaloo ndlela sonke siya kuba sisebenzisa ezo zipho sinazo ‘ekulungiselelaneni.’—1 Pet. 4:10, 11.