Abaselula Bafuna Ukumiselwa Umzekelo Omhle
1 Kuyasivuyisa ukuba nenani elandayo labaselula ‘abadumisa igama likaYehova.’ (INdu. 148:12, 13) Abaninzi babo baselula ngeminyaka. Inkqubela yabo ixhomekeke ngokuyintloko ekuqeqeshweni kwabo nangomzekelo abawumiselwa ngabazali babo nabanye abakhulileyo ebandleni. Noko ke, asimele singayisi so impembelelo yabanye abaselula, ngokukodwa abakwishumi elivisayo abadadlana nabaselula asebeqolile. Ukuba ukule ntanga, la magqabaza asenokukunceda.
2 Abantu abaselula abangekabi kwishumi elivisayo bathanda ukuxelisa abakwishumi elivisayo abadadlana. Banomnqweno wemvelo wokunxulumana ngokusondeleyo nalowo bamhlonelayo. Bathanda ukubonela kolunye ulutsha oluqolileyo nolubonakala lunolwazi yaye luhambele phambili ngakumbi. Ngenxa yoko, basenokuxelisa intetho nehambo yakho noxabiso lwakho ngezinto ezibalulekileyo zokomoya nenxaxheba yakho kwimisebenzi yebandla.
3 Njengokwishumi elivisayo omdadlana, unelungelo nembopheleleko enkulu. Kwanangoku, umzekelo wakho kusenokwenzeka ukuba uyawaphembelela amaqabane akho aselula. Zibuze, ‘Injani impembelelo endinayo kwabancinane kunam? Ngaba ndinengqondo ezinzileyo, ndiyabuphepha ubuyatha “neenkanuko zobutsha” eziphosakeleyo? Ngaba ndibonakalisa ukubathobela nokubahlonela abazali bam, abadala nabanye abantu?’ (2 Tim. 2:22; Kol. 3:20) Okuthethayo nokwenzayo kusenokuba nguthunywashe ophambili kwinkqubela yokomoya yabanye abaselula abondele izenzo zakho.
4 Ukushumayela isigidimi soBukumkani ngowona msebenzi uphambili webandla. Intumekelelo nokuba nesabelo rhoqo kuwo kunokukhuthaza amaqabane akho akhuthale ngakumbi. Ukuba unokukwazi ukungenela inkonzo yobuvulindlela, abahlobo bakho baya kukhuthazeka bakulandele. Ukugqabaza kwiintlanganiso nokunceda ngokuzithandela kwimisebenzi efuna ukwenziwa eHolweni yoBukumkani nako kusenokuba ngumzekelo omhle.
5 Nangona uTimoti wayengasekho kwishumi elivisayo xa uPawulos wamnika eli cebiso lilandelayo, nina bakwishumi elivisayo ninokulisebenzisa: “Ube ngumzekelo wabakholwayo ngentetho, ngehambo, ngothando, ngokholo, ngobunyulu.” (1 Tim. 4:12) Ukuba nesabelo kwakho ngehlombe nangomphefumlo uphela kwinkonzo kaYehova kunokushukumisela izinxulumani zakho nabakondeleyo abancinane kuwe ngendlela eyakhayo, kubanceda benze inkqubela ekubeni ngamadoda akhulileyo ngokomoya. (Efe. 4:13) Abakwishumi elivisayo abakwiintsapho ezisandula ukuqala ukufundelwa basenokutsalelwa enyanisweni koko bakubona kuni.
6 Okubaluleke nangakumbi, ukukhuthala kwakho ekubonakaliseni iimpawu zobuthixo kuzisa uzuko kuYehova nentlangano yakhe. (IMize. 27:11) Abakondeleyo abanyanisekileyo baya kumangaliswa yindlela owahluke ngayo kubantu abaselula behlabathi. Ngoko unelungelo elikhethekileyo lokunceda abaselula ngoxa ufak’ isandla ngokona kona ekudunyisweni kukaYehova.—INdu. 71:17.