Nikela Inkonzo Engcwele Imini Nobusuku
1 Sinikwe ilungelo elinqabileyo. Elo lokuba ngamangqina kaYehova. Siyinxalenye yentlangano yabavangeli esehlabathini lonke esetyenziswa nguYehova ekuphumezeni owona msebenzi mkhulu wakha wenziwa wokuvakalisa uBukumkani! (Marko 13:10) Ekubeni amaxesha ethu engxamisekile, ngaba sinesabelo ngokuzeleyo kangangoko kunokwenzeka kulo msebenzi?
2 Asazi ukuba bangaphi na abaya kuthi ekugqibeleni basabele ekushumayeleni kwethu. UYehova usiqinisekisa ukuba iya kuba ‘sisihlwele esikhulu,’ sonke esibonakala ‘ngokunikela inkonzo engcwele imini nobusuku.’ (ISityhi. 7:9, 15) AmaNgqina angaphezu kwezigidi ezihlanu axakekileyo enkonzweni kaThixo akangobaphulaphuli nje abanomdla, ingengabo nabantu abeza nje kwiintlanganiso kuphela. Angabasebenzi abavakalisa iindaba ezilungileyo ehlabathini lonke!
3 Yonke imihla, akho amathuba okudumisa uYehova, enoba kukwinkonzo yasentsimini okanye ngokungacwangciswanga. Cinga nje ngobungqina obuzukileyo obunokunikelwa ukuba ngamnye wethu ebenokuzimisela ukwabelana ngenyaniso nomntu nje omnye suku ngalunye. Umbulelo wethu ngoYehova ufanele usishukumisele ukuthetha ngaye nabanye ngenzondelelo.—INdu. 92:1, 2.
4 Nceda Nabanye Banikele Inkonzo Engcwele: UYehova uyaqhubeka esisikelela ngolwando. (Hag. 2:7) Kulo nyaka wenkonzo uphelileyo kuqhutywe izifundo zeBhayibhile ezinokuba ngama-65170 nyanga nganye kumazwe akhonza phantsi kwesebe loMzantsi Afrika. Injongo yethu ekufundisiseni naba bantu kukubanceda babe ngabafundi bakaYesu. (Mat. 28:19, 20) Uninzi lwabo sele lwenze inkqubela entle ngokuza rhoqo kwiintlanganiso. Seluqalisile ukuthetha nabantu olubaziyo ‘ngezinto oluzifundileyo zobungangamela bukaThixo.’ (IZe. 2:11) Ngaba singabamemela ukuba nesabelo kubulungiseleli basesidlangalaleni ngoku?
5 NgoAprili sifanele senze umgudu okhethekileyo wokumema abasebatsha abafanelekayo, basithelele kwinkonzo yasentsimini. Ngaba umntu omfundelayo unomnqweno wokwenjenjalo? Ukuba kunjalo, ngaba uyafaneleka ngokweZibhalo? (Bona incwadi ethi Ubulungiseleli Bethu, iphepha 97-9.) Xa umfundi enqwenela ukuba nesabelo kwinkonzo yasentsimini, xubusha nomveleli owongamelayo ngalo mnqweno wakhe, yena uya kulungiselela abadala ababini bawuhlolisise loo mbandela. Ukuba umfundi uyakufanelekela ukuba ngumvakalisi ongabhaptizwanga, mmeme ahambe nawe entsimini. Abaveleli benkonzo nabaqhubi bezifundo zencwadi bafanele bakuphaphele ngokukhethekileyo ukunceda abo basenokukufanelekela ukuqalisa ukushumayela ngoAprili.
6 Abazali bafanele babone enoba abantwana babo bayafaneleka kusini na ukuba ngabavakalisi abangabhaptizwanga. (INdu. 148:12, 13) Ukuba umntwana wakho unomdla kwinkonzo yoBukumkani yaye unehambo entle, usenokuwuxubusha lo mbandela nomnye wabadala kwikomiti yenkonzo. Emva kokuba bedibene nawe kunye nomntwana, abadala ababini baya kugqiba enoba uyafaneleka kusini na ukuba ngumvakalisi ongabhaptizwanga. Sinesizathu esikhethekileyo sokuvuya xa abantwana besithelela ekudumiseni uThixo!
7 NguYehova kuphela esifanele simnike inkonzo engcwele. (Luka 4:8) Ngamana ngamnye wethu angalisebenzisa ilungelo elimangalisayo esinalo lokumdumisa “kakhulu.”—INdu. 109:30; 113:3.