“Hlalani Niphaphile”
1 Xa uYesu wayethetha la mazwi abhalwe kuMateyu 26:38-41, kwakusondela elona xesha linzima kubomi bakhe bokuba ngumntu. Laliza kuba lelona xesha libalulekileyo kuyo yonke imbali yoluntu. Imbambano yayikukusindiswa kwabo bonke abantu. Abafundi bakaYesu kwakufuneka ‘bahlale bephaphile.’—Thelekisa iNew World Translation.
2 Namhlanje kusondele gqitha ukufika kukaYesu ezele iinjongo ezimbini ukusindisa nokuphumeza imigwebo. NjengamaKristu aphaphileyo akuqondayo ukungxamiseka kwamaxesha ethu, asisonganga zandla silindele ukusindiswa. Siyazi ukuba simele sihlale silungile ngamaxesha onke. Kubalulekile ukuba sihlale ‘sibulaleka’ enkonzweni kaYehova. (1 Tim. 4:10) Kuthekani ngathi ngabanye? Ngaba sihleli siphaphile?
3 Ukuzihlola: UYesu wakwalumkisa wathi: “Zilumkeleni.” (Luka 21:34, 35) Simele sinikele ingqalelo kwiziqu zethu, siqinisekisa ukuba ‘singabangenakusoleka, abangenabuqhinga, . . . esazulwini sesizukulwana esigoso, esigwenxa.’ (Fil. 2:15) Ngaba suku ngalunye siphila njengamaKristu, sixelisa uYesu yaye sihamba ngokuvisisana nemigaqo ebhalwe eLizwini likaThixo? Simele siyiphephe ihambo engeyoyabuKristu eluphawu lweli hlabathi “lilele kongendawo.” (1 Yoh. 5:19; Roma 13:11-14) Xa sizihlola ngeZibhalo, ngaba ngokwenene siphaphile ngokomyalelo kaYesu?
4 Abadala bamele bakuphaphele ukuba ngabakhutheleyo xa bephumeza izabelo zebandla, beqonda ukuba baya kuphendula ngendlela abawunyamekela ngayo umhlambi. (Heb. 13:17) Iintloko-ntsapho zinembopheleleko ekhethekileyo yokufundisa iintsapho zazo iindlela zikaYehova. (Gen. 18:19; Yosh. 24:15; thelekisa eyoku-1 kuTimoti 3:4, 5.) Kwakhona, hayi indlela ekubaluleke ngayo ukuba sizalisekise umthetho weBhayibhile wokuba sithandane! Olo luphawu lobuKristu bokwenyaniso.—Yoh. 13:35.
5 Kuphaphele Ukulumkisa Abanye: Ukuphapha akuphelelanga nje ekuzilumkeleni. Sinothumo lokwenza abanye babe ngabafundi. (Mat. 28:19, 20) Ukuthanda ummelwane kufanele kusishukumisele ukuba silumkise abanye ukuze basinde kwintshabalalo eza kufikela eli hlabathi. Le yimbopheleleko yawo onke amaKristu. Iyinxalenye ebalulekileyo yonqulo lwethu. (Roma 10:9, 10; 1 Kor. 9:16) Ngokufuthi abantu baye bangabi namdla okanye bawuchase ngokuphandle lo msebenzi usindisa ubomi. Sinembopheleleko yokuzingisa, kwanaxa uninzi lwabo lungasikhathaleli isilumkiso sethu. (Hez. 33:8, 9) Ukumthanda ngokwenene uThixo nommelwane kuya kusishukumisela ukuba sizingise.
6 Eli asiloxesha lokuba singqendeve. Yaye asifanele sivumele amaxhala obomi bemihla ngemihla asiphazamise okanye asibangele sixakeke gqitha ziziyolo zale nkqubo zide zibe ngumgibe. (Luka 21:34, 35) Alikho ixesha elakha langxamiseka njengeli. Alifikanga ligalelekile ixesha lokuba uYesu Kristu aphumeze umgwebo kule nkqubo ingendawo. Ngabo bathe qwa nabaphaphileyo kuphela abaya kusinda. Ukuba sithobela imiyalelo kaYesu size ‘sikufanele ukuzisaba zonke ezo zinto,’ enjani yona indlela esiya kuba nombulelo ngayo!—Luka 21:36.