Ucoceko Luyamzukisa UThixo
1 UMthetho kaMoses wawuneemfuneko ezingqongqo eziqinisekisa ucoceko. Zaziwahlula amaSirayeli njengabantu ekwakufuneka bazigcine becocekile ngokwenyama nangokomoya. (Lev. 11:35, 36; 15:1-11; Isa. 52:11) Le meko yokucoceka yayisizisa uzuko kuThixo yaye yayifak’ isandla kwimpilo yolu hlanga.
2 Nanamhlanje, ucoceko luphawu olufanisa abantu bakaYehova. Kodwa nangona lufanisa abantu bakaYehova njengeqela, ngaba ngamnye wethu kuyinyaniso oku ngaye? Indlela esikuxhalabele ngayo ukucoceka nokucoceka kwemizimba yethu ibonisa indlela esiziqonda ngayo izinto ezifunwa nguYehova.
3 Kuthekani ngembonakalo yekhaya lethu? Ngaba iyasikhanyela isigidimi soBukumkani esisithweleyo? Ngaba kungenzeka ukuba abanye bathandabuze enoba sinyaniseke ngokwenene na xa sithetha ngokuguqula umhlaba ube yiparadisi ngoxa amakhaya ethu emdaka nebala elingqonge indlu lifukufuku yingca okanye lukhula? Ukuba amakhaya ethu amdaka okanye ayanuka ngenxa yemikhwa yobuxelegu, ngaba kunokuthiwa ngathi sivelise “uhlobo lococeko oluya kufanela uLungelelwaniso Olutsha phantsi koBukumkani bukaThixo”?—om-XO iphe. 130-1.
4 Kuthekani ngenqwelo-mafutha esiyisebenzisa kwinkonzo yasentsimini? Ngaba icoceke ngokufanelekileyo, ngaphakathi nangaphandle, ukuze imbonakalo yayo ingawukhanyeli umsebenzi wethu? Kuthekani ngempahla, ingxowa yeencwadi nendlela esizilungisa ngayo? Ngaba zicocekile yaye zifanelekile, azikhubekisi? Kusengqiqweni ukuba sigcine iziqu neempahla zethu zicocekile ngokuzihlamba rhoqo.—wXO89 6/1 iphe. 16-19.
5 Kuthekani ukuba umzalwana akakhathali kangangokuba ucoceko lomzimba wakhe okanye indawo ahlala kuyo zibangela ukugculelwa kwebandla? Mhlawumbi ufuna nje uncedo olunothando ngenxa yokwaluphala okanye ubulwelwe. Ukuba kunjalo, kuya kuba bububele ukumnceda. Ubani usenokuba nengxaki abe yena engayazi; isiluleko sobubele sisenokumshukumisela ekubeni ayilungise loo meko. Abantu abaqhubeka beyimizekelo emibi kule nkalo abayi kuwafanelekela amalungelo akhethekileyo ebandleni. Kambe ke, abadala bafanele bakuphephe ukufuna kulandelwe imigaqo yabo yobuqu nendlela yococeko abayithandayo.
6 Abantu abasandul’ ukuba nomdla siyabamema beze kunandipha isidlo sokomoya kwiHolo yoBukumkani. Ngokuqhelekileyo, siyakulangazelela ukubamema kuba iholo iyabukeka yaye icocekile. Noko ke, kufuneka kusetyenzwe ukuze ihlale injalo. Khawuphos’ iliso apha eholweni. Ngaba izihlalo, umgangatho nodonga zicocekile? Ngaba izindlu zangasese zicocwa rhoqo? Xa siya sikuqhela ukubona ikhaphethi enamabala okanye udonga olunepeyinti exobukileyo, kungekudala ezo zinto sizijonga njengezamkelekileyo. Noko ke, abantu abaqalayo ukuza basenokuphazanyiswa koku. Sifanele senze okusemandleni ethu ukugcina iholo inomtsalane yaye ibukeka, siphumeza indima yethu xa kufika ixesha lokuyicoca nokuyihlaziya. Ukuba iHolo yoBukumkani yenu inesitiya, naso sifanele sinikelwe ingqalelo ngokuthe rhoqo. Ngaba sisoloko sisihle yaye sibukeka? Ngaba ingca iyachetywa rhoqo?
7 Singathethanga ngezwi, sinokumzukisa uThixo ngembonakalo yethu yobuqu nokucoceka kwamakhaya ethu, iinqwelo-mafutha neeHolo zoBukumkani zethu. Umzekelo wethu omhle awuyi kukhubekisa kodwa uya kunikela ubungqina bonqulo oluhlambulukileyo nolugqibeleleyo.—1 Kor. 10:31, 32; Yak. 1:27.