Ukuvakalisa Iindaba Ezilungileyo Zento Elunge Ngakumbi
1 Kangangeminyaka eli-117 IMboniselo ibisilwela inyaniso yeBhayibhile. Sithetha nje, yimibhalo eli-18 950 000 yenkupho nganye eshicilelwa ngeelwimi ezili-125. NoVukani! unethuba elide emele iLizwi likaThixo, ibe ngoku usasazwa ngemibhalo eli-15 730 000 ngeelwimi ezingama-80.—Thelekisa eyabaseKolose 1:23.
2 Amaphephancwadi Anelisa Intswelo Yokomoya: IMboniselo noVukani! ziye zanceda izigidi zabantu abantliziyo zinyanisekileyo zanelisa intswelo yazo yokomoya. Kuzo kupapashwa amanqaku omeleza ukholo. Ngokomzekelo, kwiMboniselo kaFebruwari 1, 1996, saye safunda ngombandela oxubusha ngemfuneko yokukholosa ngoYehova nangeLizwi lakhe. IMboniselo kaMatshi 1, 1996, yasikhuthaza isithi masihlale sixakekile enkonzweni kaYehova size sihlale simlindele. Hayi indlela eyasikhuthaza ngayo ingxubusho yesiprofeto sikaZefaniya! Kwandula ke kwakho ingxubusho eyomeleza ukholo engokunyaniseka kwamaKristu kwiMboniselo kaMatshi 15, 1996. Inkupho kaMeyi 15, 1996 yabethelela ukuxabiseka kokufunda nokufundisisa iLizwi likaThixo ngokuthe rhoqo. La manqaku aye ayenza nzulu indlela esiliqonda ngayo iLizwi likaThixo, yaye uxabiso lwethu ngoBukumkani bakhe luye lwanda.
3 Ukongezelela, la maphephancwadi anamanqaku asexesheni, nasebenzisekayo ngehambo yokuhlonel’ uThixo, imilinganiselo yamaKristu yokuziphatha neminye imibandela ebaluleke kunene. Axubusha kanye ngemibandela echaphazela ubomi bethu. Ngenxa yoko, kanye ngoku sinandipha ubomi obusemgangathweni ngoxa silindele ukuzaliseka kwamadinga kaThixo ento elunge ngakumbi kwixa elizayo.—Isa. 48:17; 1 Tim. 6:19.
4 Ukuhlolisisa ngokufutshane oko kubhalwe kwiphepha 4 lenkupho nganye kaVukani! kusinika isizathu esihle sokulincoma eli phephancwadi njengelisemagqabini elinokufundwa ngabantu bazo zonke iindawo, abancinane kwanabakhulu. Apho lithi: “UVukani! ngowokukhanyisela intsapho iphela. Ubonisa indlela yokuhlangabezana neengxaki zanamhlanje. Uchaza iindaba, ubalisa ngabantu kumazwe amaninzi, uhlolisisa unqulo nenzululwazi. Kodwa wenza okungakumbi. Uphanda nzulu aze alathe kwintsingiselo yokwenene yeziganeko zangoku, kanti uhlala engundilele ngakwezobupolitika yaye akaphakamisi olunye uhlanga ngaphezu kolunye. Okubaluleke ngokonakona kukuba, eli phephancwadi lakha intembelo kwidinga loMdali lehlabathi elitsha loxolo nonqabiseko esele liza kuthabathel’ indawo le nkqubo yezinto ikhoyo ingendawo nechas’ umthetho.”
5 Wanike Nabanye La Maphephancwadi: Yiba nesisa xa usasaza IMboniselo noVukani! (Thelekisa eyoku-1 kuTimoti 6:18.) Yiba nemibhalo ukuze uyinike nabani na odibana naye. (INtshu. 11:6) Sonke, kuquka abavakalisi abaselula nabasebatsha, sinokuba nesabelo ngokuzeleyo ekufumaneni imirhumo nasekusasazeni amaphephancwadi kule nyanga ngokusebenzisa iintshumayelo ezimfutshane ezisekelwe kumanqaku asexesheni abalaseliswa kwiinkupho zakutshanje. Kwazi oko kubhalwe kuzo, uze uzihambise ngokunyaniseka nangolweyiseko.
6 IMboniselo noVukani! zinenkcazelo efunwa ngumntu wonke. Ukuzisasaza yenye yezona ndlela zilungileyo esinokunceda abanye ngazo bafunde iindaba ezilungileyo zokuba kungekudala kuza into elunge ngakumbi!