Kuphaphele Ukuqalisa Izifundo ZeBhayibhile
1 Ukuqalisa nokuqhuba izifundo zeBhayibhile zamakhaya kuyinxalenye yothumo lwethu njengamaNgqina kaYehova. (Mat. 28:19, 20) Ngoko ke, ngaba uya kuba ngomnye wabo basebenza noThixo ekwenzeni oku? (1 Kor. 3:9) Elinjani lona ilungelo ekulilo ukunceda abanye bamazi oyena Mntu mkhulu kwindalo iphela!
2 Njengoko kukho iingxaki ezininzi kangaka ezinokuthanani neziganeko zehlabathi eziguquka ngokukhawuleza, abantu abaninzi abantliziyo zinyanisekileyo bafuna iimpendulo mayela nesizathu sokuba ezi zinto zisenzeka. Kudala uYehova wazilungiselela iimpendulo kwimibuzo yabo. Xa abanyanisekileyo befundiswa ngeLizwi likaThixo, bayathuthuzeleka. Ngenxa yoko, kufuneka siwaphaphele amathuba okuqalisa izifundo zeBhayibhile.—IMize. 3:27.
WAPHAPHELE AMATHUBA AVELAYO
3 Ngaba ukhe wacinga ngokuqalisa isifundo seBhayibhile nesalamane esisondeleyo okanye umntu oqhelene naye ongekho senyanisweni? Ukubazi kuya kukunika ithuba elihle lokusebenzisa ukuqonda mayela nexesha elifanelekileyo lokuxubusha umbandela kunye nabo. Khumbula ukuba umbuzo okhethwe kakuhle okanye ilizwi elithethwe ngexesha elililo lisenokuvuselela umdla wabo enyanisweni. Xa umdla womntu lowo uvuselelwe, ngokufuthi kulandela ingxubusho eyiyo, ibe isifundo seBhayibhile sisenokuqaliswa.
4 Kwiimeko ezininzi ihambo entle yeqabane elingumKristu iye yanceda ukuvula indlela yokuba ongakholwayo eze enyanisweni. (1 Pet. 3:1, 2) Amaqabane angakholwayo namanye amalungu entsapho angakholwayo ngokuqhelekileyo ayakuxabisa ukuqonda ukuba ayaxatyiswa yaye ehlonelwa ngamalungu ebandla. Ukubonakalisa umdla wobuqu kubo kunokufeza okukhulu ekwakheni ulwalamano lobuhlobo. Ngokusebenza kunye neqabane okanye ilungu lentsapho elisenyanisweni, usenokuba nako ukuqalisa isifundo seBhayibhile.
5 Ngoxa sibandakanyeka kumsebenzi wendlu ngendlu, sisenokuzama ukuqalisa isifundo seBhayibhile kutyelelo lokuqala. Kunokwenziwa njani oku? Abanye abavakalisi baye banempumelelo ekwenzeni oku xa umninimzi ebuza imibuzo enokuphendulwa ngokuphuma ngqo kwimpapasho. Ukuba umntu lowo uyakuvuma ukufunda impapasho okanye uyasivumela singene endlwini, sinokulixhakamfula eli thuba lokuba siqhubeke nengxubusho size mhlawumbi sibonise indlela yokuqhutywa kwesifundo. Sebenzisa ugwebo lwakho mayela nethuba onokulihlala kutyelelo lokuqala. Kusenokuba yingenelo ukubuyela kwiyure kamva okanye ngolunye usuku ukuze uqhubeke nengxubusho. Kumatyelelo exesha elizayo, usenokunqwenela ukuqhubeka uxubusha umbandela owawuqalisa kutyelelo lokuqala. Okanye usenokuqwalasela umbuzo owawuphakamisa xa wawuqukumbela utyelelo oludluleyo.
AMATHUBA ANGACWANGCISWANGA
6 Ukunikela ubungqina obungacwangciswanga kusenokuba yenye inkalo kwimigudu yethu yokuqalisa izifundo zeBhayibhile zamakhaya. Kwimisebenzi yethu yemihla ngemihla, sihlangana nabantu abaninzi abasenokunqwenela ukufundisisa. Ukuze sincedakale ekuphumeleleni koko, sisenokusebenzisa ezinye kwiintshayelelo eziye zavavanywa ezikwincwadi ethi Ukuqiqa ukuqalisa incoko. Ibe musa ukuthandabuza ukunikela ngesifundo seBhayibhile zisuka nje kuba umntu lowo ehlala kwenye indawo yaye sisenokungabi nalo ithuba lokusiqhuba ngokwethu eso sifundo.
7 Waphaphele amathuba okunikela ubungqina obungacwangciswanga, yaye zilungiselele ngokuphatha isixa esaneleyo samaphecana namaphephancwadi aya kukhulisa umdla womphulaphuli kwinyaniso. (INtshu. 11:1) Ukuba umntu ubonisa umdla enyanisweni yaye akakho kummandla wentsimi yebandla okulo, fumana ikhelingi yakhe nenye inkcazelo eyimfuneko uze uyidlulisele kwibandla apho ahlala khona ukuze kubekho umntu oya kumnyamekela ngokufanelekileyo.
8 Umsebenzi wokwenza abafundi asingowabathile nje abambalwa. Ngowabo bonke abasebandleni. Ukuhlala sikhumbula ukuba kuluthumo lobuKristu ukuba ngabenzi babafundi kuya kusikhuthaza ukuba sihlale siwaphaphele amathuba okuqalisa izifundo zeBhayibhile.