Lisebenzise Kakuhle Ixesha Lakho
1 UYehova ulixhalabele ixesha. Ufuna nathi silixhalabele ixesha. Ngentlangano yakhe usinceda ukuba sixhalabele ixesha. Sisoloko sibongozwa ukuba ‘sibe nokuninzi esimele sikwenze emsebenzini weNkosi.’ (1 Kor. 15:58, NW) Ngale ndlela, sinokuphumelela ngakumbi kwinkonzo kaYehova.
2 Ixesha esinalo veki nganye liyalingana—ziiyure ezili-168. Silisebenzisa kakuhle kangakanani ixesha lethu? Ngaba sibonisa ukuba ngokwenene siyazi ukuba kuxesha liphi ngokukaYehova? Ngaba siphazanyiswa zizinto ezingabalulekanga?
3 Kubalulekile ukuba silungelelane. Abaninzi bazama ukuhlala benoludwe lwezinto eziza kuqala. Nganye ifakwa kuludwe ngokokubaluleka kwayo. Unokukwazi njani oko? IBhayibhile ithi umntu ufanele “abone okulungileyo emigudwini yakhe yonke.” (INtshu. 3:13) Eminye imisebenzi inemiphumo emihle kuneminye. Cinga ngemiphumo eya kuziswa nguwo ngamnye. Ngaba ukuwuphumeza loo msebenzi kuya kukunika iingenelo ezibonakalayo? Ngaba uya ‘kubona okulungileyo’ emigudwini yakho? Ukuba akunjalo, ayinakuba yimisebenzi eza kuqala.
4 Kubulungiseleli Bethu: Siyayixabisa into yokuba abanye bafike ngexesha kwintlanganiso yenkonzo yasentsimini, baphulaphule ngenyameko kwimiyalelo baze bahambe ngokukhawuleza ukuya entsimini. Sikhetha ukuya kushumayela kunokuba silinde bona. Ngokucacileyo uPawulos wayezimisele ukuba kubekho ulungelelwano xa wabhala wathi: “Zonke izinto mazenziwe ngokubekekileyo, nangolungelelwano.”—1 Kor. 14:40.
5 Xa sikwinkonzo yasentsimini, sinokuchitha ixesha elibalulekileyo ngokunqumama ithutyana ukuze sifumane into etyiwayo. Noko ke, sinokuphumla okwexeshana sakuba sisebenze iiyure eziliqela enkonzweni. Okanye mhlawumbi xa imozulu ingasivumeli, ukuphumla kuya kusihlaziya kuze kusincede siqhubeke. Noko ke, abaninzi bakhetha ukuhlala bexakekile benikela ubungqina ebantwini yaye ababuthi nabazalwana ngexesha elibekelwe ubulungiseleli. Into efunekayo kukulungelelana.
6 “Kanti nengwamza . . . iyawazi amaxesha ayo amisiweyo” okufuduka, nembovane ‘isilungisa isonka sayo ehlotyeni’ ukuze ilungele ubusika, itsho iBhayibhile. (Yer. 8:7; IMize. 6:6-8) Leyo yindlela yokusebenzisa kakuhle ixesha. Nathi simele ‘siwazi amaxesha amisiweyo.’ Singadanga sibe ngqongqo gqitha, sifanele silixhalabele ixesha. Kufuneka singaneli nje ukwazi esimele sikwenze kodwa sikwafanele sazi ukuba simele sikwenze nini. Sifanele sibe nomkhwa wokuceba kusengaphambili, sivumela nakuphi na ukubambezeleka okusenokubakho. Ibe sifanele sikulungele ukuphungula eminye imisebenzi ukuze sibe nexesha lezinye izinto ezibaluleke ngakumbi, njengokulungiselela iintlanganiso, inkonzo yasentsimini neminye imisebenzi yobuthixo.
7 Sifuna ukufana noBawo wethu wasemazulwini, uYehova uThixo, osifundisa ukuba “into yonke inexesha elimisiweyo.” (INtshu. 3:1) Ngokusebenzisa kakuhle ixesha lethu, ‘sinokubuzalisa ubulungiseleli bethu.’—2 Tim. 4:5.