Fumana Iingenelo KwiSikolo Sobulungiseleli SobuThixo Sowe-1996—Icandelo 1
1 Ngaba uyifundile imiyalelo eku-“Cwangciso Lwesikolo Sobulungiseleli Sobuthixo Lowe-1996”? Ngaba uziphawulile ezinye zeenguqulelo? Ukususela ngoJanuwari ukusa kuDisemba, iSabelo sesi-3 siza kusekelwa kwincwadana ethi Imixholo YeBhayibhile Yengxubusho. Ukususela ngoJanuwari ukusa kuAprili, iSabelo sesi-4 siza kusekelwa kwincwadi ethi Ukuqiqa, kanti ukususela ngoMeyi ukusa kuDisemba, siza kusekelwa kwincwadi esandul’ ukukhululwa ethi Ulwazi.
2 IZabelo Zabafundi: ISabelo sesi-3 sabelwa udade. Xa sisekelwe kwincwadana ethi Imixholo YeBhayibhile Yengxubusho, indlela esicetywe ngayo ifanele ibandakanye indlu ngendlu okanye ubungqina obungacwangciswanga. Kwakhona sinokunikelwa njengakwibuyelo okanye njengempendulo kumbuzo ophakanyiswe sisifundo seBhayibhile kwiveki ephelileyo, kuxhomekeka emxholweni.
3 ISabelo sesi-4 sifanele sibangel’ umdla size sisebenziseke. Xa sisekelwe kwincwadi ethi Ukuqiqa, yaye ingudade onikela le ntetho, indlela ecetywe ngayo ifanele ibandakanye indlu ngendlu okanye ubungqina obungacwangciswanga. Xa sisekelwe kwincwadi ethi Ulwazi, sifanele sinikelwe njengakwibuyelo okanye isifundo seBhayibhile sekhaya. Oku kufanele kungqineke kuluncedo kakhulu, ekubeni incwadi ethi Ulwazi iya kusetyenziswa ngamandla ekuqhubeni izifundo zeBhayibhile zamakhaya. Ukuba siza kunikelwa njengakwisifundo seBhayibhile, bobabini oodade banokuhlala phantsi. Ngaphandle kokulibazisa qalisa isifundo ngokwenza intshayelelo emfutshane, uze ubuze umbuzo osencwadini. Indima yomninimzi ifanele ibe yeyokwenene. Izibhalo ezibonisiweyo zinokutyhilwa zize zifundwe ukuba ixesha lisavuma. Udade ufanele asebenzise ubuchule bokufundisa ngokwenza umninimzi athethe ngokukhululekileyo ngemibuzo nangokuqiqa ngezibhalo ezifundiweyo.
4 Yintoni efanele yenziwe xa izibhalo ezibonisiweyo kwisabelo zizininzi ukuba zingaxutyushwa kwimizuzu emihlanu? Khetha izibhalo ezingundoqo ezibalaselisa iingongoma eziziintloko. Ukuba kukho izibhalo ezimbalwa, unokuxubusha iingongoma eziphambili zesifundo ngokubhekele phaya. Maxa wambi, kusenokufundwa isiqendu okanye isivakalisi size sixutyushwe nomninimzi.
5 Ngasekupheleni kwesahluko ngasinye sencwadi ethi Ulwazi, kukho ibhokisi ethi “Hlola Ulwazi Lwakho,” enokuhlolisiswa ngokufutshane ngumvakalisi owabelwe ukugubungela isiqendu sokugqibela sesahluko. Neebhokisi ezinenkcazelo ezihambisana neziqendu ezabelweyo zisenokuxutyushwa ukuba ixesha lisavuma. Ukuba ibhokisi enenkcazelo ihambisana nezabelo ezibini ezahlukeneyo, udade onikwe isabelo sokuqala usenokuyixubusha. Kusenokugqatyazwa ngemifanekiso nanini na ingena kumbandela oxutyushwayo.
6 Xa ingumzalwana osingatha iSabelo sesi-4 uya kusinikela njengentetho. Umzalwana ufanele awufunde ngenyameko umbandela awabelweyo. Yakha intetho ngokuvisisana nomxholo, uze ukhethe izibhalo eziziintloko zeBhayibhile eziya kunceda abaphulaphuli babone indlela loo nkcazelo enokusetyenziswa ngayo kubulungiseleli bethu. Maxa wambi, kusenokufundwa isiqendu okanye isivakalisi ngokuphuma encwadini size sixutyushwe ngokubhekele phaya sisithethi.
7 Ukuba silusebenzisa ngokupheleleyo uqeqesho esilufumana kwesi sikolo, siya kukwazi ‘ukulivakalisa ilizwi’ ngendlela eya kubonisa ‘ubugcisa obuhle bokufundisa.’—2 Tim. 4:2.