Ilungiselelo LeSifundo Sencwadi Sebandla
Icandelo 3: Isazulu Sobulungiseleli Basentsimini
1 Ukongezelela ekusetyenzisweni njengendawo yesifundo seqela, indawo ekuqhutyelwa kuyo iSifundo Sencwadi Sebandla isekwanokusetyenziswa njengendawo yokuhlanganisana xa kusiyiwa kwinkonzo yasentsimini. Amaxesha ezo ntlanganiso afanele avumelane neemeko zabavakalisi abaninzi, yaye le ntlanganiso ifanele inikele uncedo lokwenene ukwenza abavakalisi bayilungele inkonzo yasentsimini.
2 Amaqela alungelelaniswe kakuhle ukwenzela isifundo nenkonzo ayakha ngokomoya. Ngubani ongangenelwayo lukhuthazo okanye amacebiso endlela yokusingatha inkcaso, yokuqalisa incoko, yokuqalisa isifundo seBhayibhile, okanye indlela yokuthetha xa ukutyelelo lokubuyela? Abavakalisi noovulindlela abahlanganisana kwindawo ekuqhutyelwa kuyo isifundo sencwadi banikela kanye uncedo olunjalo.—Gal. 6:9, 10.
3 Indima Yomqhubi: Umqhubi weSifu- ndo Sencwadi Sebandla uyakhokela yaye unembopheleleko yokulungelelanisa indlela iqela elisebenza ngayo. Usebenza rhoqo nabavakalisi entsimini. (1 Pet. 5:2, 3) Iintlanganiso zenkonzo ezilungiselelwe kakuhle zinikela imiyalelo engokweZibhalo neluncedo yokwenza iqela lilungele intsimi. Ngokuqhelekileyo kucebiseka ukuba qela ngalinye lesifundo sencwadi libe nentlanganiso yalo yenkonzo yasentsimini kunokuba onke amaqela adibane kwindawo enye. Noko ke, amaqela amabini amancinane asenokudibana ukuba kuyimfuneko. Xa kuza kuyiwa kwinkonzo yasentsimini emva kweSifundo seMboniselo, intlanganiso yenkonzo yasentsimini ifanele ibe mfutshane. Emva koko, mqhubi ngamnye wesifundo sencwadi uya kunyamekela iqela lakhe.
4 Ukuba namalungiselelo asisigxina enkonzo yasentsimini kuyabakhuthaza abavakalisi ukuba nenxaxheba rhoqo kubulungiseleli. Ukuba iintlanganiso zenkonzo ziqhutywa ngexesha nakwindawo ezicwangciselwe yona, abavakalisi benza uhlengahlengiso ngokuvisisana noko, bekhuthazwa kukwazi ukuba kuya kube kukho umhlaba ofanele usetyenzwe yaye kukho nabanye abaza kusebenza nabo. (Thelekisa uLuka 10:1.) Kwanaxa umqhubi wesifundo engenakubakho, wenza amalungiselelo omhlaba eliza kusebenza kuwo iqela lakhe. (omXO iphe. 44-5) Ukuba akukho mzalwana ufanelekileyo unokuqhuba intlanganiso yenkonzo, umqhubi unokwabela udade ukuba enjenjalo. (omXO iphe. 77-8; kmXO 3/88 iphe. 3) Akubikho ukudideka xa iqela lihlanganisana rhoqo ngexesha elifanayo nakwindawo enye ukwenzela inkonzo. Naluphi na utshintsho lokwexeshana koku lufanele lwaziswe kwisithuba seveki ngaphambili ukuba kunokwenzeka.
5 Kufuneka Intsebenziswano: Bonke bafanele bazabalazele ukuba nenxaxheba ngokuzeleyo kwiinkalo ezahlukahlukeneyo zobulungiseleli basentsimini. Abavakalisi banokuthabatha inyathelo lokuqala ngokuthi balungiselele kunye ngokwenza uqheliselo, besebenzisa iinkcaso neemeko zokoqobo ekunokwenzeka ukuba bahlangabezane nazo kwintsimi yasekuhlaleni.—IMize. 27:17.
6 Ngaba ubungathanda ukuba umvakalisi onamava akuncede ube nobuchule obungakumbi kumsebenzi wokwenza abafundi? Ukuba kunjalo, thetha nomqhubi weSifundo Sencwadi Sebandla okuso. Usenokukwazi ukulungiselela ukuba kubekho umvakalisi ofanelekayo onokukunceda. Ukuze ungenelwe, wasebenzise ngenkuthalo amacebiso owanikwayo uze ufike ngexesha xa nicwangcisele ukudibana.
7 Abo babelwe ngumqhubi wesifundo sencwadi ukuba bancede bafanele babe luncedo yaye bangalindeli lukhulu gqitha. Amava abonise ukuba abo banembono engqalileyo nelungeleleneyo yenkonzo yasentsimini nabaneentshayelelo eziphumelelayo ngabona bakufanelekeleyo ukuqeqesha abanye. (kmXO 8/79 iphe. 1, 3; kmXO 10/79 iphe. 3) Abo baqeqeshwayo bafanele banconywe ngamaxesha onke besenza inkqubela. Kunokwandula ke kumiselwe olunye usukelo.—Thelekisa uLuka 19:17-19.
8 Sifuna ukuncedana ukuze sibe nempumelelo ekushumayeleni iindaba ezilungileyo nasekwenzeni abafundi. Iimeko zehlabathi eziya zisiba mandundu zibubungqina bokungxamiseka kwalo msebenzi. Kubandakanyeke ubomi, yaye uYehova uyakukhawulezisa ukuhlanganiswa kwabantu. (Isa. 60:22) Njengoko sisoloko sicinga ngobulungiseleli esibuphathisiweyo, siya kusebenza ngokusondeleyo neqela leSifundo Sencwadi Sebandla esikulo ukuze sisifeze ngokupheleleyo isabelo sethu ngoxa sizimasana yaye sikhuthazana.—Roma 12:6-8; 2 Tim. 4:1, 2, 5.